* ليش ادون ! -نيولوكي وسواليف وَ تغييرات-

،



السلام عليكم وَ رحمه الله وَ بركاته :$ مبسووطه انو رجعت أدون بلوك جمميل وألوان فرايحيه ماتخليني امل وتعطيني دافع انشب فيكم ♥p; بوست اليوم بيكون تعريفي بس عن اللوك الجديد وَ ايش بيكون فيه للايام الجايه بس عشان تكونون متابعين لي وعارفين عن ايش راح اتكلم :$
من قراراتي الجديده انو التدوين بيكون بشكل شبه يومي -٦ايام بالاسبوع- بتقولون يوه مره كثير! وماراح تصبر قورجس وتزهق وتطنش ! بالعكس اخذته تحدي بيني وبين نفسي ، مو شرط تكون مدونتي بس ريفيو ومنتجات جماليه وَ غيرها ، بالعكس لما فتحت مدونتي اول مره كنت ابيها متنفس لي او يوميات او دايريز اشاركم بافكاري وسوالفي والاشياء الي احبها ♥.. بس الفكره اخذت منحنى ثااااني وصارت عرض تجارب بالاغلب ، اكذب لو اقول خبيره بشره او ميك اب ارتيست او مصممه ازياء او او ، احس كثار فاهمين فكره التدوين غلط ، المدونه هي عرض الافكار وَ التجارب اشياء يمكن تعجبني بس ماتعجب غيري ، ستايل يناسبني او شي احبه بس مو الكل يتقبله ! اعرض تجاربي والاشياء الي نفعت معي ، اي شي اعرضه او يعجبني مو معناته روحي اشتريه ! انا هنا مثل اختك اذا شفتي شي عاجبك عند اختك تسألينها وتعطيك رايها بدون تحيز او تطير المنتج وهو مايسوى شي ، وَ بس ♥! هنا يجي دورك انتي تشوفين لو ناسبك ولا بيمشي مع بشرتك وغير هذا دوري اراء ثانيه وقارني وأبحثي ، المدونات -كلها- هي مرجع لا اكثر، تبادل خبرات وتجارب لا اكثر ، شفتي منتج عند بنت وكثيير تمدحه لاتروحين وتشترينه ع طوول ، خلي عندك رايي وتفحصي المنتج واقري عنه ، خاصه لما يكون خاص بالبشره ممكن يضرك لان مو كل البشرات تتشابه ، حتى لو نفس نوع البشره مو معناته بيناسبك انتي !


باختصار الي حبيت اوضحه :$ الهدف من التدوين انو نشارك تجاربنا معاكم وانتو لكم حريه الاختيار هو مو فلسفه او فرض رايي او احنا او"انا" الي فاهمه كل شي لان بالاول والاخير الجمال والبشره عالم كبييير محد يقدر يفتي فيه الا اذا دارسه او له تجارب كثيره جدا معاه ، والحمدالله ماحب افتي بشي ماعرفه ، واحاول افيد بالي اقدر عليه وانبسسط انبسسط اذا بنوته جربت شي مدحته وقالت لي عجبها♥♥ و كثااار بنوتات يبسطوني بكلامهم الجمميل خاصه لما تقولي انتي غيرتي فيني شي احس اني مللكت الدنيااا جد جد ، مافي احلى لما يكون لك تأثير ع الغير بشكل افضضل فمرره شكرا لكل بنوته تسعدني داايمااا بردودها وتعليقاتها الجميله ♥ و حبيت اذكركم انو التدوين مو مختصر ع الجمال ممكن يكون بأي مجال حابينه ، الي حابه تدون بس تقول ماعندي شي اكتب عنه! مستحيل ياقلبي ، كل شخص بالعالم له تجارب او اشياء استفاد منها ، حلو نثري المحتوى العربي بتجاربنا وخبراتنا حتى لو ماجربتي اشياء كثيره تقدرين تكتبين عن اي شي عاجبك ، طموحاتك افكارك تصويرك طبخك رسمك اي اي شي ، عندك هوايه طلعيها للعالم وتحدي نفسك وَ طوريها ..

مثل ماقلت انو الهدف من مدونتي متنفس ومكان افكاري الي ابي اشاركها للناس ، فحبيت مع اللوك هذا ارجع للهدف الرئيسي ، سويت ٦ اقسام يوميا ماعدا الخميس بيكون في تدوينه جديده ، ممكن تكون طوويله وكلام كثير -كعادتي- وممكن تكون مختصره وَ صور ، مو مهم الكميه قد مو مهم الفكره وَ انها توصل الي احبه للناس ،

حابين تعرفون كل تصنيف للمدونه يعني ايش ! يلا شوفو معي *.*

قورجستا :

- هي انا :$ قسم قورجستا بيطل عليكم كل سبت ان شاء الله ، هو السبت يوم غثيث بس معاي بيكون بسيط وسلس وجميل *ثقه ثقه :$* يوم السبت بعرض لكم تجاربي بشكل عام ♥ ، منتجات اعجبتني بالمكياج \ العنايه \ العطورات ، اي شي يهمكم راح اعرضه ان شاء الله ، وبيكون من تصويري الخاص باذن الله ..

الهام :

- الهام هو قسم بيطل عليكم كل احد ، بيكون عباره عن صور او اشياء عجبتني ممكن تستفيدون منها ، ماقدر احدد نوع الصور بس بتكون مختارات من تجميعي الخاص وتعطيكم دافع تبدعون وَ تنجزون وَ أهم شي تعطيكم الهاااام .. اما بتصوير او تصميم او ديكور ، ترا احب اتفرج ع الصور والاقتباسات كثييييير ، احسها شي جميل وتعطيني افكار واسرح فيها وتطلعلي فكره مالها علاقه بالصوره الاساسيه ! بس اقدر اسميها تغذيه بصريه ، اذا شفنا صور كثييره بتتراكم ويتشبع المخ واذا صرنا نبي نفكر بشي تلقائي الصور ممكن تطلع لنا ، مدري لو فهمتوها ؟ :$ بس الي يحب التغذيه البصريه بيفهمني : )♥

تكنوشيك:

- تكنوشيك ترا مدري شلون طلعت الاسم هههههههههه بس هالقسم الي بيطل كل اثنين بيهم البنوتات الي يحبون التكنولوجيا مثلي ، صح انا مو قييك "الي يعشقون التكنولوجيا والاشياء المعقده" بس احب اشوف احدث الاشياء مثل برامج الايفون الجديده ، حتى لو مقطع باليوتيوب عجبني له علاقه بالجمال ممكن احطه هنا :$ ، الاشياء الجديده الي تهم البنات من مقاطع واخبار وصور بحطها هنا.

ميني منيكان :

- قسم الفاشووون ، ميني منيكان ! هالقسم بيطل عليكم كل ثلاثاء وبيكون له علاقه باي شي متعلق بالفاشون واللبس والكشخه ، ممكن احط تنسيقات اعجبتني من تصويري او من النت ، اتكلم عن موضه معينه ، انسق لكم قطع جديده باكثر من لوك ، اي شي له علاقه بالفاشون بيكون هنا.

غيمه ٩ :

- بتقولون ايش يعني غيمه ٩ ؟ احب هالمصطلح كثييير كثييير ، cloud 9 بالانقلش معناه اعلى درجات السعاده والطمأنينه كأنك بغيمه بروحك ، شي يدل ع السعاده ، فحبيت اسمي هالقسم غيمه ٩ وبيطل عليكم كل اربعاء عشان يكون اربيعاكم جميل اكثر p;♥ هالقسم بتكلم عن الاشياء الايجابيه وكيف نكون ناس سعيدين ونشوف الجانب الحلو بالحياه دااائما وابدااا ، الي يعرفني انا انسانه سعيده ، مو لان حياتي سعيده وكل شي ع مزاجي ، لا لان اخترت اكون سعيده واخترت اشوف كل شي حلو بالحياه والي مايعجبني احاول اغيره واطمح اطور نفسي ، ماعندنا الا عمر واحد ليش مانحب نفسنا ونعيش! صح الحياه مو دايما حلوه بس اذا اخترنا نكون سعداء بنكون ، نقدر نلقى السعاده باصغرررر الامور ، عشان كذا بالقسم هذا بتكلم عن كل شي ممكن يخليك سعيده ، احب تكون مدونتي مفيده وممتعه ، احب تعبر عني فهذا القسم احس بيكون اقرب قسم لي : )♥♥♥

استكنان :

- استكنان من الاشياء الي ابي اسويها من زمان من زماان من زماااااان ، هالقسم بيكون كل جمعه ان شاء الله "ماتشوفون المبخره ههههههههههههه" لو اقولكم طموحي بتضحكون علي :$ لما كنت صغيره طموحي اخلي اوبرا "المذيعه المشهوره" تسلم ، احبها واحب اتابع برامجها ودايما اقول لو اسلمت بتخلي الناس كلها تسلم -هذا الكلام وانا بالمتوسط *-* - المهم ، ليش التغيير مايكون بخطوات بسيطه ، كثااار منا وانا منهم مقصرين بالجانب الديني من حياتنا ، فحبيت هالقسم مانتكلم عن الدين بشكل كبيير ومتعمق لا بتكلم عن اشياء بالدين ونربطها بحياتنا العمليه ونقدر نستفيد منها لان اولا واخيرا ماحب ادخل بشبهات واكيد واكييد ماحب افتي او احلل او احرم لان ابدا ماني بوضع يسمح لي بالطبع ، فحلو كل جمعه نتذكر سيره النبي صلى الله عليه وَ سلم ونتذكر قصص الانبياء الي متأكده كثاااار منا مايعرفونها ، بتكلم عن الدين "اليسر" وحلو نبسط دينا لان دينا دين حيااااااه ، كثارر من الناس يكرهونك بالدين باسلوبهم ، ان شاء الله اقدر اغير الشي هذا لان الدين ترغيب وليس ترهيب ، وبتكون من اقسامكم المفضله صدقوووني !!



وبس هذي قورجس ناشبه لكم كل يوم هههههههه ، حسيتها مسؤوليه بس يارب اكون قدها : ) ذكرت بالبايو بالتويتر والانستقرام ، افكاري بالتويتر ، صور من حياتي بالانستقرام وَ مدونتي هي انا ! بعيدا عن التصنع والمبالغه بكون هنا على طبيعتي ، يارب تستمتعون معاي ، كل الشكر الي شجعوني احس كل يوم انا ومدونتي نكبر ونتغيير للافضل ، انتو السبب والله ! بعد ربي أكيد ، من دون دعمكم ماتوقع بوصل للمكان هذا ، مرره اشكركم من كل قلبي♥♥♥♥♥.
" ان أصبت فمن الله وأن أخطأت فمن نفسي والشيطآن "

ايش اكثر قسم حبيتوووه ♥♥ ؟؟

للتواصل معي ع التويتر والاسك-غيرت اللنك- والانستقرام

كونو دائما جميلين ♥ ..

xo Gorgeous