الثلاثاء، فبراير 16، 2016

مقارنه بين الكليراسونيك وفريو لونا وتجربتي معاهم ♥


،

السلام عليكم وَ رحمه الله وَبركاته 

تدوينه اليوم تجربتي مع جهازين تنظيف بشره انشهرو كثير الفتره الي فاتت ، والبعض يحتار شنو ياخذ او يجرب!
قبل ماتشترين اي منتج جديد بالسوق حطي ببالك هل فعلا احتاجه ؟ 
لأن اشوف البعض يشتري لمجرد الشراء وانها هبه وتبي تكون مع الناس 


وثاني نقطه اسألي وأبحثي التجارب تختلف ، قبل ماكتب البوست سألت صديقاتي عن رايهم بالجهازين حتى اكون فكره عامه والاراء انقسمت بينهم وكل شخص حسب بشرته وحاجته 


الكليراسونيك



وظيفتها:

جهاز تنظيف بشره بالبيت تستخدمينه ، ينظف بشرتك بشكل عميق افضل ب٦ مرات من استخدام اليدين ، يوعد انه يعطيك بشره صحيه ونظيفه تسمح بامتصاص المنتجات وتتقبلها بشكل احسن ، الجهاز الي بالصوره ميا ٢ يختلف عن ميا ١ بالسرعات ، وبالنسبه للبلس تقدرين تستخدمينه للجسم بس ماحس عملي ابدا لان حجمه يعتبر صغير وياخذ وقت حتى يغطي كل مناطق الجسم بس بالاخير يرجع لتفضيلك الشخصي.

طريقه استخدامها:
تغسلين وجهك بالماي والجهاز بعد وتحطين الغسول على البشره ، لما تحطين الجهاز على البشره لاتضغطين ابد يادوب تلمس بشرتك الفرشاه وحركي يدك بحركات دائريه وهي تكمل الباقي ، مدتها دقيقه وحده وهذا الحلو فيها للعجازين :)
٢٠ ثانيه للجبهه
٢٠ ثانيه للانف والخد
١٠ ثواني للخد اليسار
١٠ ثواني للخد اليمين

يعطيكم تنبيه كل مره عشان تنتقلون بين اجزاء الوجه ، السرعتين بالجهاز هذا الاولى للبشرات الحساسه والثانيه للبشرات المتنوعه وتنظيفها يكون اعمق بشوي.

تجربتي:
بشرتي مختلطه معرضه للحبوب وحساسه ، الجهاز صارله سنتين عندي تقريبا ، حبيتها جدا جدا بس توقعت نتائج افضل من كثر ماسمعت عليها مدح ، توقعت الحبوب ماتطلع لي مع استخدامي للجهاز او تقلل منه بس الحبوب نفسها نفسها تروح وترجع وتكون صغار تحت الجلد ، يعني الجهاز ماساعدني من هالناحيه ، مقدر الومه لان البشره ماراح تعتمد على شي واحد فقط بالعكس في عوامل كثيره وخاصه الاكل والهرمونات وغيره ، بالنسبه لتوحيد لون البشره مع استخدام المنتجات المخصصه للشي هذا ، ماشفت نتيجه منها بصراحه ، بتقولون ليش عاجبك ؟ احساس النظافه بعد استخدام الجهاز جدا جميل ، قبل الميك اب اذا استخدمتيه يخلي مكياجك انظف بكثير لان يشيل القشور من الوجه ، بعد الميك اب وتنظيفه ، لاحظت مهما جربت منتجات ازاله ميك اب ماتفيد بدون الكليراسونيك ، يعني لما انظف بشرتي بمزيلات ميك اب وغسول للبشره وارجع عليه بالقطنه احصل بقايا بس هالشي ماحصله مع الكليراسونيك ، يعني ادت مهمتها بشكل ممتاز "كتنظيف"  

عيوبها:
- الفرشاه لازم كل فتره تغيرينها
- سعرها يعتبر مرتفع نوعا ما
- الشحن مايطول وياك
- اذا شحنتيها لازم تخلينها ٢٤ ساعه تنشحن

السعر واماكن التوفر:
سعرها بين ٧٠٠ الى ١٧٠٠ ريال وتحصلونها بسيفورا


فوريو لونا


فوريو لونا ايضا اداه تنظيف بشره بس تختلف عن الكليراسونيك ولو انهم نفس المفهوم ، الي عندي حجم ميني وصلني من صيدليه وايتس اتوقع كمل السنه معاي ، الفرق انو الفوريو فرشاتها سيلكون وغير قابله للاستبدال وهذا شي ممتاز مقارنه بالكليراسونيك ، لها جهتين الي بالصوره الرقيق للتنظيف الخفيف والجهه الثانيه للتنظيف العميق للمناطق الدهنيه مثلا ، تشتغل على الذبذبات واحساسها على البشره جدا ناعم ، الحلو شحنه يطول كثييير كثييير يعني ماشحنته الا مرتين للان بس.

طريقه استخدامها:
نفس الكليراسونيك تحطين الغسول على البشره مباشره ، وبعدين تبللين الجهاز وتمشينه ع البشره ، الوقت الي فيه دقيقه .. ١٥ ثانيه بعدين يعطيك تنبيه تنتقلين للجزء الي بعده ، فوزعيها بالتساوي على البشره ، حاولي الحركه تكون لاتجاه واحد بعكس الكليراسونيك الي يكون بحركات دائريه.

عيوبها:
- السعر المرتفع لان الحجم الميني بحدود ال٦٠٠ ريال
- تنظيفه شبه سطحي وماتحسين فيه ومايشيل القشور الي على البشره او يعطي احساس النعومه

تجربتي:
استخدمت الفوريو ميني مرتين باليوم لمده متواصله ، بعدين على فترات متباعده ، للامانه ماحسيت فرق معاي بولا شي :)
لدرجه شكيت بنفسي وقلت لا بكمل استخدام وغيرت الغسول عشان قلت يمكن السبب منه ونفس الشي ماحسيت بفرق ، اللهم تحسين بشرتك انظف بشوي ومشدوده مع الاستخدام وهذا الشي ذكرني بفرشاه سيلكون كنت استخدمها زمااان من سوب اند قلوري لونها وردي اتوقع تعرفونها  حسيت بتعطيك نفس النتيجه ، للامانه ماعندي روؤس سودا كثير فمافرق وياي ، الحبوب الي تطلع لي من فتره للثانيه استمرت مع وبدون استخدام الجهاز ، حاولت اغير الروتين ونفس الشي مافي نتيجه.

السعر واماكن التوفر:
الميني ب٦٠٠ ريال والكبير ب٩٣٠ ريال اتوقع وتحصلونه بصيدليه وايتس

السؤال المهم لو خيروني بين الكليراسونيك والفيريو شنو اختار؟

طبعا الكليراسونيك .. مع ان مثل ماقلت ماحسهم يتشابهون ، الكليراسونيك تنظيف اعمق للبشره من الفيريو حتى لما انظف مكياجي وبعدين استخدم الفيريو يبقى بقايا بالقطن ماتروح تماما مقارنه بالكليراسونيك ، الفيرو استخدمها يوميا وماخاف على بشرتي مع ان مافي فايده شفتها بس اقدر اقول احساس الامان! بعكس الكليراسونيك ماستخدمها الا مرتين الى ٣ بالاسبوع بس ماحس احتاج اكثر من كذا ، الكليراسونيك يفرق معاي لما انظف بشرتي من اول مره بعكس الفيريو ، البشرات الحساسه اخذو فرشاه حساسه للكليراسونيك افضل لكم ، بتطلع لكم حبوب بالبدايه مثل ماسمعت من البنات بس بعدين تروح ، بالنهايه البشرات تختلف فشوفي الانسب لك من خلال ماطرحته انا او باقي صديقاتي ، وهذي تجربتي بكل صدق وشفافيه. 

الاجهزه هذي ماتصنع المعجزات مثل ماتم ترويجه بالعكس كل شي يكمل شي ، فاحرصي على روتين متكامل سواء من داخل او من برا عشان تشوفين نتيجه حلوه ان شاء الله 

ان شاء الله يكون البوست مفيد واذا لكم تجربه من الجهازين ارحب فيها بالكومنتات :)
اشوفكم ببوستات ثانيه.


هناك 38 تعليقًا :

  1. يعطيك العافية .. انا لي سنتين استخدم الكلاراسونيك وحابتها مرة بالذات بعد الميك اب احسها تنظف مرة

    وغير كذا احبها بالسفر احس مااقدر اسافر بدونها خصوصاً انو بالسفر الجو يتعب فتنظف البشرة

    وارجع اقول يعطيك العافية حبيبتي ماقصرتي 💕👍🏼

    ردحذف
    الردود
    1. الله يعافي قلبك عهود ♥♥♥ وصح بالسفر اول شي يدخل شنطتي هي :)
      شكرا على تعليقك ♥

      حذف
  2. ماشاءالله بوست كامل يعطيك العافيه ((( بالنسبه لي الكلارسونيك ما استغني عنها ابدا 🌹

    ردحذف
    الردود
    1. الي جربها بيحبها اكيد ♥♥♥ شكرا الاء نورتيني

      حذف
  3. شكرا 💕

    ردحذف
  4. احترت كثيير قبل ما أشتري وحدة منهم لكن ما أدري ليش كنت متحيزة للكليراسونيك أكثر والحمدلله خذيتها، أحبب شعور وملمس وجهي بعد ما استخدمها وزي ماقلتي مهما استخدمت مزيلات ميك اب لاازم أستخدمها👌🏽
    يعطيك العافية

    ردحذف
    الردود
    1. هو الصدق الاراء انقسمت بس يرجع بالاخير للتجربه ♥♥♥
      بس محد يقدر ينكر احساس النظافه مع كليراسونيك ♥♥♥♥

      حذف
  5. شكراً لك ياجميلة كأنك حاسه فيني قاعده ابحث عن معلومات عنها هالايام ، الله يسعدك يارب ويخلي لك ديوم ����

    ردحذف
    الردود
    1. حبيبتي نجود عاد ان شاء الله يعجبك الي بتختارينه ♥

      حذف
  6. شكراً ع المدونه انا جداً احب تفاصيل حياتك بالسناب الله يوفقك ويسعدك يارب ❤️

    ردحذف
    الردود
    1. حبيبتي الله يجزاك خير يارب ♥♥ ومن تحبين

      حذف
  7. حبيت ان كلامك جدا عقلاني على غير عادة بقية اللي تكلموا عن هالادوات، لان كل اللي شفته انهم طيروها بالسماء بشكل مبالغ فيه، دقة وصفك مره تخليني اثق برايك وكنت جدا محتارة وقرأت كثير لكن بعد تدوينتك عرفت قراري وشكرا جدا ❤❤❤

    ردحذف
    الردود
    1. يازينك نورا ♥♥♥
      صحيح كثير تكلم عنهم بس بالاخير التجربه هي الي تفصل ♥♥
      شكرا على هذي الثقه :*

      حذف
  8. توني شاريه جهاز لونا ولسى ما جربته لكن متفائلة فيه ،
    محتاجه شيء يجدد بشرتي وينظفها بس 💗
    شكرًا شيوم 💗

    ردحذف
    الردود
    1. في من صديقاتي حبوه عكسي فان شاء الله بيناسبك ♥♥♥

      حذف
  9. يعطيييك العافية ❤️❤️ .. ياليت كانت فية تجربة مع جهاز اولاي او ذوات السعر المنخفض 💋

    ردحذف
    الردود
    1. يعافي قلبك لمياء ، اولاي مشكلته الفرشاه تفر فحسيت ممكن تخدش البشره ♥

      حذف
  10. شكرا لك على الموضوع ويعطيك العافيه
    ماكنت أدري أن فوريو لونا غاليه كذا صدمني السعر 0_0

    ردحذف
  11. شششششككراً ممممره كنت محتارهه بينهم بس الحين عرفت الأنسب لي ..
    الله يسعدك ؛)

    ردحذف
  12. حبيت تجربتك
    وانا كمان استخدمت الكلاريسونك واستخدمة فرشاة كلينك متشابهات جداً لكن كلينك تتفوق بطول الشحن

    ردحذف
  13. بالنسبة لي ماأحتاج لمثل هالأجهزة لأني بعتمد على تنظيف بشرتي من المكياج إما بطرية الزيوت حسيتها مرا ناسبتني وفعلاً بشرتي تكون ناعمة ونظيفة بعد استخدامي لهالطريقة الرائعة .. :)

    إذا بتعاني من الحبوب أوصيك باستخدام تونر التفاح بإضافة ربع العلبة بالخل والباقي بالموية واستخدميه بشكل يومي، بشرتك بإذن الله بتتحسن .. كمان أهتمي لنوعية غذائك ، ممكن الحبوب بتجيك من نوع معين من الغذاء عندك الحليب البقري كمثال .. :)
    برضوا أحرصي تشربي مويه مضاف لها ملعقة كركم لتتخلص كبدك من السموم وهالشيء بيساعد بإزالة الحبوب من بشرتك ^_^

    هذي بعض النصايح اللي عندي وان شاءالله تكون مفيدة لك ..
    ربي يحفظك :)

    ردحذف
  14. يعطيك العافية شيوم💕👌🏻

    ردحذف
  15. انا للان مااشتريت ولا نوع بس كنت متحمسه للكليراسونيك واختي للفيريو
    وسمعت من بلوقز ثانيه ان الكليراسونيك تعتبر قوية ع البشرة والاغلب يمدحها بدون مصداقيه
    لكن انتي من ضمن الي اثق بهم واضمن تجاربهم
    انا طبع بشرتي مافيها حبوب ولله الحمد
    واذا اهتميت فيها بماسك او تنظيف يومي بغسول
    طلعت حبوب 😑

    الله يعطيكي العافيه ع البوست جميل ومفيد 💖💖💖

    ردحذف
  16. حبيت من زمان استنا احد يقول تجربتو عن الجهاز لانو فهلاً سرت اقول بشرتي مارح تسير كويسه الا لما اجيبو ارمي اعتمادي والحمل كلو عليه شكراً شيوم على البوست جد يسلمو ❤❤❤❤

    ردحذف
  17. البوست جمييل شيوم انا ماحربت اي منتج منهم بس احس اني اميل للكليراسونيك اكثرر احس تنظيفها اعمق 👍🏽
    يعطيك الف عافيه 💐

    ردحذف
  18. انا بعد كنت افكر بالكلاريسونيك، بس خوفني انها تطلع حبوب بالبدايه ،حسيتي بهالشي و لا لأ؟

    ردحذف
  19. حبيت البوست جدا وخصوصا ان الجهازين مجربتهم ونفس رايك تماما اشوف الكليراسونيك افضل بكثير وتنظف من قلب مقارنه بجهاز فريو الي ندمت اني شريته بس خساره فلوس ع العموم يسلموو شيووم ويعطيك الف عافيه

    ردحذف
  20. كنت متحمسة للكليراسونيك وحمستيني اكثر ♥.♥
    شكراً شيوم ♥♥

    ردحذف
  21. اهلاً برجعتك 💜 فقدتك والله سنابياً و بلوقرياً 💔

    هالموضوع بالذات كان مُحير لي ، كنت مخلصة كورس روكيتان ومبسوطة عالنتيجة وابغى احافظ عليها ، بنفس الوقت كنت حابة اتطور بالميكب و اطبق دروس واجرب باستمرار ، قرأت مقارنات وبحثت وبالنهاية اخذت فرشة فيليبس فيزا بيور لما شفتها بعروض ساكو لوووول

    للآن تجربتي معاها كويسه الحمد لله 🌻

    ردحذف
  22. حمستيني للكيلواسونيك ،انا عندي فرشة سيقما القديمه وكانت تعطيني هالاحساس نظافة البشره بعد استخدامها ،بس من كثر ما اسمع مدح على الكيرالسونيك شكلي بشرتيها

    ردحذف
  23. Thanks for sharing your experience.

    ردحذف
  24. Thanks for sharing your experience. keep going 👍

    ردحذف
  25. ثانكس على الريڤيوو .. ماجربت ولا جهاز منهم 😁.. احس بشرتي ماتتحمل ابداً .. استخدمت فرشاة بودي شوب وماناسبتني فوققت تجارب 😅

    ردحذف
  26. فعلا كلاريسونيك رائعة جدا، شعور النعومة في الوجه بالذات الانف مميز جدا، مرات نحس أني مش مضطرة ندير تقشير لوجهي لانها مكفية وموفية ..

    http://samarscoffee.blogspot.com/

    ردحذف
  27. يعطيك العافيه شيوم من زمان كنت محتاره بينهم بس ابي اسالك انا قد شفت جهاز تنظيف من شركة براون نفس شكل الكليراسونيك بس مادري بيكون نفس النتيجه ولا ! لان سعره ارخص بكثير تقريبا ١٤٠ ريال ولها فرش معه ف مادري وش اشتري بالضبط 😢💔

    ردحذف
  28. ما كنت متشجعه لمثل هالأجهزه لكن من شفت تدوينتك تشجعت😃💜 الله يعطيك العافية💜💜

    ردحذف

التعليقات الجميله ♥♥

Blogging tips