وظيفتين ، شغل خاص ، ام وَ زوجه .. حياتي في ٢٠١٤ بإختصار + خطوات لسنه ناجحه ♥.

السلام عليكم وَ رحمه الله وَ بركاته ♥♥♥♥♥♥♥♥

بالبدايه ، بكتب لكم ولنفسي تحديدا لاني احب ارجع اقرا كلامي والمدونه والانستقرام عالمي الصغير الي اشوف تطور نفسي ووين كنت ووين وصلت واشوف هل جد في تغيير وتحقيق اهداف ؟

سنه ٢٠١٤ بالنسبه لي كانت من اجمل السنين يارب لك الحمد ، ببدايه ولاده ديم الجميله الي ملت حياتي ولشغلي الخاص الي بديت فيه واني اشتغلت بوظيفتين ، يمكن هالاشياء خلت نشاطي بالمدونه يقل ، مو لان مافي وقت ؟ بالعكس الحمدالله مرتبه اموري وجبت من يساعدني بالبيت بادارتي طبعا بس كان المزاج والضغط النفسي العامل الرئيسي اولا واخيرا ..

اذكر من اهدافي للسنه كانت ابدا شغل خاص فيني ، ليش وشلون وشنو هو بالضبط ماكنت عارفه صراحه بس كنت حاطه ببالي لازم استقل بنفسي ، احس عندي طاقه لازم اطلعها ، بديت مخططات كثييييييييره كثييييره بس ابدا فيها تتكنسل من الله ، كنت اقول خيره ، مازعل صراحه! يمكن وقتها اتحبط بس ثاني يوم ولا كأن شي صار ، صرت اسأل الي حولي عن اي فكره تطري ببالي بس ماحس احد شجعني يمكن لان عارفين عندي شي اكبر من كذا ، الحمدالله جتني فرصه كبيره ماكنت متوقعتها ، سبحان الله كل شي خططت له مايقارن بالفرصه هذي ابدا ، الحمدالله كل شي تكنسل لان ربي شايل لي شي افضل بالمستقبل ، كنت واثقه بربي واكرمني الحمدالله!

طيب تبون تعرفون وانا ابي اقول بعد والله هههههه ، بس وعد قريب ان شاء الله بشاركم فيه ويارب يعجبكم لان تعبت عليه جددددا :") ♥♥♥♥

ثاني شي كانت الوظيفه ، في جزئيه كنت بكتب عنها بوست منفصل لان جاني كذا ايميل يدور على نفس الموضوع ، بس قلت دام جبت الطاري خلني ادرجه بالموضوع ، كثير بنات يرسلون لي نفس الايميل ، يقولون شيوم احنا نبي نلبس نبي نكشخ نبي نسافر نبي ماركات ومكياج وغيره بس اهلنا مايتفهمون هالشي ويعتبرونه ماله داعي ، وبعضهم ماديتهم ماتسمح لهم ، نشوف عند غيرنا ونبي نفسهم ! طيب بقولكم قصتي ويارب تلهمكم لو شوي ، انا جيت من عائله الحمدالله مقتدره بس كان فيني صفه ماحب اطلب من احد شي ، يعني مستحيل اروح لابوي واقول يبا ابي اشتري او ابي فلوس او او ، مع اني ادري ابوي حبيبي ماراح يقصر وبيعطيني بس كنت احسه عيب هههههههه ، اللهم مصروفي اليومي اطلبه اكيد وكل فتره هو من نفسه يعطيني يقول اشتري ، بس وقتها ماكنت اشوف فلانه شنو عندها والي رفيقتي شنو مشتريه ولا ولا ، يمكن كان عندي قناعه والاشياء هذي ماتهمني ، بس مالوم بنات الحين الانستقرام والواتس وغيره خلانا نشوف الي عند غيرنا مو نفس قبل!

طيب انا دخلت الجامعه وعالم ثاني وعالم بنات يكشخون ويلبسون وغيره ، تدرون ماكنت اطلب من اهلي مصروف ؟ كنت ماخذته تحدي ومابي اثقل عليهم مكافئتي هي الي اصرف منها على نفسي ، اذكر اول مكافأه مستاااانسسه فيها ، كانت جامعه الكويت تجمع اول شهرين وتعطي الطلبه ، فكانت اول مكافئه اخذها ٢٠٠ دينار كويتي "الله يرحم ايامنا الحين يعطونهم كل شهر ٢٠٠ هههههه :( " اول مكافئه انبسطت فيها جدا واخذت كل الي خاطري فيه! ♥

يالله كان للفلوس قيمه لانها احسها لي ولتعبي اني اداوم ، ابوي كان يعطيني مصروف يومي اكيد بس كنت انبسط لاشريت شي لنفسي من مصروفي ، اذكر ابوي الله يحفظه يروح لامي يقول بنتك غريبه ماتطلب فلوس شسالفه هههههه ، يعني الحمدالله لو احد يعطيني مصروف ماراح يأثر لو ١٪ على ميزانيه اهلي الحمدالله وعارفه هالشي بس كنت ماحب اطلب من احد فلوس وخاصه اهلي وللان ، عندي قناعه الشي الي تجيبه بتعبك وجهدك احسن مليون مره من فلوس تاخذها من احد حتى لو كانت حق من حقوقك ، اذكر كل شهر اكتب احتياجاتي بورقه واقسمها وشنو احتاج ، الطريقه هذي فادتني جددددددا بان اعتمد ع نفسي وماسرف واعرف قيمه الفلوس.

خلصت الجامعه وتزوجت و بصراحه ابدا ابدا مافكرت لو ربع دقيقه بالوظيفه ، وخاصه جتني عروض كثيره بس دايما اقول ماحس اني شخص يقوم كل صبح يلبس ويداوم حتى لو راتب قوي لان اذا ماكنت مرتاحه بالوظيفه وهي ماتقدم لي كشخص واتلهف كل صباح لها عارفه بحس باكتئاب وبصير شخص روتيني ممل ، هذي وجهه نظري يعني تنطبق علي بس ممكن ماتنطبق على البعض ويشوفون نفسهم بالوظيفه ، بس ذكرت هالشي ممكن تكونون بموقفي ومحتاجين الهام p:

  كنت ابي اتوظف بشي احبه لو مبلغه بسيط اهم شي اسوي شي احبه ، وهذا الي صار! توظفت بوظيفه بسيطه جدا حتى لما قلت لاهلي انصدمو يقولون محتاجه فلوس ؟ ابوي قال بمشيلك معاش ، الي بالكويت وكل صديقاتي وظيفتهم معاشاتها قويه وبشكل عام كل الكويتين معاشاتهم مرتفعه خاصه الجامعيين بس عمري ماشفت الفلوس مقياس ، والحمدالله زوجي ابد ماقصر بشي معاي وداعمني تماما بس انا حبيت اتوظف بشي بسيط يسعدني ودايما اذا بديت صغير بتكبر ، اذا بديت كبير بتصغر باي لحظه اما كوضع مادي او كراحه نفسيه ، فليش ماتوظف بشس بسيط وانا حابته ؟؟؟

الهدف من ذكر التجربه للبنات والخلاصه الي ابي اوصلها ، انو لاتعتمدون علي احد يجيب لكم ويعطيكم ويسوي لكم ، لا تخلون يدكم ممدوده وعطني وعطني ، المسؤول عنك بيعطيك مره مرتين ثلاث بس ماتضمنين الدنيا بكره شنو بيصير ؟ الشغل يضيف لك تجارب واهم شي يضيف لك سعاده واكتفاء تحسين انك شخص منتج له هدف ، اذا اخذتي اي مبلغ بسيط بتحسين باستحقاق لهالمبلغ ، انا من عائله مقتدره وزوج مستواه ممتاز بس ماحطيت رجل ع رجل وطلبت لان ابي احس بالانجاز والنجاح ، اعرف وحده مستواها فوق الممتاز من عائله غنيه تعتبر بس متوظفه وظيفه عاديه واتوقع شنطه من شناطها دبل المعاش الي تستلمه ، ليش؟ لان تبي تحس بالاكتفاء وتبي تجرب ويكون عندها خبره ، كانت دافع كبير لي ويارب اكون دافع كبير لكم ، بس لاتسألون شلون ابدا ولا شنو اسوي ولا ولا لان جد ماعرف هههههه هذا يرجع لكم ويرجع لخبرتكم وشنو تحبون بالضبط وشنو تتقنونه وشنو ترتاحون فيه!

طيب نجي لاهم شي بالموضوع ماعليكم من خرابيطي فوق ، شلون نخلي ٢٠١٥ سنه مليئه بالانجاز ؟

١. كن واقعي!

خليك واقعيه ، احلمي صح مو غلط ، خلي لك طموح بس خليك واقعيه بنفس الوقت ، النجاح مايجي بيوم وليله ، يعني شخص عادي ماعمرك فكرتي بالتغيير وفجأه اذا بتغييرين راح تغيرين كل كل شي ، راح تفشلين وراح تحبطين وراح تخلين كل شي وتنطشينه ، عشان كذا ابدأي غيري اشياء بسيطه بالحياه ، خطوات صغيره " baby steps" وكل مره زيدي الجرعه ، بس حطي ببالك لمجرد انك فكرتي بالتغيير تأكدي انك بالطريق الصح! لما كنا صغار وبدينا نمشي لاول مره ، كم مره طحنا ؟ كم مره بكينا هههه ؟ كثييير والحين مو بس نمشي الا نركض!! صح ؟ عشان كذا تأكدي راح تفشلين وتطيحين وتمشين خطوات صغيره بس بالاخير بتركضين.

٢. لاتبدأ بكره

مشكلتنا نخطط ونتحمس ونقول بكره نبدأ واذا جا بكره نقول الي بعده وهكذا ، ليش مانبدأ بنفس اللحظه ليش ننتظر ؟ طيب واذا بدينا بكره ، والي بعده وقفنا نتحبط ؟ لا اهم شي بديتي حتى لو ماكملتي لاتوقفين دام انك قدرتي تبدين بالاساس معناته تقدرين تكملين للنهايه ، فوتي يوم او يومين مو نهايه العالم اوقفي ع رجلك وارجعي اقوى "هنا اتكلم عن الناس الي تبي تصير مثلا تاكل اكل صحي عادي لو خربطتو كم يوم بس مو "دايما" احنا مو اجهزه لازم يمر علينا يوم سيئ او مزاج مو متحمس او احباط بس ارجع وأقول ابدااااااا لايطغى على الهدف والايام الي تمشين فيها صح.

٣. اكتب اهدافك

يمكن هذي اكثر نقطه اذكرها ، اذا كتبتي كل شي قدامك بتعرفين شنو تبين وشلون توصلين له ، لما تكتبين اي هدف لاتخلينه عام وسايح ع بعض ، مثلا هدفك "اضعف واصير صحيه" حددي كم كيلو بتضعفين ؟ ليش تحددين ؟ لان هدفك انتي يختلف عن توقعات غيرك ممكن بالنسبه لك تضعفين ٥ كيلو ممتاز بس بالنسبه لغيرك لا ، فانتي بتقولين ماحققت هدفي و المفروض اكثر فتتحبطين انك ماسويتي مثل مايبون اما اذا حددتي هدف ورقم معين ووصلتي له هذا انجازك وشي حققتيه فراح تفتخرين نفسك.

٤. رتبي وقتك

صعب شوي الترتيب وخاصه مرات يمكن يطرأ شي علينا وممكن تتعبين ويمكن تسافرين فجأه يعني ماتضمنين الظروف ، بس خلي لك روتين معين حطي وقت لتحقيق هدف ووقت لنفسك ووقت لاهلك ووقت لشغلك سواء دراسه او مهام منزليه او وظيفه ، اشوف بنات بس ترجع من المدرسه خلاااااص بس تضيع وقتها على النت ماتهتم بنفسها ولا تجلس مع اهلها ولاتسوي اي واجب اجتماعي ، حياتها نت واكل نوم ودوام ،، حرام والله حراام ، انا كنت بمكانكم بيوم من الايام وتمنيت احد ينصحني استفيد من وقتي تمنيت احد يقولي شيوم اهتمي بنفسك وببشرتك واجلسي مع اهلك ومارسي لك هوايه ، كان تبلد تااااام عندي وبس تخرجت من الجامعه احس ضايعه ، يعني حياتي كانت مرتبطه بالجامعه وماعندي اي شي اسويه لنفسي انا ، تمنيت يكون عندي وعي بالرياضه واصير صحيه عشان نفسي مو عشان اضعف او انها موضه ، جد الي توها صغيره لاتضيعين حياتك ع اشياء سطحيه اذا انتهت خلاص ماعندك حياه! بتقولون شنو نسوي ؟ مثل ماقلت خصصي يوميا لكل شي ممارسه معينه ، ٢٤ ساعه عندنا بس احنا فينا كسل ، وانا مثلكم مرات يمر يومي طوووول اليوم ع الكنبه متنحه بس يخلص اليوم اكرهه نفسي وتصير نفسيتي مش ولا بد لان ضيعت وقتي على ولاشي! صح حلو ناخذ فتره راحه بس حلو نخصص مهام ننجزها بعدين نرتاح.

٥. التغيير بأشياء بسيطه

لما بتغيرين شي فيك او تبدين شي جديد ابدأي بشكل بسيط ، لما تكتبين نفسك صفات ماتحبينها لاتقولين بكره بغيرهم كلللللهم ، غيري شي واحد لمده ٣٠ يوم مثلا خليه تحدي تغيرينه ، اذا تغيرتي بشكل بسيط فهذا ممتاز اهم شي في تقدم ، واهم شي لاتصدمين نفسك بالتغيير المفاجئ وانا انسانه سععععييده واليوم جمميل ومتفائله والطيور تزقزق والحياه حلوه ، التفاؤول حلو بس لاتصيرين اوفر وتنصدمين بالواقع هههههه ، اخذي صفه وحده وغيريها وبس ، بس تحسين تمكنتي من الشي ابدأي بشي ثاني ، اذا ماتهتمين ببشرتك ابدااااااا لاتسوين لك جدول واليوم بسوي واليوم بفعل ، ترا قبل كنت أؤؤمن بسالفه الجداول وتكلمت عنها بالمدونه زماااان بس جددد شفته شي متعب ومحد يقدر يمشي عليه تماما والنتيجه احباط ومافي انجاز ، فسوي شي معقول حطي لك اشياء بسيطه تقدرين تمشين عليها ، ترا انا مع الاشياء والخلطات الطبيعيه بس في بنات الله يهديهم مره يخلون الشي اوفر ويحطون كل الثلاجه بالخلطه ، طيب انا سويتها مره مرتين ، اغراضنا بتخلص هههههه واصلا جد جد من له موووود كل يوم يخلط ؟ سوي مره شي طبيعي ومره جاهز عادي المنتجات الي بالسوق كثر التراب ، دوري الاشياء العمليه الي ماراح تصعب عليك حياتك نبي ننجز وبنفس الوقت مانبي نضيع وقتنا بأشياء بنلقى لها بدائل.

٦. جزء اهدافك

لما يكون عندك هدف  كبير مثل "ابدأ مشروع" حطي اهداف صغيره قبلها وانجزيها حتى توصلين للهدف الكبير مثل ابدأ بالبراندنق "الهويه" الشعار وثيم الشغل وغيره ، بعدين المنتج ، الاشياء الي راح تستخدمينها لانتاج المشروع وهكذا ، بكذا بتكونين عارفه شلون توصلين له وماراح تضيعين او تقولين شنو قاعده اسوي!! لما بتسوين مثلا ريجيم وتنزلين ١٠ كيلو خليه بمده معينه منطقيه ، مثلا كل شهر تنزلين ٣ او ٤ كيلو بتشوفين نفسك وصلتي لهدفك بكللل سهوله.

بالاخير ، ونصيحه مهمه جدا ، اشوف كثييير صوره منتشره NEW YEAR , NEW ME يعني سنه جديد وانا شخص جديد ، الشي هذا غلللط ، مافي شخص سيئ او فاشل او ماعنده هدف ، في شخص اوعى ومركز بالهدف للا أكثر ولا اقل ، عشان كذا خلي شعارك للسنه الجديده "سنه جديده وشخص افضل" كوني النسخه الاحسن من نفسك لاتغيرينها حتى لو عشان خاطر احد ، ركزي بالايجابيات وعززيها وطوريها ، السلبيات مع الوقت بتختفي ، اذا انتي انسانه عصبيه الحل ماتكونين "مو عصبيه" الحل تكونين ريلاكس اكثر صبوره اكثر ، فهمتو شلون المصطلحات كيف تأثر ؟ لما تكتبين اهدافك وجهيها بنبره ايجابيه ، تكلمي عن نفسك بصفه حلوه وحبيها ، "ضمي نفسك" و "تقبلي نفسك" هذا سر النجاح برأيي.

يارب سنه حلوه لي ولكم ، وافضل لي ولكم ، مبسوطه بقضي هالسنه وبتكون الثالثه باذن الله معكم ، احبكم

قورجس ♥