تجربتي بتبيض الأسنان بتقنيه التبيض البارد والقوالب المنزليه ♥

السلام عليكم ورحمه الله وبركاته ♥♥،،

من سنتين وانا مدمنه٣ قهوه بشكل خيالي هالشي يآثر على اسناني وبياضها للاسف!

جربت كذا نوع تبيض واقدر اقول عندي خبره شبه كافيه عنهم ..

لو تذكرون تجربتي مع تقنيه الزوم مع دكتوره جمانه قبل سنتين تقريبا ♥♥ ، تجربتي كانت جدا ناجحه بالتقنيه هذي وحبيته وكررت التجربه بس ملاحظتي كانت ان الاسنان تصير اخشن كملمس وصعب تعتمدين عليه كل مره لان شوي قاسي ع السن ، ممكن الجأ له اذا احتجت نتيجه فوريه ، وملاحظه ثانيه اسناني اطرافها المينا فيها شوي شفاف فلما افتح السن بنسبه كبيره شوي يفرق بالسن لان مايكون لون واحد كامل ، هالشي الاحظه انا بس غيري مايلاحظه الا اذا قرب حيييل مني ، مع العلم ان اسناني معتناه واصلا بيضا وصفه وحده بس مثل ماقلت بسبب القهوه تفقد بريقها.

حبيت اجرب شي جديد فتواصلت مع دكتوره جمانه "انتقلت لعياده جديده بذكرها اخر البوست"   نصحتني اجرب التبيض بالضوء البارد ، اول مره اسمع فيها للامانه ومافي احد متكلم عنها كثير ، لكن دكتورتي  بلغتني انها جدا قريبه من الزوم لكن الزوم لانه اقوى كبياض فالناس تتوجه له مع العلم ان الضوء البارد أأمن وارخص كسعر ♥♥

توكلت على الله وسويته ، بالبدايه سوت لي الدكتوره تنظيف خفيف للاسنان الحمدلله ماكان عندي جير ، بعدها حطت مثل القالب الي يوسع الفم ، شعور اخخخ يمكن اكثر شي عورني لان فمي صغير ههههه ، بعدها حطت لي مثل الجل حول الاسنان وظيفته يحافظ ع اللثه ماتتصبغ ، حسيت الخطوات نسسخه من تبيض الزوم! بعدها حطت لي الضوء البارد وكثييير يشبه الزوم كشكل تمنيت اني صورته لكم

قالت لي يكفيك دوره وحده ، سويتها لمده ربع او ثلث ساعه ، مافي اي الم او عدم ارتياح بالعكس ، اكثر شي كنت شايله همه ان اسناني تتفتح ويصير فرق بينها وبين اطرافها ، بس لما شفت النتيجه حييييل حبيتها بياض طبيعي جداا ، الاسنان فيها لمعه ونظافه!

مافرقت اطراف المينا عن السن الاساسي ، وهذا اكثر شي ريحني ، صار تصبغ ع اطراف اللثه بس اقل من ساعه وراح ، في اسناني السفليه واحد منهم مثل النقطه البيضا وحتى مع التبيض واضحه بشكل خفيف قالت لي الدكتوره من اخر جلسه وهي مضايقتك “حافظتني ههههه” قالت بشيلها لك ، وفعلا شالتها لي بالليزر وبدون تخدير او الم وحطت حشوه وبسرعه خلصنا ولا فرقت عن السن ابداا ، بالبدايه لما المسها بلساني احس فيها وتضايق بس كلها كم يوم وتعودت ولا كانها موجوده والاحلى ابدااا مو مبينه ماتوقعت هالامر بالسهوله هذي ♥♥

الفرق بين التبيض بالضوء وبين الزوم ، ان التبيض بالضوء مايآلم ومادري لو كملت دورات اكثر يمكن يجي الم؟؟ الله اعلم بس حبيت النتيجه من اول دوره ، الزوم البياض فيه اوضح ويكون ساطع وممكن يكون شوي fake اكثر من التبيض البارد ، اسناني بالزوم اخشن من العادي وهالشي لاحظته اكثر لما سويت تبيض مره ثانيه بالزوم ، بالضوء البارد ابداا ماحسسني لا السن ولا اللثه بعكس الزوم .. كلهم اللون الساطع يخف بعد كم يوم لان اشرب قهوه لو قللتي من الملونات البياض بيستمر معاك اكثر بكثييير بس ابي احد يمسكني من هالادمان هههههه!!

لكن لو برجع ابيض اسناني بعتمد على القوالب للامانه ، كثره التبيض بالليزر وغيره يحسس الاسنان وخاصه لو بفترات متقاربه اقل من ٦ شهور ، عشان تستخدمين القوالب لازم تقطعين الملونات كم يوم عشان كذا ماسويتها الا مره لان ابي اوحد لون السن واحافظ على نتيجه البياض

انا اشوف القوالب نتيجتهم ع صديقاتي ومره مره جميله كأنهم مسوين فينير من البياض ماشاء الله ، الحلو بالقوالب انها تذوب الملونات وتجي ع مقاس اسنانك وتعتبر من التبيض الامن الي مايحسس لا اللثه ولا السن عيبه ان ياخذ وقت اسبوع او اكثر وتوقفينها لحد ماتوصلين للنتيجه الي تبينها والقوالب تبقى معك بس تشترين الابر او الجل ، الابره الوحده تكفيك ثلاث جلسات تقريبا او حسب حجم السن وتجلس ٦ شهور بالثلاجه او حسب تاريخ صلاحيه الجل ، اول مره جربتهم حسيت بشد خفيف ع الاسنان ، لان الي عندي قوتها ٢٠٪ (طبعا في نسب ثانيه تتراوح بين ال١٠٪ وال٣٠٪ ع حسب  بنيه السن وحساسيته الدكتور يصرفه لك) استخدمها من ساعتين ل٤ ساعات مع ان دكتورتي قالت نص ساعه لساعه تكفيك لان اسنانك الريدي بيضاء لكن ابن ادم طماع للاسف ههههه

ليش الجل له نسب مختلفه وشلون نعرف الانسب لنا؟
اول شي مثل ماقلت تبيض القوالب تذيب الملونات والترسبات الي على السن فماراح تأثر على الاعصاب او السن نفسه ، فاذا انتي عندك حشوات ماراح تغير لونها فقط يشيل الترسبات ، النسب بالجل كلها تعطيك نفس النتيجه لكن كل ماقلت النسبه يزيد الوقت الي تستخدمينه ، اذا اسنانك حساسه اخذي نسبه اقل وهكذا.

شلون احصل على القوالب؟
القوالب من العيادات فقط لان ياخذونها على مقاس سنك بالضبط بحيث الجل مايطلع للثه اذا استخدمتيه.

شلون استخدم القوالب؟
- فرشي اسنانك بمعجون عادي ونشفيها
- حطي نقطه داخل تجويف القالب
- حطيها ع حسب الوقت الي قالت لك دكتورتك ، البعض يستخدمها وقت النوم مادري احس ممكن تتحرك او تطيح!
- غسلي اسنانك واستخدمي معجون اسنان حساسه او معجون تبيض دكتورتي نصحتني بكلوز اب الي بالصوره
- لاتنسين تجففين القوالب زييين عشان ماتتجرثم
- التفريش دايما يكون مثل التمشيط من فوق لتحت بدون قوه ابداا
- ماتستخدمين ملونات ابدا وقت التبيض مثل القهوه والعصاير

بس اوقف القهوه برجع اكمل جلساتي ان شاء الله! تجربتي بالضوء البارد جدا ناجحه انصح فيها لو تبين لمعه وبياض طبيعي بسعر حلو ، اذا عندك مزاج ووقت انصحك بالقوالب لانها بتظل وياك طول العمر لانها تتسوى بالعياده ع قياس اسنانك وتثبت لك تبييض الجهاز ايا كان نوعه وتجدده ، قوالبي سويتها عند دكتوره جمانه الله يعطيها العافيه ، حاليا هي بعياده المشفى الطبي بمخرج ١٢ على الدائري ، الدكتوره مو اول مره اتعامل معاها واكيد مارجعت لها الا لأني ارتاح وياها ولتعاملها جدا لطيفه ونصوحه ، حتى كنت بسوي قشره لاسناني “اللومينير” وهاوشتني تقولي اسناني ابدااا ماتحتاج بس لان شافتني مصره قالت لي عن جهاز تستخدمه يصمم لك الابتسامه ترسلين لها صورتك وتسويلك الابتسامه الي تناسب وجهك بحيث تعرفين شكلك بعد الفينير او اللومينر او الي يسمونها ابتسامه هولويد ، ان شاء الله اذا جربتها بقولكم عنها :)) وبعد تسوي توريد اللثه عن طريق الليزر شفت كم حاله عندها وحبيت النتيجه .. حساب دكتورتي بالانستقرام @dr_jumana_dentist دايم تحط عروض بحسابها ومعلومات لطيفه 

ان شاء الله يكون البوست لطيف ومفيد واذا عندكم تجربه عن اي شي ذكرته لاتبخلون بتعليقكم

اشوفكم قريب!