طريقتي في روتين الحواجب ، نصائح وغيرها ♡ | My eyebrow routine

السلام عليكم وَ رحمه الله وَ بركاته ♥♥

بوست اليوم كثيير تكلمو عنه وعن المنتجات والخطوات لرسم الحواجب وشلون تكون حواجبكم بيرفكت ، حبيت اليوم اتكلم عن تجربتي الشخصيه شلون ان الحواجب كانت مسببه لي ازمه والحين بديت اعرف لها الحمدالله وكل مره افضل وافضل مع التدريب وتجريب طرق جديده. ♥

اول شي نوعيه حواجبي خفيفه وفاتحه ، فيها فراغات وتحتاج رسم داايماا ، الحلو فيها ان اذا شقرت مايبان واقدر اغير شكل  حواجبي مثللل ماحب ..

قلت قبل مافي شي صح او غلط بالمكياج لانه مو كيمياء او رياضيات! بس بالمقابل في اشياء او قواعد لازم تلتزمين فيها ، مثلا ماتحطين فاونديشن ابيض!! ماترسمين حواجبك باللون الاسود لان بيعطيها قساوه!! والحاجب مايكون مربببع من قدام لان ماراح يكون طبيعي ..

BIG NO NO!

الحواجب المربعه من قدامه وخيوط من الاطراف لا لا !

(ع فكره شفت قريب وحده مسويه كذا وهي حلوه ومبشعها الحاجب :(( )

الحاجب الاسود ومرسوم رسسم ابدا لااا

( يعطي شكل كبير للعمر حتى لو شعرك اسود حطي لون افتح من شعرك ع الاقل بدرجتين)

الحواجب القصيره!!

( غلط وشكلها مو حلو ، تخيلو الحاجب هو برواز الوجه فشلون لو البرواز نقطه ومايشيل الوجه هههههه ، تحت بحطلكم الطريقه الصح للرسم)

الحواجب الشاينيز الي طايره فوق بخط مستقيم ، موضتها قديمه خلاص ومو حلو ترفعين حاجبك مرررره فوق

( في ناس طبيعه حاجبهم كذا بس في ناس يرفعونها فوق بزياده وتكون مستقيمه مو حلوه ابدا)

،

المنتجات بالسوق كثييييرررره ، في قلم حواجب وفي جل حواجب وفي شدو حتى ! شنو تختارين وليش؟

- الباودر ينفع اذا رسمه حواجبك حلوه بس حابه ترتبينهم وتعبين الحاجب نفسه.

- الجل والبعض يستخدم ايلاينر بس يكون فاتح ، ينفع للي حواجبهم خفيفه مثلي ويضطرون يرسمون ع الجلد ، بالنسبه لي الشدو خفيف وحتى لو كان غامق وحطيتيه ع الجلد ممكن يروح او يبهت فالحل الجل او التاتو مثل مايسمونه.

- القلم احلى شي فيه ان سهل وسريع وخاصه للمبتدئات انصحكم فيه ، بس في اقلام تكون قاسيه وممكن تطيح الحاجب بعد الاستخدام المتكرر.

anastasia beverly brow wiz

قلم حواجب من انستازيا بفرلي هيلز بلون "بيرنيت"

هذي الالوان المتوفره عندهم :

القلم جدا جددا جميل واول مره استخدم قلم حواجب وماحس اني ارسم بلون! بالعكس يندمج مع الشعر ويعطي مظهر طبيعي ، مشكلتي بسس اني اخذت لون مو مناسبني المره الجايه ممكن اخذ ميديم اش ، الي هو اغمق ، ينفع ترسمين ع الجلد بعد لانه كريمي ، حلو كاستعمال يومي وسهل ، من سلبياته بسرعه يخلص! انا ماجلس شهر عندي واكتشفت الوالده الغاليه تستخدمه معاي ، يوم خلص قالت القلم الزين الي جبتيه تراه خلص ههههههه ، وسعره مرتفع شوي بحدود ال٨٥ ريال ومو متوفر الا من النت او التاجرات ، بس يستاهل وبرجع اطلبه لي ولنبع الحنان p:

،

القلم نهايته مشط للحاجب وماحذفت القلم لان المشط جدددا ممتاز ونوعيته ممتازه وحجمه صغير فصرت استخدمه بروتيني الجديد ، 

نجي لطريقتي الي مؤخرا ماشيه عليها ، اسويها بالمناسبات او لطلعه مهمه لان تاخذ وقت بس بشكل يومي اعبي حواجبي بشدو وبس.♥

امشط الحاجب وارتبه اولا.

بعدها بفرشاه ماك "اول فرشاه استخدمتها بحياتي وصارلها قريب ال٧ سنوات الظاهر وممتازه هههه!" اتوقع رقمها ٢٦٦ -الرقم ممسوح للاسف!- بس مو مهم اهم شي فرشاه مشطوفه وماتكون ناعمه مرره ، في فرشاه عند ميك اب فورايفر الي تجي مع التاتو بعد متازه وحجمها حلو ، جربت حقت اتش اند ام بس حسيت ناعمه بزياده وكبييره ماحبيتها وجربت حقت ريل تكنيك احس حلوه تممشي الحال بس اذا يدك تعودت على فرشاه صعب تغيرينها.

بالفرشاه اخذ شدو حواجب واعبي الحاجب واكثر شي استخدمه بودي شوب.

واضح ماكلته ههههه ؟ هذي ثاني علبه ، اهم شي بالشدو يكون مطفي بدون لمعه ، اللون هذا مناسبني "رقمه ٣" اذا حاجبك غامق مره ممكن مايناسبك وممكن تستخدمين اييي شدو بني بالحياه بس مايكون مايل للاحمر .

بالشدو بس اعبي الحاجب "بحط فيديو اخر شي لطريقتي" من قدام مارسمها مربع ، احاول اقلد رسمه الشعر بخطوط لفوق وتكون خفيفه او الي يبقى بالفرشاه نفسها ، يعني حاولو من قدام يكون لون خفييف عشان يعطي شكل طبيعي.

بعدها اعدل ع رسمه الحاجب بالجل او التاتو من ميك اب فور ايفر ، هذا اللون مرره غامق بس مو اسود ، بالبدايه كان شكل حواجبي يخوف كاني راسمه بفحم!! نقطه او اصغر من النقطه من المنتج هذا يكفي لان اللون مرره قوي ، فصرت شنو اسوي ؟ اخذ نقطه احطها ع يدي واخذ الفرشاه المشطوفه واخذ شوي من المنتج وامشيه ع يدي عشان اشيل الزايد وبعدين استخدمه.

المناطق الي يبيلي ارسم ع الجلد استخدم الجل فيها مثل كسره الحاجب وطرف الحاجب واحدد الحاجب من تحت ، بس لما احدده ماقرب من مقدمه الحاجب اببببد لان قوي مثل ماقلت والشدو يكفي ، يعني ابدا تقريبا بعد اول ربع من الحاجب من قدام "يارب يكون مفهوم" :( والي يبقى من الجل اوزعه ع باقي الحاجب ، احرصي لما ترسمين الحاجب مايكون خططط لا خطوط صغار صغاار كانك ترسمين شعر عشان يبان طبيعي.♥

اخر خطوه امشط الحاجب بعدين استخدم جل حواجب شفاف يثبت الحاجب ويرتبه ، ينفع اذا طلعتك طويله او حر او مناسبه كبيره تضمنين مايتحرك الحاجب من مكانه اببد ، الجل من ماركه بوبا وهو شفاف.

هنا اكثر من رسمه لحاجب واحد حبيتها لان يبين لك تقدرين تثقلين او تخففين او ترفعين الحاجب لحد ماتحصلين شي يناسب لك وكل مايكون الحاجب طبيعي يكون احلى .. رسمها مو عاجبني مره بس حبيت تنويعها بالاشكال وكيف طبيعيه ♥

(بحطلكم مقاطع فيديو اعجبتني ومايشتغلون الا من جهاز مكتبي بالجوالات ماتطلع للاسف :\ )

هذا مقطع لميك اب باي انوشا بنت كويتيه احبها!

حاجبها شوي غامق بس رسمتها قريب من رسمتي 

هنا لبنت مرره احبها واحب مكياجها بس ماحس تنوع بالمنتجات دايما تعلق ع ماركات معينه :|

حواجبها جميله ، بس مدري ليه هالشكل الفاتح ماحس يناسب ملامحنا :| بس حبيت انها قالت تدرجو بالالوان

واخر شي دلال الدوب الجميله الي اكثر شخص استفيد منه صراحه

شوفو طريقتها بالحاجب وشوفو فيديوهاتها القديمه وشلون حاجبها الحين اجمل بكثييير ، نفس طريقتي اول شي تعبي الحاجب بلون فاتح وبعدين تحدده باغمق وتعبي الفراغات وتمد الحاجب ع الجلد ، هي استخدمت برايمر مع الشدو فخلاه شوي جل.

المنتجات الي ممكن تستخدمونها كثييييررره كثيره! لاتتقيدون بشي معين وعشان تعرفين الي يناسبك لازم تتدربين كثييييييرررر لحد مايطلع شي يرضيك ، اخر خطوه ماذكرتها تحديد الحاجب بالكونسيلر يبين مرتب اكثر.

بالنسبه لتشقير الحاجب♥ "اي نعم اشقر حواجبي مدري ليه في ناس منصدمه ومحسسيني im old fashion! but I really dont care :p

هذا الي استخدمه من صيدليه بوتس ، افضل شي وخفيف ع الجلد مايحرق وانا جلدي حساس ، مثل ماذكرت شعري خفيف فمايبان التشقير ابدا كأني شايله الشعر ، فمادري لو ينفع للي شعرها ثقيل بس جربوه عادي لان رخيص بالاساس.

هذا كان كل شي بخصوص الحواجب يارب تكونون استفدتو ، اشوفكم ع خير♥♥♥