الثلاثاء، يونيو 21، 2016

مشترياتي من فكتوريا سيكرت ونصائح عن الملابس الداخليه وكيف تختارين مايناسبك ♥


السلام عليكم ورحمه الله وَ بركاته 


قبل كم يوم كنت في زياره لفرع فكتوريا سيكرت الجديد بالحياه مول بالرياض ، وجدا انبسطت بالتفاعل الي كان وياي بالسناب شات فقلت اوريكم شنو اخذت منهم ونتكلم عن الملابس الداخليه بما ان الحديث عنها شبه نادر وانا اشوفه شي مهم جداااا لان اللبس مهما كان جميل والبرا = الستاينه ماكانت مناسبه ممكن يبشع شكلك ويعطيك مظهر غلط ، ع العموم بوريكم شنو اخذت اول وبعدين نكمل ..




اول شي شريته بجاما مكونه من ٣ قطع قميص+بلوزه كم طويل+غطا للعيون ، هالنوع اسمه myfair مصنوعه من القطن بس الخفيف وشوي تحسينه استريش عشان يناسب مع الجسم ، انا جربت منهم القطن اسمها sleepover حييل خفيفه ومررريحه بس مشكلتها تطلع ركب وتمطط بسهوله وبالنسبه للبجايم الساتان حيل انييقه انصح فيها العرايس بس انتبهو لطريقه الغسل لان ممكن تخرب عليك وتتنتف 


للاسف تشكيله البجايم عندهم مو كبيره بس قالولي بيجيبون ، ونقطه ثانيه اذا بتطلبون من موقعهم في خيارين اذا انتي قصيره او طويله تختارين طول البجامه مع مقاس الجسم ، فانتبهو للنقطه هذي مع اني ماشفتها متوفره بالمحل ..


انا انسانه اعشق الشنط الصغيره للترتيب واتوقع ختمت كل شنط فكتوريا سيكرت! احب جودتها واشكالها جدااا
هذي النقشه جديده نازله ماقدرت اقاومها وخامتها ثقييله بعكس الي كنت اشتريهم قبل 


هذي شكلها من داخل والشنطه تنفصل او تتركب ، تنفع للميك اب والشور جل والكريمات لان ملبسه من داخل بلاستيك
فماتخافين عليها ، وانصح للعرايس بعد شنطه تتعلق حيل عمليه بالسفر وكرفتها كرف وماتاخذ مساحه كبيره
شكلها يجي كذا


ودايم سولد اوت من محلاتهم ..


الي يعرفني يعرف اني ابتعد عن الشورجلات ومعطرات الجسم واستخدم الطبيعي اكثر شي
لكن من خلال جولتي بالمحل اكتشفت هالمجموعه الي مادري وين كنت عنها قبل 
مجموعه عنايه مستخلصه من القطن وفي منها تقريبا ٥ روائح ، هالمجموعه مافيها باربان وحاصله على براءه اختراع
يقولون الترطيب يستمر لمده ٢٤ ساعه مادري للان ماجربت 


الي اخذته مجموعه الشيا ، تتكون من ٤ اشياء (شورجل - زيت للجسم - سكرب للجسم - لوشن)
كلهم باحجام صغيره اكيد في احجام اكبر بس انا حبيت اجرب اول فاخذت مثل العينات محطوطه بشنطه
وايضا تنباع منفصله لو حابين ، وعندهم بعد بالروز كان حييل حلو بس للاسف مخلص

الي حبيته بالعرض بالمحل انهم مقسمين الروائح لكذا نوع يعني مهما كان ذوقك الا ماتلقين الي يعجبك
مثلا حاطين قسم للي يحبون الروائح القويه وقسم للي يحبون الورد وقسم للي يحبون روائح الفاكهه والسويت "تنفع للمراهقات" وهكذا ..


واخذت لوشن وعطر بعد اسمه اكس او ، للامانه عطوراتهم ماعتبرها ثابته او فواحه
وقلت لهم هالملاحظه قالولي جربيها مع لوشن وشورجل وشوفي الفرق
فاخذت بس اللوشن لان ماحب استخدم شورجل معطر


اللوشن خفيف وبسرعه امتصته البشره وريحته فووواحه ويكفي شكله يجيب السعاده p:


بالنسبه للعطر غير ان شكله جمميل وهو ليمتد اديشن يعني فتره وينقطع ، ريحته على ورد
مع اني اميل للباتشولي والعنبر والروائح الشرقيه لكن حبيت هذا للبيت والطلعات الخفيفه
ريحته تعتبر قويه ترا مو خفيف وفريش بس انا ماتستهويني الروائح الخفيفه

انصح فيه للعرايس وانصح يخصصون عطر للملابس الداخليه وملابس النوم
مدري شفيني قلبت البوست للعرايس هههههه بس احس هالمحل ضروري تاخذين منه وقت تجهيزك لان يحسسك بالانوثه والجاذبيه!


اخر كم شي شريتهم من بينك وهو تابع لفكتوريا سيكرت بسس الجانب الهايبر والاكتيف والمخصص للشباب اكثر بعكس فكتوريا الي شوي للناس الكبيره ويعتبر انثوي اكثر ..


هذي الشنطه للنادي الي ناويه ادخله بعد الولاده وان مادخلته خليتها للسفر ولايهمكم ههههههه ، لا جد ان شاء الله برجع لنمط حياتي الصحي بعد ماخربتها هالسنه للاسف ، ماقدرت اقاوم هالشنطه جدددا حلوه ولونها احلى واهم شي خفيفه تعتبر 


اخذت تي شيرتين بعد من بينك حييل خفيفين ينفعون للرياضه بعد ، واشكالهم تحمس ماعليكم من تصويري طبعا :)


اخر شي اخذت الليقنزات ، يوقا ليقنز ع اليمين المميز فيه ان مرررريح من اريح الاشياء الي جربتها صراحه ، من ناحيه البطن مايضايق ابدا فينفع للرياضه او المشي ، يحلي الجسم تحسينه يشد وغير هذا من ورا مثل المخبه الصغيره اذا بتحطين جهازك فيها ، اما اليسار خامته اثقل وعلى كلامهم افضل خامه صنعوها لليوقا ليقنز 


الحين نجي للجزء المهم بالبوست!
مثل ماذكرت اللبس الداخلي مايقل اهميه عن الخارجي ، خاصه لو بتلبسين شي ضيق يبان شكلك مرتب او لا!
شلون تعرفين ان مقاس البرا غلط؟

١. زوائد طالعه من اطراف البرا
٢. البرا مايحتوي الصدر كامل اما يطلع من فوق او من تحت مع الحركه
٣. البرا ضاغطه على الصدر او حتى الشريطه حافره الاكتاف وتسبب علامه ع الجلد معناته البرا الي تستخدمينها صغيره!
٤. شريط البرا كل شوي يطيح حتى لو صغرتي المقاس معناته ان المقاس كبير عليك
٥. تسكيره البرا من ورا تكون مرتفعه وماتكون بنفس المستوى من قدام
٦. الستريشنق للبرا تقريبا اختفت ، لما نمسك طرف البرا"التسكيره" دايم تتمدد مثل المغاط لما تمطينه يرجع مكانه
فاذا جربتي تمطينه وماصار ينمط مثل المغاط يعني اهترى وماصار منه فايده وصار وقت تغيرين البرا
ليش؟ لان خاصيه التمغط هي الي تعطي دعم للبرا والصدر يكون بمكانه الصحيح ومع انعدام هالخاصيه من كثر اللبس مثلا او من الغسيل ماصار منها فايده فعليه ..

هنا يكون عندك مشكله وصار وقت لازم تغيرين البرا ..

،

ضروري نعرف نختار المقاس الصح اولا وبعدين الشكل ثانيا ..

كيف اختار شكل البرا او الستيان المناسب؟
اول شي تسوينه تقيسين نفسك عشان تطلعين المقاس الصح
تحتاجين ل: برا غير مبطنه او فيها حشوه - متر للقياس - موقع يطلعلك القياس النهائي
اول شي تقيسين تحت الصدر بالضبط مثل الصوره يسار BAND
تكتبين الرقم عندك ..
بعدين تقيسين تكوير الصدر والي هو ابرز نقطه ظاهره CUP
وتكتبين الرقم ، وراعي المقاسات تكون بالانش

بعدها ادخلي على هالرابط 
( هنا )
بتطلع لكم هالصفحه اختارو الرابط الي ظللت عليه بالوردي


بتطلع هالصفحه رقم واحد حطو فيها قياس تحت الصدر ورقم اثنين حطو قياس التكوير
وبعدين اضغطو get my size بيطلع لكم ع طول تحت
انا حطيت ارقام وهميه وطلع لي المقاس 40AA




وهذا فيديو توضيحي:


،

اذا حسيتو صعوبه بالقياس انصحكم تروحون فكتوريا سيكرت عندهم فريق متخصص للقياسات 
وحييل حبوبات بيفيدونكم ومنها يعطونكم كذا برا انواع واشكال عشان تقيسون وتختارون الي يناسب
طبعا سألتهم كيف البس من بعد شخص قالولي البرا تتغسل بشكل دوري وهم مهتمين بنظافتها
والي حبيته بعد بالخدمه عندهم انهم يسألونك شنو البرا الي تبينها؟ هل هي بشكل يومي او تبين شي للسهرات
تبين شي لفساتين او لقمصان وبعدها يختارون لكم الي يناسب ..

،

بعد ماعرفنا مقاسنا الحين وقت نشتري البرا وشلون نعرف الي يناسبنا؟

١. اللون:

لما تشترين برا وخاصه للسهرات اعتمدي على الوان حياديه مثل الاسود او الابيض او النود نفس لون الجلد
لان اذا بان تحت اللبس مايكون منظره قبيح وابتعدي عن الالوان الصارخه لان ممكن تبان وخاصه مع الاضاءه القويه

٢. الشكل المناسب بالوقت المناسب
البرا متنوعه فووق ماتتصورون من اشكال والوان فضروري نختار الشكل الصح بالوقت الصح
مثلا غلط غلط نلبس برا عاديه وقت الرياضه! بالاضافه الشكل بيكون غلط الصدر ماراح يثبت مع الركض والحركه وبتضرين نفسك وتسببين ترهلات واشياء انتي بغنى عنها ..

ولازم نحط بعين الاعتبار شكل اللبس الي بنلبسه 
"الصور الي بحطها الغرض منها تعليمي والكل بنات اكيد الي بتتحسس منها تقدر ماتشوف الصور وتكتفي بالكلام المكتوب"


اذا بتلبسين تي شيرت وخاصه ضيق انصحك بتي شيرت برا متوفر بفكتوريا سيكرت واتوقع باقي المحلات
المميز فيه ان الخامه ناعمه فماتبان التفاصيل تحت التي شيرت وتكون عمليه جداا


اذا لبسك بدون اكمام البسي برا strapless يعني بدون سيور وابتعدي عن السيور الشفافه تقبح الشكل
وبفكتوريا سيكرت نوع اطراف البرا يكون فيها ماده تمسك ع الجسم 


والي ظهرها مكشوف في برا سيلكون بدون ظهر يمسك ع الصدر او سيور نفس الصوره


بالنسبه لقصه الملابس تكون ع الرقبه فقط في برا نفس هالشكل تنلف بس ع الرقبه
واذا القصه واسعه ايضا في برا تكون قصتها نازله يسمونها plunge cut


اذا لبسك بس ون شولدر البسي برا تقدرين تتحكمين بالسيور حقتها وتشيلين وحده منهم وتخلين الثانيه
مع الحرص انها تدعم الصدر من تحت عشان مايكون الشكل مايل

،

الحين عرفنا شنو البرا الصحيحه مع اللبس ، ماوقفنا باقي نعرف انواع البرا واشكالهم
لما رحت فكتوريا سيكرت جد جد تنحت على الانواع انا عارفه في تنوع بس ابدا ماتصورت الاختلافات الكبيره
الي بترضي جمييع الاذواق فبالاخير الهدف من البوست لما تخلصينه تكونين كونتي فكره كااامللله عن شنو ودك وشنو مناسبك وبس توصلين لاي محل لانجري تعرفين تختارين بكل ثقه :)

،
البرا تنقسم لثلاث انواع رئيسيه:


فل كوب = تغطيه كامله
مثل مو شايفين بالصوره بالنوع هذا الجزء العلوي من الكوب او التكوير للصدر مرتفع والجسر بين الصدرين ايضا عريض اما السيور فتكون بالنص تقريبا . الشكل هذا يعطي تغطيه كامله للصدر ويعتبر مريح 


هالف كوب = تغطيه متوسطه
تقريبا هذا من اكثر الانواع منتشره ويحبونه البنات يعتبرونه جذاب! بالنوع هذا التغطيه ماتكون كامله للصدر لا يبان منه
الجسر بين الصدرين بالغالب يكون نازل لتحت ، بفكتوريا عندهم ديمي وهو اشهر نوع عندهم

source:clothhabit.com
بالكونيت = اقل تغطيه من الي ذكرتهم
الجسر بين الصدرين يكون حيل نازل اكثر من الاجناب وبالنسبه للستراب يكون متباعد مو نفس الفل كوب بالنص
هذا النوع يعتبرونه جذاب اكثر من الباقي

ومن الاشكال هذي تندرج انواع ثانيه مثل:
- بدون بطانه فتعطي شكل طبيعي جدا
- مع بطانه خفيفه تعطي شكل طبيعي ومايكون شفاف
- بوش اب الي هو يعطي دعم للصدر ويرفعه لفوق عشان يعطي شكل ممتلئ
- تو كوب يعني دعم مضاعف للصدر وينفع جداا للي صدرهم صغير ويبون يبان اكبر واكثر جاذبيه

وبعدين نقدر نختار لو نبي بسيور او بدون او كروس وغيره

مثال عن الملخص من هالكلام ، اذا صدري صغير مثلا اختار النوع الي ابيه "هاف كوب" وابي حشوه دبل كوب مع سيور
واذا صدرك حجم كبير اختار "فل كوب" لان يغطي الصدر بشكل اكبر والحشوه بطانه خفيفه مع سيور كروس مثلا  

،
لما تشترين برا احرصي تجربين وانتي حاطه التسكيره على اوسع شي ، لان لما تبدا خاصيه التمدد تخف تقدرين تصغرين بقياسك وبالنسبه للستراب او تعليقه البرا لما تجربين حاولي ترفعين السير لفوق اذا ارتفع مرره ووصل لاذنك مثلا معناته السير يحتاج تضييق اما اذا ارتفع بمقدار سانتي مثلا معناته تمام مناسبك  

وبالنسبه للبانتيز او الاندر وير يعتمد على شنو ترتاحين عليه بس اذا لبسك ضيق اختاري نوع يسمونه ليزر كت
يعني مقصوص بالليزر بحيث ماتبان اييي تفاصيل تحت اللبس لان صدقوني مافي ابيخ من ان يبان خطوط تحت اللبس

،

بالنسبه لغسيل الاندر وير حطيه باكياس مخصصه للغسيل مثل هذي
اسمها lingerie wash bag تحصلونها بالمحلات المخصصه للانجري او اطلبوها اون لاين
المميز فيها ان تحافظ على الاندر وير وماتخلي السيور تتداخل ببعض او تخرب وسكرو السيور قبل ماتغسلون البرا
عشان ماتخرب وتدخل بالملابس الثانيه واقعدو فككو ..

وبس ان شاء الله اكون غطيت كلللل شي بخصوص هالموضوع وتكونون استفدتو
اشوفكم ببوستات جديده ان شاء الله  



هناك 75 تعليقًا :

  1. اول كومنت 😭😩 من أسبوع استنى التدوينه يسعدك ربي شيوووم ❤️❤️
    م قريتها الى الان 😅 يبغالها قهوه 😍❤️

    ردحذف
  2. الله يعافيك تدوينه جميله كعادتك
    تحمست اجيب مجموعة الشيا والعطر 😍
    🌹🌹

    ردحذف
  3. كفيتي ووفيتي
    وفعلا نحتاج نتثقف بهالامور مشكورة��

    ردحذف
  4. مررره حبيت التدوينة شكراً قورجس❤️

    ردحذف
  5. 💕موضوع جدا مهم كفيتي ووفيتي يعطيك العافيه

    ردحذف
  6. أخيراااااااا 😭
    اتحرا هالبوست من دخلت المحل 💕
    سبحان الله احس اني من بد الشعب مايستهويني فكتوريا سيكرت لكن بحاول اعطيه فرصه 👌🏼
    انواع البرا والاكياس جديده علي الصراحه وحبيت فكرة الأكياس توفر وقت وجهد التفكيك 😩
    مو من معجبين البنك ابدا بس هاللون جرححححح 💔😭😭
    يخرفن ماشاءلله 👌🏼💓
    لبوس العافيه شيوم والله الله بالرياضه 💪🏼😎😂

    ردحذف
  7. انتي حاجه جمييله بجد كل مره اقول لك هالكلام بس لأن فعلاً تستاهلينه ومحد مثلك أبداً من المشاهير طرحك راقي ومختلف ، وكل مره احذف مشاهير انتي اللي مستحيل استغني عن متابعتك الله يوفقك ويتمم حملك وييسر لك ولادتك < قلوووب لبيتك ❤️❤️❤️❤️

    ردحذف
  8. الله يسعدك جد استفدت من الموضوع كثيييير 💕.. لأن انا ماعندي احد يعلمني كيف أخذهم كثير مرات اشتري وتكون واسعه على أو ضيقه نادر تطلع مقاسي صح وجد انبسطت يوم شفتك تكلمتي عن الموضوع بشكل أوضح بسناب ✨👌 ،
    الله يوفقك ويقومك بالسلامة ويخليك لبنتك 💜

    ردحذف
  9. أزال المؤلف هذا التعليق.

    ردحذف
  10. يعطيك العافيه شيووووم ❤️
    البوست رااااائع وغني جداً بالمعلومات ، فكرته جديده والاجمل لباقتك في طرح الموضوع 💐💕
    دُمتي اضافه جميله في حياتنا 🌷

    ردحذف
  11. جميل البوست
    دائم مبدعة قورجس يعطيك العافية ❤️❤️

    ردحذف
  12. ي نااااس عسل وربي ماشاء الله عليك ❤️❤️❤️

    ردحذف
  13. يسعدك ربي شيوم ❤️😘
    جد جد بوست رائع ومغيييد كنت محتاجه مثل هالبوستات

    ردحذف
  14. *
    *
    *
    حبيت البوست وأستفدت من كلامك قورجس ، بالرغـم من اني على إطلاع كامل بعالـم اللانجري
    الا اني استفدت من كم شغلة جديدة : )

    ردحذف
  15. شكرا شيوم الله يعطيك العافية ويقومك بالسلامة .. البوست حلو وجبتي المختصر المفيد شكرا من القلب

    ردحذف
  16. جميل جمال 😍😍
    تشكرات شيوم ♥️♥️🌹

    ردحذف
  17. استنى البوست من يوم كنتي تتكلمين عن الموضوع في السناب تشات 💭 صراحة ممررا مهم نتثقف بهالشي 👌 لأنه ما في ناس كثير تتكلم عن هالموضوع بشكل مرتب مثلك وانا شخصياً استفدت من البوست بشكل كبير 👑 شكراً لك 💙💙 وصدقيني هذا البوست بينتشر لانه في ناس محتاجين يعرفون عن هالموضوع 💙 استمري في بوستاتك المنعشه 🍀 وبالتوفيق 💙💙

    ردحذف
  18. يعطيك العافية ياعسل

    من كلامك بالسناب تحمست للتدوينة

    الموضوع مرة مهم و مفيد و لازم يكون مرجع لكل البنات

    ردحذف
  19. الله يسعدك دنيا واخره شيوم ويخلي لك ديوووم يارب...موضوعك اكثر من رائع جميل بمعنى الكلمه اسعدتيني بطرحك للموضوع وطريقتك مرررررره جميله الله يوفقك يارب دائما مبدعه وانتي بالنسبه لي انسانه ملهمه أحبك في الله ...

    ردحذف
  20. الله يسعدك دنيا واخره شيوم ويخلي لك ديوووم يارب...موضوعك اكثر من رائع جميل بمعنى الكلمه اسعدتيني بطرحك للموضوع وطريقتك مرررررره جميله الله يوفقك يارب دائما مبدعه وانتي بالنسبه لي انسانه ملهمه أحبك في الله ...

    ردحذف
  21. كفيتي و وفيتي موضوع شامل وكامل ومهم جداً وقليل الي يتطرق له ..... مشكوررررره مشكوره مشكوره لطرحك هذا الموضوع ����������

    ردحذف
  22. كفيتي و وفيتي موضوع شامل وكامل ومهم جداً وقليل الي يتطرق له ..... مشكوررررره مشكوره مشكوره لطرحك هذا الموضوع ����������

    ردحذف
  23. 😍😍
    تدوينة ممتعة ومفيدة
    😂احس مثل هذا الموضوع مهما تثقفتي فيه لازم تستمرين لان كل فتره ينزل شي جديد
    انا جربت برا وحده من عندهم وفعلا كانت مريحه وشكلها مرتب جداً في اللبس 😉
    بس فعلا الملابس الداخلية عالم احيانا اكون ناويه اشتري وادخل المحل واتوه ما اعرف ايش اختار 😂😂
    شكراً شيوم 🌸

    ردحذف
  24. الله يسعدك شيوم كالعادة مبدعه بطرحك وهالموضوع مهم لكل بنت شكراً حبيبتي ع طرحك المميز ❤️

    ردحذف
  25. شكراً لك ع الطرح المميز ❤️
    ماقصرتي حبيبتي وأكيد استفدنا منك ()؛ ي مبدعة
    الله يحفظ لك ديوم ويسعدك

    ردحذف
  26. يعطيك العافيه شيووم ماقصرررتي ���� جد معلومات جديده مممره استفدة منها انتي اول وحده اعرفها تتكلم بهالموضوع واطلع منه بمعلومات تفيدني ششكرا جزيلا والله يهون عليك ويسهل امرك يارب ♥️♥️♥️

    ردحذف
  27. مشكوووورة حبيبتي شيوم جد موضوع مميز ومهم للبنات بس محد تكلم عنه ..شرح تفصيلي وواضح جدا مميزة بطرحك دائما ♡

    ردحذف
  28. البوست جميل ومرتب ماشاء الله
    حسيته شامل لكل الاشياء المهمة ����❤️
    يعطيكِ العافية وربي يسعدك ويسهل لك ولادتك ������

    ردحذف
  29. كفيتي و وفيتي ، من دخلتي فكوريا و قلتي بتنزلين بوست وانا كل شوي داخله المدونه ، الله يسسسعدك جد معلومات مفيدة ، الله يعطيك العافية ����

    ردحذف
  30. حبيت المدونة مره و الصراحة امنيتي انو يفتحون فيكتوريا سيكرت في الخبر او الدمام اللي يكون للملابس الداخليه طبعا ، شكرا كفيتي و وفيتي

    ردحذف
  31. ما شاء الله...جدا مفيد البوست❤❤
    وايد اشياء نجهلها في مثل هالمواضيع وسهلتي علينا موضوع الاختيار صراحه كل مره ندخل بصعوبه نختار 😅

    الله يوفقك ويسعدك💜🌷

    ردحذف
    الردود
    1. شيوم نريد موضوع عن تجهيزات العيد😆😁💜

      حذف
  32. يعطييج العافيه ❤❤

    ردحذف
  33. تحمست اروح لهم عشان يشوفون مقاسي ووش يناسبني وبعد عشان قسم الرياضه كل شي يجنن شيوم 😭💗

    ردحذف
  34. جدا استفدت شكرا شيوم 😭❤❤ على كثر ما قريت عن هذا الموضوع وكيف اختار البرا المناسب إلا إني كل مره اخطأ بالأختيار بس هالمره راح امشي على الي قلتيه بالضبط.
    احنا بالشرقيه عندنا بس فروع فيكتوريا الي فيها عطور وكريمات الفرع الي فيه ملابس بس بالرياض 😭 ما اقدر اروح له.
    الله يوفقك يارب ويسهل عليك 💜💜

    ردحذف
  35. الله يوفقك شيوم جددا استفدت 😢❤❤

    ردحذف
  36. تجنن التدوينه و شامله و متنوعه
    الله يسعدك يارب😻

    ردحذف
  37. حبيت البوست فعلا شامل مررررا يعطيك العافيه وحبيت شرحك بالسناب الله يسعدك ويقومك بالسلامه ي رب وينولك الجسم الممشوق 💜✋🏼

    ردحذف
  38. شيوم الله يسعدك ويخليك والله استفدت مره بموضوع البرا ماكنت اعرف كل هالاشياء وكل ما اشتري برا يطلع فيها غلط لين شفت هالتدوينه والله ساعدتيني مرره شكررررا ❤️❤️❤️❤️❤️❤️❤️

    ردحذف
  39. شكرا ع الموضوع الجمييل من وقت ما تكلمتي في السناب وانا انتظر تنزلينه ❤️❤️❤️

    ردحذف
  40. حبيبتي مثل كل مرة أستفيد منك واتثقف من تابعتك من اول ما ابتديني بالمدونة
    الله يسعدك يارب ويهون عليك الباقي من حملك ويسعدك ربي بشوفة البيبي يارب
    وعقبال ما تتسهل جميع أحلامك ومشاريعه يارب

    ردحذف
  41. جججججد ججججد شكررراااا
    صراحة الموضوع يستاهل يندفع له مبلغ محترم
    مااااقصرتي شيوووم

    ردحذف
  42. اخييييراً نزل البوست مرة كنت متحمسة لاغراض فيكتوريا سيكرت��..واستفدت والله من المعلومات الله يكتب اجرك وماتقصرين ياغالية..والف الف مبروووك حملك الله يتمم لك على خير ..دايم اذا حملتي اكون انا مثلك������

    ردحذف
  43. مره شكرا شيوم موضوعك مرة حلو شجعني اروح لفكتوريا مرة ثانيه اول مرة رحت و كنت ضايعه هالمرة ان شاء الله عندي معلومات

    ردحذف
  44. الله يسعدك ياشيوم ويوفقك ويسهل لك امرك على هالبوست الحلو!
    ماتتصورين قد ايش افدتيني بشكل , مره شكراً ماقصرتي شرحك كافي ووافي
    وان شاءالله يفتح فرع بينك بجده وتنزل عندنا الملابس والاندروير متحمسه اجرب هالخدمه!
    مره ثانيه شكرا والله يتمم لك حملك ويفرحك فيه

    ردحذف
  45. مشاء الله الموضوع متكااامل مرره جميل ومفيد مشاء الله ..

    ردحذف
  46. شيوم جربتي موقعهم ؟ يشحنون عطور شحن مباشر ؟ انا اعرف شحنهم مباشر بس الملابس لكن العطور ماعندي فكره افيديني بليز

    ردحذف
  47. يعطيك العافية حبيبتي مره أستفدت من كلام عالسناب و هنا ♥♥♥

    ردحذف
  48. شكرا شيوم ما كنت اعرفه انه شي انواع وايد للبرا البوم بجرب اشوف قياسي و بروح فيكتوريا سيكرت اتقضى
    بالنسبه لكيس الغسيل للانجري فيه منه بدايسوا

    ردحذف
  49. حبييت موضوع مهم ومفيد

    ردحذف
  50. شكرا شيووم يعطيك العافيه حبيبتي الله ييسر امرك وولادتك

    ردحذف
  51. الف شكر شيييوم تعلمت اشياء جديدة ربي يوفقك ويقومك بالسلامه :)

    ردحذف
  52. روعه عجبني الموضوع واتحمست ازور المحل تسسلمي

    ردحذف
  53. شكرا شكرا غطيتي الموضوع 😚😚
    بشكل كامل وسلسل
    جميلة بكل تفاصيلك 🌹🙏🏻💓

    ردحذف
  54. حبيت التبسيط والشرح الواضح ، ابداً مو معقد واستوعبت دغري ..
    شيء جميل إنو الموظفات يكونون مدربات وعارفات ، مو كل الزباين عندهم خلفية بأفضل إختيار فهالنقطة لصالحهم كثير ..

    يعطيك العافية أم ديوم ❤️

    ردحذف
  55. يعطيك العافيه شيوم ونبغى موضوع عن تجهيزات العيد

    ردحذف
  56. اخيرا فضيت وقريت التدوينه �� يعطيك العافيه شرحك مره جميل وصدق عرفت اشياء جديده كثييير والمفروض يكون فيه مدونات عرب يتكلمو لانه بنات كثير م تعرف ويطلع شكلها مره مو حلو والمسكينه تجرب وتحوس وتخلص فلوسها ع اشياء م تناسبها 🙈يعطيك العافيه مره ثانيه ونسخت الرابط راح ارسله للبنات 💜

    ردحذف
  57. الله يعطيج العافيه على هالتدوينه الاكثر من رائعه مب غريبه عليج و الله *ـ* ما شاء الله ... كل شئ رائع من ناحية الشرح و التوضيح تحسين متعوب عليه صدق !!! <3 ما كنت اعرف هالاشياء من قبل شكرا عالتوضيح الاكثر من رائع و اعتبرج انسانه ملهمه من الدرجه الاولى ... الله يسهل عليج ان شاء الله و يزاج الله خير

    ردحذف
  58. كل عام وانت بخيييير 😘
    صراحه ع اساس،اقراها في رمضان كسلت التدوينه جدااا مفيده... انا مشكلتي تعجبني الاشكال 😂رمضان اخذت 5 كلها نفس الشي رافعه لصدر وانا محتاجه يوميه احس ادووخ لما ادخل محل الانجري . فكتوريا سكريت دووم اتعدى من جنبه .. صراحه استفدت منك كثييير.. والله يسهل لك ولادتك ويحفظ لك اولادك

    ردحذف
  59. يعطيك العافية صراحة مرره حلو التدوينة ومفيده ..والله يسهل عليك

    ردحذف
  60. شيوووووووووم الله يسسسعدك سعادة الدارين ويسهل عليك على كثر ماقريت مواضيع عن اختيار البرا المناسب بس اووول مرره تنجح معي الطريقه طبعا قريت التدوينه قبل العيد ومافي بمنطقتنا محلات ملابس داخليه ولا في وقت اروح الرياض ف رحت ل ماكس واخذت النوع والمقاس المناسب لي،والله ماتتخيلين حجم فرحتي اني لقيت مقاسي مضبوووط وكل من شفته قلت له عن تدوينتك حتى كل اللي عندي فرقو شكلي والله مدري كيف اشكرك 😭❤❤❤❤

    ردحذف
  61. مشكوره جدا على الموضوع
    بس حبيت اسال دخلت الموقع وحطيت مقاسي لكن يقول please enter band measurement between 30 and 40
    ومايقبل يطلع انا كم اللي عنده كيف اسوي يخبرا ضروري

    ردحذف
  62. ياحبني لك شيوم انتي إنسان فعلا رائعه كذا تعطيني طاقه إيجابيه احب اشوف سنابتك كثيير شكراً لك من الأعماق 💕

    ردحذف
  63. كنت ضااااايعه ياشيخه 😭 ؛ ومن بعد موضوعك وضحت الصورة و فهمت كل كل شي .. الله يسسسسسسسععععددك و يرزقك بغير حساب . شكككككككررا على الموضوع الجمممييل و المفيد عزيزتي ❤❤❤

    ردحذف
  64. طول عمري اشتري البرا بالنظر والانواع شختك بختك �� الله يسعدك والله موضوعك فكلي ازمة وفادني مره مره كثييير ❤❤

    ردحذف
  65. مرره افدتيني يسعدك ربي

    ردحذف
  66. يعطيك العافية موضوع جميل 💜🌸

    ردحذف
  67. موضوع جميل استفدت منه كثيير
    باقي اطبق اللي فيه ان شاء الله
    فكتوريا يعجبني مره وحابه اجرب البرا من عندهم
    ربي يوفقك ويسعدك شيوم ��

    ردحذف
  68. جمييله جدا التدوينه ومفييييده 👏🏻👏🏻برااافو وفقتي بأختيار هالموضوع لأن احس مناسب لجميع الفئات العمريه👌🏻

    ردحذف
  69. تدوينه بطله ومفيده جدا

    ردحذف
  70. شكرا للنصائح المفيده :)

    ردحذف

التعليقات الجميله ♥♥

Blogging tips