,
السلام عليكم وَ رحمه الله وَ بركاته 
كنت بنجلط الا شوي من الساعه ١٢ الى ٣ وانا اعدل بالصور !!!!
مادري وش علته الاب كل شوي معلق ، بس قلت ياأنا ياهو اليوم :\
المهم ، كيفكم يَ جميلات ؟
خطرت ببالي "منيره"
كانت دااايم داايم تعلق ع البوستات وكلامها جميل ويجيب السعاده
بس مدري وين اختفت :( يارب تكون بخير وين ماكانت ()
بوست اليوم عن مشترياتي من هنا وهناك ، مو مع بعض بس شي جديد طازه وشي لأ p;
بس يعتبر مشتريات ولا p;
- ماشاء الله -
حابه أبدا بالميك أب
،
بسم الله علي الله يتمم علي من زماان ماشريت شي بخاطري ههههههههه
اشتري الي أحس محتاجته ، قبل كنت ماروح السوق الا وطالعه بروج او بلشر !
بس حاليا عندي الي مكفيني *تقنع نفسها*
فرشتين جميلات من سيفورا ،
اليمين اسمها miniral powder brush من سيفورا تكلمت عنها بالمفضلات
سعرها بحدود ال١١٠ ريال رقمها ٤٥
حلوه لتوزيع الفاونديشن تعطي لوك جمميل جدا معتمدتها من اخذتها
اليسار فرشاه البروزنر و للكونتور حلوه رقمها ٤٣ وسعرها ب١١٣
أسعار سيفورا جدا حلوه مقارنه بجودتها ، حبيت فرشهم كثير ومتحمسه اجرب شي جديد منهم
!
بما انو برايمر العين من اوربن ديكاي خلص فقررت اجرب شي جديد وكان المدح عَ تو فيسد
أخذته من سيفورا ، وظيفته تثبيت الشدو لأطول وقت ممكن
وَ صح وفوق الصحات بعد ! حبيته أكثر من اوربن ديكاي
اوربن ديكاي حسيته كريمي شوي بعكس تو فيسد ، ومايعطي لون مايل للشفاف أكثر
سعره ب١٥٠ ممكن مو متذكره بس يستاهل كل فلس ، كميه صغيره تكفي وَ يدوم طويل
أوزعه بإصبعي ولا أجمل :*
نجي لبارت الكريمات ! خلصت من المكياج بدا هوس الكريمات ههههه
من اليمين كريم ايفين للبشره الحساسه
هو مخصص للبشره الي تتعرض للاحمرار او طفح او لجفاف البشره بسبب فرط التنظيف
تو ببدايه تجربتي له فلا أحد يسألني عن شي ههههههه
السعر ب١١٥ ريال من صيدليه وايتس - بنوراما مول
الي جمبه لوشن جلايكولكس بأحماض الفواكه لتقشير البشره
من صيدليه الحبيب - التخصصي ب١٢٠ ريال
الكريم ، كريم جلايكولكس ١٠٪ بأحماض الفواكه
اااااع هالكريم دخت عليه العشر دوخات عشان احصل تركيز ١٥٪
ولااا حصللت رحت لكل صيدليه تتخيلونها ماحصل شيي !
فقلت باخذ ١٠٪ تأثير اقل بس امري لله ، لما رجعت للصيدليات الا ١٠٪ بعد مخلص
ههههههههههههه انقهررت وجلست ادقدق ع الصيدليات لحد ماحصلته بوايتس
الي جمب بندا الي ع الشارع ماعرف اسم الشارع بس فرعهم هذا معروف اتوقع p;
سعره ب١٣٠ ريال
- الكريمات جديده علي فمابي أتكلم عنهم الا لما أخلص منهم عشان أحكم صح :$ -
مسحات ايفين تون من نفس شركه جلايكولكس الي اسمها توبيكس
لتوحيد البشره وَ تنقيتها ، هي عباره عن شرائح قطنيه + محلول + بودره تخلطينهم وَ تمسحين بالقطنه
سعرها ب٢٥٣ ريال ،
الله ينفعني بها عشان امدحها لكم وَ تشترونها هههههههههه
ماخذتها من وايتس - بنوراما مول
وَ تحصولنها بالحبيب بعد وَ أدمه وَ الصيدليات الكبيره : )
الي جمبه من فوق ، قطرات من ايسنس دراي دروب ، هو محلول تنقطونه فوق المناكير
وَ يجففه بسرعه ، جربته مره يمكن ! بس يبيلي اجرب اقين عشان احكم صح ..
سعره رخيصصصصص ب١٣ ريال يمكن :\ !!
الي جمبه من ايسي ، اليسار كيوتكل اويل ، زيت خاص للجلد الي حول الأظفر بالخوخ
مررره حلو ، وً برطبه صح وَ يساعد لو بتتخلصون من الجلد الزايد ينعمها لكم عشان تقصونها
من شريته وَ أنا ماستغني عنه
..
سعره ممكن ١٠٠ وشي ناسيه مره وضيعت الفاتوره :$
الي جمبه 3 way glaze ٣ اشياء بمنتج واحد !
بيس ينحط قبل المناكير عشان مايضر الاضفر
سترينقثر ، يقوي الاظفر اذا انحط بروحه
توب كوت ، ينحط بس المناكير تجف عشان يحمي المناكير ويعطي لمعه حلوه
أحب الاشياء الي أقدر استخدمها أكثر من استخدام *سعاده* :$
نفس الشي ناسيه السعر لان ضيعت الفاتوره :$ بس اكثر من ١٠٠
كلهم من صيدليه وايتس - بنوراما مول
* كل شي من بنوراما ههههههههه أحبه لانه قريب p;*
نروح لبودي شوب
مثل ماقلت قبل زمااان عن بودي شوب ماحبه مره :(
وَ أخر مره رحت له ماحسيت نزلو شي جديد او شي يجذب !!
اكتفيت بعطرين فواحه + عطر زيتي
العطرين واحد بالمسك الابيض ريحته حلوه بس مو الريحه الي أحبها
ماقول شيينه بالعكس ! بس مش مودي ابد مع اني احب المسك بس ماحس هذا مسك صح ههههه
الثاني exotic روائح فواكه واشياء هاديه واستوائيه
حبيته اكثر من المسك ، اسعارهم ب٢٣ للحبه
العطر الزيتي ، amber oud عود العنبر عطر زيتي تركيزه قوي
كان عليه خصم ، حلو كنت احسبه بيكون بديل للمسك الي خلص من عبدالصمد القرشي
بس هيهاااات هههههههههه
حبيته بالمحل وبس رجعت البيت موو مرره !!! ممكن لما اتبخر واحطه
بعيش الجو وَ أحبه p; سعره ١٨ ريال
بودي شوب بكل مكان مايحتاج اقولكم p;
اوشيو *قلوب*
أميره هذي الصوره اهداء لك انتي واريج احلى من الكليراسونيك صح ههههههههههه
هالشنطتين الكيوتات عليهم خصم من اوشيو وطبعا قورجس ماصدقت خبر
داخله عشان بجايم وَ اخذت هذول عادي عادي جدا يستاهلووون :**
الصغيره للميك اب وخاصه لمااسافر او باخذ ميك اب كثير ماعندي شنط بالحجم هذا
*نصابه عندها بس ماقدرت تقاوم الميني ماوس :( *
سعرها ٩٩ وبعد الخصم ٤٩ بسس !
الهيلو كيتي تجنننن اعششقهااا ياااناااس :"(
شوي كبيره تجنن للسفر تشيل اشياء كثيره *كل شي للسفر وهي قاعده بمكانها*
وفيها من داخل اماكن تخزين فمره بتنفع :*
سعرها ب٦٩ مادري كم قبل ، من اوشيو الرياض قاليري وفي ببنورما
وَ أتوقع للان تنزيلات فلحقو لو حابين :$
ستيتمنت نيكلس من زارا
ماعرفت اصوره ههههههههههههه
حلو صاير سلسلاين فوق بعض سعره بعد الخصم ٤٩ ريال
وفي هيد باند جلد بعد من زارا اخذته ب ١٩ ريال بس p;
* تخيلو صوره هيد باند فيه ستدز ذهبين ناعمين وكشخه*
الششوووززززات !!
أنا وحده أعششق الهاي هيلز وخااااصه البمبز او الي مرتفع من قدام
ماحب الواطي او الي له بوز مو حلو علي احس :|
كل شوزاتي بمبز ههههههه :(
مايعجبني اي شوز واحب المرتفع مرره
ابدا جدتي الله يخليها لي ماتهاوشني :$ بس مره صارت سالفه
بس مابي اكرهكم بالهاي هيلز :|
الي يبي يقرا يضلل الكلام والي ينقرف بسرعه لايقرا :
* مره كنت رايحه زواج انا وامي وصديقتي وبس وصلنا باب القاعه
السايق قرب للباب عشان ننزل والبوابه مرتفعه على هضبه
عشان السيارات تصعد لها مثل نظام الفنادق
المهم نزلنا وسمعنا صراااااخ
انا مانتبهت بس امي راحت تشوف ،
ولما رجعت ادور امي ولا اشوف الناس متجمعه وَ تصيح
انا شفت حرمه منسدحه ودم
وخفت مارحت ، شويات الا وامي جايه ومنقلب وجهها
تقول الحرمه لابسه كعب وتصعد الهضبه هذي ماجت من الدرج !
كانت تمشي ع العشب فلفت رجلها وانكسرت والعظام طلع من الجلد
امي تقول اشوف العظام قدامي وجلست تقرا ع الحرمه ماتدري شتسوي لحد ماجو اهلها واخذوها *
بعدها حرررمت البس كعب واخااف اذا مشيت مع اني متعوده بس اخاف تلف رجل :|
البسه اكثر شي بالبيت او بارض مستويه مو اماكن عامه نوو وااي :|
الحمدالله الذي عافانا والله يشفيها المسكينه
- نعود لمحور حديثنا ههههههه -
الشوزات بس شفتههم اخذو ئلبي ، بما انو مو كل شي يعجبني
فماصدقت واخذتهم اثنينتهم :|
حبيت التفاصيل الي عَ الكعب ، وَ خامته شامواه
أحب الشامواه ع فكره وعادي البسه طول السنه :(
من بيرشكا سعره ب١٩٩ ريال اذا موب غلطانه :$
الجميل الأسود بعد من بيرشكا ونفس السعر ،
ماعندي اسود ساده وَ أحسه يمشي مع كللل شي ..
عندي واحد وانكرف لحد مامات الله يرحمه وَ عقبال هذا ان شاء الله
بما انو بمود الشوزات بوريكم my new love
شوزي الرياضي لاني اعششق الرياضه *من جمبها*
HOW PRETTY !!
كان فيه بنك وبنفسجي بس مو مخصصين للرياضه
هذا مخصص للرياضه مثل الايروبكس وَ غيره
وفي مخصص للمشي والجري يكون خفييف
أنا قلت للي يبيع وَ عطاني هذا قال انسب شي
* تذكرت موضوعي مع البياعات ههههههههه الله يخلف *
من اديداس عليهم خصم كان ب٤٩٠ تقريبا
صار ب٣٦٠ ريال بس !!
مرريح وأحس سهل علي رياضتي ،
من اديداس - بنوراما مول
هههههههههه المفروض اسميه قورجس مول p:
كم شي كيوتي ، مو شرط تكونين ست بيت مثلي عشان تشترين هالاشياء اشكالهم تشفع لهم p;
كيوووووت T____T
الدجاجتين عباره عن صحنين للبيض ، اذا طبختي البيض رزيه بالصحن هههههه
لهم اسم بس نسيت :|
من الدانوب الحبه ب١٥ ريال ممكن !
السمكه الظريفه
اذا عندك اعشاب او شي من هذا القبيل
تحطينه بالسمكه وتغطينه بالكوب وبس تخلصين تشيلينه
واستمتعي بأطعم مشروب بدون شوائب
هو مطاط وَ مخصص للأكل يعني مافي خوف ان شاءالله
سعره ١٠ ريال من الدانوب بعد
تذكرون كوبي البلاستيك الفوشي الي قلدت اميره فيه ؟
اول ماشفتهم مابي احكي عن شعوري
حاله من الكياته الي ماتحملها ابدا ابداااا
تنحت مدري شأخذ كلهم ابيهم بغا يجيني تهزيئي هههههههههههههه
جد طولت وَ أنا اختار فقال زوجي اخذيهم كلهم وَ فكينا هههههههههه
اول واحد من اليمين مكتوب
if you obey all the rules you will miss all the fun :p
وعليه صور عطورات كيوته
ثاني واحد بومه تززننن
،،
والاخير مكتوب I LOVE NERDS هههههههه
ينفعون للمويه ، كوبي القديم ماينزل بيدي دايم اعبيه مويه ويكون حوللي
لان ماخاف يتوسخ او يجيه شي لان غطا وشفاط - مزازه
وينفعون للمشروبات البارده بشكل عام ..
الحبه ب٢٢ ريال من الدانوب طبعا !
ببنورااامااا موووول p;
ختامها الهديه الظريفه من متجر فانيلا
ارسلولي كوبون خصم من متجرهم ، فبس دخلت احترت ايش اخذ !
مااشاء الله كل شي حبيته عندهم
متجر متنوع وَ مناسب لكل الاذواق وَ غير هذا اسعارهم جدا جدا معقوله مقارنه بغيرهم
اخترت كذا قطعه كتجربه اوليه ، وصلوني بنفس اليوم ماشاء الله سريعين :$
وَ كانو مغلفين بطريقه جميله وَ تضمن لك القطع توصل سليمه ..
أول شي أخذت اكسسوارين منهم
سواره سبايكي سيلفر ، وَ حرفيااا صايره ماتنزل من يدي مرره مريحه وَ تناسب اغلب اللوكات !
والثانيه سواره مع خاتمين ، مرره جميله عَ اليد وَ مميزه حبيتها !!
أخر شي طلبته ،،
شلون قلبي يطاوعني اكشخ بدون ماأكشخ فوني معي !!
تززنن اودري هوبرن :"")
تعاملهم جددا جميل ، وَ طريقه الطلب سهله جدا جدا جدا
بس تسجلون وَ اختارو القطع وضيفوها لسله الشراء
وَ بعدين روحو لسله الشراء وَ اختارو الدفع وَ بس!!!
وَ الاحلى من كذا انو الدفع يكون عند التسليم ، في اريح ؟
رابط المتجر للي حاب ياخذ فكره
http://vanillaeshop.com
وَ مره شكرا لهم ()
وَ بس هذي مشترياتي ، باقي ملابس بس أبدا ماعرفت أصورها
متى اجيب منيكان بس :"( !
* اللهم بارك لي فيما رزقتني *
وَ الحمدالله
لتواصل معي أو استفسارات أو ملاحظات :
الايميل :
gorgeousta@gmail.com
وَ الي حاب يوصله كل جديد يقدر يشترك بالمدونه بالضغط ع الزر الاشتراك الموجود ع يمين الصفحه
كونو دائما جميلين \ قورجس 
