روتين فاونديشن ، لبشره فوتوشوبيه ♥♥

،

السلام عليكم وَ رحمه الله وَ بركاته ♥♥!

بتكلم اليوم عن طريقتي بالفاونديشن الي صارلي من فتره استخدمها ، بس بالبدايه بتكلم عن كذا نقطه

الفاونديشن مايطلع بيرفكت الا اذا بشرتك مرتاحه ، صح مو الكل عنده بشره بيرفكت وانا منهم بس في فرق بين بشره مترطبه كويس ومرتاحه وبين بشره متقشره وفيها جفاف ، كل ماكانت بشرتك نظيفه طلع الفاونديشن بشكل احسن

ثاني شي الطريقه الي بتكلم عنها اليوم ماتعطي لوك ناعم او لوك طبيعي ١٠٠٪ لان البشره كأنها متفتشبه p;

يعني الي يحبون الشكل الطبيعي تماماا ماراح تناسبهم وبنفس الوقت ترا ماراح يكون كأنه ماسك ابدا!

ثالث شي الطريقه هذي تنفع للمناسبات والمساء ماتخيل احد مسويها الصبح او للدوام او الجامعه لان ثقيله ، تعرفون الاضاءه القويه ؟ بتناسبها جدا ومايبين وجهك باهت ♥♥

ذوقي بالمكياج عشان اوضح لكم مثل فوز الفهد

اعشق مكياجها نظييف وبنفس الوقت مو اوفر!♥♥♥♥

اتمنى اوصل لاحترافيتها بالميك اب "بنظري p:" 

ملاحظه : بشرتي مختلطه دهنيه ومرات جافه وخاصه منطقه الانف دايم تبهذلني

نبدأ!

١. اول شي لازم ننظف البشره ونرطبها بشكل كويس 

٢. ارش فيكس بلس من ماك ع كل الوجه

يساعد ع دمج الفاونديشن بشكل حلو ويخليه ندي بنفس الوقت

دايما اسوي عيوني وبس اخلص اكمل باقي الوجه عشان اظمن ميك اب نظيف

٣. احط برايمر بينفت "الي لونه ازرق" ع منطقه الخدود والخشم الي فيهم مسامات والي يبقى بيدي اوزعه ع باقي الوجه

تمنيت اصور كل منتج بروح بس ماعليه :|

الي بعلبه صغيييره هذا برايمر ستروب من ماك اخذته منهم كعينه عشان اجربه وظل معاي كثيير

٤. اوزعه ع الخدود والجبهه يعطي لوك ندي مثل ماقلت بس ماكثر منه عشان مايصير حفله

بعدها ابدا بالفاونديشن ،

عندي من استي لودر دوبل وير من افضضضل الفاونديشنات الي جربتها بحياتي تغطيتها فل فل الكوفر ♥♥

بس مشكلتي اخذت لون غلط فلما استخدمته خلا لوني رمادي! انا جربته بالهارفي نيكلس بغرفه مخصصه بالميك اب وكان تمام بس اتوقع عطتني درجه غلط الله اعلم!

المهم اخلطه مع فاونديشن دولتشي اند قابانا ، الفاونديشن حلو بس حسيت ماخذ سمعه اوفر ماقدر اقول سيئ بس ماحس وقعت بغرامه ..

مثل ماقلت اخلط شوي من هذا وهذا عشان اوازن اللون ،،

*اذا حابين ريفيو عن الفاونديشنات قولولي وابشرو ♥♥* 

للدمج استخدم فرشه ريل تكنيك او فرشه سيقما ، ماقدر احدد اي وحده افضل احبهم كلهم 

 ٥. ادمجهم بحركه دائريه ع كل الوجه ..

٦. بعدها استخدم كونسيلر من ميبيلين واضح من العلبه اني عاشقته لدرجه التنتيف ههههههه

"الي ع اليسار" اسمه

instant age rewind

الي عندي درجه ميديوم ♥♥

المفروض معاه اسفنجه فوق ، بس من ذكائي قلت الاسفنجه بتاخذ من المنتج كثيير وبنفس الوقت صعب انظفها وبتجيب لي جراثيم وهكذا فشلتها وخرب بشكل ما :| يعني عشان اخذ الكونسيلر لازم هوشه معاه فانتبهو!

احط الكونسيلر شووي تحت عيوني واوزعه بالبيوتي بليندر "بعد مابللها عشان تنتفخ"

٧. بعد ماخلص توزيع احط الهايلايتر من ميبيلين بعد اسمه

dream lumi touch highlighting concealer

هو خفيف فماراح يتكتل وفايدته ينور المنطقه تحت العين ، الي عندي درجته ivory

كثيير يقارنونه بتوش ايكلا من ايف سان لوران ، جربته زمااان بس حسيته عادي عندي الدريم لومي افضل وسعره رخيص جدا

طريقه الهايلات والي هو ابراز المناطق وتنوريها مثل الصورتين

اللون الغامق هو الكونتور يعني نحت الوجه

تقريبا نفس طريقتي ..

بالنسبه للكونتور للان ماستقريت ع منتج معين كل مره اجرب شي جديد فبس احس نفسي وصلت لدرجه راضيه عنها 

بالكونتور بنزل بوست اكيد ..

بس نخلص ندمج كل شي بالبيوتي بليندر وحتى الفاونديشن نرجع نطبطب عليه بالبيوتي بليندر

عشان يتساوى ويندمج عدل

٨. اخر خطوه تثبيت كل شي بالباودر ،،

هنا يرجعلك الاختيار اما تحطين او لا ..

اذكر كنت اتابع ميك اب ارتيست وتقول لااازم تحطون باودر لازم ودايم تكرر الكلام

ويلا ياشيوم حطي من الباودر لحد ماصار شكلي كيكي او مغبر ومتكتل واقول العيب بالمنتج او العيب من بشرتي :|

دايما وابدااا حطو ببالكم حلو تشوفون طرق متنوعه وتستفيدون وجررربووو

انا لما جربت احط باودر بس تحت عيوني عشان مايخطط الكونسيلر صار مكياجي افضل بكثييير

يعني الميك اب مو معادله رياضيه انتي جربي وشوفي شنو الاحلى عليك ..

الميك اب ارتيست الي تقول هذا صح وهذا غلط اعرفو انها اصلا ماعندها سالفه

بالميك اب مافي شي صح او غلط في شي ناسبني وشي ماناسبني

وهذا الي تعلمته وللان اتعلمه كل مره اجرب طريقه جديده ♥♥

نرجع لمحور حديثنا :$

اثبت بباودر سائبه او لوس باودر تحت عيني بس

حاليا استخدم الباودر من بير مينرالز اسمها veil

صوره اوضح لها من بوست قديم

سوري ماصورت كل منتج بروح :( بس وعد المره الجايه ، ان شاء الله كل شي كان واضح!

وبعدها اكمل بلشر واضاءه ع الخدود وروج اكيد

وبأخر خطوه ارش رشتين من فكس بلس ..

وبس!

النتيجه النهائيه بيكون فاونديشن مطفي لان الفاونديشنز الي استخدمتهم كلهم نهايتهم مطفيه .. بس ع الخدود شوي اضاءه ، حاولت ادور صور واضحه للوك بس قلت اكيد بيختلف من بشره للثانيه عشان كذا لازم تجربون!

ملاحظه اخيره ، مو شرط تشترون نفس منتجاتي بالضبببط حاولو تجربون من الي عندكم الفكره من البوست يعطيكم

الهام وتدربون يدكم وان شاء الله تصيرون افضل خبيرات لنفسكم

اذا حابين ريفيو لاي منتج من الي ذكرتهم خبروني بالكومنتس تحت او بالانستقرام وان شاء الله بسويه لكم ♥♥♥♥

عيد سعيد مقدما جميلاتي!