تعرفو عَ كولكشن عطوراتي الجميله ، ممكن تصيرون أصحاب ♥_♥ My perfumes collection ~

 -



مسساكم \ صباحكم عطور فواحه وَ جميله مثلي :$♥
مثلي مثل أي بنوته أحب العطوور وَ أحب الريحه الجميله ! شي طبيعي :)♥
بس ماكنت مهووسه بالشي هذا عاادي يعني أجلس سنه ع عطرين أو ثلاث ومش أنا الي أشتريهم بعد ههههه !
إما تكون هدايا من البابا أو أسرق من مامي :$ أو عمي حبيبي دااااااااااايم يجيب لي عطور أحبب ذوقه كثثير فيها ..
ماأذكر والله شريت عطر ! الا لما دخلت الجامعه ممكن :/ ؟ بس بعد الزواج كل شي تغير أكييد :)
وبدال لا أهتم بتعطيري الشخصي صرت أهتم ببيت كامل ههههههههه ، جيرانا الله يهديهم من دوله عربيه شقيقه :)
وإذا طبخو ماشاء الله يمتلي البييييييت ريحه طبببخ وَ ريحه طبخهم فيها سر عجججيب !! ريحه قويه قووويه
ومو زززينه أبد الله يديم النعمه ! و دايماااا يطبخون !! والله كل ماأحد زارني يقول في ريحه شينه بالممر ههههههههه
فأنا أوسوس وبس مشغله الشموع والفواحات ويالله تغطي :/ ؟؟؟ بس ماأحب دااايمما البيت فيه ريحه عطر ! 
أحس الواحد لازم يتنفس هوا طبيعي شوي ولو إنو بالرياض ماعندنا الا الغبار هههههههههه ! بالله انتو نفسي يوميا تمسحون الطاولات ؟؟
أحسني المخلوقه الوحيده الي بس تمسح وكل ماكلمني أحد أقول جالسه أمسح هههههههه وصاحبتي تتريق علي تقول لو انك عايشه بقصر :)) كلها غرفتين ومطبخ :)) *أشوف فيك يوم إن شاءالله* ♥

إيوا نرجع لمحور حديثنا :$~
"عطر المرأه يخبرك بأشياء أكثر مما يخبرك خط يدها" *كريستيان ديور ♥
أحس العطر يدل عَ شخصيه معينه ، وكل عطر يمثل شخص .. أنبسسط أنبسسسط لا أحد شم عطر وَ قال ايي هذي قورجيس :$♥ !
عندي الروائح مرتبطه بأشخاص ، مناسبات ، ذكريات .. رشه عطر تاخذك لمكان بعيييد ! صح إنو ماأقدس العطور وَ مش مرتبطه فيها بشكل كبير
بس بعض العطور تجبرك على عشقها وَ بسسس♥♥، لما أسلم عَ شخص وَ ريحته جميله بس مو قويه أنسجم معه ، أصلا أول شي أفكر فيه لما أسلم ع شخص أشمه ههههههههههههههههههههههه جد جد لما أسلم عَ شخص وَ أشم ريحه جميله ، حتى لو ريحه نظافه أنسجم معه حتى لو مو كشخه وَ لا جميل كشكل خارجي ، أحس أول شي يجذبني العطر وَ النظافه ، في وحده أحبهااا مرررررررررررره مرره ، بس عندها عطر شين شين ، لما أزورها أشم ريحه العطر ولما تزورني أشمه فيهاا ، أحاول قد ماأقدر أتغاضى عنه بس ماقدر :"( وَ أذكر في وحده شفتها مره وحده وَ عطتني عباتها أعلقها شميت ريحه شينه للعطر نفسه وَ أحس خلاص ماإرتحت لها ! مدري وش هالسر الي فيني ههههههههه بس عندي العطر يعبر عن الشخصيه ..
وَ الي تتعطر فوق ريحه "عرق" ترا شي مو زيييين أبببد والله والله :""( إرحمووونا خليكم بريحتكم الاوليه أحسن ! لأن الروائح تختلط وَ تصدر رائحه نفاثه مزززعجه مززززعجه ..
صح قبل ماكنت أهتم بالعطور وَ عادي أتعطر وَ تنتج روائح شينه ! بس توقعت إنو أسرع وَ أريح ، كنت صغيره ومحد نبهني وَ بس كبرت
صرت ألاحظ ، وَ صرت أعرف الشخص النظيف من الشخص الي نص نص ، في نااس حرام حررام عسسل بس ماتهتم بالنظافه ! عيب بعزيمه أشم ريحه مو زينه ! الناس بتأخذ انطباع سيئ ، ودي أنصح بس أستحي يأخذون الموضوع بشكل شخصي :"( بس مره أهديت لوحده طقم لوشن وَ عطور من فيكتوريا سيكرت وكأن الأمور بدت تضبط لووووول ..

قبل لانبدا بس معلومه صغننه :
Eau de Parfum  بيرفيوم يعني عطر مركز ، ريحته أقوا وَ ثباته أعلى ♥
Eau de Toilette  تواليت ، التركيز أقل وَ يكون أفضل لو حابين للصباح بالنسبه لي :)♥

حفظ العطور : أفضل طريقه حتى تحافظين عليها لفتره أطول إنو تخلينها بعلبتها لأنها مصممه بشكل مخصص للحفاظ عَ العطر ، 
اذا كان للاستخدام اليومي لا عادي بس أفضل شي بعيد عن الحراره + الشمس :)

ذوقي بالعطور : مدري ماأقدر أعبر بشكل معين بس في أشياء مشتركه بالعطور الي بتكلم عنها :)
ما أميل للفواكه وَ العطور الناعمه بزياااده :$ أكره الريحه الي أساسها الفواكه القويه مثل الماانجااا ولا البرتقااال ..
ممكن أستخدمها للبيت بس بشكل شخصي لأ !

نشوف كولكشني المتواضع ؟ هذا الي أستخدمه حاليا :)♥♥



أول واحد تكلمت عنه قبل جوسي كوتور - كوتور ، من محتوياته العنبر - المندرين - زهره البرتقال - خوخ - فانيليا وَ خشب الصندل
عطورات جوسي بالغالب أعشششقهااا ، هذا كان له ميداليه كشخه بس مدري وين راحت هههههههههه ! العطر فخم ينفع لعزيمه أو مناسبه كثيير أنسأل عنه :)



ايلي صعب للمصمم العالمي ايلي صعب <- يعني جايبه شي جديد هههههههه ، أحب هالعطر ومعي من زماااااان وَ له ذكريات حلوه 
محتوياته : زهره البرتقال - الياسمين - الباتشولي - خشب الأرز ، كثاار ممكن مايحبون العطر بس أنا جدا يعجبني :$
وَ عطوه فرصه لما يبرد وَ إحكمو ، شوفوني مخلصته p; ♥♥♥



عطر زواجي ههههههه ،  * الغطا منعوج فغضو النظر * كنت أبي ريحه مميزه غير عن المعتاد مثل كوكو شانيل وَ طقته ! وأبي ريحه لسهره جد وَ ثااابته ، فنصحني الي يبيع أشوف هذا
وَ عجبني أنا وَ ماماا كثيييييييير ، يكفي إنو مميز وَ محد قد شافه :$ ♥♥♥
من محتوياته : العنبر - القرفه - الياسمين - الزنبق - الباتشولي - الأخشاب - البخور وَ الكراميل ، 
مدري وين تحصلونه هنا بالسعوديه لأن ماأذكر شفت هالماركه ! لأن اخذته من برا ، هل يستحق الشراء ؟ ريحته قويه جدا ماأتوقع بتعجب الكل بس غريب غريب وَ كثييير حبوه وَ ثابت بشكل عجيب ، لدرجه بخيت منه بغرفه الضيوف عند قرايبي وَ بعد إسبوعين قالت لي تدرين تو أدخل الغرفه وَ ريحه عطرك موجوده ههههههه !!
سعره فوق ال700 اذا مو غلطانه ، شكله فخم *تخيلوه بدون إنعواج :$* ينفع كهديه :)
أحب أستخدمه بالزواجات بس ، بما إنو قوي :)♥♥♥



عطر هوت كوتور من جيفينشي ، هذا العطر مو ستايلي أببد بس أخذته كتغيير وكان عليه عرض بعد ههههههههههه بس مايمنع إنو ريحته جميله وَ غريبه !
غريبه لأنو تحسين حاره مثل اسمه ههههههه وتواليت يعني خفيف يصلح للصباح بس مش الصباح الساعه 7 مثلا ! لا كذا ع الظهريه < تبيكم تحطون عطر لكل وقت ههههههههه ، المهم من مكوناته : توت - فرواله - توابل - روز - مسك - عنبر وَ مسك أبيض ،
العطر من العطورات الي ماإستخدمتها للأن ، فما أقدر أعطي رايي بصراحه ، بس جربوه ممكن يعجبكم :$



عطر بيلي دي أوبيوم من إيف سانت لورانت ، هالعطر نصحتني فيه وحده مدمنه عطور ، جميل بس ماحسيته ذوقي ، حاولت أحبه بس ماقدرت :$ 
بس مافي مانع أخليه للمناسبات ، مخليته بعلبته لحد مايجي يوم أتفاهم معه ، من مكوناته : خوخ - فلفل أبيض - ياسمين - بخور - خشب الصندل
العطر يعتبر مشهور ، عطوه فرصه ممكن يعجبكم وَ يارب يعجبني :$ 



عطر 212 في اي بي من كارولينا هيريرا ، هالعطر غني عن التعريف ! أذكر رحت المحل 3 مرات لأن كل مره يقول بيجي مع طقمه الكامل وأنا أتصبر 
بس للأسف كل ماأروح خالص خالص ، هذا عطري اليومي هو مع ايلي صعب أكثر شيين أستخدمهم وَ كوتور لليل♥♥♥، شوفوه متخدش ورايح فيها دايم مرمي بالشنطه ههههههههه ، كل شي جمميل فيه بس مشكلته شوي ثقيل :/ يقولون من أنجح عطورات كارولينا هيرارا ، أفضل من ليدي ميلون حتى !
مكوناته : فواكه - قاردينيا - مسك - فانيلا ، أحبه وَ بس :$



هذا العطر من بينفيت ، اسمه طويل سيي اند بي سيين ساشا ! جميل جميل ، كنت أنا وماما نتمشا بسيفورا وَ قالت الي تبيع إنو هذا ليمتيد إديشن ومدري ايش أنا جذبني الشكل أول شي صارت عيوني قلوووب♥♥♥ ، عاد لما شمته ماما عجبهااا ، وقالت باخذه وأنا أناظر فيها وأسبل بعيوني فأخذت لي واحد *تذكرت حلا الترك لما سبلت بعيونها باربز قوت تالنت وَ نجحت* أسوء تسبيله بالتاريخ ، التسبيله الي جابت لنا الزباله وإنتو بكرامه :| ! أعع أكره أهلهاا مخلينها الكرت المؤدي للنعيم وَ ووجع ، قتلو برأتها وَ طفولتها ، حرام تجنن البنوته بس أهلها خربو حياتها .. ايوا وين كنا ؟ شدخل العطر بحلا الترك مدري ههههههههههههه

المهم ، العطر هذا بيكون عطري اليومي بس يخلص 212 في اي بي ، وَ على وشك يخلص :$ عَ فكره اذا خلص عطر مستحيل أرجع أخذه أحس الخيارات كثيره قدامي وَ التجديد مطلوب حتى لو عششقت العطر ، من مكوناته : زهره البرتقال وَ المشمش - الياسمين - العنبر وَ المسك السائل والفانيلا
طبعا المكونات أجيبهم من موقع الشركه نفسها وأترجمها وَ يطلع لي كلام غير مفهوم يعني أغلب المكونات الي ذكرتها هي الي أعرفها ولا في مكونات ثانيه مدري وش تبي ، العطر صباحي هاادي وَ رايق ، وَ كافي إنو كيووت .. وَ أذكر موو غالي اقل من 200 ريال < اكبر نسايه أنا :((




مجموعه نوير تييز من فيكتوريا سيكرت ، هذي المجموعه عششق عشششق .. أحلى شي جربته من فيكتوريا سيكرت ♥♥♥
ماتنفع للصباح مرره قويه بس جميله وَ ثابته لحد ماا .. معاها شور جل + لوشن + عطر + سامبل للشنطه .. أصلا يكفي أرزه ع التسريحه وأسرح فيه 
ههههههههههههههههههههه من مكوناته : الماندرين - الكمثرى - التفاح الأحمر - ياسمين وقاردينيا - مسك وفانيلا ولوز ومسك وعنبر وَ خشب الصندل
مدري كيف أوصفه ! بس ينفع للمتزوجات ، ريحته قوويه بس تسحر الصراحه ، ماينفع للصباح مثل ماقلت ..



هذا العطر أو العود *ترا ماأفهم بالاشياء الشرقيه ، عطورات فرنسيه وَ يخب علي* مخصص للعبايات ، ماما جايبته لي هديه الله يخليها لي♥♥♥() وَ ماخذته من تاجره ، ما أدري وين ينباع صراحه حاولت أدور إسم ماركه ماحصلت !! ريحتته تجنن تجنن ، أبخه للعبايات ( للمناسبات أكيد) يثبت بشكل كبير ،
وَ خاصه لو تبخرت قبلها يطلع ولا أجممل ، فيه قطع بخور تطفو داخل أحسه يونيك ههههههههههههه ، وشو كمان !
حلو قبل لاتروحون لمناسبه تبخرون العبايه وتعطورنها بعود وتخلونها شووي وثم تلبسونها .. الريحه ثابته وَ جميله
وَ يكفي لا أححد أخذ عبايتك يعلقها يشم ريحه حلوه ! بليز لاتهملون النقطه هذي :$♥♥



أخر عطرين بتكلم عنهم ماخذتهم هديه عشان كذا مافتحتهم ! 
العطر الاول ع اليمين من جورجيو أرماني أكوا دي جويا "ايسانزا" عطر مركز ، يقول إنو أجدد شي نزل ، بس مش مهم .. ريحته مرره مرره مررررره فخمه !
ينفع لهديه وَ بقوه وً الي ما تعجبه ماعنده سالفه الصراحه :$ سعره 600 اذا موغلطانه
لما بحثت عن مكوناته مافهمت شي فروحو شموه أفضل ههههههههههههههه ، بس ريحته حامضه :)♥♥

العطر الثاني كلوي ، هذا العطر من سمعت عنه زماااااان وباااالي معه الا اشتريه ، وكل مره يصير شي ماأخذه ! لدرجه وصيت باباتي لما سافر يجيبه لي ،
كلمني ويب كام وشفته وقال هذا الي تبينه قلت ايييييي وماجابه هههههههههههههه مدري وش الي يحول مابيني وبينه !
قلت شكلي مالي نصيب ، فأخذته هديه .. العطر هذا الكللل يحبه وَ مشهور مره .. فإن شاء الله بيعجبها ()♥♥
نصيحه اذا بتهدون أحد عطر لاتهدون على ذوقكم إهدو شي الناس مننهبله عليه يعني الاراء متجمعه جوله عشان ماتتوهقون ههههههههه
من مكوناته : روز - خشب الارز - العسل - العنبر ، ريحته هاديه وَ رايقه وإنثويه
سعره حول ال400 اظن ! لأن طلعت من سيفورا بالف و50 تقريبا ♥

وَ بهيك أكون خلصت من مجموعتي الحاليه بالعطور الي ماأتوقع تتجدد إلا لما أخلص كل الي عندي :$
الأذواق تختلف أكيييد فالي حاب يجرب شي يرش ع ورقه بالمحل يروح ياخذ فره وَ بعدين يقرر !
مستحيل تعرف ريحه العطر الا اذا برد وَ ركز .. وَ نصيحه ثانيه لاتشمون عطور كثييييييره لأن بتدوخون ولا راح تعرفون تختارون !
لاتعتمدون على أحد بشراء العطر الخاص ، العطر يعبر عنك لاتستهين بالشي هذا !
في عطورات للصباح وعطورات لليل مانبي ازعاج لحواسنا لو سمحتو :$
النظافه الشخصيه أهم من العطر نفسه ! 

وَ طريقتي بالتعطير بسيطه .. أخذ شور أحط كريم وياليت يكون نفس العطر ولو مافي عادي أي كريم مرطب بس بدون ريحه وَ بعدين تعطرو لضمان الثبات لاغير ، بالنسبه للبخور أنا فاشله بالاشياء الشرقيه هذي فمعتمده ع ماما تشتري لي البخور .. ما أتبخر الا بالمناسبات *ماما غمضي عيونك هههههههههههههه* ♥
أمي الله يحفظها تععشق العطور وَ البخور ودايما تتبخر بس ماطلعت نفسها للأسف :$ بس البخور يثبت العطر بعد وَ يحليه وَ خاصه لو كان خشب ومو مسقى *يعني مش منقع بعطر من قبل يكون خشب بيور* وأجمل شي تبخرين الشعر وهو مرطب حتى تمسك الريحه !
وإيش كمااان ! يارب مانسيت شي وَ لا أهملت أي نقطه :$
وهذي مو كل عطوراتي بس صورت الي قدرت عليه ()
تكلمت كثيييير أدري بس أحس من زمان ماتعبت عَ موضوع ! فيارب يعجبكم ذوقي وإختياراتي :)
وترا التصوير جميل وماعلي من بعض الناس *فيس ماد لسانه*
لو في أي أخطاء إملائيه مشو لأن دايخه وماأشوف الدرب ..
وترا القيف أواي قررريب مره :$ خليكم مستعدين *الي يبي يفهم سالفه القيف اواي يطل ع الانستقرام حقي* ♥♥
وكالعاده

أي إقتراحات أو طلبات 

عَ التويتر:

https://twitter.com/Gorgeous_blog

أو الأسك:

http://www.formspring.me/GorgeoustaBlog

كونو جميلين دائما  / قورجيس ××

أحبكم ♥♥♥♥♥