الأحد، يونيو 02، 2013

كل بنت تستحق تشعر إنها جميله ، ( أنا جميله♥ ) #تكنوشيك #غيمه٩




"نقضي وقت كثير بانتقاد الاشياء الي لاتعجبنا بأنفسنا والمفترض ان نقضي وقت اطول بان نقدر الاشياء الجميله فينا"
 بالفيديو هذا حمله دوف لنشر ثقافه (كلنا جميلين) ، فكره الفيديو "الافضل شوفوه جدا ملهم وَ مؤثر" بس الي مافهمه بشرحه له، فكرته كانت عن مجموعه بنات طبيعيات من عامه الناس ماجابو سوبر موديل او انسانه مشهوره ، جابو ناس طبيعين نفسنا ، قالو لهم يوصفون نفسهم عشان الرسام يرسمهم ، كل بنت وصفت نفسها ركزت ع عيوبها او الاشياء الي ماتحبها بنفسها! الرسام ماشاف اشكالهم بس يرسم ع الوصف ، وبعدين البنات اختلطو مع قروب ثاني وجابو الناس الي اختلطو معاهم الي اول مره يشوفونهم قالو لهم اوصفو لنا اشكالهم ، باخر الفيديو تقريبا حاطين صورتين ، صوره البنت الي وصفت نفسها وصوره البنت الي وصفوها الناس ، الصدمه انو كل وحده وصفت نفسها وهي اكثر شخص تعرف نفسها والنتيجه ماتشابهها ابدا ابدا ، الناس الي مايعرفونهم ووصفوهم طلعت صورتهم ادق واجمل!!!


الهدف من الحمله انو يبان للناس قد ايش احنا نقسي ع انفسنا وننتقدها ، شركه دوف تقول انو بس ٤٪ من النساء تعترف انها جميله وتشوف نفسها جميله! كثاااار منا نربط الجمال بالمظهر الخارجي ولبسنا! صح شي مهم جدا بس هو مو كل شي ، احنا صرنا ننبهر بالمظاهر قليل الي يطلع ع طبيعته ويكون واثق من حاله ، دايم نحط ببالنا "ايش بيقولون الناس عنا" هالكلمه تزعزع كل ذره ثقه بنفسك ، ليش نهتم لكلام الناس او نظرتهم لنا ؟ الناس الي راح تشوفك بتاخذ نظره عامه عن شكلك وشكل شعرك ولبسك ماراح تدقق بعيوبك الي انتي تشوفينها اكبر شي بالدنيا ، احنا نحط ببالنا ايش الناس بتقول عنا ، بس ليش مانفكر احنا شنقول لانفسنا ؟ احنا نستحق انو نحب نفسنا ونقدرها ، مافي شخص بشع ابدا ابدا ابدا ابدا ، في اشخاص ماتقدر تظهر جمالها او ماتعرف! جبت بعض صور للمشاهير :



يمكن البعض سوا عمليه تجميليه او شي ، بس الملامح ماتغيرت مره! الي سووه حطو مكياج مناسب ، لون شعر مناسبهم وبينو جمالهم بشكل بسيط ، كثير بنات تفكر بعمليات تجميليه خلونا نكون صريحين مع بعض وخاصه بالخشم "الانف" هههههههههههه محد يقتنع بخشمه ، مره جالسه مع صديقاتي *جالسين يقرون الحين عارفين نفسهم p:* وحده قالت خشمي ابي اصغره شووي ، احنا قلنا مجنونه انتي يجنن خشمك! قالت الثانيه لو ارفع خشمي شوي فوق بيطلع بيرفكت ونفس الشي هاوشناها وجيت انا بعد قلت ودي اخلي خشمي حاد اكثر قالو لااا خشمك كيوت هههه !! اشياء احنا نشوفها مو حلوه فينا بس الغير يشوفها جميله او مناسبتنا ، وشي ثاني .. انا ماشوف نفسي بيضا اشوف نفسي حنطاوي اميل للصفار ، بس كل شخص يقولي انتي بيضا انتي بيضا .. انا مايهمني اللون صراحه بس شي غريب انك تشوفين شي بنفسك والناس متفقه ع شي عكس تماما!! احنا نشوف شي ونخليه اكبر واسوء شي فينا وبعيون الناس شي طبيعي وبالعكس ممكن يشوفونه جميل !! عندي صديقه من الطفوله اشوفها اجمل بنت بالدنيا وكل شي بيرفكت فيها ، بس دايما تقول خشمي طويل خشمي طويل انا ماكنت اشوف هالشي صراحه ولا ادقق فيه انا اشوفها ككل جميله وكشخه ، من كثر تدقيقها صرت اشوف خشمها طويل :| ليه نبين عيوبنا للغير ؟ الناس بتشوفك انتي ككل ماراح تقسمك لخشم وعيون ومدري وش .. عشان كذا حبي نفسك حبيييييييها لانك (انتي) لان مافي (مثلك) ولانك (تستحقين الافضل) ، انتي جميله!! كثير نمر بحالات ضعف او مانحب شي بنفسنا عادي جدا جدا ، نحاول نغيره لو ماقدرنا خلونا نتقبله مو نهايه الدنيا!!!

مثل موضوع اسمرار الركب والاكواع ، كثير يعانون منه والكثير حاولو يعالجونه ومانفع معهم شي ، اذا انتي ماهتميتي بنفسك يمكن المشكله تخف بالاهتمام والترطيب ، بس اذا انتي انسانه تحب تهتم ورحتي لدكاتره كثييير مانفعك مو معناته نهايه الدنيا!! تقبلي المشكله هذي ، اذكر مره شفت منى مس بوتيك ، تكلمت عن هالمشكله قالت انو منتشره ومالها حل! رحت لدكتوري وسألته ، قال صحيح المشكله هذي منتشره بشكل كبيييير ومافي علاج فعال لها والنتيجه بطيئه وخاصه لو كانت وراثه ، ليش نتعب انفسنا طيب ؟ نحاول نحلها اذا جربتي اشياء كثيره ومانحلت خلاص تقبلي الوضع! وتذكري انتي مو حاله خاصه كثاااار بنات عندهم نفس المشكله والناس الي ماعندهم مشاكل بالاسمرار مايحمدون ربهم صدقوني جالسين يدورون عيوب بنفسهم بدال مايشوفون انها ميزه فيهم ههههههه ، هذي طبيعه الانسان يشوف الجانب السيئ دايما .. الشي اذا دققتي فيه بتحسين كل الناس تشوفه وتنتبه له ، انتي بتعيشين نفسك بدوامه وقلق ، بتحسين الناس كلهم مدققين ع مشكله معينه فيك ، وهم اصلا ولا انتبهو! انا لما اشوف شخص للمره الاولى اول شي انتبه له هندامه ، يعني كيف شكله مايهمني يكون كشخه قد مايهمني انو مرتب! وبعدين انتبه لابتسامته اذا هو شخص بشوش ومريح ولا ؟ ماعمري شفت بالبنت ركبها سودا ولا؟ هل خشمها طويل ولا قصير ، شفايفها صغيره ولا مليانه ماعمري انتبهت لشخص اذا اذانيه كبيره ولا هو سمين او ضعيف مايهمني الا انو مرتب وبشوش ، انا مو رايحه اناسب الشخص ههههههه ، اذا في ناس تهتم بالاشياء هذي وتدقق فيها بشكل مبالغ هم ناس سطحيين ، بس بالاول والاخير شنو راح يبقى للشخص الا شخصيته وانو يترك شي حلو بنفوس الناس ، انا ليش بهتم بشخص شايف نفسه ونفسيه وهو اكشخ واجمل شخص بالدنيا ؟

كلامي هذا مو معناته خلاص نهمل نفسنا ولا نهتم ولا نكشخ ولاشي ، الي اقصده انو عندنا مشاكل مانقدر نحلها .. نتقبلها نحاول مانتكلم عنها ، نخفيها نحطها بمرتبه اقل بالاهتمام ونبرز ونهتم بالاشياء الحلوه ، اهتمي بنفسك ببشرتك بلبسك بشعرك اكشخي حسي بانوثتك ، استمتعي بجمالك ، قولي لنفسك : آنا حلوه! نفسي تستحق اجمل الاشياء بالحياه!

الهدف من البوست انو ابين لكل بنت انو انتي حلوه ، في شي مو عاجبك بنفسك الناس ممكن ماتنتبه له اذا انتي ماسلطتي الضوء عليه ، احنا نكبر كل شي ونشيل همه بس مانهتم بالاشياء الحلوه والي نحبها بانفسنا! فلا تشغلين نفسك باشياء تافهه تخليك تفقدين المتعه بالحياه وتدمرين ثقتك بنفسك ، الثقه بتخليك اجمل وحده بالكوون ، الثقه الي ماتؤدي للغرور اكيد ، في موضوع تكلمت عن الثقه وكيف نقدر نبني ثقتنا بنفسنا ..


♡ How To Be Happy - كوني واثقه من نفسك كوني سعيده ♡


وشي ثاني ، احس الجمال والثقه بالنفس قيمه تعززينها بالبنت من صغرها ، يعني لو من واحنا صغار دايما اهلنا يقولون لنا "انتي احلى بنت بالدنيا" "انتي ذكيه" انتي جميله" خلاص بتكون قيمه بنفسها مكتسبه مثلها مثل اي عاده متعودين عليها من الصغر ، احزن لما اشوف ناس تعيب او تذم اشكال ناس .. صح ممكن مرات لسانا يزل او نقول شي من باب المزح بس يأثر ويحز بخاطر الشخص حتى لو كان مزح ، مو حلو نقول لبنت "يالدبه" "يالعصلا" "ام خشم" "رقبه زرافه" "ام كشه" اول شي هذي خلقه ربي ، ثاني شي ايش تستفيدين لما تضحكين ع بنت ؟ ماستفدتي الا انك قللتي من قيمتها وهزيتي ثقتها بنفسها وخاصه البنات الصغار وفوق هذا تضحكين ع خلقه ربي ! قال تعالى :"لَقَدْ خَلَقْنَا الْإِنسَانَ فِي أَحْسَنِ تَقْوِيمٍ" ترا شي مايضحك انو نخلي الي قدامنا لوحه نستلهم منها النكت عشان نضحك الناس ونسوي نفسنا الواو والفله .. 

اما الي يقول هالكلام مو لغرض الضحك بس لغرض الاستهزاء فهو انسان مريض وعنده خلل بعقليته ، انتي راضيه تكونين مريضه نفسيا ؟ اذا راضيه خلاص انتهت القضيه واعترفتي بمرضك.

طيب كيف نقدر نوقف الاستهزاء ؟ مره قال لي ابوي الله يخليه لي ، اذا احد تكلم بوجهك وقفيه عند حده ، اذا احد تكلم بظهرك طنشي .. وصارت قاعدتي ، الناس ماراح تسكت ويدورون اي شي يتكلمون فيه او يمسكونه عليك .. صدقيني لو متأكدين من كلامهم او هم ناس عندهم الشجاعه وعارفين نفسهم انهم صح بيجون بيقولونها بوجهك ، الي يتكلم بظهرك هذا انسان جبان ، قليل ادب وَ من الاخير ماعنده سالفه! اي احد يتكلم بظهرك طنشيه وشوفي الشي الايجابي بالموضوع انتي تاخذين حسنات ومررررررره محتاجين حسنات بالزمن هذا! وشوفي انك شخص مميز لانهم رضو يفرطون بحسناتهم عشانك ترا يحبونك هههههههه ، ونفس الشي ينطبق ع السب بالانترنت بما انو اغلب وقتنا صار عليه ، واحسه كثر كثر مدري شفي الناس انهبلت فجأه لو تلاحظون عمركم شفتو احد يسبك بوجهك وحاط اسمه ويوزره الحقيقي ؟ اغلب السب يجي بحساب جديد او يحط يوزر وهمي او يجي لاماكن ماتبين شخصيته ، هالفئه الله يهديها لو عندهم ثقه بنفسهم وبكلامهم يواجهونك بهويتهم الحقيقه لو هم عارفين انو رايهم هو الصح قالوها بوجهك ولايهمهم ، بس هالناس تغار ويس تو أكتشف انو ناس تكون مريضه لدرجه انو تسبك وتغلط عليك عشان انها "تغار منك" فليش تحزنين ع ناس كذا؟ هي فضحت غيرتها هذا واحد ، ثانيا تبان انها جبانه وخوافه ،، الشخصيات الضعيفه هذي لاتخلينها تأثر فيك لانهم هم اصلا فاضحين مرضهم فليش تهتمين فيهم!! والحل لهم البلوك البلوك بدون تبريرات او اخذ وعطا معهم البلوك ترا كف الكتروني ههههههههه.

الجزء الثاني: اذا تكلمو بوجهك وقفيهم عند حدهم! اي احد يستهزء فيك وقفيه عند حده ، اذا قالك "يالدبه" قولي طيب انا دبه انا عارفه عندي مشكله بس هذا مايسمح لك انو تخلي مشكلتي نكته تستمتع فيها ، اذا ضحكتي عليها ومشيتي بيجي غيره ويقول نفس الكلام ، فوقفي الكلام من البدايه ، حتى لو قالو لك يالزعول يالي ماتتحملين المزح ، معليش كل شي الا ثقتي بنفسي ليش نزعزع ثقتنا بنفسنا عشان تخلي غيرنا يضحك شوي!!! لازم يكون عندنا شخصيه ونعرف ندافع عن انفسنا لانسكت عشان خاطر فلان ومانخسر علان ، الي مايحترمني كشخص ماأحتاجه بحياتي ، وكثار يقول ممكن الكلام مايأثر .. لا الكلام اذا تكرر بيأثر ويأثر حتى لو ماحسيتي فيه راح يأثر فيك وبثقتك.

الموضوع طويل كثير .. من زمان بخاطري اتكلم عنه ، كثير منا يتكلم عن الجمال الخارجي والميك اب وغيره ، بس لو كنا من داخل مهزوزين عمره الشكل الخارجي بيكتمل ، الجمال الداخلي مع الخارجي بيخليك انسانه جميله ومتكامله .. 
الخلاصه:

١) انتي جميله جدا.
٢) انتي جميله جدا.
٣) انتي جميله جدا.
٤) المشاكل الي تهتمين فيها وتدققين فيها غيرك مو شايفها ، الناس تشوف الشكل العام ماتشوف كل جزء مفصول.
٥) لانخلي الناس تحكم علينا ونبين عيوبنا لهم ، الثقه بالنفس بتحليك بعيونهم واهم شي بعيونك انتي.
٦) حاولي تتخلصين من مشاكلك اذا ماقدرتي خلاص تقبليها وانسيها وابرزي الاشياء الي تحبينها بنفسك!
٧) الناس بتتكلم باشياء فيك ، لاتسمحين لهم ابدا ابدا .. التطنيش حل لو كان الكلام من وراك بس لو بوجهك وقفيهم عند حدهم.
٨) محد يشوف نفسه كامل لان محد كامل ، اهم شي حبي نفسك وعيشي حياتك ، استمتعي فيها وبكل لحظه .. لاتضيعينها ولاتخلين ثقتك بنفسك توقف لك بالطريق.
٩) الجمال الداخلي مهم مناصفه مع الخارجي ، اذا تقبلتي نفسك بكل عيوبك واهتميتي باناقتك ولبسك ونظافتك واسلوب حلو وصرتي انسانه بشوشه ، انتي انسانه جميله جدا جدا جدا.

وخلونا نحط ببالنا نقطه ، ترا الجمال يختلف من شخص للثاني ، يعني انا اشوف ناس جميله بس غيري يشوفها عاديه او حتى قبيحه!!! فليش نهتم بكلام الناس ، كل شخص وذوقه والي يشوفه .. اهم شي انا شنو اشوف!

بالنهايه ، انا احب اصابعي الطويله ، احب شعري الطويل لو انه ينفش مرات بس احبه لانه متحملني ، احب شفايفي احب عيوني احب خشمي لانو قاله عنه كيوت p: احب جسمي حتى لو محد يشوفه بيرفكت بس انا احبه كيفي ههههههههه احب خدودي ، احب حواجبي الخفيفه لان انقدر ارسمها براحتي ، احب لون بشرتي! اكتشفت انو احب اشياء كثيره باختصار احبني كلي :\!!!!
اخذ الشي فتره طويله معاي انو اتقبل كل شي فيني كل شي احبه عيوبي احبها قبل مميزاتي ، اكتشفت انو كنت اشوف نفسي شي والناس يشوفوني شي ثاني! احب لما الناس اول كلمه يوصفوني فيها "كيوووت" ماكنت اشوف هالشي ابدا .. ليش ؟ لان كنت مشغوله اشوف الاشياء الي مو متقبلتها فيني ، بس اكتشتف لااا عندي اشياء احلى واحلى بكثيير مما كنت اتصور او حاطه ببالي ، في اشياء ابيها تكون افضل صح بس هذا مايمنع انو احب نفسي الحين بكل حالتها ، لاني اذا حبيت نفسي ووثقت فيها بنجح وبحقق طموحاتي وبكون راضيه عن ذاتي واهم شي بكون سعيييييده ، وانتي ايش تحبين بنفسك؟

هناك 80 تعليقًا :

  1. انتي جميلة وكلامك جميل ومره اثرتي فيني
    الله يسعدك وين ماتكونين ياجميلة

    ردحذف
  2. أوه ماعرف ايش أقول بس انتي مرا يناس وكل شي قاعده تقوليه أقول معاكي من ججد! الفيديو حق دوف مرررا كان يجنن ومن جد خلاني اعرف انو الناس محايشوفوني زي ما أشوف نفسي ، انو ٤٪ من النساء يشوفو نفسهم جميلات صدمة !!! كنت احسب بس انا اشوف نفسي مو حلوة خخخ بس خلاص مافي احد بيرفكت أنا اعرف مستوى جمالي واعرف عيوبي والحمدلله .. الناس الي تعلق بدبه ولا أم خشم ولا اي شي مررررررا حرام بالذات لما يكون طفل مسكين ولد اختي وزنه زايد شوي تخيلي عمره ٦ سنين ومتعقد من جسمه ويبكي يدعي انه ينحف ويحرم نفسه من الأكل مع ان الموضوع وراثي لكن عشان أولاد جيرانهم يتريقون عليه :( المهم انفلت مدري وين بس بوست جمممميل يعطيكي العافية لازم كل وحدة تقدر جمالها صح في بنات كثير يشوفوا نفسهم مو حلوين بس والله الين اليوم شفت وحدة ينقال عنها بشعه! مافي بنت بشعة دائماً البنات جميلات وكلنا جميلين وانتي اجملنا❤

    ردحذف
  3. ماا شاء الله كلام جدا مؤثر ، و نبهتيني على حاجه مررا مهمه " مدح الأطفال "
    فعلاا ما كانت ببالي ♡

    البوست أكثر من رائع ، ربي يسعدك ياا جميله ♡♡

    ردحذف
  4. صحيح ياحلوه صدقتي ..أهم شئ الثقه بالنفس وتسلمي على هالبوست

    ردحذف
  5. صدقتي ياحلوه ♡. وتسلمين ياقلبي ..

    ردحذف
  6. انتي مشالله شخصيه مميزه جد اشكرك ع موضوع زي كذا بيفيد كثير من البنات وزي ماقلتي لو ماكانت ثقتك بنفسك عاليه عمرو احد مابيحترمك لانو انتي مو مقتنعه بنفسك وجد شكرا قورقجس ع الموضوع الجميل من تقدم لتقدم ياعزيزتي ❤❤❤

    ردحذف
  7. ياااجممالك يختي انتي انسانه تهبلين وتفتحين النفس احببك في الله ♥♥

    ردحذف
  8. كلامك جميل ماشاء الله
    الله يسعدكك ويوفقكك ياجميله ❤❤❤

    ردحذف
  9. رائع ماشاء الله عليك
    ان الله لا ينظر إلى صوركم ولا إلى أجسامكم
    ولكن ينظر إلى القلوب التي في الصدور
    فلنحاول نرضي ربنا
    لان إرضاء الناس غايه لا تدرك
    الى الامام

    ردحذف
  10. جداااا اثر فيني حكيك
    من جد احنا نتعب انفسنا ونفسياتنا عشان ناس مانسلم منهم مهما عملنا
    شكراا على كلامك اللي كله ايجابيه ♡♡

    ردحذف
  11. بوست جميل وطالع من القلب لذلك وصل للقلب.
    كلامك صحيح ١٠٠٪ واعجبني كلام ابوكي بجد صادق عن اللي يتكلم من ظهرك لاني ساعات ازعل واحط بخاطري اذا احد تكلم عني.

    كمان اعجبني الفيديو صحيح حكمنا ع انفسنا يكون قاسي ونركز ع العيوب اكثر مانشوف الشغلات الحلوه اللي فينا.

    شكرا حبيبتي.. ربي يسعدك

    ردحذف
  12. كلامك مرا حلو ومفيد وكثير بنات يحتاجون يتثقفون من هالناحيه
    اشكرك اشكرك اشكرك فيه نقاط فتحتي مخي عليها ♥.♥
    الله يكملك بعقلك وكيوتّك ♡

    ردحذف
  13. انتي وردة يفوح عطرها كل ماكتبت بوست هنا ،،، أحلى تحيه لاحلى قورجس .. انتي جميله جدا جدا شكلا ومظهرا

    ردحذف
  14. انتي انسانه جميلللللله جميله جميله كلامك واسلوبك وتعبك وتفكير وكتابتك هذي عشان تساعدين كثير من البنات الي يعانون هذي تدل على جمال روحك وقلبك وكل ♥♥♥♥شي فيك الله ىيسعدك حبيبتي ♥حب كبير لك

    ردحذف
  15. انتي وردة يفوح عطرها كل ماكتبتي هنا ،، وجميله جدا جدا شكلا ومضمونا

    ردحذف
  16. يسعددددك ربي مممرا اثرتي فيني وكلااامك عين العقل
    يسلمووووو ي قمررة

    ردحذف
  17. وربي دمعت عيوني من هالتدوينه ربي يسعدك ياقورجس

    ردحذف
  18. جماااال ي ناس جماااال الله يسعدك ي شيخه فين ماتكوني

    ردحذف
  19. بالفعل كﻻمك كله صحيح وانا أتفق معك %100 بكﻻمك ان الناس مابتنتبه وتدقق على عيوبك بتنتبه على الأشياء الجميله ودا الشي حصل لي شخصيا .. وربي يسعدك ياعسل

    ردحذف
  20. يختي أنتي كميه جماال ❤_❤
    وكلامكِ أجمل وأجمل ، تأثرت بأحرفكِ الذهبيه ♡
    يسعدلي هالانامل ، ربي يوفقكِ حبيبتي واستمري في طرح هالمواضيع الحلوه ♡♡♡
    ربي يسعدكِ وين ماتكونين ❤🌹

    ردحذف
  21. الله يجزاك خير .. كلامك غاية في الروعه ..

    ردحذف
  22. واااو رهيبه ياخطيرة جزاك الله خير
    وكل كلامك واقع بس لا يطغى على الشخصية ويدخل فيها التكبر
    ودمت سالمة

    ردحذف
  23. كلامك جميل ينطبق علي مشكلتي مو قادره اتقبل نحافتي
    جسمي مو قابل للسمنه ومرررره محبطني :/

    ردحذف
  24. مشكوره ويعطيك العافيه انا فعلا اعاني من هالمشكله احس اني مو جميله لكن الناس تقولي انتي حلوه مافيك شي لكن احيانا يجيني هالشعور لان اسناني متلخبطه ومسويه تقويم حاليا لكن ابتلشت بوحده من قاريبي دايم تقولي كذا انتي مو حلوه واذا رحت انا وياها السوق انا عاجبني شي تجي تقول هذا مو حلو انا احلى منك يليق علي اكثر مع اني مااستهزأت فيها ولا قلت لها شي مو عارفه شلون اوقفها عند حدها وانا كشخه واعرف البس وانيقه لاقصى درجه وجسمي حلو بس هي دايم تكسر في خاطري انا من النوع اذا احد سب او انتقدني اسكت لان اخاف ابكي قدامها وتستانس زياده ودي تساعديني ومشكوره

    ردحذف
  25. أزال المؤلف هذا التعليق.

    ردحذف
  26. ياختي يازينك انتي واميره وجوجو تخلون الواحد يحب نفسه ويعشقها وتزيد ثقته بنفسها بدون اشياء تكلف
    عكس بلوقر ثانيه تابعتها اسبوع وكرهت نفسي من كثر ماتنتقد وتتهزا بالمشاكل اللي نعاني منها

    ردحذف
  27. مشكوره على النصييحه الحلوه بجد انك ابداع انتي وجوجو !!ربي يخليكم لنا

    ردحذف
  28. مشكوررررررره الله يعطيك العافيه

    ردحذف
  29. يَ اللّه إنتِ شي جدا ً جميل ، جميل ، جممميل . .
    هالتدوينه أنعشتني بشكل ما تتخيلينه ، أحبني مثل ما أنا عليه ليّه أتعس نفسي و اركز ع عيوبي و انا عندي إيجابيات كثيير .
    و علئ كلامك انا صار معي نفس كلامك كل مره آجلس مع صديقاتي او بنات خوالي او ايا ً كان يبدئ موالي انا دبه مو راضيه عن جسمي كانوا يعارضوني ححرام واللّه حلو ، اوك انا عارفه جسمي مو بيرفكت بس ما كان مثل ما انا متخيلته عارفه كيف ؛( واللحين صاروا ينادوني دبدوبتنا كان يضحكني بالبدايه بس جد ما تتخيلين شكثر محطم ومثل ماقلتي هي غلطتي اني خليتهم يتصورون هالشي فيني :')

    كلامك ما في منه ححبيبتي ، ربي يسعدك ♥♥
    شكرا ً كبيره '') نحبك واللّه ()

    ردحذف
  30. انتي خلتيني احب كل شي في حياتي كلامك موثر ورفع معنوياتي احبك في الله

    ردحذف
  31. هالموضوع جاء بوقته الحين انا اهتم بنفسي الحمدالله من كنت صغيره واحب الزين بس اطلع فيني عيوب الدنيا مثلا الناس يحبون عيوني ويقولون وسيعه وجميله بس انا اشوف العكس وماحب حواجبي الخفيفه واتعقد بالرسم وكل شوي اقول لازم انزل كم كيلو وانا حيوانه ماسوي رياضه يعني اسب نفسي ههههههههه امي قالت لي قبل ارسلي رسائل ايجابيه لنفسك كل ليله قبل تنامين وحبي نفسك واهم شىء يابنات ابعدوا عن الغرور لانه يحرق صاحبه قورجس شكرا لك ياجميله الجميلات انا احبك ياختي واعلان دوف شفته من قبل وجد تاثرت فيه

    ردحذف
  32. المشاكل اللي فينا . نعدلها ، نحاول نعدلها
    مش بس نوقف الناس عن المسخرة ، كمان لازم نهتم عشان محد يتمسخر

    وشكراً :)

    ردحذف
  33. قبل فتره اختي قالتلي على هالمقطع ورحت شفته تدرين دمعت عيوني من جد ؟
    اشياء كثيررره كنت اكرهها بنفسي وتعلمت اتقبلها
    ولما وريت امي المقطع قالت من جد الانسان يشوف نفسه اقل بكثيررر من ما الناس تشوفه
    قلت بنفسي بروح لناس اثق فيهم وبسألهم كيف يشوفوني بدون اي مجامله
    ماتتصورين قد ايش صدمني وصفهم ! خصوصاً الشغلات اللي مااحبها مدوحها وعاجبتهم وترا لوماذمو شغلات بقول يجاملون هههههه
    وبخصوص الركب ترا صادقه هههه كنت اكرهه ركبي ومستحيل البس الا تحت الركبه او البس تايت لوكانت حد الركبه
    مع انه ماعندي اسمرار بس اكره انهم مليانات شوي احب الركبه يبين عظامها مررره ، مانخلص ابد ههههه

    وتلاحظين شئ الانسانه اللي واثقه بنفسها سبحان الله تشوفينها احلى بكثيرر من اللي موواثقه يصير لها طله
    وحده من صديقاتي قالت مره واحنا نتناقش بموضوع الثقه
    اذا فكرتي بشئ موعاجبك بنفسك فكري على طول بشغلتين او حتى ثلاثه تحبينها بنفسك لاتتركين الاشياء السلبيه تأثر فيك

    اممم بالنهايه انا احب طولي واحب تقاسيم جسمي واحب كثر شعري ولمعانه واحب رسمة عيوني ورموشي واحب خشمي "ترا كنت اكرهه والحين احبه هههه"
    اوووه حسيت بثقه عجيبه :$ هههههههه

    يعطيك العافيه على هالبوست بجد بجد جممممميل ويحسسك بالثقه 3>

    ردحذف
  34. حبيت البوست ي كيوت ♥♥
    فعععلا كلامك اقراه وكل شوي اقول بنفسي فعلا.
    خاصة بنقطة ابرازنا لعيوبنا.
    احيانا تنصدمين بجد انه م احد كان ملاحظ.
    مممم انا احب فيني عيوني م شاء الله. ♥♥
    وعظمة خدي كمممان احبها مع انها مو مميزة بس احبها.

    ردحذف
  35. Wow! thats really amazing post <3 im so glad i read it all
    We all have the same problem :) thinking about too much and wishing to be someone else , made us all depressed for no reason.

    The way you see yourself is way different than what everybody sees you!
    I really really REALLY hate my eyes lol like whatever i do to them they just never be the way i want it.

    But then I remember that there's so many people that wish they could see :( After that i just stop complaining & feel stupid


    Thanks again for the amazing post :)

    ردحذف
  36. كلام جميل جداا
    هذا ثاني بوست اقراه لك
    اسلوبك يدخل القلب مباشره تبارك الرحمن ♥

    ردحذف
  37. روعه جميييييل

    ردحذف
  38. الصراحه كلامك جميل ومؤثر وحبيت نفسي اكثر وزادت ثقتي بنفسي 3>

    ردحذف
  39. رائع حبيبتي ,, من فترةوانا اقول بكتبلك بس بصراحة اتكاسل فيديو دوف شفته من فترة وكثير اعجبنيبصراحة معبر جدا..
    وفيديوات jillian 30 days challenge بصراحه اكثر من رائع الحمدلله جسمي حلو لكن الاهتمام احلا ويحافظ على الجسم ويعزز الثقه بالنفس باقي لي 3 ايام وادخل ب المرحلة الثانية شكرا انك عرفتينا على هالفيديو ..
    بموضوعك اعجبتني كلمة (البلوك كف الكتروني ) ترة مرة صحيح بعض الناس يحتاجون هالكف .. باختصار الموضوع رائع ويعزز الروح العاليه والثقه بالنفس انا احزن على الي ثقتها معززة بسبب انها سمعت كلام فلانه .. لا يوجد انثى بشعه ابدا صدقوووني اي وحده منا تهتم بتتغير وتصير احلا الحلوات..
    دمتي بخير

    ردحذف
  40. تدوينتك درس في الحياة في الطاقة الايجابية في الثقة في الجمال..طيب انتي اكوووت شي في الدنيا وخشمك جامد أووي...حبيتك

    ردحذف
  41. اصفق لك ؟! حرام شوي بحقك
    شي فضيع , جميل , ممتع , ملهم , مبدع ... كلامك

    احب شعري , و عيوني , جسمي , و اظافري الي بس تتكسر , و قصري , و لون بشرتي , و كلللل شي

    الله يبارك فيك

    ~ توافيق

    ردحذف
  42. ودي أني أحب نفسي و شكلي
    بس مشكلتي م أحبهم :'(
    و أتأثر بأي كلمه تقآل لي :(
    و دآيم أحطم نفسسي :'(

    ردحذف
  43. وااااو كلامك مرره حلو ™* يـسـلمَـٌٍوٌٍوٌٍوٌِوٌِ ✆*

    ردحذف
  44. كلامك روووعه حبيتك وانا من متابعينك

    ردحذف
  45. انا نبهتني على كم شغله بحياتي وبصراحه انتي روووعه وصديقاتك كمان بجننو

    ردحذف
  46. انا كتير حبيت مواضيعك نبهتيني على شغلات وغيرتي فكرتي بكتيير شغلات ما كنت منتبه الها يسلموووو كتيررر

    ردحذف
  47. كلامك مراااا مرررا جمميل
    وانا اتفق معاك في كل كلمة قلتيها
    الفديو حق دوف فكرته مرا جميلة
    وعجبني كلام ابوك ربي يحفظه لك
    انتي قلتي::اذا تكلمو بوجهك وقفيهم عند حدهم!
    ^^طيب ايش لو كانت امي =(
    ماما دايماا تعيب عليا عشاني دوووبة =(
    وكل ما شافت وحدة نحيفة تقول ابغاكي تصيري زيها
    احاول اطنش كلامها واحاول اني اخفف وزني بس ما قدرت...=(
    ربي يوفك =) 3>

    ردحذف
  48. ربي يسعدك ياقورجس ومعك بكل حرف قلتيه والحمدلله انا واثقة بنفسي وحتى عيوبي اشوفها حلوة بس الحمدلله مو غرور وكله من فضل ربي والثقة بالنفس أهم من الجمال لأنها تخلي الكل يشوفك جميلة وجذابة ...

    ردحذف
  49. أنا أحبك أحبك أحبك
    انتي انسانة عظيمة ماتتصورين تأثير كلامك علي o_O
    أول مره أكتب رد الموضوع اصاب مقتل
    جاري تعديل تفكيري p:
    أحب نفسي وأحبك بعد
    شكرا

    ردحذف
  50. شكراً من قلب
    ابغى اطلع كلام ف قلبي لانه من يومي و أنا إنسانه ما اطلع ضعفي لأحد.
    من كنت صغيره وانا إنسانه مهزوزه ثقتي بنفسي كله من العوامل الخارجيه المخيسه
    لما وصلت الثانوي عرفت وتعلمت معنى الجمال الحقيقي زي ماقلتي (إذا شفتي نفسك جميله بيشوفونك الناس جميله +حب النفس) وفهمته زين وثقتي بنفسي زادت وأنبنت زين محد بناها إلا أنا بنفسي بعد فتره واحد من خوالي قعد يستهزئ في خشمي كل ماشافني قعد يتكلم عنه ويضحك ويضحك الي معه (خالاتي وخوالي) ماعمري أبدا أبدا شفت خشمي كبير أو شين وكنت اطنش كلامه لأني عارفه أنه شئ مو صحيح طبعاً مقدر أرد عليه لأنه خالي وأمي بتتحسس.. مع مرور الوقت كلن صار يعلق على خشمي كلهم!!! كلهم أقتنعوا بإن خشمي كبير وإني شينه صاروا ينادوني بأم خشم ؟ حتى عيال خالاتي الكبار متزوجين وغير متزوجين يسموني أم خشم.. لما كلن يناديك كذا ويتكلم عن عيب فيك حتى وأنتي بكامل أناقتك وكشختك.. ماتلقين إلا كلام يجرح منهم!شئ يقهر.. فعلاً التطنيش أبدا مو الحل لأنه فعلاً كلامهم أثر علي و على ثقتي لدرجه إن ثقتي نزلت ف الأرض ما عاد صرت أشوف نفسي جميله إذا قعدت اناظر نفسي ف المرايه أشوف شخصه بشعه مع خشم كبير.... كلامك رجع لي أمل إني جميله دموعي نزلت وأنا اقرأه! شكراً ♥

    ردحذف
  51. صراحه كلامك مفففيد
    بمعننى الكلمهه
    وبما انو انا صايره اركز على حبوبي الي بوجهي الخفيفه
    وماركزت على شي ثاني
    كلامك قوى ثقتي
    شكرا قورجس عالبوست الددميل
    انا مناير متابعهه بصممت تامم *

    ردحذف
  52. بس انا عندي مشكله مااقدرت اتخطاها
    اللي هو لوني انا حنطيه بس أحس كل من حولي يحطمني حتى امي حبيبة قلبي لازم كل فتره خصوصا بالمناسبات تلمح بالكلام وتدقني بسماري
    ومره وحده من صحباتي بيضاء ماشاء الله مره وتنخطب كثير قالت لي مره انتي لو تموتي ماحتنخطبي مع العلم اني حلو ه بس هذا الشئ االلي هزني ماخلاني اتهنا بجمالي

    ردحذف
  53. قورجس انتِ شي جمييييييل :" <3
    و فعلاً الثقه بالنفس اهم شي وقبل كل شي :)

    ردحذف
  54. مشكورة على الكلام الحلو وي

    ردحذف
  55. اااءء شكرا شككرا قورجس شككراقورجس الله يزرقك الجنة ويسعدك دنيا واخره.
    كلام يعزز الواحد ويزيد الثقة بالنفس ويفرح ويغير كثير اشياء سلبية فينا..
    مدري وش اقول بس ششكرا وربي يسعدك

    ردحذف
  56. ااااءء شكرا شككرا قورجس الله يسعدك.والله كلامك مرة جميل
    يعزز الواحد ويزيد الثقة بالنفس ويفرح ويغير كثير اشياء سلبية فينا مدري وش اقول بس ششكرا وربي كلامك اثر فيني.

    ردحذف
  57. فعلا الشخص لازم يكون واثق ينفسه وحتى لو كان فيني عيوب مثلا خشمي طويل الخ لازم ماتعطون الاشخاص السطحين فرصة شكرا قورجس

    ردحذف

  58. قورجس يا جميله ، كمية جمآل تفيض من هنآ ..

    الفيديو فكرته جميله صرآحه بس مآ أستغربت من النهايه ، لأن صديقتي قالت لي معلومه ان الشخص نظرته لنفسه اجمل من نظرة العالم له هالشي حسيته مع الايام صحيح ..
    مآ أكذب عليك اذا قلت لك انا احب نفسي بشكل كبير لدرجه ما افكر في عيوبي ، عندي عيوب بسيطا بس انا ما عمري فكرت فيها كثير بس اهتم كيف اظهر نفسي بشكل اجمل ، الاشياء الي حابه اغيرها في نفسي من باب التغير فقط و البحث عن مظهر اجمل ما عمري فكرت احسن من عيوبي او اخفيها ، ما ادري هاذي ثقه في نفسي او غرور او ايش ..

    انا عن نفسي احس عندي ثقه كبيره في نفسي من الداخل و في اسلوب حياتي و طريقتي للتعامل مع الامور ، دايم اشوف نفسي صح مهما كان الي سويته احسه صح ، وكثير ناس يشوفوني مغروره و شايفه نفسي لاني جميله و مزيونه ع قولتهم ، انا مو حابه الناس تنظر لي كيذا اني مغروره بجمالي لأ وما ادري وش الفرق و وجه الشبه بين الثقه بالنفس و الغرور ،

    وانا دايم ابحث كيف اطر من نفسي بالشكل الداخلي و الخارجي و هالشي لاني اطمح اكون ذا بيست في كل شي و ما اشوفه غلط ..

    كلمة ابوك جدآ مثاليه ، الي يتكلم بوجهك و قفيه عند حده و الي يتكلم بظهرك طنشيه ..
    انا عندي وحده بعايلتنا ناشبه لي في كل شي دايم تتكلم قدام العالم ان اشيائي مو زينه و اشيائها افضل ، ولمن تشوف احد يمدحني بشغله او يذكر شي سويته حلو على طول تنط تقول وانا بعد زيها و انا بعد بس افضل منها و كيذا ، انا دايمآ الي يتكلم في ظهري اطنشه حتا الي يتكلم بوجهي لان انصدم صراحه من وقاحته و ما عاد اعرف ارد … نفسي اتعلم كيف ارد ع الناس الوقحه باسلوب مبطن مثل الي يقول مزحه بردحه ..

    ردحذف
  59. اهنيك على البوست الاكثر من رائع
    فعلاً كل انسان جميل لكن بطريقته الخاصه!
    انا كنت اشوق نفسي جميله و اعترف اني قصيره -طولي 150- لكن ما كنت اهتم مره!
    بس بالسنه الاخيره صديقاتي صاروا يضحكون على قصري و ما تصدقين قد ايش تعقدت و انهز ثقتي بنفسي لحد الان الله وكيلك حتى رحت للدكتور قلت ابي اصير طويله ضحك علي و قال خلاص انتي عمرك 18 ما راح تطولين لازم تقتنعين في نفسك و القصر مو عيب بالعكس ميزة ..
    بعدين حسيت بتأنيب الضمير لان فيه ناس مبتوره رجولهم و ناس معوقين مت يقدرون يمشون و انا اتحطم على طولي بسبب كلام الناس!
    لازم اتعلم ابني ثقتي بنفسي من جديد خصوصاً اني على وجه ادخل الجامعه حياة جديدة مختلفه بالنسبة لي و ان شاء الله تكون بداية حلوه لي :))

    كلمة شكراً ما توفيك حقك فعلاً :")
    الله يسعدك و يوفقك دنيا و آخره :*

    ردحذف
    الردود
    1. انا زيك بالضبط طولي 141 فقط وبسن الجامعة ما اخفيك الموضوع جدا حساس بالنسبة لي واتمنى اطول شوي لاني جدا قصيرة, بس هذا مايمنع اني احب نفسي واكون انثى والبس واكون عندي ثقة بنفسي واختياري للملابس دايما بمعاير معينه تناسب قصر قامتي + تبرز معالم الانوثة عندي ودايما الي حولي يقولون لي انتي ذوقك مختلف ومميز وبرستيج ولك لمستك بكل طلة تلبسينها والسبب اني حبيت جسمي ونفسي وقصري وركزت على انوثتي واخترت اللبس اي يناسبني وصار شكلي مرة كيووووت حبي نفسك وتنحل مشكلتك .

      حذف
  60. ياناااااس عليك
    كلااااااامك يجننننن ما شاء الله
    عججججبني كثيييييرررررر
    وفعلاااااا انا جمممممميللللله
    حبيت نفسي كثير بعد كلااااامك
    ومسسستحيل اقول لاحد عيوبي فعلااااا لان لو قلت لهم بينتبهووون لها اكثرررر
    نحببببك واستمري يا جمييييلع
    ربنا لا يحرمننننااااا منك

    ردحذف
  61. كثيييير اتأثرت بكلامك
    ههه الحين اعرف أني جميلة لول
    عندي مشكل واحد هو الي يححطم ثقتي في نفسي هو جبهتي الهريضة
    يعني لازم انزل الغرة طول حياتي :((
    بس بعد موضوعك راح اتعلم ابني ثقتي في نفسي من جديد :))
    عن جد مشكوة الله لا يحرمنا منك

    ردحذف
  62. يعني بجد سوالفك جميله وماتنمل هذي ثالث مره يمكن اشوف هالتدوينه هههههه اتوماتيك اكمل مقدر اسحب P: يعني كذا كأني جالسه مع صديقتي الصدوقه او اختي كلامك قريب للقلب وكذا , حلو اسمك صار يجيب لي السعاده والأيجابيه بدون مبالغه حاليا ارتب ديكور غرفتي
    مصره ادخل اسم قورجس ع مكتبي وكذا هههه لأنه بتذكرك وبتذكر كلامك احيانا الشخص يحتاج لرشة ايجابيه وكذا
    بجد محظوظه إني اتابعك من زمآن تجننني , فرحت كثير لما وريتك هالمقطع ع تويتر وعطيتيه اهميه بإنك تخصصي وقت وتعرضيه وتكتبين هالكلام الي يجننننننن , كم مره قلت يجنن بجد احبك في الله احب شخصيتك وتفكيرك ربي يوفقك ويسعدك ويحقق لك كل امنياتك يارب ويخليك لنا ولأحبابك يآرب *قلوووووب من هنا لبيتكم * واسفه ع هالبربره بس من قلب ههههه

    اختك / ميامين

    ردحذف
  63. كلالامم جميل ()

    ردحذف
  64. الموضوع حطيته بالفيفوريت من كثر ماهو جميل
    الله يسعدك يااارب

    ردحذف
  65. الله ي قورجس.. والله اسرتي فيا و كلامك اداني قوة ايجابية و دافع قوي انو ما ادي اي مجال للناس و الافكار السلبية تاسر بسقتي في نفسي ♡
    والله كلامك صحيح 100% و انا من النوع اللي كانو يعانو من مشكلة الحياء الزايد و الخوف من الاختلاط مع الناس.. و تقريبا تقريبا اتخلصت من نص المشكلة و الى الان انا ب أجازف حتى اوصل للهدف لخاطر ارجع سقتي بنفسي و اخليها اقوى و اقووى♥♥♥
    ما شا الله عليكي تجنني و كلامك اروع و اروع والله منجد مو عارفةة اش اقولكك!

    انا احب نفسسي *من غير انانية* انا حلوة و انا انسانة اجمل و احلى من جوا♥♥♡
    االله يعطيكي الف عافية ع البوست القروجس دا يا قورجسية>> كيف بس ههههههه

    واخيرا، الله يسعدك حبيبتي فين ماتروحي♡♡♡♡♡♡♡♡♡

    ردحذف
  66. يسعد قلبك ي جميلة
    سطور مبطنه بالجمال
    اشكرك

    ردحذف

  67. شعرت بسعادة من قراءة كلامك
    انا كمانت كنت ما أحب نفسي وخاصة جسمي ما كان عاجبني وكل شوي اذكر عيوبي
    بس دحين بعد ما قراءة كلامك حبيت نفسي اكثر
    وراح ابرز جمال اكثر وبأذن الله راح اصلح عيوبي بقدر المستطاع
    شكرا لك اختي

    ردحذف
  68. كلامك جمييييل جداَ الله يسسعدك ..

    ردحذف
  69. كلاااامكك مراااا جميييل ومؤثر اسعدتيني الله يسعدكك ..

    ردحذف
  70. كلامك صح ألاحظ كثير بنات ما عندهم ثقة بنفسهم و دائما متوترين و يبينوا عدم الثقة بتصرفاتهم ، اذا مو عاجبك شي معين بشكلك غيريه ! و اذا نفسيتك تعبانه و مأثره عليك ريحيها ! انا تطرقت لهنقطة في بوست في مدونتي و كتبت رأيي بصراحه
    http://iamruaa.blogspot.com/2015/03/how-to-indulge-yourself.html ، عيشي عمرك و تدلعي و حبي نفسك ترا محد بيحبها أكثر منك !

    ردحذف
  71. دايما تقولين الشي اللي ودي احد يتكلم عنه و اذا ابي اي شي او احتاجه اجي لمدونتج .. كل مره ادخل لها لغرض معين وما اطلع منها الا وانا من موضوع لموضوع جد انتي ملهمه ماشاءالله ...♥♥

    ردحذف
  72. نقطة جداً مهمة:

    فعلاً الثقة تنزرع من الصغر
    فعلاً البنت الصغيرة تتأثر جداّ بالكلام الجارح عن شكلها
    والشي يبقى في قلبها للكبر و تتذكرها في كل مرحلة في حياتها
    فعلاً لسان الناس المريضة من أقوى الأسلحة المدمرة للذات.
    و اللي لازم الواحد يتفاداها.

    ردحذف
  73. فعلا اهم شئ الثقه بالنفس تسلمى علي هالكلام المفيد

    ردحذف
  74. بقول لك معلومه.. من قال الركب مايتغير لونها
    جربي تستخدمين تونيك الشعر من فازلين لركبك وخليه مرطبك اليومي.. بيومين ركبك تصير بيضاء..

    اذا ماتبغين شي صناعي وتبغين شي طبيعي.. تدهني بشي ثقيل زي زيت الجلسرين او زيت البرافين.. او زيت جوز الهند.. يعطيك قلو ولمعه زي الاجانب...

    بالنسبه للهالات .. المويه توخرها.. اشربي ٧ اكواب يومياً لمده اسبوع.. وبشرتك بتصير فاتحه بدون هالات

    ردحذف
  75. فعلا كلامك صحيح وجمبل , انا قصيرة جدا ومبسوطة بقصر قامتي والي يوفني يقول شكلي اصغر بكثير وكيوووت , الوصول للرضا التام عن الذات رحلة طويلة ومتعبه لكن ممتعه جدااا جدا الحين انا مبسوطة عن شكلي وجسمي الحمدلله بعد ماحبيت نفسي صرت اعرف الميك اب المناسب لسمار بشرتي واللبس المناسب لقصر قامتي وصرت كلي انوثة ولله الحمد . حبي نفسك اولا عشان الناس تحبك او زي مايقولو if you don not love yourself, who else will ?
    اذا انتي ماتحبي نفسك مين راح يحبك ؟؟؟ انا فترة مراهقتي كانت جدا متعبه مليانه مصاعب وعدم رضا عن لون بشرتي وشكلي وشعري وقصري وجسمي الرشيق بزيادة ههههه الحين اشوفه شي جدا ممتع لانه يشغلني اني اسوي رياضه اكون صحية اشعر بالرضا عن نفسي فعلا ( مو لاني صرت بيرفكت ) لا ابدا بس راضية عن نفسي لاني اشتغل على نفسي احبها واكرمها واكافئها .. شكرا قورجيس انتي فعلا ملهمة وتفاصيلُ سعيدة .. اتابعك عالسناب والمدونة والانستا وكل مكان :) كيب قونق قيرل

    ردحذف
  76. كلامك منحني طاقة ايجابية عجيييبة.
    سأحكي لكم قصتي. منذ ان كنت طفلة صغيرة وانا عرفت بالطول, كنت دائما اطول طالبة بالصف واطول من المعلمات احيانا. و بالطبع كعادة الاطفال, كانوا يسخرون مني ويطلقون علي الالقاب "يا طويلة يا هبيلة"" يا زرافة" الخ واصبحت متعقدة من طولي وكرهت نفسي وكرهت كل شي فيني, المؤلم بالموضوع ان السخرية لم تكن تأتي من الاطفال فقط بل حتى اهلي كانو يسخرون مني احيانا."لا تمشين مع بنات قصار شكلك غبي,امشي مع ناس بطولك" أتصدقون ان هذا الكلام صدر من امرأة قد تجاوزت الاربعين وخلفت ابناء؟ ومتزوجون ايضاً؟؟ قد لا نلوم الاطفال حين يسخرون من غيرهم ولكن المصيبة أن يوجه البالغون كلاماً محطماً ومقززاً كهذا لطفلة لم تتجاوز ال 7 سنوات!!!!!!
    عشت حياتي وانا اكره نفسي, حتى وصلت لعمر المراهقة وكطبيعة المراهقات اصبحت مهتمة بالاناقة والموضة والخ.
    كنت تقريباً في ال 15 حين قررت تجربة الكعب ولكن بسبب كلام اهلي وكلام الناس الفارغ اصبحت لا البس الا الاحذية المسطحة!
    حتى وانا بهذا العمر كنت لا ازال اكره نفسي. واخوتي زادوا الطين بله فكانوا ينادوني بالقاب مثل "صاروخ" "زرافة" "ما ودك توقفين" <-- يقصدون الطول
    الى أن أتى يوم وصادفت تغريدة في خطي الزمني تتحدث عن الكعب " الكعب ينلبس عشان الاناقة مش عشان الطول" وارفقت معاها صاحبة التغريدة صورة لمشاهير نساء طويلات القامة ولازلن يرتدين الكعب.
    هذه التغريدة غيرت فيني واعطتني ثقة.
    بعد مرور الكثير من الوقت وجدت أن طولي اصلا طبيعي بالنسبة لعمري!!
    كنت أُقيم في بيئة طبيعة سكانها انهم قصار القامة, وبعد سفري لبلدي الاصل ولبلدان أخرى إتضح لي أنني لم أكن أنا الطويلة. هم كانوا القصار, لم أكن أنا المشكلة. ولا طولي, المشكلة هي أن الناس لا يتقبلوا الشيء الغريب عليهم.
    أنا الآن في ال 18 لم أعد أهتم للتعليقات السخيفة حول طولي لأنتي اعلم تماماً أنني طبيعة وجميلة وانهم هم المخطئون.
    تعلمت أن أتقبل نفسي وأحبها لانه في نهاية المطاف إرضاء الناس غاية لا تدرك.
    وايضا لأن لنفسي حقُ علي بأن أحبها واتقبلها وأخبرها بأنها جميلة لأنها بالفعل كذلك.
    شكرا لك على الطرح الرائع واتمنى لك يوماً سعيداً.

    ردحذف
  77. ربي يسعدك ويثبتك ... انا مافيني شي بس من صغري ينتقدون بشرتي لين كبرت متحطمة ومااشوف فيني جمال واطالع في نفسي وابكي ليش انا كذا يعني صرت لا شخصية ولا شكل ... بس كنت اتابع برامج تطويرالنفس واقرا كتب وكذا وطورت نفسي كثير قدرت اغير شخصيتي من وحدة عادية الى وحدة مهمة كل مين يسأل عني قد ما عانيت اتعلمت الحمدلله .. وطول الفترة هذي كنت واثقة اني اذا تزوجت اتزوج واحد مايكون همه جمال المظهر الحمدلله ربي رزقني انسان رائع بس اهله رجعوني لايام زمان حرمتك سمرة مافيها جمال وووو وانا بكا وقهر واقطع نفسي الحمدلله زوجي مايهمه كلامهم بس انا ماقدرت امسك نفسي صرت اكرههم احس اني مغصوبه عليهم .. لكن بعد فترة اكتشفت انها غييييييرة احيانا في ناس تشوف غيرها احسن منها ويقعدوا يحطموهم.. انا كنت محتاجة لكلامك الجميل ربي يجزاك الجنة ويسعدك .

    ردحذف
  78. كالعادة ماتقولي الا كلام جميل,انا من متابعاتك بكل مواقعك عالسوشل ميديا اول مرة قريت لك تدوينة كانت احدى التدوينات بالغيمة التاسعة فعلا اثرت فيني وخلت يومي يمشي كويس وبالعكس سويت بذالك اليوم اغلب اللي كنت ناوية اسويها بديت اقرا تدويناتك حبيت المدونة حقتك وحبيتك كشخص اعتبرتك شخص اخر ملهم لي وكمان حوك نفس جوي وفيه تقارب بسيط في اهتماماتنا,اثرتي فيني كثير وانبسطت مرة لمن عرفت انك تعرفي الجوهرة ساجر وبينكن صداقة عاد جوجو اكثر شخص واول شخص اثر فيني بحياتي وانتي بعدها هههههههه احسني انبسطت لمن عرفت انكم صديقات هههههههه مدري ليه,والبوست جمبل جدا ومرة كله طاقة ايجابية,وبالنسبة للموضوع فعلا جميل انا من الناس القزومة وكنت مرة متعقدة من طولي كنت اجرب كل شي عشان اطول بس مع الوقت حبيت قصري حبيت اني انسانة قصيرة الكل يقول عني كيوت حبيت قصري ماعدت افكر اطول حبيت قصري وحبيت نفسي وبعد كنت مو متقبلة خشمي لاكني حبيته شفت اني فيه جميلة وحدة من صحباتي تقولي خشمك جميل رغم انه ماكان عاجبني الناس اذواق فعلا مع الايام حبيت خشمي وكل شي فيني احب عيوني حب قصري احب وجهي احب حواجبي المتناثرة احب يدي احبني كلي انا جميلة وبظل جميلة مافي بنت لهالعالم بشعة!! انتي اللي تحددي اذا ماكنتي جميلة او لا بثقتك بنفسك وحبك لها♥

    ردحذف

التعليقات الجميله ♥♥

Blogging tips