الأحد، يونيو 28، 2015

تقنيه ريجينريت علم تجديد مينا الاسنان ♥ ، هل رجعت لي اسنان قويه وبيضاء في ٣ ايام بس ؟


السلام عليكم وَ رحمه الله وَ بركاته  .
اليوم بتكلم عن تقنيه جديده بالسوق هي ريجنيرتر انمل ساينس ، علم تجديد المينا ، بشكل عام فكره هالمنتج قوالب تستخدمينها لمده ٣ ايام بالشهر ومعجون اسنان يستخدم يوميا والنتيجه مينا اسنان قويه وبياض اسنان طبيعي



شنو المينا ؟
المينا هي الطبقه الخارجيه للاسنان الي نشوفها وهي اكثر ماده بالجسم صلابه ، لونها بالعاده بيضاء تميل للصفار شوي وكل ماكبر الشخص تصير اسنانه اكثر صفار لان المينا تضعف ويبان العاج الي لونه بالاساس اصفر ، من الي قريته وفهمته ان المينا ماده ماتتعوض اذا راحت عشان كذا اكثر الاطباء يهتمون فيها اكثر شي لان مايقدرون يرجعون المينا

شنو تآكل مينا الاسنان وشنو الفرق بينه وبين التسوس؟
تاكل مينا الاسنان "الحمضي" الي مركزين عليه ريجنيرتر هي عمليه كيميائيه تصير لمينا الاسنان بسبب اتصال الاسنان بشكل مباشر بالاحماض الناتجه من الاطعمه والمشروبات ، هذي العمليه تسبب حاله مرضيه تحلل المينا وعاج الاسنان الي ورا المينا ، الفرق بينه وبين التسوس ان المينا تسبب فجوات على السن بسبب التاكل فيضر كل الاسنان اما التسوس يضر سن واحد بس.

سبب تاكل مينا الاسنان ؟
تاكل مينا الاسنان مايكون واضح ترا الا بمراحل متقدمه وسببه الاكل الي يحتوي ع احماض مثل "البرتقال والليمون والمخلل والروب والمشروبات الغازيه ..  والقهوه والتدخين تسبب بقع للمينا بعد ، الاحماض الي بالمعده قويه جدا لان تساعد بالهضم فالناس الي تتقيئ تسمح للاحماض هذي بانها تلمس الاسنان فتكون سبب قوي للتاكل بعد.

فلازم نحرص على شرب المشروبات الغازيه والعصاير والقهوه ان امكن بمزاز ونقلل من شربهم لان تضر الاسنان كثييير 

شنو اعراض الاصابع بتاكل الاسنان ؟
١. حساسيه الاسنان اذا شربت شي بارد او حار
٢. صفار السن بسبب ظهور العاج
٣. شفافيه حواف الاسنان
٤. حفر وفجوات بالاسنان

شنو وظيفه الريجنيرتر ؟
يعيد تجديد المينا بالاسنان ، مع انه مستحيل على كلام الاطباء بس الي اخترعو هالمنتج قالو انهم قدرو يرجعون مينا الاسنان من نفس المعدن الي يتكون منه المينا ، وفعاليته كبيره بمراحل تاكل المينا المبكر الي مو واضحه بالنظر ، هالمنتج حاصل على براءات اختراع ، فهو قادر على تعزيز تجديد المعادن في طبقه المينا المتآكله في ٣ ايام فقط!


انا مو خبيره بالاسنان وعندي فوبيا من الدكاتره كحال كثيير من الناس ههههه ، اسناني تعتبر جيده وماعندي مشاكل بالتسوس من صغري وماستخدمت اي علاج للاسنان لا تقويم او حشوات او غيره واسناني كانت بيضاء بياض طبيعي ولا جربت ابيضهم بيوم لان ماكنت اشوف نفسي احتاج ، الى سنه بالضبط بعد ماجبت ديم وانا مدمنه قهوه بشكل يومي!

المشروبات الغازيه اشربها من فتره للثانيه مو شي اساسي وحتى القهوه بس السنه الي فاتت زدت جرعه القهوه وصفرت اسناني بشكل بسيط، كنت حاجزه موعد تبيض  عند دكتور بس قلت بجرب هالمنتج اول بعدين اشوف دكتور ، هدفي مو تبيض قد مو اهتمام بالسن نفسه لان القهوه تضر الاسنان بشكل كبير ، اتوقع عندي تاكل المينا من الي قريته من الاعراض مع اني احافظ على نظافه السن والتفريش المستمر ، بس مرحلتي مو متقدمه ابدا ، جبت لكم صور عن التاكل الحمضي "اهون شي لقيته صراحه"



نجي لتجربتي ، صارلي شهر حاليا فاتوقع بتكون تجربه متكامله ، اول شي النظام مكون من سيروم بقوالب اسنان ومعجون اسنان ، القوالب بس ٣ ايام متتاليه والمعجون يومي يكون 



هذا شكل البوكس فيه سيروم التنشيط وسيروم NR5 وقوالب اسنان ، يقولون بعد الاستخدام ٨٢٪ من مينا الاسنان تتجدد


هذا الجل المنشط ووظيفته يدفع سيروم NR-5 على تفعيل مكوناته وامداد المينا بالمعادن الي تغلف وتدمج الاسنان فتساعد على تجديد المينا وتعكس عمليه التاكل واعاده المحتوى المعدني للمينا 


 الفكره كلها بالسيروم هذا فيه عنصرين مهمين سيليكات الكالسيوم وفوسفات الصوديوم الي يتجمعون ويشكلون بنيه الكرستال المطابقه للهايدروكسياباتايت وهو المعدن الرئيسي الي يتكون منه مينا الاسنان <  ارجعو اقرو الكلام لاتطوفونه هههههه لان مهم 


مع السيروم يجون هالقوالب "جدد ماستخدمتهم" وبقولكم تحت طريقه استخدامهم


ويجي بعد قطعه بلاستيك عشان تساعد بغمس القالب بالماي الحار عشان نشكله ومعاه ملعقه مزج 

طريقه استخدام القوالب كأول استعمال:

قبل اول استعمال القوالب لازم نجهزها عشان تاخذ شكل الاسنان ، ناخذ القطعه البلاستيك الي ماشره عليها بالسهم


راح نحطه بالقالب "في فتحه بالقالب عشان نركب القطعه فيه" القالب الي لونه ازرق راح يكون للاسنان الي فوق فنبدأ فيه ، نجيب ماي مغلي ونغمس القالب فيه لمده ٥ ثواني بس نطلع القالب ونحركه عشان يبرد ونطلع الماي الحار فيه ونحطه بالفم على الاسنان الي فوق ، القالب لازم يكون حار بس مو الي يحرق! نشفط القالب لداخل ونسكر الشفايف ونضغط على القالب وتقدرون تضغطون عليه من برا يعني من الخد والشفايف بالتدليك عشان ياخذ الشكل كامل ، بس دقيقه وياخذ الشكل وتطلعونه وتكررون الخطوات مع القالب الابيض للاسنان الي تحت بس مو مع بعض كل واحد بروح.

الحين نجي لطريقه الاستخدام الفعليه بعد ماجهزنا القوالب :






عادي لو طلع شي من السيروم برا وبلعتوه مايضر ، بعدين نرجع نكرر الخطوات للقالب الثاني الابيض للاسنان الي تحت ، تستخدمون هالطريقه مره بالبيوم والافضل بالليل عشان ماتاكلون او تشربون بعدها لمده ٣ ايام متتاليه


معجون اسنان ريجنيرتر ، استخدمه قبل ماستخدم القوالب وبعدين استمريت عليه يوميا الصبح والليل ، هو نفس فكره القوالب تعكس عمليه التاكل وتجديد المينا وحمايه وتقويه ضد التسوس 

تجربتي :
نجي للزبده الحين والهدف من الموضوع كله تجربتي بعد استخدام دام شهر متواصل ، اسناني بالبدايه شكلها طبيعي مافيها حفر او اي شي بس من الاعراض الي قريتها اكتشفت ان عندي تاكل مينا بس بسيط تو بادي ما يبان بالعين المجرده ، بس ضروري اشوف دكتور ويفحص حالتي وبعدين برجع اسوي ابديت للبوست عشان تكون التجربه متكامله ، اول يوم استخدام القوالب سببت لي غثيان يوم بديت اشكلها ع اسناني مع ان مافيها شي هههههه بس مادري ليه بغيت ارجع !!  فالناس الحساسه انتبهو للنقطه هذي ، لما حطيت السيروم وخلطتهم توقعت طعم شين بيسبب لي غثيان بس بالعكس الطعم تقبلته وبلعت شي بسيط منه ولا حسيت بشي ، استخدمت القوالب قبل النوم وفرشت اسناني بالمعجون المخصص قبلها ، المعجون مافيه ماي فنشف فمي حيل واطراف الفم بعد واول مره بعد استخدام القوالب حسيت ملمس اسناني ناااعم وبعدين صارت بقع بيضا ع اطراف الاسنان ، خفت من شكلها !! حاولت ابحث عن تفسير ماحصلت ، المهم كملت تجربتي وبعد ٣ ايام من الاستخدام اسناني فتحت بشكل بسيط والصفار خف ، البقع البيضا اختفت! بعد شهر كامل من الاستخدام اسناني فتحت اقدر اقول درجه ونص يمكن بس الي اكثر شي لاحظته ملمس اسناني صار ناعم وشكلها انظف ، حبيت الانتعاش الي احس فيه بعد استخدام المعجون ومستمره عليه لان احس ينظف الاسنان صح ، هل اسناني صارت اقوى ؟ مادري يبيلي افحص عند دكتور لان التاكل من قبل مو واضح معاي ابدا فمادري اذا انعكس التاكل ، بس مثل ماقلت النتيجه اسنان سطحها انعم وفتحت بدرجه بسيطه بس مارجع بياض اسناني الطبيعي ، ماتغني عن قوالب التبيض لان هدف السيروم والمعجون مو التبيض قد مو تقويه الاسنان ، حبيت المنتج بشكل مبدأي ولازم اروح دكتور يفحص اسناني واسوي ابديت للبوست ان شاء الله

فعاليه المنتج حسب الي ذكروه على الحالات البسيطه مو المتقدمه يعني اذا سن محفور ومتضرر بشكل كبير ماراح يرجع طبيعي لانه مو سحر ، حاولت ابحث عن تجارب لغيري بس المعجوون والقوالب جديده على السوق فالتجارب نادره جدا! بالنسبه لي حابته وبيكون من روتيني الشهري ، طول وقت التجربه كنت اشرب قهوه بسبب التوتر الي حاصل لي مع شغل محلي ههههه فهل أثر ؟ مادري لان اصلا مو ذاكرين من ضمن الارشادات التوقف عن المشروبات ، بعكس التبييض الي لازم توقفين المشروبات والعصاير او تشربينها بمزاز ، المهم بعد الاستخدام وانا كنت استخدم كميه سخيه من السيروم في القوالب باقي اكثر من النص فراح اشيله للاستخدام للشهر الثاني ، بحثت ومو ذاكرين اذا ينفع نستخدمه! بس انا محافظه عليه بعلبته والكميه كبيره ماراح اخسرها .. سعر المعجون "من موقع بوتس البريطاني" يساوي ٤٢ ريال وسعر القوالب ١٢٤ ريال ، موجوده ببوتس كل مكان الا السعوديه حصريا بصيدليات النهدي ع حسب مقابلتي مع المسؤولين وقت ايفنت اطلاق المنتج ، بس بحثت بموقع النهدي ومو ذاكرين شي عنه فاستغربت! 

لمن يهمه الامر: المنتج مرسول لي من الشركه بس مدفوع لي والبوست وتجربتي صادقه تماما بدون تدخل من احد ، وراح اسوي ابديت للبوست بس ازور دكتوري باقرب فرصه.

اشوفكم ببوستات اجمل 

هناك 14 تعليقًا :

  1. يعطيك العافية عجبني الموضوع ، بس ب اسأل ينفع لو فيه حشوات اماميه للاسنان ؟ ولا يغير لونها ؟

    ردحذف
    الردود
    1. الله يعافيك مها ، بحثت عن الموضوع مافي تحذيرات ابدا بس الافضل تستشيرين الدكتور ♥

      حذف
  2. يصلح للي فيها حشوات اماميه

    ردحذف
    الردود
    1. بحثت عن الموضوع مافي تحذيرات ابدا بس الافضل تستشيرين الدكتور ♥

      حذف
  3. صراحه احس البوست جا بوقته بس ازيد على معلوماتك اذا سمحتي لمن يبون يكتشفون اذا المينا عندهم سليمه او لا اذا اسنانكم شبه شفافه من الاسفل اعرفوا انكم بمرحله متقدمه .. انا اسناني للاسف اهلمتها بشكل كبير بالذات لمن اتسوس لدرجه اسناني تكسرت ووصل السوس للاعصاب وهذا بسنين عندي حصل لكن انا اكتشفت ان اسناني كانت جدا ضعيفه بالذات اللي فوق رغم اني كنت اروح لدكتوره عشان الاعصاب بس ماعلقت على شي وبعد ماسوت تنظيف للجير اسناني بدأت تألم وبعد فتره صارت جدا ضعيفه اكتشفت ان المينا عندي ضعيف لهالشيء انصحتني الدكتوره استخدم سنسوداين ترميم باول اسبوعين حسيت اسناني تحسنت بس احتجت شي اقوى ف بإذن الله راح استخدم هالسيروم وبإذن الله يجيب نتايج حلوه بس حبيت أسالك اختي قورجس لو بغيت استفسر عن معلومات للمنتج عندك رقم ولا موقع للتواصل معهم؟؟ ياليت تفيديني وشكرا

    ردحذف
  4. شيوم يعطيك العافيه حبيبتي بس ياريت حطيتي لنا لون مقارب لاسنانك قبل وبعد لاني افكر بتبيض لاسناني هالفترة واحترت بين الليزر وبين هالمنتج

    ردحذف
  5. يسلمووو شيومة عالمعلومات الحلوة واللي تخوف 😅.. في شفافية في السن ابشرك 😂.. بطرحه على طبيبتي كونه عندي حشوات في الضرس

    ردحذف
  6. انتظر ابديت فحص الدكتور حبيبتي 3>

    ردحذف
  7. بانتظار الابديت يعطيك العافيه

    ردحذف
  8. ماشاء الله يعطيك العافية 💜 عندك فكره اذا تناسب الحوامل او لا ؟

    ردحذف
  9. اود معرفة تأثيرها المبيض،ومعرفة إذا كانت تزيل شفافية اﻷسنان ام لا؟
    وأشكرك على الموضوع ومبروك عليك المعجون وإن شاء الله اختفى التآكل عن أسنانش

    ردحذف
  10. بعد تنظيف الاسنان بالمعجون هل استخدم غسول الفم كالعاده ام اتوقف في هذه الفترة من العلاج ؟

    ردحذف

التعليقات الجميله ♥♥

Blogging tips