الجمعة، مارس 22، 2013

ياصبر ايووب !! #استكنان




السلام عليكم وَ رحمه الله وَ بركاته ، اعرف بنت دايم تقول يااااصبر ايوب بكل موقف وبكل ماتعصب ، لما سألتها ليش تقولين ياصبر ايوب ، قالت مادري هذي مقوله، عاد انا عارفه انو المقصود نبي من انبياء الله ايوب عليه السلام ، بس ماكنت اعرف القصه كامله! فبحثت عنها وَ اكتشتف قصه ممتعه وَ مليييئه بالفوائد فحبيت تشاركوني فيها للي مايعرفها أكيد.



ايوب عليه السلام من ذريه يوسف عليه السلام ، بس بالبدايه ايش الفرق بين النبي وَ الرسول ؟
النبي وَ الرسول كلهم ينزل عليهم الوحي ، والملك جبريل هو المسؤول عن تنزيل الوحي فعاصر جميع الرسل من عصر ادم الى محمد صلى الله عليه وَ سلم ، وسيدنا جبريل عليه السلام اكتشفت من خلال بحثي انو مايجاوب ع اسئله الانبياء ! الرسول يأمر بتبليغ الرساله وَ توصيلها للناس ويقول اهل العلم بانهم يحملون رساله جديده اما الانبياء غير مأمورين بتوصيل رسالتهم للناس ولكن هم يحملون نفس رساله الرسل الي قبلهم يعني تأكيد لرساله الي سبقوهم، عشان كذا كل رسول نبي وليس كل نبي رسول 

نرجع لمحور حديثنا :$
ايوب عليه السلام كان معروف بامواله وربي رزقه بالكثييير من البناات والبنين ١٤ بنت وَ ولد وَ زوجه صالحه ، ومزارع وخيرات ومواشي وفوووق كل هذا ربي كرمه واختاره للنبوه ! وعاش نبينا بكرمه وَ أمواله ماكان يبخل ع أحد وَ يكرم الفقير وَ يساعد الناس ، وَ فجأه صار يفقد عياله واحد ورا الثاني وَ خسر كل أمواله وَ مزارعه وَ خيراته وَ حتى خدمه تركوه واحد ورا الثاني !

طيب ليش ربي ابتلاه ؟ وايش قصه ابتلائه ؟!!
ربي سبحانه وَ تعالى حب يختبر صبر ايوب ، الشخص الي بخير وَ نعمه يشكر الله وَ يحمده ، طيب اذا ربي ابتلاه بأشد الابتلائات وَ غير حاله من حال ايش راح يسوي ؟
ربي ابتلا سيدنا ايوب بأشد انواع الابتلاء ، ماكان يقدر يحرك الا لسانه وَ هو طريح الفراش وكل شوي يسمع خبر وفاه ابن من ابنائه :( على شده مرضه وَ انه فقد اعز مايملك كان صابر وَ محتسب ، مابقى له شي من الدنيا الا زوجته بس الي كانت بجنبه تخدمه وَ تجيب له الاكل ، سبحان من غير حاله من حال ! جلس ١٨ سنه وَ هو على هذه الحال ، ماكان يشتكي ولا يتكلم كان صابر صابر ولا يتأفف ولا يقول ليش ياربي سويت كذا! كانت زوجته صامده وَ صابره وَ محتسبه ، حتى يوم من الايام جت زوجته وَ قالت له : "ياايوب انت نبي من انبياء الله ادع ربك ليشفيك فيستجيب لك!" قال :"كم سنه وَ انا كنت بصحه وَ عافيه" قالت:" ٧٠ سنه كنت بصحه وَ عافيه لحد ماربي ابتلاك" قال: "٧٠ سنه وانا بنعمه لما اخذ ربي عافيتي بس ٧ سنين جزعت ! سأصبر ٧٠ سنه كما كنت بنعمه" ياسبحان الله :( لو احنا ليش ياربي ونصيح ونقول ليش احنا ، طيب ليش مو احنا ؟ ربي منعم علينا بنعم كثيره اذا اخذ نعمه بيعطينا غيرها فليه الجزع!

كانت زوجه ايوب ، تشتغل عامله عند الناس بعد ماكانت منعمه وَ مكرمه وَ عندها خدم وَ حشم :( كانت تذل نفسها وَ تحاول تشتغل اي شي ، كانو الناس يطردونها وَ الي مايبي يستقبلها ببيته والي والي ، لدرجه بيوم من الايام قصت شعرها وَ باعته بمبلغ زهيد ، وَ شرت اكل وَ رجعت البيت ، سألها ايوب:" يافلانه ماقلتيلي ان الناس طردوك وَ منعوك من العمل" قالت : "نعم يانبي الله كل وَ بقولك القصه" قال" لاوالله لن أكل حتى تخبريني" قالت" قصيت شعري وَ بعته عشان اشتري لك الاكل" ومعروف الشعر كان ينباع لغرض التوصيل فوصل نبي لطاقته القصوى وهنا دعا دعا من قلبه "رب إني مسني الضر وأنت أرحم الراحمين" حتى بدعائه ماكان يشتكي ولا كان يعترض على قدر الله سبحانه ، يقول ربي انت ارحم الرحمين ، ١٨ سنه مبتلى عياااله كلهم راحو واحد ورا الثاني ، ١٨ سنه وَ هو  على فراشه ، ١٨ سنه وَ زوجته الي تخدم وَ تذل نفسها ، ماشتكى ولا قال ليش ولا اعترض عَ حكمه ربي ، لحد مادعا ربه ..

فيوم من الايام ،اراد ان يقضي حاجته وَ زوجته كانت دائما موجوده تساعده ، ومره كان يبي يقضي حاجته بس زوجته تأخرت :( مع كل البلاء الي ربي ابتلاه كان يدعي ربي :"يارب انتا ارحم الرحمين" ، ربي اوحى عليه انو الفرج وصل ! خلاص بترتاح من عذابك وابتلائك ربي اوحى له ان يحرك رجل ويضرب فيها الارض ، وَ سببحان الله قدر ايوب يحرك رجله وَ ضرب فيه الارض وَ طلعت موويه كثييره ، وَ أوحى له ربي ان يغتسل بالمويه هذي .. اغتسل ! فجأه شفى ايوب ، راح المرض ، رااح الابتلاء .. صار يمشي صار يقدر يوقف بعد ١٨ سنه وَ فوق كللل هذا صاار شباب ، ربي رجعه شباب وَ رجعت له صحته وَ عافيته يااسبحاان الله!!!

دخلت زوجته البيت ، تدور ايوب .. وين ايوب ! مافي احد بالفراش ؟ احد دخل واخذه ؟ جا ذيب او حيوان واكله ؟ ايوب مايقدر يتحرك! شافت رجل شباب وسيم قوي وَ بصحه .. سألته :"يافلان هل رأيت نبي الله ايوب؟" ضحك وَ قال "يافلانه انا ايوب انا زوجك" استغربت زوجته :"تستهزأ فيني ايوب مريض وايوب رجل كبير!" فحلف ايوب وقال اناا زوجك ربي استجاب لدعااائي ، وَ دعا لله عز وَ جل انه زوجته العجوز ترجع لشبابها .. ربي استجاب له رجع زوجته بعدد لشبابها وَ عافيتها .. هذا جزاء الصابرين، وَ فووق كل هذا فوق ابتلاء ١٨ سنه ربي رجع له اولاده .. رزقه الله باولاد نسخه الي ماتو وَ نفس اوصافهم وَ اشكالهم وَ بنفس العدد بعد! وَ رجع له كللل مزارعه وَ رجع كل امواله ، كان الذهب ينزل عليه من السمااء ! هذا جزاء الصابرين :")

لما زوجه ايوب قصت شعرها ، قال ايوب اذا ربي شافاني نذرت اني بضربك بالعصا ميه مره ، لما ربي شافاه وَ عافاه مانسى نذره! فاوحى له ربي ان يجمع عصيان صغييييره وَ يربطها ببعض ،١٠٠ عصا صغيره وَ يضرب زوجته فيها ضربه واحده وَ بكذا يخلص نذره ..

هذي كانت قصه ايوب كيف ربي غير حاله من حال ، كيف امتحنه ربي وَ هو بشر مثلنا .. قال انا ربي انعم علي ٧٠ سنه ، مرضت وَ عشت بهم بس ١٨ سنه كيف احزن مو عدل اني احزن وَ اتضايق ،، لو احد منا الحين ربي يبلاه بشي بسيط بمرض تافهه ، لو وحده فينا بسس جلست اسبوع واحد بالمستشفى لو رافقت مريض بس يوم واحد بالمستشفى ممكن تستخف ! فشلون انو ربي يبدل حالك من حال احنا ضعفاء نتأفف من أتفهه الامور اذا ربي امتحنا بشي بسيط نزعل وَ نتضايق ماعندنا صبر! وَ فوووق كل هذا مانشوف الناس الي اسوء منا .. نشوف دايما الاحسن وَ نقول ليش ربي مابتلاهم ليش احنا ؟

ايوب عليه السلام اعطانا درس عظيم ، ربي يفرجها .. بعد كل كرب فرج، لازم نخلي املنا بربنا كبير وَ لازم نحمده وَ نشكره على نعمه الي انعم علينا فيها .. اذا ربي ابتلانا لازم نصبر وَ نقول "ربي اني مسني الضر وَ انت ارحم الراحمين" ، ربنا كريم وَ بيقول"فبشر الصابرين" الحمدالله عَ كل حال ..

استفدتو من قصه ايوب ؟ حصلك موقف وَ صبرتي وربي جازاك ؟ انتي بموقف ماتتحملينه بس تذكري صبر ايوب وقولي الحمدالله عَ كل حال ، ودايما تذكري انو اذا ربي ابتلاك مو معناته انو الناس الثانيه ربي مابتلاهم لانهم احسن منك! ابتلاء الله تطهير من الذنوب وَ ربي ابتلى الانبياء وهم خيره البشر فكيف احنا ؟

اشوفكم الجمعه الجايه بقصه جديده ، في احلى من القرأن الكريم نستفيد منه ، احبكم بالله 




هناك 28 تعليقًا :

  1. اول مره اعرف القصه بتفاصيله ..
    سبحان الله...

    ردحذف
  2. ربي يسعدك علا تذكيرك لنا بقصة ايوب وهي مشهورة بس ننسأها كثير عند البتلاء أو نزول المصيبة.

    ردحذف


  3. جزاك الله خير
    كلامك رائع و جميل
    و زي المثل الشائع عندنا ما بعد الصبر إلا الفرج

    ردحذف
  4. ربّي يسعدك ويجعله صدقة جارية عنك ووالديك ياارب
    استفدت كثير بتفاصيل القصة ويكفي قوله تعالى " وبشّر الصابرين "
    الله يرزقنا الصبر والقوة اتجاه تقلبات الحياة

    ردحذف
  5. طول ما انا اقرأ القصة مو مصدقة منذهله !
    يالله ليتنا كنّا بزمنهم ولا الحين :(

    شكرا وماتكفيك حقك على هالمعلومة ♡♡
    قورجس نحبك :( ♡♡

    ردحذف
  6. يعطيك الف عافيه اول مره اسمع القصه بالتفصيل الله يسعدك
    صراحه شي جميل وسعيد التغيير الي احدثيه عالمدونه احنا مره فرحانين وسعيدين فيه
    وننتظر بس يجي بكره عشان قورجس تنزل لنا بوست جديد وعجيب

    ردحذف
  7. الله يجزاك خير اول مره اعرف القصه بتفاصيلها قصه جدا ممتعه
    سبحانك يارب بيدك الملك كله ، الله يوفقك ويسعدك حبيبه قلبي ♥

    ردحذف
  8. قوررجس أفدتيني كثير ، ما كنت اعرف قصة أيون عليه السلام الا الآن ، وسبحان الله ألي يصبر ينال

    ردحذف
  9. انا اول مره اعرف القصه كامله .اولا جزاج الله خير .ثانيا يمكن لو صار فينا جزء صغير من الي صارله مانتحمل تدرين ليش لان الوازع الديني قل فينا وصرنا نتوكل على الدكاتره هذه شاطر وهذا زين في شغله .

    ردحذف
  10. اللَہ يجزاك الجنه
    ويدخلك الفردوس العلى بدون حساب
    لانك فرجتي علي هم كبير كنت احس فيه

    ردحذف
  11. انا مثلك
    دايماً اسمع يا صبر ايوب يا صبر ايوب
    والان عرفت القصة بتفاصيلها
    جزاك الله خيراً على ذكر القصة لنا
    وقرأت في احد المدونات وقد تكون مدونتك،،
    "أعمل من القبة حبة"
    وقال أيضاً أحمد الشقيري:
    "الإنسان دايماً لازم نشوف الأحسن مننا عشان نصير زيهم،
    وبرضوا نشوف الأسوء عشان نحمد ربنا"
    ♥♥♥

    ردحذف
  12. يسعدك ربي وجزاك الله خير ع الاسلوب الجميل ..

    انا زي كدا دايما لما اعصب و اتنرفز .. اقول يااصبر ايوب .. لاني اعرف القصة فكدا تهدا اعصابي شوية هههههه

    مدونة رائعة ماشاءالله ..

    ردحذف
  13. قصة رائعه جزيتي الجنة و جمعنا واياكم في جنات النعيم اللهم آمين

    شكرإ

    ردحذف
  14. شكراً قورجس ❤ ، استفدت كثثير وتوني اعرف القصة كامله
    الله يسعدك ويوفقك يارب ��*
    ماتدرين قد ايش غيرتي فيني ")
    شكراً بقدر السماء قورجستا ����������

    ردحذف
  15. الله يجزاك خير من جد احس كاني اول مره اسمع هالقصه يمكن قد سمعتها قبل بس نسيت او مافكرت فيها زين بس لما قريتها احس غبير من جد الله يسعدك ي رب ويجعله في ميزان حسناتك احبك في الله

    ردحذف
  16. يالله أذكر يوم كنت في طفولتي كنت اسمع أجزاء من هذه القصة لكن لم يسبق لي قراتها بالكامل فعلا الله يرزقنا بصبر ايوب عليه السلام للاسف احنا اذا قلنا العبارة "ياصبر ايوب نقولها بتضجر ويأس غابت عن اذهاننا قصة ايوب علي السلام
    اسلوبك كان اكثر اكثر من رائع استمتعت بالقراة وكانك انتي بنفسك تلقين علي القصة جزاك الله الف خير انت مثال رائع للمرأة المسلمة مدونتك كنا بحاجة لها من زمان الحمد لله لقيناها

    ردحذف
  17. جزاااااااك الله الف خير قصة مفيدة وممتعة فيها الكثير من العظة والعبرة

    ردحذف
  18. ااه يا جورجس ..
    الحمدلله على كل نعمه اللي انعم بها علينا ونظل مقصرين مهما فعلنا
    وبعد الصبر الخير الكثير لقوله تعالى ( وبشر الصابرين )
    بجد قصة نبينا ايوب تعطينا امل ودفعه للحياة وانو مافي شي صعب وبالدعاء تتحقق الامنيات
    يارب يكتب لك الخير يا جورجستا ويكتبلي ويكتب لكل البنوتات

    ردحذف
  19. أزال المؤلف هذا التعليق.

    ردحذف
  20. قصة تستحق التأمل
    ليتنا كلنا تقتدي قي النبي ايوب عليه السلام بقوة صبره و تحمله

    فكرة حلوة يا قورجس لو مثلاً كل جمعه تكتبين قصة من قصص القرآن او من قصص الانبياء او من الصحابه او من السلف الصالح بطريقه ممتعه زي كذا , حلو نخصص جزء من حياتنا نتأمل فيها , و يا رب تحصلين الاجر الكثير على جهودك

    جزاك الله خير و جمعنا اياك في جنات الفردوس الاعلى

    ردحذف
  21. يااااااه سبحان الله !!!!
    عجيب غريب رهيب جميل
    لما قريت هالقصه ارتحت ارتحت لان ربي موجود يمهل ولا يهمل
    عجبني كلامك واسلوبك فعلا اندمجت مع القصه
    وبجد الغلط منا مفروض نبحث على القصه لأننا دايم نسمع هالكلمه ياصبر ايوب !!!
    ولا عمرنا قريناه " تلووم نفسها حاليا "
    مشكوره جدااا استمري الله ينور دربك
    ننتظرك بل جمعه بشوق وحمااااااااس

    ردحذف
  22. ربي يسعك دنيا واخره ويثبتك

    ,,,,,,, والله بكيـــــــــت

    ردحذف
  23. كثري لنا من هالقصص القران الجميله اللي الواجد يستفيد منها .. شكرا ماكنت اعرف هالقصه

    ردحذف
  24. امي دايم تقول ياصبر ايوب
    بس ولا مره فكرت اعرف القصه
    مررررررره مؤثرة
    شكراً قورجس

    ردحذف
  25. القصة جداً مؤثرة و أول مره اعرفها بتفاصيلها وأسلوبك ما شاء الله جميل ..
    الله يعفو عنا أدنى شيء نتضايق و نتنرفز واحنا مازلنا بنعمة وخير ولا يجي ببالنا ان اي شيء يجينا هو خير من الله لو ان ظاهره شر سواء مرض او ضائقة او تأخر امنيات ما تحدث الا وبعدها فرج بإذن الله ..
    الله يعيننا على ذكره وشكره وحسن عبادته ..

    ردحذف
  26. والنعم بالله ♥♥♥♥

    ردحذف

التعليقات الجميله ♥♥

Blogging tips