الخميس، مارس 10، 2016

كوني أم مثاليه + ديم ومصاصتها وكيف تخلصت منها ! #ديميات




السلام عليكم وَ رحمه الله وَ بركاته 
تدوينه اليوم مختلفه شوي لكن ان شاء الله تفيد الامهات ، احترت شلون ابدا بالتدوينه لأن لها جانبين
أول جانب ديم ومصاصتها "اللهايه" اللطيفه الي بالصوره وثاني جانب كيف تكونين ام مثاليه 


كوني أم مثاليه!

كثييير امهات يتمنون هالشي ويطمحون له ، وجدا يسعدني الوعي الحاصل بين الامهات واستثمار طاقتهم بعيالهم
لأنهم فعلا كنز وراح تشوفون هالثمره بالمستقبل ان شاء الله ، الوعي وتثقيف النفس شي لابد منه
لاتقولون امهاتنا قبل مو متعلمات وطلعو افضل جيل! صحيح هالشي بس بالمقابل العالم كانت تعيش بعالم صغيرون 
يعرفون بعض ونفس التربيه ونفس الجو ونفس الظروف ، بعكس الحين الدنيا متفتحه ع بعض ونعرف اشياء عمرنا ماسمعنا فيها او حتى اهلنا سمعو فيها .. احس السيطره الحين اصعب اذا ربيتي طفلك احسن تربيه ممكن من يجي يخربه
ممكن يفتح عيونه على اشياء ماتبينه يعرفها وممكن يضره بأشياء ماتتمنينها اكيد!

دايم يأرقني هالموضوع وخاصه اذا كبرت ديم واخوانها ، كيف بكون مرتاحه وهم يواجهون هالعالم الي كل مره
يصدمنا بتفتحه المبالغ فيه ، اشياء كثيره مثل الشذوذ والتحرش والتدخين صارت "عااااادي" هي موجوده من قبل
بس انتشارها وتقبل بعض الناس لها يخوفني :\

المهم مالكم بالطويله .. شلون تكونين ام مثاليه ؟
الجواب ماتقدرين .. انا انسانه واقعيه جدددددا ومجالات تطوير الذات والطاقه وغيره تجذبني لكن احسها تخدير للشخص
وخلق عالم مثالي غير موجود هذا مايمنع اني اقرا بالمجالات هذي بس اكون واعيه لكل شي استقبله ومخي يستقبله!

قبل ماجيب ديم مقرره اكون السوبر ماما والتربيه ولا اسهل منها وشلون اصلاااااا مخلوق صغير يتحكم فيني
لكن انصدمت بواقع مغاير تماااماا p:

التربيه اصعب مهنه لكن ضروري ضروري تفهمون انها مو مستحيله!
كثير يقولون لي خايفين من تجربه الامومه .. طبيعي هالشعور لكن الي موطبيعي كيف الناس مكبرته!
الحين اذا عندك امتحان ودخلتيه بدون دراسه بتنجحين؟ طبعا لا!! لازم تفهمين الماده وتفهين الاسئله عشان تجاوبينها 

بالضبططط التربيه كذا ، لاتدخلينها على عماك عشان ماتنصدمين ، اذا فهمتي طفلك وفهمتي احتياجته وليش هو يسوي كذا وليش يجننك ببعض المواقف وليش يبكي كثيييير وليش يعاندك بتعرفين انه مو داخل تحدي وياك

بالعكس هو شخصيته جالسه تنبني ولازم تتفهمين هالشي وتساعدينه ببناء شخصيه متوازنه وصحيه
عشان نفهم التربيه لازم نقرا عنها سواء تجارب امهات او دكاتره ، لاتاخذين اي شي وتضيفينه لحياتك او تربيه طفلك
بس كذا لان شفت فلان مدحه لازم اسوي نفسه  ، عن نفسي اسمع كثييير واقرا كثير للناس الي مع او الي ضد

بالاخير اكون راي خاص فيني مناسب حياتي وظروفي  ، من الدكاتره الي انصحكم تقرون له
دكتور مصطفى ابو سعد وخاصه هالكتابين للاطفال حديثين الولاده لعمر ٥ سنين تقريبا


للامانه ماخلصت كل الكتابين ، لكن دكتور مصطفى من زماان اتابعه بالتويتر وفتح عيني ع كم شي
صح بعض الامور اعارضه فيها ، لكن مثل ماقلت اخذو الي يناسبكم ولاتصيرون وعاء فاضي الناس تصب فيه كل شي
(الكتب متوفره بجرير)


وايضا المستشار التربوي ابراهيم الخليفي من الناس الي احب اتابعهم واستفيد منهم
تقدرون تبحثون عن محاضراته باليوتيوب ، عنده كتب اتوقع بس ماقريت له

،

لاتحملون نفسكم فوق طاقتها ، بنهايه اليوم لما يكون طفلك بخير وانبسط بيومه ونايم بسريره وهو مرتاح وشبعان
هذا اهم شي ،، بعض الامهات تحسسك ان عيالهم ابتلاء! وبس تتحلطم عليهم بالصاعد والنازل

انا اتفهم ان بعض الاطفال فيهم نشاط وحركات بزيااااده بس بالاخير قرار ان يجون بالعالم هذا قرارك انتي
لازم تكونين مسؤوله عنه ، التعب الي تتعبينه معاهم مو شي سهل ادري بس لكل مشكله حل 
حلطمتك وضربك لهم وتحسين انهم سبب تعاستك ماراح يسوي شي ابد ابد

ديم الي يسمع عنها يقول ملاك منزل من السما ههههههه ، بس بسم الله عليها شيطانه شيطااانه
ونشيطه لازم احد وراها طول اليوم تطري ببالها حركات غريبه وتخوف
مرات القاها متعلقه بين فتحات الدرج ومرات صاعده فوق الدولاب ومرات ماخذه الكريم وداهنه ورق الجدران
وغيره كثييييرررر صح اتحلطم عند اهلي بس ولله بنهايه اليوم احمد ربي عليها 

لها شخصيتها الخاصه وحركاتها الي مراات تضحكني p: واحب ان الناس تحبها 
كل يوم اتعلم شي جديد من خلالها واحاول استوعب ليش تسوي كذا ..

اكتشفت اذا ماأشغلتي اطفالك بيشغلونك ، عاد شلون تشغلينهم هذي يبيلها تدوينه ثانيه

ديم ومصاصتها!

اقدر اقول وبكل فخر هذي من اجمل التجارب الي اثبتت لي اني قويه هههههه
ديم من صغرها ماتنام الا بلهايه "غلط او صح هذا مو موضوعنا" لان هالشي كان اختياري وكل شخص يختار حسب ظروفه

يمكن الشي الي اعترف انه غلط انها طولت ع المصاصه ، بس ماتستخدمها الا وقت النوم واشيلها منها
من تقوم تدورها ومرات تاخذها وتصيح صياااااح اذا ماعطيتها ومرات ماتنام ابد ابد ابددد الا وهي وياها

كانت سالفه المصاصه مأزمتني كل ماحد يشوفني يوووه للحين بنتك ع مصاصتها يوو حرام عليك
يعني حتى انتو عندكم اغلاط بس انا ساكته بدون اي انتقاد :\
المهم الشي الي منعني امنعها منها ، ان السالفه يبيلها التزام وانا كنت فتره نقل بيت
وظروف خاصه وتعبانه ادري ماراح التزم فيها فقررت ماشيلها منها الا وانا مستعده للقرار هذا 

اسوء شي تسوين شغله وبعدها تتراجعين وانتي بنص الطريق هذا بيخلي البيبي يعرف انك مو جازمه 
ويقدر يفوز عليك بصياحه ودموعه وتصير سلاح بيزعجك فيه

اول شي سويته عشان اقطعها منها ..
لبستها بجامتها ، شربتها حليبها ، قرينا قصه قبل النوم حرصت انها نظيفه ونومتها بسريرها
طبعا الكلام سهل والتطبيق شي ثااااني

كانت تصيييح وتقول ابي همهم يعني اللهايه ، وانا اقولها همهم راحت خلاص
مادري لو اسلوبي صح بس مابي اعشمها بشي ههههه

اذا زاد الصياح طلعتها برا الغرفه عشان ابوها يقدر ينام ومايقوم بنفسه يدور المصاصه يسكتها P:
واخليها تصيح لحد ماتشبع :| يمكن هذي اصعب مرحله تتحملين ازعاج وصياح مستمر

بس الحمدلله كان بكاها بكا دلوعي مو صدق ..
بس تتعب وتستلم للنوم ارجعها سريرها وتقوم من النوم نفس الشي تصيح تدور المصاصه
احاول اهديها او اشتت انتباها بشي ثاني او اغني لها او نطلع برا الغرفه من جديد

عاد اسوووء شي فيك نوم الدنيا والبيبي يصييييح!
الحاله هذي استمرت 5 ايام متواصله

بعدها صارت تنام بس نوم مو متواصل تفز من النوم تبكي شوي وترجع تنام
احس لو بديتو بدري بمنع المصاصه ماراح تتعبون مع البيبي
انا ديم قطعتها قبل لاتكمل سنتين والحين الحمدلله صارلها فتره ناسيتها تماااماا 

،

شعور الانتصار حلو ولله ماتوقعته كذا ههههههه
حسيت الامومه معركه وفي فايز وخسران مع ان هالتفكير غلط

حلو نكون متفائلين واهم شي صبوووررريييين ادري صعب بس صدقوني ضروري تتعلمون الصبر
عشان تقدرون تكملون .. بالاخير هذي نعمه احمدو ربكم عليها

انا مو أم مثاليه بس أم اتعلم كل يوم شي يقربني للمثاليه اذا ربي راد
لاتستهينون بانفسكم وقدراتكم وخلوكم واعين وثقفو نفسكم

الامومه نعمه لمن اراد ونقمه لمن اختار 
اشوفكم بتدوينه جديده

هناك 20 تعليقًا :

  1. فعلاً التربيه الحين صايره صعبه جداً
    ودائماً اقول اللي مو قد التربيه لا يتزوج و يجيب عيال لانها مسؤؤليه
    وهذا الشي اشوفه في الناس اللي حوالي
    لكن ماشاء الله عليك اهنيك صراحه على تربيتك لديم و مسويه لها نظام
    وقدرتي تتغلبين على الشي الصعب بنسبه للأمهات الي هي المصاصه ههههه
    الله يخليها لك يارب ويصلحها ..

    ردحذف
  2. بصراحة انا مو أم و اتمنى هالشيء مع اني متخوفه بس التدوينه جممممميله جداً جداً و حبيتها و استمتعت و انا اقرأها
    الأمومه فعلا صعبه انا جربت ولد اختي كان عمره شهرين و شوي جلس معاي ٥ أيام كانت من أصعب أيام حياتي جدياً
    بس أضاف لي خبره و قوة تحمل و صرت اتذكر أمي و ادعيلها حسيت فيها مررره :(
    الله يخليلك ديوم يارب و تشوفينها في أفضل حال دائماً

    ردحذف
  3. "حتى انتو عندكم اغلاط بس انا ساكته عليها بدون انتقاد"
    عجبتني العباره مررره ، من جد كثير ناس مليااانين اغلاط ومايشوفون نفسهم وبس يتكلمون ع الباقين :/

    جممميلة التدوينه شيووم ربي يرزقك بر ديوم العسل 😍❤️
    استمتعت مرره وانا اقرأ 😍 ننتظر تدويناتك الجايه ❤️❤️

    ردحذف
  4. من جد الأمومة متعبة لكن في الوقت نفسه اسمى وارقى واجمل مهمة ، يجيني اوقات اقول وش جابني للضيم جنت مدلله ودي اعطي نفسي كف وقتها لأن ربي رزقني اجمل نعمة واتذمر منها ، لما اشوف الأمهات الايجابيات مثلك يعطوني بور وطاقة ودافع ، اتمنى يكون فيه قسم للأمومة عشان لا ننحرم من هالجمال شيوم

    ردحذف
  5. الأمومه شعور ماتوصفه تعابير الدنيا كلها أتمنى كل أنثى تخوض تجربته ويارب الله يقدرنا ونربي اطفالنا التربيه الصالحه السليمه
    التربيه أبد مو هينه أبد.. اهنيج على انجازج مع ديم و بانتظار تدويناتج القادمة 💕

    ردحذف
  6. تدوينه جميله والامومه فعلا تحتاج صبر ووعي للشي اللي تسوينه ، وسالفه المصاصه هذي للاسف لغايه الان متازمه منها مع طفلي مع انه عمره اكبر من سنتين بس عشان ظروفه الصحيه ماقدرت اضغط عليه وامنعها عنه بس الله يسهل ان شالله

    ردحذف
  7. كلام جميل وتجربه يستفاد منها ..يعطيك العافيه

    ردحذف
  8. حبييت التدوينة كثييير 💕برأيي السعي للمثالية جداً متعب لان هالشي بحد ذاته يختلف من شخص لآخر ومجتمع لآخر .. المثالية في نظري اني احقق اعلى حد من خططي واكون مرنة ومتزنة وفي نفس الوقت فطنة وعارفة شنو اسوي ولوين بروح >> هالشي في نطاق الأمومة طبعاً .. أهنييييج على نجاحج في التحدي 🎊💪🏻.. أنا الحين على وشك دخول تحدي الحفاضة والله يوفقني 😭😅..

    ردحذف
  9. ربي يخليلك ديم و يفرحك فيها :*
    في مواضيع الأمومة مدري ايش اقول لأني مو أم بس حبيت أقرأ لك <3

    ردحذف
  10. حبيت حبيت حبيت 😢❤️❤️❤️
    انا مو ام و مو متزوجه اصلا
    بس احب اقرا بهالمواضيع و اخذ الخبره
    و يضايقني لمن اناقش اخد عن التربيه
    يقول يووه بدري !
    الحين صرت اواجههم برد واحد و انا اقوله من قلبي
    " مجتمعنا مليان ضحايا ، ما ابغى عيالي يكونون الضحايا الجدد
    يا اجيب وانا متاكده اني كفو و اقدر يا اقعد ، و الواحد لازم يتثقف و يقرا و يتعلم اول باول "
    + انا معاك في ان بعض الكتاب يصنعون اجواء مثاليه غريبه 😹❤️

    ردحذف
  11. تدوينه جدا جميله
    صحيح والله كلامك عن الجيل القديم والجد يدحبيت المقارنه اختصارتي كثير بسلوب واضح وجميل
    الله يحفظ لك ديوم اكثر شي يدمر الطفل إهمال الأمهات الاهمال مو بطلعات والخدم لا بالأسلوب وتعامل في امهات وربي اسلوبهم مع اطفاهم جدا سي لدرجه كلامهم جدا قذر يعني تلفظين على أطفالك !! غير لعن وشتم وش ترجين طفلك يطّلع !! وطفلك بياخذ تصرفاتك وكلامك ويتعامل مع الناس فيها !!الله يهديهم ان شاء الله

    ردحذف
  12. تدوينه روعه قليله عليها وجد جات في وقتها ��
    انا مع ابني عطيته اللهايه تقريبا في ثالث اسبوع بعد ولادتي لان كان نومه بالليل مقطع متعبني الله يصلحه وابتدا يمص اصابعه فقلت اللهايه احسن بكثيرر ولا ادخل بدوامة مص الاصبع وشوي شوي اتعود عليها وانقطع عنها بنفسه في عمر الست شهور الحمدلله بس كنت اتمنى انه يكمل شوي معاها بس ماصار والحمدلله ..
    وطبعا الكل انتقدني وكيف وكيف وبتخربين اسنانه ومدري شنو >> فلسفه للعلم انه في دراسات حديثه تقول انها تساعد على استرخاء الطفل وتخليه ينام المهم لاجبت الثاني باذن الله من اول يوم اللهايه بفمه �� صراحه هيا life saver
    وبالنسبه لتثقيف النفس وانك ماتسعي وراء الكمال والمثاليه جددا صعب واحساس الذنب انك مو قادره تصيري مثاليه اصعب بس البوست حا بوقته كالعاده ❤️
    يعطيك الف عافيه ��

    ردحذف
  13. تدوينة رائعه والأروع شعور الام بالانتصار وتحقيق الهدف بدون
    الضرر للطفل
    اللي لفت انتباهي برا ان الطفل يوصل عمر ٦ سنوات ومعه اللهايه يعتبرونها حريه شخصيه للطفل
    و لكن الله يكرمك والقارئات من عمر سنه و ٦ شهور يدربونهم على الحمام
    اختلاف ثقافات ��

    ردحذف
  14. انا بنتي دحين عمرها سنة واربعة شهور ومن يوم ما دخلت السنة بديت ايام اعطيها المصاصة وايام لا لمن دحين سارت مهي مهمه بالنسبة لها زي قبل لكن مخليتها احتياط للاوقات الي احتاجها بجد لمن عمر سنتين وبوقفها ان شاءالله . . مرا احب الاشخاص الي مهتمين باطفالهم رغم انهم مشغولين ببزنس او عمل معين لانو اكتر الي حولي يا مهتمه باطفالها يا بشغلها . . لمن اقراء تدويناتك عن تجربتك مع الامومة احس براحة واحس انك فعلا ما تتصنعي المثالية لانو دا الواقع لكن تسوي كل الي تقدري علية فعلا تريحيني نفسيا مرا شكرا

    ردحذف
  15. فعلا مستحيل نكون مثاليين في كل شي خصوصا في التربيه..
    أنا كنت متخوفه كيف أقطع عنها مصاصتها خصوصا انها كانت مره متعلقه فيها و خوفي كان من نفسي أنا
    كنت خايفه اضعف و افشل في المهمه بس الحمدلله مع الاصرار تمت المهمه بسلام!
    حلو إحساس الانجاز.. حسيته أكثر شي لما قطعت الاجهزة تماما عن بنتي.. كانت فتره صعبه لأني قطعتهم عن نفسي كمان.. لأن نظرتي للتربيه إني اربي نفسي ع الشي اللي ابيه تسويه بنتي.. صعب اقطع بنتي عن الجوالات اذا انا طول الوقت عليهم! و الحمدلله طلعت بنتيجه و مره فخوره بهالشي..
    أحلى إحساس فعلا إنك انجزتي شي يفيدك و يفيدهم!

    ردحذف
  16. ماشاء الله تبارك الله. .. لاتطولين علينا في بوستات ديمات😍 احنا الأمهات نستفيد💕
    عقبال مانقراء تجربة نقل ديم ل غرفتها 😙

    ردحذف
  17. ربي يقدرك على تربيتها وان شاء الله تشوفي ثمرة تربيتك بالمستقبل ♥♥

    ردحذف
  18. ��������
    رووووعة كلامك وواقعي .... وأهنيك على الإنجااز هذا معها ...

    ردحذف
  19. ما شاء الله💗 كلام جميييل وواقعي ومفيد للامهات وغير الامهات😆

    ردحذف
  20. مشاء الله على مدونتك مره رائعه

    ردحذف

التعليقات الجميله ♥♥

Blogging tips