طريقتي بإخفاء الهالات بالتفصيل ♥ #قورجستا

السلام عليكم وَ رحمه الله وَ بركاته ♥ وحشتوني كثيير ، يارب ماغيب كذا مره ثانيه :( بس لو غبت عن المدونه انا دايما متواجده بالانستقرام والتويتر "الروابط ع يمين الشاشه" اليوم حابه اتكلم عن موضوع انطلب مني كثير وخاصه من ريم متابعتي الجميله فالموضوع اهداء لها♥♥♥.
كثير يشتكي من هالات والي ماعنده فهو انسان محظوظ فيشكر ربه هههههه ، انا اعاني منها وكثرت بالفتره الاخيره وخاصه انو ٢٤ ساعه ع الاجهزه ، الكلام عن الهالات واسبابها طويل بس دايما وابدا انصحكم تستشيرون شخص ثقه مثل دكتور يشوف لو هالاتكم وراثيه بيحلها بالعياده عنده ولو كانت خفيفه او نتيجه سهر وتعب وغيره حلها مع الكريمات المتوفره بالصيدليات ، فالاول استشيرو دكتوركم وبعدين ابدو بالحلول ، اليوم بتكلم عن اخفاء الهالات بشكل مؤقت باستخدام الميك اب ، المنتجات الي بعرضها مو أفضل شي لاتعتمدون عليها جربو لحد ماترسون ع شي مناسبكم ، انا بس بعرض لكم طريقه اخفاء الهالات والمنتجات الي ناسبتني.

اول خطوه ، ترطيب المنطقه ، المنطقه الي حول العين حساسه جدا رطبوها بمرطب خاص افضل شي ، انا استخدم بوبي براون وللاسف انتهت صلاحيته قبل لا اخلصه نسيته بالدرج هههههه ، المهم لما ترطبون وجهكم قبل الميك اب رطبو تحت العين وانتظرو لحد ماتمتصه البشره وبعدين كملو مكياجكم.

طريقه استخدام:
وزعي نقط صغيره من الكريم حول العين من فوق وتحت وبعدين وزعيه بالطبطبه وليس المسح! لان المسح يشد المنطقه وهي حساسه حبتين وبالطبطبه نفيد البشره نحرك الدوره الدمويه ونخليها تستفيد من الكريم اكثر.

رأيي:
المرطب روعه وينعش المنطقه وخفف هالاتي ، ماأخفاها تماما بس الي هالاتها خفيفه او تبي تعتني بالمنطقه هذي لانها عرضه للتجاعيد تستخدم المرطب هذا انصح فيه كثير.

ثاني خطوه ، الكوركتور .. في ناس تقول احط الكوركتور قبل ولا بعد الفاونديشن ؟ اقدر استغني عن الكوركتور ؟ الكوركتور يكفي بدون كونسيلر ؟
اول شي بالنسبه لي احب احط ميك اب العيون كااامل وبعدين احط فاونديشن والاشياء الباقي لان بكذا المكياج يكون انظف ، ماحس في فرق كبير اذا حطيت الفاونديشن قبل ولا ؟ بس اذا بعض الفاونديشنز ثقيله فتغطي الهالات فتحتاجين كوركتر بكميه اقل ، هل تحتاجين كوركتور ؟ بالنسبه لي اي ويفرق الكونسيلر معه لانه مع الهالات الغامقه ، اللون الاورنج يكسر اللون الغامق تحت العين ، الكونسيلر بروحه يقلب الهالات رمادي ، وافضل كوركتور هو الاورنج او البيتشي "المشمشي"
استخدم تبع بوبي براون لان ماحصلت لا بماك ولا ميك اب فور ايفر كل شي مخلص ، بس ماندمت انو شريته مره حابته.

 طريقه استخدام :
اوزع الكوركتور بعد الفاونديشن ع الهالات واوزعه باصبعي بالطبطبه او باستخدام البيوتي بليندر الرائعه بالتوزيع وخاصه انو كريمي فصعب شوي.


رأيي:
حبيته بس لو كان لونه اكثر يميل للبرتقالي احس بيغطي بشكل احلى ، بس بشكل عام حابته وبس يخلص افكر اشتري من ماركات ثانيه ودي اجرب شي ثاني.

ثالث خطوه ، الكونسيلر ، يفضل تاخذين كونسيلر درجه افتح من الفاونديشن عشان ينورلك المنطقه ، استخدم تبع بوبي براون بس صارله فتره يخطط ومايغطي كويس اظن انتهت صلاحيته والله اعلم :\ 
كان ماشي معاي تمام وحلو ، بس شريت بعده من استي لودر حبيت اجرب شي جديد ومره انبسطت انو جربت هالشي ! عجبني اكثر من بوبي براون ، حسيت يميل للبينك شوي فاحس ينور المكان بشكل احلى! الدرجه الي عندي رقم ٢ ماعندهم درجات كثيره بس الدرجه الي اختارتها كانت موفقه.


 طريقه استخدام :

اوزعه بالطبطبه وأحاول اخليه ع شكل مثلث مثل كذا :

عشان ينور المنطقه وبعدين ادمج كل شي بالبيوتي بليندر ، استي لودر سائل اوزعه باصبعي بعدين ادمجه بالبيوتي بليندر *صورتها فوق اول صوره وهي اسفنجه خاصه بالدمج* وبالنسبه لبوبي براون منتج كريمي اوزعه باصبعي او بفرشاه سيقما الخاصه بالكونسيلر وبعدين كشكل نهائي ادمجه بالاسفنجه.

رأيي:

كنت احب بوبي براون بس بعد استي لودر غيرت رايي وممكن اغير رايي لو جربت شي افضل ، فمثل ماقلت التجربه دايما خير برهان ، بس احس اختيار اللون يأثر بشكل كبير بالنتيجه فيمكن العيب مو من بوبي براون لا من اللون الي اخترته ، بالنسبه للتغطيه احس استي لودر افضل .

رابع خطوه ، تثبيت الكونسيلر + الكوركتور ،، واهم شي تثبتينهم ببودره منثوره شفافه عشان مايخططون!!!  جربت البودره المضغوطه حلوه بالبدايه بعدين تحصلين تحت العين مخطط ، فالافضل البودره المنثوره ولو ماعندك جربي بودره مضغوطه ووزعيها بالفرشاه مو بالاسفنج ، المكياج ابدا مو رياضيات ١ + ١ يساوي ٢ ، كل شخص له تجارب تختلف والي ينفع معي يمكن ماينفع معك فمالك الا التجربه.



 طريقه استخدام :


استخدم بودره بير مينرلز فييل ، بودره شفافه كانت جايه مع الفاونديشنز الي تكلمت عنهم قبل ، استخدمتها لتثبت الكونسيلرات وشفت فرق كبير ، اوزعها بشكل خفيف بفرشاه بير مينرلز.


رأيي:

جربت هالطريقه من فتره قريبه ، وحبيتها كثيير افضل من البودره بمراااااحل ، وشكلها طبيعي اكثر.



شي اضافي ، لما اسوي ميك اب الصبح وابي شي سريع استخدم كونسيلر قارنييه درجه رقم ٢ ، خفيف ويغطي الهالات صح مو بيرفكت بس مين يبي يكون ببشره فلولس الصباح؟ حلو نكون ع طبيعتنا لوو شوي ، انصح فيه وثبتيه ببودره سائبه مثل ماقلت ، عيبه الوحيد انو مايثبت مره ، بس خلصته وحبيته وبرجع اخذه.

بالنهايه ، المكياج تجارب حلو نتعلم ونجرب طرق جديده ونشوف الي يناسبنا ، انا مو ميك اب ارتيست وماصارلي فتره طويله احط مكياج صراحه هههههههه بس كل يوم اتعلم واتحسن ، ويارب اوصل لمرحله ترضيني ، اذا حبيتي شي تعلميه ومع الممارسه والتجارب راح تتقنينه ، محد يعرفك الا انتي ، فطلعي جمالك بنفسك لاتنتظرين احد يطلعه لك.

الاماكن:
- منتجات بوبي براون بالهارفي نيكلس الفيصليه ، ناسيه الاسعار تماما.
- استي لودر بالهارفي نيكلس الفيصليه واظن باغلب المحلات الكبيره.
- قارنييه رول من اي سوبر ماركت تحصلينه انا اخذته من هايبر بنده.

للتواصل معي ع التويتر والانستقرام الايكونز ع يمين الشاشه

     

لاتنسين الاشتراك بالمدونه ليصلك كل جديد ..

كونو دائما جميلين ♥ ..