♡ How To Be Happy - كوني واثقه من نفسك كوني سعيده ♡

السعاده ♡ كلمه كثير ناس يبونها عنوان حياتهم ، هي كلمه بس هل هي شعور ؟ ايش يجلب السعاده للناس ؟
كثار يتخيلون السعاده بفلوس او ممتلكات ، كثاار يقولون سعادتي اكون بصحه وعافيه ، كثار يقولون سعادتي بان ربي يحفظ لي احبابي ، بالنسبه لي السعاده اذا ارتبطت بشي تفقد قيمتها ، اذا ربطت سعادتك بشي مادي بس تحصلين عليه تبين شي ثاني وثاني وثاني انتي تملين كوب مكسور فقط ، صح سعادتنا بصحتنا وباحبابنا حولنا ، بس هل يعني انو كل شخص مريض غير سعيد ؟ هل كل شخص فقد شخص غالي عليه غير سعيد ؟ السعاده هي انتي ، هي الرضا عن الذات ، تنبع منك كشخص ، اذا فهمنا انو سعادتنا شعور خاص فينا مرتبط فينا مو مرتبط بشي مادي او شخص ثاني ، مستحيل ننكسر!



السعاده مثل ماقلت رضا عن الذات ، اذا حبيتي نفسك ، قدرتيها ، وثقتي فيها ، تؤمنين انها تستحق الافضل ، تعرفين انها تستحق الافضل ، تطورين منها للافضل .. بتكونين سعيده ، اذا قلنا سعادتنا بفلوس او بشتري شنطه عشان اكون سعيده بشتري مكياج عشان اكون سعيده ، احنا بس جالسين نعوض نقص فينا ، السعاده مو بشي مادي ابد ، ممكن اكافئ نفسي بشي احبه ، ممكن اعطي نفسي هديه ، صح بكون سعيده اذا شريت شي جديد ، بس الي يتعود يربط نفسه باشياء ماديه وانها سر سعادته ، بس يحصل ع الشي بسسرعه بيدور ع شي ثاني يحلم انها بتكون سر سعادته !

بكذا جالسين نضر نفسنا ، ليش مانؤمن انو السعاده هي رضا الذات وَ التوافق مع نفسك ، وكل شي بالحياه هو بس وسيله وغايتنا الكبرى انو نحب نفسنا ، من اهم مقومات انو نحب نفسنا نكون واثقين منها!

الثقه !! كثار يقولون انا واثق من نفسي ، بس اذا جلس مع نفسه بيجلس يفكر ايش فلان قال عني ؟ صدق فلان مرتاح لي ؟ صدق شكلي ذاك اليوم كان زين ؟ شكل فلان يسلك لي ! اكرره شكلي اتمنى اكون احلى ، وغيرررررره من الرسائل السلبيه الي نغذي نفسنا فيها ، وندخل بدوامه انعداام الثقه ، صح دائما نبي نترك انطباع جيد للناس انو احنا جميلين او مقبولين للغير ، بس ليش نبي نرضي الناس ؟ مين هم عشان نرضيهم :\ ؟ اصلا مستحيل ترضين الكل فخلاص ريحي نفسك!! طيب في بنوتات بيقولون انا اصلا ماعندي ثقه !
في مثل يقول Fake it till you make it مثلي هالشي لحد ماتتقنينه ، اذا اي شخص حس انو عندك لو اهتزاز بسيط بثقتك بنفسك خلاص بيحكم عليك بانعدام الثقه ، في ناس عاديه بس الثقه تحليهم اكيد مو الثقه الي توصلك للغرور هذا شي غير مرغوب فيه ابدا ، الثقه الي تفرضين وجودك اذا دخلتي مكان الناس يحسون فيك وانو حولك طاقه هاائله ، سبحان الله في ناس حتى من مشيتها تحسها واثقه ، بس قبل لانمثل الثقه في كم خطوه احس ضروري نبدا فيها عشان نبني ع اساس متين.

١) لاتقارنين نفسك باحد ثاني.
المقارنه دماار ، ومن اخطاء الاهل لما يقولون لاطفالهم شووف فلان احسن منك ، فلان اشطر منك ، فلان مايزعج اهله مثلك ، هذي كلها تدمييييير للشخصيه وَ تعدم الثقه كلها ، اذا اهلك قالو هالكلام قبل اكيد اثر عليك ، ونحط ببالنا انو اهلنا اكيد مايقصدون هم بس كانو يبون يشوفنا دائما الافضل ، اهلك غلطو بس انتي لاتستمرين بنفس الغلط ، اذا شفتي بنت جميله بتقولين يووه احلى مني ، بنت جسمها حلو ، بتقارنين بينك وبينها ، بنت مقتدره وتشتري بتحسين نفسك فقيره عندها وتكرهين نفسك وتقولين ليش انا مو مثلها ، مو كل شخص عنده شي افضل منك صار افضل منك يعني ، يمكن انتي عندك ميزه مو عنده ، يمكن حياتك او شخصيتك افضل يمكن عندك هوايه وهي عقلها فارغ مافيه شي ، يمكن انتي شاطره وبكره بتصيرين شي مهم وهي ببيت اهلها ، يمكن ويمكن ويمكن ..  غير انو المقارنه تدمر الشخصيه تزرع الحقد والغيره بنفس كل بنت ، والحقد والغيره مميييته للقلب ، بتتعبك وماراح تخليك تنجحين بحياتك انتي تشوفين ايش الناس تملك بس مافكرتي شلون ملكو هالشي ، يمكن حظ عندهم ويمكن تعبو ع نفسهم انتي ماتعرفين كل تفاصيل حياه الناس ، وقفي تشوفين ايش عند فلانه ومو عندك ، ابدي دوري ايش عندك انتي اصلا !

٢) اعرفي من تكونين.
بتقولون شتبي قورجس هههههههه ، سؤال تافهه بس قليل الي يعرف نفسه ترا ، احنا ننتظر نخلي الناس يعرفون عنا وعن شخصيتنا ، ليش نخليهم يكتشفون ليش مانعرف ونخليهم يشوفون بنفسهم ، امسكي ورقه وقلم اكتبي اشياء تحبينها ، اشياء تكرهينها اشياء ودك تغييرين منها ، اشياء ودك تسوينها ، بشخصيتك او تصرفاتك .. ترا اغلب الناس ماتقدر تكتب اكثر من ٣ نقاط ، لاتألفين ههههههههههه اعرفي جد جد انتي مين ! اغلب البنات بيقولون انا طيبه ولا ام دميعه ورقيقه ههههههههه ، وحنا الي دايما مظلومين مدري منو الي يظلم الناس الي دايما نسمع عنه p:
اكتبي جمل وعبري عبررري ، اعرفي نقاط ضعفك وقوتك ، لاتستعجلين مو بجلسه وحده بتكتبين كل شي ، بس اذا عرفتي انتي مين هذي اول نقاط التغيير.

٣) كوني انتي،
هذي النقطه جوجو تكلمت عنها بالفيديو الجميل حقها ، ليش ننتظر نكون عند حسن ظن الجميع وَ توقعاتهم ، ننجح بحياتنا عشان نرضي احد ، نغير من طبع فينا عشان نرضي شخص ، مادري بس عن نفسي اي اي شي لو بغيره بغيره عشان مو عاجبني لنفسي انا مو عشان احد طلب مني ، دام احنا مانسوي شي غلط ليش مانكون احنا!
انا مبسوطه انو شعرري ويفي واحبه بس كم شخص ينتقده ، مو معناته اروح اسويه ستريت عشان ارضيه وارضي ذوقه -اقوله كمثال يعني- طيب انا عاجبني شكلي كذا ليش اغيره ؟ انتي لبسك جريئ كألوان او تحبين المكياج وعائلتك واهلك مايحبونه ودايما مخلينك المهرج الي يضحكون عليه ، ليش ماعاد تحطين مكياج او تلبسين لبس هادي ؟ عشان ترضينهم ! طيب هذي شخصيتك وهذي انتي وهذا الشي الي تحبينه ، خليك مثل مانتي ماعليك من احد ، اذا احد ضحك عليك لسببين :
- غيران (ترا احس كل شي بالحياه نربطه بالغيره صايرين! بس اذا انتي واثقه من نفسك وجاك شخص مثلا مايعرف باللبس ودائما يسألك عن اخر الموضه وبيوم ضحك ع لبسك او شكلك اعرفي انه يغار لان مستحيل احد يسوي كذا الا اذا بقلبه شي ، او يمكن ذوقك خايس هههههههه امزح :( مادري شلون اوضح الفكره اكثر بس يارب وصلت :$ )
- انتي تبالغين ( حلو نكون على طبيعتنا بس مانبالغ او نوصل لمرحله الجنون لكل مقام مقال ، حلو نعرف نحط ميك اب بس نعرف متى ووين ونحطه ، حلو نكشخ بس نعرف المناسبه الصح ، كوني انتي بس كوني واقعيه )

٤) لاتدع الماضي يعيقك.
يمكن كنا بيوم من الايام باعلى درجات الثقه وفجأه تحطمت ثقتنا بسبب موقف او بسبب مشكله معينه ، طيب هذا كان امس احنا اليوم ولبكره بنعيش ، الي صار صار وخلاص نكمل حياتنا ونكون واثقين اكثر انو ربي كريم وَ احنا نستاهل نعيش افضل وافضل ، خلاص تعاملي مع الموقف وانسيه وكملي حياتك لاتخلين شي يوقف بطريقك ! انتي اقوووووى.

٥) مو كل شي تفكرين فيه هو حقيقه.
ايش المشاعر اصلا ! المشاعر هي افكار او اشياء ببالك دائما ، اذا انتي تحسين انك مو حلوه ترا مو معناته انتي مو حلوه هذا احسااس ومو شرط يكون واقع ! مافي بنت مو حلوه مافي بنت مو جميله كل بنت جميله بس الجمال هذا اظهريه ابحثي عن اجمل شي فيك وخليه يبان للناس ، الجمال ممكن يكون درجات انا عارفه هالشي بس ابدا مافي بنت قبيحه ، اذا شلتي هالفكره من راسك ، بحثتي عن جمالك وبينتيه وبعدين أمنتي انك جميله بتكونين جميله ، ترا الثقه هي تلاعب بالعقل الباطن ، الرسائل الايجابيه مثل ( انا جميله \ انا واثقه \ انا ذكيه \ انا رائعه ) اذا ارسلتي لنفسك هالرسائل وامنتي فيها جدا جدا وصرتي تقولين لنفسك اناااا جميله بتتغير الافكار الي براسك وتزيد ثقتك بنفسك ، ترا شي بسيط اخذي اوراق ووزعيها ع الاماكن الي تجلسين فيها دائما واكتبي عبارات او اشياء او قيم بتعززينها بنفسك وَ بتصدقين هالشي وَ بيكون صفه فيك ، اول ماتصحين الصباح قولي صباح الخير ياجميله ، حبي نفسك واسعديها بتكونين اسعد بنت بالدنياا !

نقطه مهمه بالرسائل الايجابيه ( لاتكتبين : انا احس اني جميله ، اظن اني اقدر اسوي كذا ، بحاول اكون رشيقه ) غلط غلط خليك واثقه واكتبي النقطه بكل وضووح وقوه عشان توصل لعقلك الباطن ، ترا هالنقطه جربتها وفادتني لاتستهنين بقدرتك ع تغيير العقل الباطن : )

٦) ابعدي عن السلبيه والناس السلبيه.
اااخ اكرره الناس السلبيه و الي دايما تتحلطم وحياتي وحياتي وحياتي ، ولو ولو ولو ، ودي اخنقهم :@
انتي عندك يد وعندك عين وتمشين وتاكلين وتشربين وحولك اهلك ، عندك اشياء ممكن تعتبرينها تافهه او من المسلمات وتعودتي عليها بس تخيلي فقدتي عين بعيد الشر او خسرتي شي ! ليش ننتظر انو يضيع الشي منا عشان نحس بقيمته ، دام انتي واهلك بخير ابتعدي عن السلبيه ، الروتين وَ الحياه فيها ضغوطات صح عارفه بس مو معناته نستسلم لها ، احنا نبي ننسدح ونتحلطم ونقول الحياه والله يلعنها -استغفر الله- طيب حاولتي تغيرين شي ؟ غيرتي ومافاد ؟
 تخيلي عندك طاوله امتلت غبار كل ماتمرين عليها الصباح يوووه غبار اووف ايش هذا ماحب انظف يع وبعدين يعني ، طيب بدال الحلطمه مسحيها مره وبس بترتاحين ، بكره بيرجع الغبار ارجعي مسحي ، الغبار هو الروتين او الضغوطات بس مانتسلم لها ، ندور حل اما جذري مثلا نسكر اماكن دخول الغبار وهذا مرتبط بانو نبعد عن الناس السلبيه ، او نمسح كل يوم ونصر ع موقفنا.
- ترا مدري شلون طرا علي الغبار هههههههه افكر بتنظيف البيت : ( -
السلبيه تقتل الشخص وَ تعكر مزاجه ماراح تخليه سعيد ابد ولا واثق من نفسه ، ماعمري شفت انسان واثق حزين ومعبس ههههههه.

تقريبا هذا كل شي لليوم في نقاط ثانيه بس بخليها لبوست ثاني ، السعاده تنبع من نفسك ، السعاده رضا الذات ورضا الذات يجي من الثقه بالنفس هي كلها دائره مرتبط ببعض -بالنسبه لي يمكن غيري يشوفها بمنظور ثاني- حتى اكون سعيده هو شعور صح بس شعور اقدر اصنعه ، اتبعي الخطوات السابقه ولما اقول اتبعي لاتجلسين وتقرينها وتقولين طيب لا اتبعي امسكي ورقه وقلم اجلسي مع نفسك فكري فكري فكري وحاسبي نفسك ، ابدي بالتغيير ، مافي شي يجي بالساهل ، بس ابدا مافي شي صعب ، السعاده مو حلم السعاده واقع ونقدر نعيشه ، انا سعيده لان اخترت اكون سعيده

قورجس ♥