MINI HAUL ♥ مشترياتي من ماك ، بينفيت ، سنتربوينت وَ غيره ! وَ محل جديد تعرفو عليه اكثر ♥

السلام عليكم وَ رحمه الله وَ بركاته ♥ يالله كيف المطر يجيب السعااااده وَ الابتساممه ، اعششق المطر عندي اي شي سعيد اربطه بالمطر وَ الخيير ، الحمدالله يارب ♥♥ كنت بسوي تدوينه العنايه باليد وَ مجهزه اغراضها بس مامدا الوقت وَ اشتريت منتجات جديده ودي اضيفها لروتيني فاذا ربي سهل وَ شفت نتايج بعطيكم الطريقه النهائيه ، انا ع وعدي حتى لو اتأخر تحملوني :$ اليوم بوستنا قسم قورجستا ، صح دخلنا بالاحد بس انا يومي مايبدا الا اذا صحيت من النوم ههههههههه ، فكرت اوريكم اخر مشترياتي وَ انطباعاتي الاوليه عنها .. ماسميها ريفيوز ابدا لان ماعطيتها حقها بالتجربه بس اجربهم وَ اقتنع فيهم اسوي لهم ريفيوز الحين بس عرض مشتريات + انطباع اولي ، بعضها جديد وَ بعضها قديم بس بالنسبه لي دام ماستخدمتها الا مره فتعتبر جديده :$♥ طبعا سلكو للتصوير اسرع شي بالحياه ههههه

من اليمين ..

ماسكرا ميبيلين ذا كولوسسال .. هذي مو وتربروف العاديه -يعني مو ضد المويه- انا احب ماسكرات ميبيلين احس الافضل بالدرق ستور كنت رايحه ابي البنفسجيه بس ماحصلتها قلت اجرب هذي لاني جربت اغلب الماسكرات عندهم الا هذي ، انطباعي الاول بايخه لول ، اول شي لاحظته ريحتها مو حلوه فيها شي غريب :| جربتها اليوم مره .. ناعمه جدا تطول بشكل خفيف بس ماتكثف وَ سوادها مو قوي ، لازم اعطيها فرصه ثانيه بس بشكل مبدئي ماعجبتني.

السعر : ٥١ ريال

مكان الشراء : سنتربوينت

الي بالنص ايلاينر سائل من سيفورا ، انا ضيعت ايلاينري العزيز من ذا بالم فقلت ارجع للشي هذا دام اني تركت الجل ايلاينرز للابد .. مجربته زمااااان فرشته ناعمه وَ سهل الاستخدام بس ماكنت اعرف للايلاينرز فحذفته :| بشكل مبدئي عجبني جدا جدا سائل بس ينشف بسرعه عادي سمعت من ناس انو ماينشف وَ يطبع بالجفن بس مدري جربته مرتين او اكثر يمكن وَ مشى معي مضبوط وَ فرشته سهله اهم شي.

السعر : ماذكر بالضبط بس حول ال٧٠ ريال مو اكثر من ١٠٠ ريال 

مكان الشراء : سيفورا ( موجود بالحياه مول \ بنوراما \ الرياض قاليري ) هذا الي اعرفهم

اخر ماسكرا ذاي ار ريل ، من بينيفت .. عَ كثر ماسمعت مدح مدح ع هالماسكرا رحت ركض ادورها ، اخذتها من دون تجربه ، بالبيت جربتها احس خيبت ظني :| توقعت شي خيال ع قد المدح هههههه .. عطيتها فرصه ثانيه اليوم وَ جربتها كويسه بس مو الشي الواو الي كنت متخيلته ، بس الايام بينا بجربها اكثر يمكن تعجبني p:

السعر : ١١٠ ع ماظن :$ ضيعت الفاتوره :(

مكان الشراء : سيفورا ( موجود بالحياه مول \ بنوراما \ الرياض قاليري ) هذا الي اعرفهم ♥

عششقي عششقي الاروااج :((( وَ طايحه بالورديات وَ درجاتهم اكتشفت ماعندي درجات وردي اغلبهم لحميات وَ باهته :|

وَ اكتشفت شي ثااني اني اوزع ارواجي او اضيعهم ههههههه ، لما شريت ستاند الارواج وَ رتبتهم اكتشفت انهم قلليللل ويين ارواجي! اغلبهم مدري وين ضاعو :| وَ بعضها وزعتهم لان ماستخدمهم :| يبيلي ارواج كثير :( المهم نجي لجميلاتي الي مبسوطه فيهم من اليمين :

روج ريميل من مجموعه كيت .. انا جربت نفس الارواج بس الي لون علبتها اسود الفرق بينها وبين هذي الي علبتها احمر انو الاسود لاست فينيش يعني يجلس مده طويله ع الشفايف اما هذي بعد لاست فينيش بس مات او مطفيه ، لما جربتها كان مافي غيرها تيستر والكاونتر بكبره مو مرتب ماخذت راحتي!! مافي غير هالروج الي له تيستر وَ شفت لونه حسيت نعوومي وَ كريمي فاخذته وَ رحت البيت ، بس جربته واو وااو حبيته من كل كل قلبي لونه وردي النااااعم وَ كريمي ماحسيت يشقق الشفايف بما انو شفايفي ناشفه وتميل للتشقق دايما .. حطيته اليوم "جربت كل شي اليوم عشان اكتب عنهم هههه" ابهرني بثباته !! ماتوقعت ثابت لهدرجه♥♥ ، وَ الي صدمني انو كنت مشتريه روج من ماك بليز مي اسمه وَ ماكنت احصله دايما ولما حصلته شريته وَ فرحانه فيه وَ ضاع هههههههه ، الصدمه انو روج ريميل كيت موس هو نسخه من بليز مي وَ السواتش هذا اكبر دليل :

يلا طلعو لي الفرق p: الي فوق ريميل والي تحت ماك ، ريميل اغمق بتكه بس مو مره الفرق! حسيت وناسه مايحتاج افحط بماك عشان ارواجهم المعفنين ، اقصد هم معفنين ولا ارواجهم تهبل :( ريميل كيت موس رقمه ١٠١

السعر : ٤١ ريال

مكان الشراء : سينتربوينت (معروف اماكنهم)

الي بالنص ، روج ريفلون ليب بتر .. انا كنت محتاجه روج نااعم ماكان حاطه روج ابي مرطب بس فيه نسبه لون ، خاصه للمشاوير السريعه ابي شي سريع .. احس عشان احط روج لازم فل ميك اب يعني بودره او فاونديشن مع ماسكرا ماعرف احط روج بدون شي احس شكلي كاني مريض :| المهم بعد المدح الهائل ع الليب بترز قلت اجربهم .. لما رحت ماحصلت تيسترات كانو يرتبون ارففهم -ــ- ماحصلت الا هذا عجبني لونه ناعم قلت اخذه ، جربته بالبيت نعوم وَ وردي وَ فيه لون خفيف مع ترطيب مو شي واو بس يمشي حال للاستخدام اليومي اسمه ستروبيري شورت كيك.

سواتش :

السعر : ٥١ ريال

مكان الشراء : سينربوينت

اخر روج من ماك ، رحت ماك فجأه وانا طبعي لما اروح لمكان فججأه ماعرف اشتري وَ خاصه قبل ماروح او اقرر اشتري شي اشوف المكياج الي عندي ايش ناقصني ايش محتاجه او الالوان الي مو عندي .. رحت وَ ضعت مدري شاخذ كان محلوف علي الا اخذ هههههه ، اخذت روج اسمه هق مي ، شفت لونه عجبني وَ رحت البيت وَ قلت ياغبائي كل ارواجي لحميات وَ بيجيات ماجبت شي جديد :| قلت ارجعه احسن فرجعته وَ أخذت هالشي الجمممممميل .. روج اسمه كريفنق craving حاطته الحين جددا عاجبني لونه *.* اللون الي دايما ودي فيه هههه ، وردي مايل للبنفسجي ماتحسين متكلف او ثقيل ينفع لاغلب الاشياء مكياج ناعم او ثقيل مايفرق♥♥♥!

سواتش :

اللون علي اغمق منها يعتمد ع لون البشره اكيد.

السعر : ٩٨ ريال -احس يستهبلون ماك هم واسعارهم!!!-

مكان الشراء : ماك (المملكه \ الرياض قاليري \ صحارى \ غرناطه) هذا الي اعرفهم

تجيكم حالات لما تشترون ميك اب تقولون خلاص شريت كل شي محتاجته!!! بس كلها كم يوم وَ تقولون مااعندي مكيااااج :( دايم تصيرلي هالحاله وَ خاصه لما اتابع قنوات اجنبيه او انستقرام او مدونات احس جد ماعندي مكياج ابي نفس هذي وابي نفس هذي .. اكرهه هالعاده! بس الحمدالله اغلب او ٩٠٪ من الاشياء الي اشتريها اكون محتاجتها ، الي مايعرفني يقول هذي ادراجها مليااانه مكياج هههههه .. مكياجي مو قليل بس مو كثير ، اخذ ع قد احتياجي لاني ماحط مكياج كثير مره بالاسبوع غالبا ، فنصيحه الي تحب المكياج مثلي لاتبذر لان المكياج ترا له تاريخ انتهاء مو حلو تكدسين الاشياء عندك وانتي ماتستخدمينها ، مثلا لو انا طالبه او موظفه كلامي بيتغير لاني بستخدم المكياج بشكل يومي ، فكل وحده تعرف احتياجاتها بدون تبذير او اقتصاد زياده عن الحد ، ترا مدري شدخل هالكلام بس تذكرت نفسي لما اتحلطم ماعندي مكياج فقلت اقنع نفسي واقنعكم معي ههههههههههههههههههه نرجع لمحور حديثنا :$

من اليمين ، كولور بيس من ماك .. ايش الكولور بيس ؟ هو اساس لاي لون من اسمه له استخدامات كثيره ، تحطينه ع الجفن بدون اي شدو او عند مدمع العين او تحت الحاجب يعطي اضاءه طبيعيه جدا جدا وَ مافيها قليتر او تكلف ، او تحطينها ع الجفن وَ تحطين فوقها شدو يبرز الشدو بشكل كبيير وَ يعطي لون قوي يشابه للاي برايمر بس الاي برايمر بدون لون .. الكولور بيس يعطي لون تحت الشدو ، او تقدرين تستخدمينه ع عظمه الخد تعطينها اضاءه حلوه وَ بعد تقدرين تحطين فوقها اضاءه بودره عشان تبرزها ، صراحه انا اخذتها عشان اخر سبب .. اشتريت اضاءه سوفت اند جينتل المشهوره من ماك بس ماحس منها فايده او لون ماحبيتها ، فقلت اجرب الكولور بيس تحتها وَ احكم .. الكولور بيس بلون البيرل او اللؤلؤي ..

سواتش :

السعر : اظن ٩٠ ريال لان رجعت الفاتوره لهم! ناسيه والله :|
مكان الشراء : ماك (المملكه \ الرياض قاليري \ صحارى \ غرناطه) هذا الي اعرفهم

الي وراه بودره فكس بلس لان ضاعت حقتي "ترا كلهم ضاعو مع بعض عشان محد يقول هذي مفهيه هههه" اشتريت وحده ثانيه ، لان كانت عاجبتني تغطيتها ولها كذا استخدام ، المشكله لما جيت باخذ لوني القديم حسيته مره اصفرررر مدري بشرتي فتحت لهدرجه او غيرو الوانهم :| احترت فقلت يمكن يفرق ع الوجه وانا من ذكائي كنت حاطه فاونديشن فماقدر اجرب بالمحل ، اخذت درجه افتح فالله يستر للان ماجربتها :$

السعر : ١٦٠ ريال -النصابين انا ماخذتها قبل شهرين تقريبا ب١٥٤ ريال وجع :| -
المكان : ماك (المملكه \ الرياض قاليري \ صحارى \ غرناطه) هذا الي اعرفهم

الي جمبهم بلشر من ماركه الماسكا ، ياويح قلبي متى يجيبون هالماركه عندنا وجع :(((( تجنن تجنن احترت ايش اخذ!! فاخذت بس بلشر اجربه وبعدين اذا سافرت اشتريت او طلبت اون لاين ، البلشر جربته اول ماخذته وجربته اليوم من الصباح للحين اللون موجود!! وانا ماحطيت الا طبقه وحده خفيفه لانه ثقيل مره لازم تاخذين لون خفيف مره وَ تدمجينه صح ، حبيت مرره مرره معاه ذرات لميعه بس مو بشكل مبالغ ينفع للصباح مسحه سريعه ولليل طبقه وحده مدموجه بيطلع جميل وَ بيجمنتد متحمسسسه للالوان الثانيه احس افضل بلشر استخدمته بحياتي !! ، اسمه allure
سواتش :

السعر : تقريبا ١١٠ درهم اماراتي
مكان الشراء : مو من السعوديه ومو متوفر عندنا ، اخذته من بلومنقديز الامارات

اخر شي ورا هو باليت ذا فيس من اوربن ديكاي ، انا ماعندي الا باليت واحد وَ شدوات من ماك ، ماستخدم الا الالوان الناتشورلز فماكنت احتاج شدوات كثير بس قررت انو اجرب لوكات اكثر وَ اطور من مكياجي وَ طريقتي ، فشفت ذا فيس وَ جدا اسرني وَ عششقت الوانه ، بيجمنتد يعني من اول مره بيطلع اللون مضبوط والوانه متنوعه جدا ، كنت ابي باليت سموكي بس ماحصلت الا هذا وَ ماندمت جربته مرتين وَ عجبني ، ولاضير اجيب السموكي باليت بالمستقبل ان شاء الله .. مشكلته الي تقهر الباليت الكشخه يتوسخ بسسرعه والالوان لانها شيمري ومخمليه تتناثر بسرعه! انا حافظته بعلبته وماستخدمت الا لونين مرتين بس واليوم عشان اصور انظفه بمزيل مكياج ولا راضي يتنظف رافع ضغطي :|

في ٢٠ لون متنوع حبيته كثير .. سواتشز من النت

متحمسه اجربه اكثر واكتب تجربتي ان شاء الله ، هو ليمتد ع حد علمي فمادري لو تحصلونه بس ان شاء الله تحصلونه :$
السعر : ٢٥٠ او اكثر درهم اماراتي
مكان الشراء : سيفورا الامارات مول

نجي للعطورات وَ الروائح الجميله ، مليت من العطورات الفرنسيه صراحه احس كلها صارت نفس الريحه وَ نفس الجو ، وَ اغلب عطوراتي طفشت وانا ماخلصتها .. فكرت بباسم القاسم دايما اشوفه قلت بشم عطوراته يمكن تعجبني ، رحت له ٣ مرات اجرب واطلع بدون ماخذ شي ، جربت ع جاكيت زوجي ع السريع وَ رجعنا البيت وَ اشم الجاكيت الريحه تجنن تجنن نسيت انه من العطر!! والمشكله لو احلف انها اسبوع ماراحت او خفت محد بيصدقني لول ، لما جتني ماماتي حبيبتي قالت في محل عندكم اسمه بسمه القصيم ههههههههههههههههههه "فضحتها بتكفخني سوري ماما :$" قلت قصدك باسم القاسم مافي شي اسمه بسمه القصيم قلبك مع مزارع القصيم ولا شنو ههههههههه ، اخذنا امي ورحنا لبنوراما مول في كشك هناك ، جربنا كثير وَ استقرينا ع مجموعه انا كنت ابي عطر واحد وامي تبي عطرين فقال انو عندهم عرض تاخذون عطر كبير قزاز مع عطرين حجم عادي *نفس الي بالصوره* وَ فوق هذا بيعطونا تيسترات مجانيه ١٠ .. قلنا طيب هذا كله بسعر ٥٠٠ او ٦٠٠ ريال يعني يابلاش ، اذن فاستعجلنا اخذنا اشيائنا ولما رجعنا البيت الا صندوق واحد فيه ٣ عطورات ، احنا كنا نبيه هديه عصبنا تعصيب جماعي لوول ، يعني هو ماقالنا انو كلهم بعلبه وحده وهو يدري انو كل واحد حاسب بروح ، مو حلو تهدي احد عطر بدون علبه ولا شي :| رحنا ثاني يوم وَ قلنا لهم السالفه وانو محد فهمنا وانت شايف انو كل واحد دافع بروح ليش ماقلت لنا ان كل وحده بعلبه :| قال حقكم علي وَ ماقدر اسوي شي :\ لما شافنا وش حليلنا ماعصبنا ولا رفعنا صوتنا قال بعطيكم عطرين هديه -الحبتين الي بالصوره- ومعاها ١٠ تيسترات مجانيه ، قلنا محد يقول لا للبلاش :$ اخترنا العطورات واخذنا اغراضنا وَ رجعنا باشياء اكثر ، لاتقولون لاحد اني علمتكم ثم تتهاوشون معهم وَ تقولون عطونا مثل ماعطيتو قورجس :| بيني وبينكم الكلام :$ ، مو كاني قلت قصه حياتي ؟ المهم العطر الكبير رقمه ٢٠٩ والصغير ٣٠٠٠ و ١١٢ مقدر احكم ع روائحهم بس جميله جميله جميله ، حسيت هي اجمل شي بالمحل فلو حابين اخذو الارقام وَ شمو بنفسكم .. من بعد هالثلاث حبات ماصرت اتعطر باي عطر ثاني♥!

السعر : الصغار كانت مجانيه بس اظن انها ٨٠ ريال ، الكبيره ب٢٠٠ او اكثر شوي يالله كنت شايله الفاتوره بس مدري وين حاطتها :(
مكان الشراء : باسم القاسم ، بنوراما مول كشك هناك وفي بلوكلايزر مول بس ماعرف الباقي.

الي متابعني يعرف اني اعشششق مسك عبدالصمد القرشي ، بصراحه ماجربت غيره بس ماحس احتاج اجرب غيره ، ماحس اني ماخذه شور او نظيفه الا لما احط مسك السائل ، مو كثير يتقبل ريحته ولا انا كنت احبها بس مع بخور او بعد الشور حطيه ورا الاذن وعند عروق اليد .. انتظري يتفاعل مع حراره جسمك وَ شمي الريحه الخياليه ..
خلصت التولات الي عندي فرحت اخذ شي جديد ، ماعندهم الا ثلاث انواع اظن ، مسك العود الي بريحه دهن عود الي ع اليسار ، مسك العروس ، مسك الختام .. كلهم احبهم وعندي منهم بس الي شريته نسيت اي واحد منهم ههههههه ، لما تروحون اطلبو تشمون اول لاتاخذون الا لما تجربوون :$ ودي اكتب موضوع كامل عن المسك احس مايكفي اتكلم هنا :(

السعر : مسك العود غالي اظن اظن ربع توله ٢٥٠ وريال بس يستاهل ، مسك الابيض الي نسيت اسمه هههه حول ال١٥٠ ريال .. يضحك اني شايله كل الفواتير وبعدين ضيعتها ؟ :( مره ثانيه بجيب بوكس واحفظ الفواتير ابي اعطيكم معلومات دقيقه :"""(
مكان الشراء : عبدالصمد القرشي بنوراما مول ، افرعه كثيره ابحثو بالنت :*


الحين نجي لاهم شي بموضوعنا ، صارلي فتره اشتكي من يدي وَ شكلها الي ابدا مو مقبول .. هالايام غباااار ومع التنظيف احس يدي راحت فيها ، مع انو البس قلوفز اذا غسلت الصحون بس لما انظف البيت مالبس غباء صح :| وغير هذا اتحسس من اي شي اذا حسيت ع يدي شي اشتغل عليها غسل بمويه وصابون وانتي باكتيريال داايماا جمبي ، يمكن عشرين مره اغسل يدي باليوم ، ارطبها صح بس ماحس يكفي وَ فوق هذا سمرت كثيير لما سافرت مع انو استخدم واقي من الشمس!! بشرتي خاينه للعشره اهتم فيها طول عمري وَ بيومين اهملهم كانو بحياتي ماهتميت! *صوت ميوزك حزين*

فرحت للوكستيان ابي مجموعه الشيا ، بس مخلصه احس كل شي ابيه مخلص ههههههه ، فطلعت وَ شفت محل كيووت جمب لوكستيان ، قلت بدخل اشوف ! اسم المحل كرابتري اند ايفلين ، بحثت عنه بالنت اغلب الي كاتبين عنه يسألون ماحصلت اجابات او تجارب مفيده الصراحه ، دخلت بس اشوف مو نيتي اشتري بس مدري في شي جذبني بالمحل هذا ، سألت الي يبيع انتو وش ترجعون له هههههههه امزح اقصد يعني ليه اول مره اسمع بالمحل هذا مع انو شكلو ممتاز! والي رافع ضغطي انو بودي شوب الخربوطي ماخذ صيت اكبر! قال انو صاحب المحل مايهتم بالدعايه ، وانهم محل انجليزي نفس لوكستيان كل منتجاتنا طبيعيه بس لوكستيان فرنسي واحنا انقليزي .. اصلا هالشي لاحظته من الديكور ، شميت عطرين كانو لابأس .. احس عندي اكتفاء من العطور مابي الا لما اخلص الي عندي ، قال انهم محل يهتم بالبشره اكثر وَ العنايه وَ غيرها .. الي لاحظته اسعارهم جدا جدا جميله مقارنه بالشكل لان مادري ايش المضمون صراحه ههههه ، نشوف الصور الي صورتها بفوني ع السريع ..

اخر صوره هي كونر للتخفيضات الي اخذت منها اشيائي ، قلت للي يبيع ابي شي لليد ايش افضل شي عطاني الكريم الصغير الي بالنص صورته ..

كان في حجم كبير بس قلت اخذ الصغير اجربه ، سعره بس عشرين ريال! فليخسأ بودي شوب :| مدري ليه حاقده عليهم هههههههه ، اسمه India Hicks Island Living ، من مكوناته المكديميا وزبده الشيا .. ريحه فتنه يجنن ! مفكره ارجع اخذ باقي المجموعه بس بعد كم يوم اقرر لان اظن اني بحاله عشق يارب ماتكون اوهام لوول ، المهم هالكريم اكسترا ترطيب.

انا ع اساس باخذ الكريم الصغير وَ بطلع ، قال اذا تبين منتج خاص باليدين بس شوفي هالمجموعه ، مقشر + مرطب ، عادي اعترف انو اذا عجبني الشكل انسى المضمون واخذه وانا اضحك وبس ارجع البيت انقد ع نفسي ؟ :$ شكله كيووت وَ فنتج وَ حسيت اني بالريف واشتغل بالحقول مثل الصوره :( هالمجموعه ماخذه جائزه هونج كونج بمسابقه افضل منتج لليد ، كاتبين هالكلام عَ البوكس يعني اكيد مو نصب :$ هالمجموعه مخصصه لليد المكروفه التعبانه البهتانه .. يدي مو لهدرجه مكروفه بس ان شاء الله بعد هالمجموعه ترجع لسابق عهدها *ترفع يدها وتدعي* ماجرب المنتجات ماقدر احكم ولا شي بس وعد لهم ريفيو خاص .. اخذت هالمجموعه من التخفيضات بسعر ٩٠ ريال وعليها خصم ١٨ ريال فصارت ... دقيقه بحسب ، صارت ٧٢ ريال سعر معقول جدا ولا !؟ اسمها Jardiniers

وانا ماشيه بكل امان وَ طمأنينه بحاسب بطلع خلاص نشبت بالمحل ، شفت هالمجموعه النقطه الكيوته فرجعت وانا اقول اخر شي خلاص والله بطلع ..

مجموعه بعد عنايه باليد *ناويه حرب الاخت* المجموعه نفس الشي سكرب هاند ريكوفري وَ كريم هاند ثيرابي ، ريحته جمميله وَ منعشه كأنك ببحر !! وَ صغير حلو للشنطه آو السفر ، سعره بس ب٢٣ ريال :(
ماقول لكم كش ع بودي شوب ههههههههه ، مثل ماقلت ماراح احكم الا لما اجربهم بس حبيت المحل جدااا وَ حبيت الاسعار اكثر وَ اكثر ،، بحثت بالمواقع الاجنبيه وَ مره يمدحونها! مالها شهره عندنا مادري ليه ؟ بس بالنسبه لاسعارها احس بيرفكت ، ماتوقع بتكون بمستوى لوكستيان بس احس احسن من ذا بودي شوب -بيذبحوني محبات بودي شوب ههههه- ويمكن احسن من باث اند بودي وركس وَ خاصه عَ كلامه انو منتجاتهم تعتمد ع الاشياء الطبيعيه ، احس بيكون لي رجعه كثير للمحل هذا بس اكييييد بعد ماجرب منتجاتهم وَ احكم صح ، المحل موجود بالمملكه تحت عند لوكستيان بالضبط وَ بحياه مول اظن ..



وَ بس هذا كان اطول بوست قرقه بالحيااااه ٣ ساعات اكتب واسولف الحمدالله ع العافيه بس هههههههه
يارب اكون افدتكم ، وَ مثل مو معروف من بوستات الهولز وَ المشتريات هي تشوفين اشياء جديده ممكن تعجبك او تتعرفين عَ محل جديد يمكن يكون من مفضلاتك ، وَ الحمدالله عَ مارزقني به بغير حول مني وَ لاقوه ♥♥♥

اشوفكم بعد شوي ببوست جديد لان دخل الاحد هههههههه ، للتواصل معي ع التويتر والاسك-غيرت اللنك- والانستقرام 
الايكونز ع يمين الشاشه

لاتنسين الاشتراك بالمدونه ليصلك كل جديد ..
كونو دائما جميلين ♥ ..

xo Gorgeous