الأحد، مارس 03، 2013

نتائج تحدي قورجس للجمال + سواليف وَ مفاجأه ♥





السلام عليكم وَ رحمه الله وَ بركاته ،
احم آدري انو ياقدمي وَ تو الناس :$ بس ماحب أكتب أي شي الا وله مزاج وَ أكون مهتمه له عشان اكتب بذمه وَ ضمير ،
الي متابعني من قبل يعرف انو بديت تحدي قورجس ٣٠ يوم من الجمال ، و وعدتكم أرجع بالنتايج ، طبعا التحدي خلص من زمااان بس تو اروق أكتب عنه ، بالبدايه ماتوقعت انو بيكون بالصعوبه هذي ! لسبب واحد بحياتي ماخلصت شي ههههههه دايما ابدا واوقف بس الحمدالله من بعد البلوق صرت اكثر جديه بقراراتي واكملها للأخر.

الهدف أنزل ٥ كيلو وَ أحب أبشركم مانزلتها كلها p; بحياتي ماسويت ريجيم ولا اعرف مقدره جسمي كم ينزل وكيف يستجيب ، فبالعكس ماضايقني هالشي لاني حاولت واستمريت واثبت لنفسي اني اقدر ، نزلت ٤ كيلو وزني من ٦٣ الى ٥٩ وطولي ١٥٧ ونص فشي حلو : )



سافرت ورجعت كيلو لوول السفر مايخلو من الاكل والاكل وخاصه لما تسافر مع عائله كبيره :$ بس نزلت نص جرام وحاليا عشان اكون دقيقه وزنت الصباح وزني ٥٩ و٤ جرام ..

التجربه هذي كانت من أجمل التجارب الي مرت علي وَ أحس غيرتني وَ قوت شخصيتي لان مثل ماقلت انا ماكمل شي ابد!
برنامجي بسيط جدا جدا ،

- اكل صحي خالي من الدهون.
- ماحرم نفسي من شي ابد ابد الحرمان هو الي الكبت واذا وصلت للي ابيه ممكن انفجع وارجع كل الي خسرته !
لاااا للحرمان ناكل كل شي بكميات معتدله اذا مشتهيه شي عادي اكلي قليل منه ماراح يضر ابد.
- الخضار والفواكه كانت اهم اهم شي بالبرنامج ، اغلب يومي اكل سلطات او فواكه مفيده وتشبع ومافيها كالوريز.
- الرياضه الرياضه ، مادري لو اتكلم من هنا لبكككره ماراح اقدر اعبر عن اهميه الرياضه بحياتنا،

وبس !
ترا شي مره سهل نتبعه ونحصل جسم بيرفكت واهم شي الشعور بالرضا ، ترا ابدا مافات الوقت انو نحب نفسنا ونحسسها بقيمتها الي تستاهلها ، مو لان عندك بيبيات او كبرتي بالعمر او عندك مرض اي نوع كان خلاص اوقف واستسلم للحياه ، تغييرات بسيطه بحياتنا تعطينا دافع للحياه اكثر واكثر.

قبل لا اتكلم بتفاصيل برنامجي ، اول شي لازم نصحح بعض المفاهيم :

١) توني صغيره ماحتاج رياضه + جسمي حلو مابي رياضه + يع الرياضه للدبات + مابي تطلعلي عضلات.

احس الي يتكلم كذا ودي امسكه بزاويه واخنقه لين يقول امين هههههههههههه ، مابي اقول انا الواااو الي يوميا اسوي رياضه واتدرب وجسمي بيرفكت وبنفس الوقت ماسوي شي ابدا! لما بديت بالرياضه صراحه هدفي انزل وزن بس مع الوقت اكتشفت انو مع الرياضه صرت نششيطه وماتكيسل وكلمه مالي خلق ممسوحه من يومي ، اغلب يومي اتحرك وانجز واحس نفسي خفيفه وجسمي مرتاح ! وفكرت لو بعدين كبرت بالعمر ؟ بكون كذا مثل الحريم الحين الي بس توصل لل٤٠ انواع الامراض وظهرها يوجعها وعظامها تعورها ؟ صح كل شي مقدر ومكتوب بس مو معناته احط يدي ع خدي وانتظر الامراض تجيني ، مايحتاج اتكلم عن فايده الرياضه ابببدا وانها من اهم الاسباب لمقاومه الامراض ، يكفي دينا حثنا ع الرياضه وحتى عباداتنا فيها حركه بس مين يفهم ؟
والي تقول ماتبي تطلع لي عضلات لا ياقلبي مو كل من سوا رياضه بتعضل وتصير رجل ، مهما كان انتي انثى وبنيه الجسم تختلف ، في انواع من الرياضه تبني العضل وانواع من المشروبات والفيتامينات تساعد بس ماتوصل لعضلات الرجل اكييييد ، فانتي شوفي ايش حاجتك من الرياضه وسوي الي يناسبك.
لاتنتظرين العمر يفوت وتتحسفين :| ولا تضيعين وقتك تطالعين صور الموديلز وتكرهين نفسك زياده ، انتي تمنيتي شي ليش ماتحققينه ؟

٢) ابي اسرع خلطه تضعف + اشرب شاي اخضر وزنجبيل وضعفت ١٠ كيلو + ابي ريجيم التمر + ريجيم السلطه الخورفايه.

هذا بعد من النوع الي ودي احطهم بزاويه نفس الي فوق :( ليش ليش هالاجرام ؟ سوري لو كلامي بيكون شوي قاسي بس احنا شعب كسووول واتحدا اتحددا احد يخالفني الرأيي ، اغلب يومنا يروح بالتسدح ع الاجهزه والجوالات والاكل وبعدين نبي اسرع واسهل شي يضعف ، يعني سنين منسدحه وتبين شي يضعفك باسبوعين ؟ والي يرفع ضغطي لما تقول وحده عندي مناسبه بعد اسبوع ابي اضعف ٥ كيلو ، صباح الخير ؟؟ ليش ننتظر لما تصير مناسبه او شي مهم عشان نكون كشخه وواو ؟ ليش مانكون واو ومبسوطين بنفسنا طول السنه ؟ تبين تكشخين وتحبين نفسك عشان نفسك ولا عشان الناس تحبك وتمدحك ؟ اذا سويتي شي عشان الناس فاعرفي انه شي وقتي ولحظي وبيرجع وضعك مثل قبل واردى ، اضعفي وحبي نفسك عشان نفسك عشان لما تصحين الصباح تشوفين شي حلو وَ بنوته صحيه بالمرايه مو اذا شفتي المرايه تتصددين عنها !
ودايما حطو ببالكم الي يجي بسهوله بيرجع بسهوله ، الحمدالله خلصت التحدي وصح رجعت لنظامي الي قبل تقريبا -للان محتفظه ببعض التغيرات الي سويتها- ومع هذا مارجع وزني الي نزلته لاني تعبت عشان انزله ، وغير هالشي الشحوب الي بالوجه والتشققات الي بالجسم والتساقط الرهيب بشعرك كلله بيجي اذا نزلتي وزنك بسرعه وحرمتي نفسك عشان الاكل ، صح كسبتي شي بس فقدتي اشياااااء بالمقابل ، فليش مانوازن نفسنا ؟
صح في مشروبات تساعد ع الضعف بس للامانه ماجربتها ولا قدرت اجربها ، ذقتها وماقدرت اكمل :|
يمكن تخلونها كشي اضافي مساعد لانها مفيده اولا واخيرا وابتعدو عن الحبوب وجلسات التخسيس والمشروبات الي مادري شلون تخاطرين بنفسك عشانها ! اذا تبون شي يمشي معك دايما غيري نظام حياتك غير هذا مافيه.

٣) ودي اسوي رياضه بس ماعندي وقت + عندي اطفال ومادري ماعندي وقت اسوي رياضه + انا اداوم وعندي دراسه ماعندي وقت + بكره اسوي رياضه.

في ناس ماتستوعب عندها ٢٤ ساعه باليوم ؟ يعني الي يسون رياضه عندهم وقت اطول ولا كيف بالضبط ؟
اذا قلنا ٨ ساعات نوم وهو المعدل الطبيعي + ٣ ساعات تروح بالصلاه والعبادات والاكل والطبخ + دوام ٧ ساعات + ساعه راحه ، باقي ٥ ساعات اضافيه ؟ اعترفو انكم ماتجلسون ع التي في او النت وتضيعون من وقتكم اقل اقل شي ساعتين باليوم ؟ في في وقت بس احنا مو عارفين كيف ننظم يومنا ، ساعه باليوم او نص ساعه صباح ونص ساعه بالليل تكفي والله مو مطلوب منا اكثر من كذا ابدددد ، لاتتعذرون الا لو كسلانين هالشي راجع لكم بس لاتقولون ماففي وقت.

٤) ابي اغير حياتي بس مدري من وين ابدا!

ولا انا كنت ادري ههههههه ، كنت ابي اغيير شي بس مادري من وين ولا ايش اسوي وخاصه انها اول تجربه لي بتنزيل الوزن ، اول شي سويته ، مسكت التويتر + الانستقرام نظفته تنظيييف سويت انفولو لكلل حسابات الاكل والطبخ والي ينزلون صور تجوع :( لان حتى لو انا مو جوعانه بس اشوف اكل اجلس اتشهوا فليش التعذيب ؟ وسويت فولو لحسابات الصحه والرياضه شوفو تويتري مسويه فولو لكم شخص مميز ويساعدك تحقق طموحاتك من التويتات التشجيعيه.
دورت عن رياضات كثيره ولاني جديده بالموضوع ، كثيير مدحولي جليان لانها جامعه كل انواع الرياضه بنص ساعه مفيده ،  واذا خلصت جيليان وريحت فتحت اليوتيوب دورت مقاطع رقص او رياضات ممتعه لاجل التنويع لا اكثر : )
بعدت عن المطاعم والوجبات السريعه كان شي صعب جدا جدا ههههههه وخاصه زوجي يحب هالمطاعم ولما اكون تعبانه ومالي نفس اطبخ كانت اقرب شي لبيتنا :(  فصرت اطلب معاه بس وجبات مشويه وتكون الخبز بر لو متوفر وبدون شيبس او ببسي واذا جا ماكل الساندويش كامله وبكذا ماحرمت نفسي ولاطبخت p;
قاطعت الببسي والغازيات ، الحين ماتفرق معي كثثثير اذا موجود شربته هههههه بس ماشربه كله ، بس مستحيل مستحيل اروح السوبر ماركت واشتريه اببد ، وبنفس الوقت التشوكليتات والشبسات ماصرت ادخلها البيت اذا اشتهيت جبت من البقاله حبه بس وخلاص ماجيب غيرها ، صرت اكثر الفواكه والخضار ، بموضوع الاكل لما كنت متحديه ملتزمه مرره الحمدالله ، بس خلص التحدي صرت اخبص شوي للاسف بس ان شاء الله اقدر اصر ع نفسي واكون اكثر تماسك ، الطبخ صرت ادور عن طبخات صحيه بس لذيذه ، مافي موقع معين امانه :$ بس ادور بالنت كثيير ، وللاسف ماعندي الوصفات ولا كان حطيتها لكم :(
اتبعت طريقه سهله جدا بس مفيده بصحن الغدا ( نص الصحن سلطه + ربع نشويات (مثل الخبز او الرز) + ربع بروتينات (مثل اللحم او الدجاج) )
اكل كل شي واشبع الحمدالله ، اهم شي وجبه الفطور لاتبدون يومكم من دونها !! وبعدين سناك خفيف وبعدين وجبه غدا وورها سناك وبعدين العشا ، خلو حصصكم باليوم ٥ حصص تكون صغيره بس ماتجوعون طول اليوم وتخربونها !

العشا يكون بدري يعني ع الساعه ٨ بالكثييييير ، بس كانت مشكلتي اني اسهر فكنت ااخر العشا شوي :(
الي يبي حياه صحيه يعدل نومه ، حلم حياتي اعدل نووووومي اكرررره السهر يارب بس :"(

وايش كمان :$ يارب ماكون نسيت شي!

نجي الحين لبارت الرياضه ، رياضتي الي معتمدتها هي جيليان ٣٠ داي شريد ، انا مستغربه كثاار يسألون عنها وماحسيت شرحي لها كان واضح ؟ اشرح واشرح عنها ويرجعون يسألون بديت اشك الخلل فيني لوول
الرياضه بسيييييطه بسسسسييطه ، هي ٣ مراحل كل مرحله غيير عن الثانيه ، تاخذون المرحله الاولى تسونها ١٠ ايام ورا بعض وبس تخلصون انسو احذفو الفيديو من عندكم لحد يرجع لها هههههه ، والمرحله الثانيه تسونها ١٠ ايام ورا بعض بس تخلصون من المرحله الاولى يعني الثانيه من يوم ١١ تبدون فيه لحد يوم ٢٠ وبس تخلصون تبدون بالمرحله الثالثه من يوم ٢١ الى يوم ٣٠ وبس !
بشهر واحد تكونون خلصتو من التمارين ، التمارين الحلو فيها جامعه كل شي بنص ساعه واقولكم صعبببه وخاصه الي ماعنده لياقه مثلي بس لاتوقفون لااتوقفووون اذا تبون نتيجه بتشوفونها تحملو نص ساعه بسس وبعدين كملو يومكم عااادي ، اخذوها بشكل جميل وتقبلوها لاتحسونها هم عليكم وتقولون يوووه لازم ابدا بالرياضه اذا تحمستو لها واخذتوها كتحدي وانكم تقدون تسوونها راح تسوونها وتنبهرون بالنتايج الي وصلتو لها !!
التمارين تضعف + تصقل الجسم وتشده ، حسيت تغيير بجسمي من ناحيه الشد اكثثر من الضعف وامانه ماهمني اضعف كثر ماهمني يكون جسمي متناسق ، وعشان تاخذون نتايج افضل جربو تضيفون لها رياضه ثانيه من اي شي تحبونه ، مشي او ركض او رقص الي يعجبكم ، اذا ماحبيتو تمارين جيليان ابحثو عن شي يناسبكم بس لاتسألوني لان مو خبيره رياضه :$
الي يبي رياضه جيليان يبحث باليوتيوب 30 day shred jillian بعض الفيديوهات مجزأه ٣ اقسام وَ بعضها لا كامله ٣ اقسام مع بعض فشوفو الي يعجبكم.

وباقي اليوم وَ روتيني اليومي بتكلم عنه ببوست ثاني عشان ياخذ حقه افضل ()

الحين نجي للمفاجأه ، برجع لروتيني السابق ان شاء الله الايام الجايه ، فالي حاب يشترك معاي يتابعني ع انستقرامي @gorgeous30d وهو كان خاص بالتحدي السابق بس برجع له ، الي حاب يشاركني ونشجع بعض يكلمني هناك ونتابع بعض بشكل يومي ، ونقطه ثانيه الاجسام وطريقه تقبلها تختلف يعني يمكن انزل ٤ كيلو زياده ويمكن اكثر فمادري عن الي تبي تشاركني ، بس لاتحطون ببالكم هدف معين في بعض الاجسام عنيده ماتنزل بسرعه بس اصري ع نفسك ولاتيأسين ابد !
لاتحطين ببالك كم كيلو لازم تنزلينهم عشان ماتحسين بالاحباط ، اتعبي عشان صحتك ورضا الذات لاتفكرين بالعدد لانه بالنهايه مجرد رقم ! لاتقولون بكره ببدا اذا قلنا بكره يعني ابدا ماراح نبدأ ، المطلوب منكم حاليا تجهزون لكم ورقه وقلم وتكتبون لنفسكم ليش تبون تصيريون صحيين ؟ وزنك زايد وبتنزلينه ؟ تبين تصيرين صحيه وعندك لياقه واذا مشيتي ماتتعبين ؟ تبين عشان صحتك لبكره ؟ تبين جسم متناسق وحلو ؟ حطو هدفكم وخليكم واضحين ، وسوو جدول واكتبو كل شي بتسونه باليوم بس بنفس الوقت خليكم واقعيين لان التغيير فجأه مستحيل يستمر افضل شي التدرج ، وحبه وحبه بنحقق كل شي ببالنا : )
انا بشاركم يومياتي بالانستقرام وببدا تمارين جيليان للمره الثانيه لان حبيتها جددا واحس جسمي تعود عليها ، انتو دورو لكم عن تمارين تناسبكم + وصفات صحيه + واهم شييي تكونون مقتنعين بالي تسوونه لاتغصبون نفسكم ع شي خليكم مستعدين !! وبحمسكم وتحمسوني بالانستقرام : ) بس لحد يسألني ايش اسوي واني ارتب له جدول انا ماعرف يومك ولا ادري شنو تسوي طول اليوم كل واحد افهم بنفسه من غيره فسوو جداول لنفسكم ورتبو وقتكم وَ خلو عندكم هدف واضح + مكافأه شي خاطركم فيه من زماااان واذا حققتو هدفكم جيبوه هديه لكم ، عن نفسي جبت هديتي لنفسي لاني خلصت التحدي .. وبدور هديه ثانيه للتحدي الجديد p;





يومين وببدي التحدي ان شاء الله ،  تابعوني بالانستقرام لكل التحديثات واليوميات ..
موعدنا الثلاثاء ان شاء الله ياجميلاتي ، متحمسين !!

هناك 20 تعليقًا :

  1. ماشاء الله تبارك الرحمن
    عيني عليك باردة

    ماقصرتي شيمااء كل نقطة اعطيتيها حقها في الشرح ربي يحفظك

    كلامك جميل يحمس الشخص يهتم بنفسه واهم شي يصحح تفكيره في حياته وكثير اشياء ماخذها كَـ مُسلّمات

    الله يعطيك العافية ويجزاك خير على هالنصايح والتحفيز ..

    جمييله كعادتك ما شاء الله ❤

    ردحذف
  2. قيداااام مره مره متحمسه تدرين حتى أنا.تخليت عن أشياء كثيره ماعاد صار يهمني الوزن قد مايهمني الأكل الصحي معك معك ي روح ليلى انتيا

    ردحذف
  3. يسعد مساك () ()

    كلام جمممميل جممميل .. انا نومي منظم الحمدلِلّه اساسا لو اسهر يوم والا يومين نفسيتي تنعفس

    اما بالنسبه للرياضة فانا اسويها ومؤمنه ايمان كاامل باهميتها ، حتى نومي يتغير لما اجلس فتره ما سويت
    بس مشكلتي مرات يكون يومي مضغووط واجبات واختبار وهيك
    لكن إن شَاء اللّه راح ابحث عن تمارين جيليان وابدا معاك ♡ ♡

    ^^ معليش قرقي كثير :'(

    على فكرة دائماً اكتب تعليق بعدين انتبه قبل ارسله انه طوووويل ،، اقول لا عيب اقرق و اهون لوول

    ردحذف
  4. يعطيك العافية :) انا بالنسبة لي قاعدة أجرب رياضة التاباتا مدتها ٤ دقائق او ٥ ، قليلة صح بس فعلا متعبه مع انها قليلة بس يقولوا انها فعلا تنزل الوزن ورح تلاحظي النتيجة في فترة بسيطة انا صار لي يومين ورح استمر عليها

    ردحذف
  5. ما كلمتينا عن عنايتك ببشرتك خلال فترة التحدي؟

    ردحذف
  6. أزال المؤلف هذا التعليق.

    ردحذف
  7. صح كلامك, اذا تبين رياضه حلوه جربي انسانيتي, اكيد سمعتي عنه, انا صاحبتي اقرب وحده لي تبي تضعف و انا اسمن ههه و هي كسوولة فاضطر ابحث عن معلومات للي تبي تضعف و رياضه و كذا و من جد افضل افضل رياضه لنقص الوزن انسانيتي و بيلاتيس وطبعا spinning هذا اذا عندك اشتراك بنادي.
    انشاءالله توصلين لهدفك جورجيس 3> وطبعا البنات الي بيدخلون التحدي معك

    ردحذف
  8. ماشا الله ...مررره حبيت البوست جميل ...نفس طولي بس انا وزني حالياً ٦٠ و أبي أوصل ٥٨. قد وصلت ٥٧ و صرت أخوف معاد ألاقي مقاسي ما توقعت لحمي يخلص بسرعه. آثارية وزني في العظم ههههههه

    ردحذف
  9. بالتوفيق حبيبتي واحنا معاك بالتحدي

    ردحذف
  10. فعلا فكرة لازم نطبقها لانووو الرياضة المفروض تكون من اساسيات يومياااتنا

    يعطيك العافية عا الفكرة

    ردحذف
  11. مره شي جميل الله يعطيك العافيه انتي من الناس اللي حمستيني للرياضه والحمدلله ان شا الله استمر عليها طول حياتي
    مجرد راي لو تغيرين برنامج شريد ل ريبد لجليان نفس الفكره تمارين شامله لكل الجسم تلقينها في موقع تورنت كامله اربع اسابيع لكل اسبوع ليفل عشان الجسم لما يتعود على رياضه معينه ما يستجيب لنزول الوزن

    ردحذف
  12. أهلاً غورجستي 3>

    ويّآك ويّآك ، من بعد الولآدة لي تسع شهور مآعرفت أضبط نفسي !!!
    وزني طلع بالستينآت ؛ أتوقع وصل 64 !
    .
    .
    متآبعتك ،

    ردحذف
  13. آنآ آبي ابعد تشققات الحمل ابي اعرف الرياضه المنآسبه
    لآني متحطمه من جسمي كثير

    ردحذف
  14. يالله ياقورجس والله كل كلمة قلتيها بحب راسك عليها انا قررت اغير نظام الاكل والحركة من خمسة سنين او اكثر وطريقتي تقريبا نفس طريقتك ماحرم نفسي من شي ومعدل الرياضة الطبيعي الي المفروض كل بني ادم يسويه مو واو انا ترينر ,,
    وكل الي قلتيه احس فيه ونفسي امسك الناس واخليهم يحسون بالي احسه وافهمهم ان السعاده بالصحه والنشاط وان ضيقة الصدر والعصبية كله من الدهون وقلة الحركة ياليت تزورين البوست حقي الي عن الصباح بتلقين كثير كلام مشترك خخخ
    http://www.solisaar.com/2013/02/tips-to-enjoy-morning-5.html

    ردحذف
  15. روعه ورق الجدران
    من وين

    ردحذف
  16. انا خلود يشرفني اني اتابعك ي جمميلة انتي ~ اسلوبك ذوق و جمميل جدا$:

    ردحذف
  17. كلام جميل جدا

    ردحذف
  18. موفقه شيمو الله يوفقك حبيبتي ..وماشاء الله عليك ان شاء الله تحققين اللي في بالك

    وماكافاتك لنفسك حلوه :)

    ردحذف

التعليقات الجميله ♥♥

Blogging tips