مشترياتي الديكوريه من روائع المكتابات وهوم سنتر وغيره | Home Decor Haul ♥

السلام عليكم وَرحمه الله وَبركاته ♥♥

من زمان ماتكلمت عن الديكور والاثاث و بس بما اني سكنت بيت جديد وبديت اخلص شوي من الاثاث قلت اشاركم اختياراتي ، بالبدايه قبل مادخل بالمشتريات بتكلم عن الاثاث والديكور بشكل عام وشوي نصائح .. فاذا مو مهتمه كملي للصور الي تحت لان كلامي شوي طويل p:

المنزل ليس مجرد مكان بل هو "مشاعر"

لما تبدين تفكرين بأثاث بيتك ، فكري بشي يعكس شخصيتك انتي مو عشان الستايل حلو وعاجبني خلاص بعتمده

خاصه بغرفه الجلوس اليوميه وغرف النوم ، ببيتي القديم كان الاثاث جدا حلو بس ماحس يمثلني انا وزوجي

فلما سكنت ببيتي هذا طولت بالتفكير جدااا وكل اهلي هاا خلصتو اقول لا باقي ، حسستهم ساكنه ببيت ١٠ طوابق من كثر ماطولت هههههه ، كنت مابي أحط شي وبعدين مارتاح له ويقعد ع قلبي ، اول خطوه بالتأثيث كانت البحث والبحث والبحث سواء بالنت او المحلات او المجلات واخذ فكره عامه ، التغذيه البصريه جدا مهمه .. ♥

حطيت ببالي ستايلات ابيها بعد ماكونت فكره ، وابي كل مكان له روح خاصه فيه ومختلف عن بعض ، الي ساعدني اغلب الستايلات الي اخترتها صارت موضه مثل الرخام الابيض والذهبي وحتى الاشكال الهندسيه بالديكور ، كنت لما انزل السوق اقول يووه ماراح احصل الي ابيه او يكون السعر اوفر ، فصرت اشتري القطع الاساسيه وحتى بعضهم ماقتنعت فيهم بس لما كملتهم باكسسوارات صرت احبهم بشكل كبيير فالصبر مطلوب جدااا ♥♥

لما عرفت بكل غرفه شنو ابي بديت بصبغ الجدران مناسب لستايل الاثاث وابتعدت عن ورق الجدران اللهم بغرفه النوم الماستر واخترت الباركيه لكل مكان مناسب له ♥

مثلا الصاله ابيها ستايل فرنسي مودرن ودخلت فيه الطابع الريفي وابتعدت تماما عن المورد لان اذا قلنا ريفي ع طول يجي ببالنا المورد بالعكس مو شرط!

ثاني شي ، استثمرو بالاكسسوار اكثر من قطع الاثاث يمكن البعض مايوافقني بالنقطه هذي ، بس الي اكتشفته من خلال حوسه الاثاث لو اخذ قطعه اساسيه بدون زخارف وغيره من الاثاث واحط عليها اكسسوار جميل تتغير تماما ، بعض القطع شريتها بمبلغ وقدره بس ماحسيت تسوى سعرها غير لما اخذت شي جدا بسيط وغيرته بطريقتي صار شكله اجمل وكأني دافعه شي كبيير عليه ، ايكيا خيار ممتاز للقطع الاساسيه مع اني كنت معارضه للتسوق من ايكيا بس اكتشفت كثير قطع فيه غير مستهلكه واسعارها جدااا جميله ، تنفع لاصحاب البيوت الصغيره كحجم اثاث وحتى السعر المهم اعرفي كيف تنسيقين ،، تكلمت كثير بس الحين بوريكم شنو اخذت مع الاسعار! ♥♥

العصفور♥♥ حامل شمعه اخذته من هوم سنتر ب١٩ ريال بعد التخفيض

كثير تجيني استفسارات عن هالزاويه هي عباره عن كلمات مصنوعه من حديد تنباع بالحبه اخذتها من هوم سنتر اسعارها ناسيه بس اذكر مو غاليه بحدود ال٥٠ ريال

ركن القهوه اللطيف للان ماخلصته بسوي له بوست منفصل بس كل شي من ايكيا ماعدا البرواز السيلفر من هوم سنتر
ايطار السيلفر سعره ٢٦ والاكبر منه ب ٣٦ ريال "ماصورت الجدار كامل" عليهم خصم ♥
اللوحه السودا من ايكيا وتجي حبتين بس حطيت وحده ومكتوب عليها انواع القهوه حسيت مناسبه للمكان سعرها ٦٥ ريال

ركن القهوه ، الطاوله من ايكيا ب٣٠٠ ريال وهي عباره عن ستاند وفوقه مثل الصحن المتحرك بس خليته للقهوه حسيت مناسب للمكان ♥ هذي صورتها:

البوكسات كلها من روائع المكتبات ، الكبيره للكبسولات سعرها ٢٨ ريال والصغار حطيت فيهم سكر انواع سعره ب٢٨ ريال

الفانوس بعد من روائع المكتبات بس ماخذته من زمان ♥

الفانوس اللطيف هذا من روائع المكتبات محلي المفضل! سعره ٥٠ ريال تقريبا

الشمعه من بوتري بارن شموعهم حيل حلوه بس اسعارها غاليه اخذتها بحدود ٦٠ ريال بعد الخصم ♥

شريت طاوله طعام من ايكيا وكأني تحسفت لما اخذتها .. بس كل شوي امدحها عشان زوجي مايقول قايل لك مو حلوه ههههه
لما حطيت المفرش والاكسسوارات تغيرت وعجبتني وطلعت مثل ماأبي واحلى فلاتستهينون بقدره الاكسسوارات هههههه ♥
من اليمين للملح والفلفل من روائع المكتبات ب٣٢ ريال والي جنبه للزيت والخل البلسمك او اي صوص حابينه ب٣٥ ريال

الفوانيس هذي اخذتها كسر للون المكان وحبيتهم من روائع المكتبات الكبيره ب٩٥ ريال والصغيره ب٥٨ ريال ♥

ستاندات الكيك هذي وقعت بغراامهاا وتنفع للمخبوزات بعد الكبيره ب٦٣ والصغيره ب٤٩ ريال اتوقع لان محتفظه بالفاتوره بس مو كاتبين اسم الغرض نفسه!

نجي للطاوله هذي كثير سألتوني عنها واستغربتو انها من ايكيا .. اي نعم ايكيا شكلها جديده لان ماشفت لها صور بموقعهم .. عباره عن صحنين معدن ذهبي والي تحت سيلفر ماشيه مع غرفه النوم لان معتمده هالتون فيه مع رخام ابيض ، سعر الطاوله ١٦٥ ريال ♥

الايطارات ايضا ايكيا وهذا مو ترتيبهم النهائي بعلقهم ان شاء الله ، الشمعه الي شكلها رخام ابيض من اتش اند ام عندهم اشياء جدااا حلوه انصحكم تمرونهم بغرناطه مول وبالعليا موجودين سعر الشمعه ٣٠ ريال بعد الخصم

اللوحه الجميله من هوم سنتر ب١٨٦ بعد الخصم ، ضخمه جدا بس ماقدرت اقاوم جمالها! مادري وين بعلقها للحين بس نشوف هههههههه ♥♥

الصحن الذهبي من هوم سنتر ، ماتوقعت احصل اشياء تعجبني بهوم سنتر صراحه بس كل مره اروح وانبببببش عدل القى ههههههه ، سعره ٥٩ ريال وهذا مو الترتيب النهائي للمكان اكيد !

البوكس شكله رخام وبالاساس هو بوكس عادي ، يعطي فخاامه للمكان من اتش اند ام ♥♥♥

حامل الشمعه من هوم سنتر ناسيه اسعارهم بس كانو بحدود ال٢٠ ريال ممكن اذكر مو غالين

الشموع من اتش اند ام اليسار ب٦٩ ريال واليمين من بوتري بارن ب٧٠ ريال بعد الخصم

واخيرا وليس اخرا اللوحه بالاقتباس الجميل من هوم سنتر ب٧٤ ريال وبتكون بمكتبي عشان اذكر نفسي كل يوم عندي هدف وبوصله ان شاءالله ♥♥♥

ان شاء الله يكون البوست عجبكم واستفدتو منه :)♥ 

اشوفكم ببوستات أجمل بإذن الله ..