العشق الجديد عطر صندل عود من بوند ٩ وَ طريقه تثبيت العطر ♥

السلام عليكم وَ رحمه الله وَ بركاته ♥♥♥

تكلمت قبل فتره عن بوتيك بوند ٩ الي افتتحوه بجده كأول بوتيك بالشرق الاوسط ، هنا البوست للي ماشافه

عطور بوند ٩ نيويورك عندما الفخامه تتحدث ، عطور جديده اخذت مكان فخم بقلبي ♥♥

اليوم بتكلم عن العطر الي وصلني منهم ، عطر صندل عود والي هو اخر اصدار عندهم ، اكيد عارفين ذوقي بالعطور ، احب العطور الي ع عالعود والمسك والباتشولي والسبايسي هي الي تطغى فيها ، ماحب العطورات الناعمه والي ريحتها فواكه وسويت ، احب العطورات الفخمه ، احس العطر يعطي هيبه ويكمل الشكل النهائي لطلتك ، اخر سنتين صايره مدمنه للعطور واجرب كثيير لدرجه عندي ١٠ عطورات تنطر دورها اني استخدمها ههههه! ♥♥♥

تركيزي صاير على عطورات النيش مو التجاريه ، النيش معناته العطر الي مكوناته طبيعيه ونقيه والعناصر الكميائيه فيها اقل ، عشان كذا مرات البعض يشتكي ان في عطورات غاليه وثباتها اقل من غيرها ، لان الكحول فيها اقل لان اذا استخدمتي العطر تبين تستمتعين بجوده المكونات الي فيها بدون ماتشمين كحول بالنهايه ، زمان العطورات كانت ثابته اكثر بسبب استخدامهم للكحول بس ضررها اكثر من نفعها لان تسبب امراض وتضر الناس ،  وهالشي مو بس انطبق على الكحول حتى بعض المواد الطبيعيه فرضو قيود عليها لان لها ضرر فقللو من استخدامها . هذا مايعني ان عطور النيش   ماتثبت بالعكس من تجربتي ثابته! بس في اختلاف بين الثبات والفوحان ، لان عطور النيش مستخلصه من زيوت عطريه فتكون ثقيله بعكس العطورات التجاريه الي اساسها الكحول والكحول ماده متطايره فتشيل معاها الريحه وتكون فواحه اكثر ، ومثل ماذكرت الكحول تآثيرها ضار على الانسان اكثر  ، فانت الي تحدد تبي الجوده او الفوحان الي يوصل لدرجه ازعاج من حولك ، حلو نختار ريحه قويه بس في فرق بين الريحه القويه والريحه النفاثه الي تزعج الناس وتدخل بالراس والصدر!

ثاني شي حابه اتكلم عنه النوتات العطريه ، لازم نفهم هالنقطه لان تسهل لنا شراء العطر ، بكل عطر في ثلاث نوتات ، النوته الاولى "الافتتاحيه" هي الروائح الي توصل للانف اول مانبخ العطر وهي تعتبر مقدمه عن العطر بس مو ثابته لان بعدها بتكون النوته الوسطى والاهم بالعطر لانها الي تحدد عائله العطر او تصنيفه ، وبعدها النوته الاساسيه هي الي تعزز ثبات العطر والي تجلس وقت اطول وبالعاده تكون ثقيله ، عشان كذا اذا بنشتري عطر لا نحكم عليه ابدااا الا بعد فتره من البخ عشان نشم الريحه الي راح يشمونها الناس بعد مانستخدم العطر ويبرد. ♥♥♥

بوند ٩ نيويورك يعتبر من العطورات اللاكجري الفاخره ، عطوراتهم تنباع ببعض مراكز التجميل بس الفرع الاساسي الي يحتوي على كل الكولكشن موجود بجده في مجمع ستارز فنيو

شكل العبوه فخمه باللون الذهبي حتى تنقل لنا فخامه الصندل عود باعتباره من المكونات الثقيله ، شكل عطورات بوند ٩ كلها متشابهه بس لكل عطر هويه خاصه فيه

مكتوب على العلبه صندل عود ومكتوب نيويورك ، ومحفوظ بعلبه خاصه سهله الفتح ، بالنسبه لي هالشي جدا مهم ، لان العطورات تتأثر بالحراره والضوء عشان كذا العطورات دايم احفظهم بعلبتهم وبدروج خاصه ، فالعلبه سهلت لي المهمه جدا!

مع البوكس في بطاقه لعضويه النادي لبوند ٩ ، من مميزات النادي يرسلون لك عينات مجانيه لاي عطر قبل اصداره وكل فتره يرسلون لك هدايا من عطوراتهم ، حبيت الفكره!

نجي للعطر نفسه ♥♥♥، العطر مكون من الجزر والهيل وخشب الصندل والتين والمسك والعنبر .. مكونات غريبه وخاصه الجزر ! بس النجم هو الصندل عود ، صندل عود يستخدم بالتأمل وتهدئه العقل نقدر نقول ومهم جدا في صناعه العطور وهالعطر بالذات ينفع رجالي ونسائي ، زوجي جدا حبه لان ريحته فخمه بس ماتكتم وخاصه مع البخور شي خرافي!

اول ماتبخينه تشمين ريحه الجزر والهيل ، الريحه غير معتاده ويمكن مو الكل يتقبلها ، انا الي عجبني فيها غرابتها ، وبعدها ينقلك العطر للنوت الثاني بكل هدوووء والي هو الصندل عود مع التين والخشب العطري ، بالنوت والانتقاله هذي العطر هذا خطف قلبي واعجابي التاام! فوق هذي الفخامه يطلع لنا المسك والعنبر والسنديان لتعزيز رائحه الصندل عود وتكتمل التوليفه الفخمه !

مثل ماقلت اول ماتبخين العطر ممكن ماتستسغينه بس انتظري لما يبرد بيكون شي هادي رومانسي بس فخم بنفس الوقت ، بالنسبه للثبات انا استخدمته اليوم مع اني صارلي فتره استخدمه بس حتى اكون متأكده مليون بالميه من ثباته ، رشيت العطر من الساعه ٢ الظهر وظل للساعه ٩ تقريبا موجود ع القماش الي بخيت عليه ، حاليا الساعه ١١ ونص صارت الريحه خفيفه جدا ، الطبيعي للعطورات تظل ٤ ساعات بالكثير ، بالنسبه ل٧ ساعات هذا شي جميل!

بالنهايه حبيت العطر وكذا مره انسأل عنه وبكل امانه ، احبه للمناسبات مو للصباح مع انه اذا صار بارد تصير ريحته رقيقه جدا جدا! ♥♥♥♥♥♥

بالنسبه لطريقه تثبيت العطر فهي سهله ، تبدأ من لحظه الشور وان تستخدمين شور جل من عائله العطر الي تستخدمينه بس عن نفسي افضل شورجل بدون روائح عطريه ، بعدها نحط اللوشن ونفس الشي لازم يكمل ريحه العطر ، يعني مانقدر نحط عطر صندل عود مع لوشن فيه فراوله مثلا!

والجسم رطب قبل ماتمتصه البشره نرش العطر على الجسم مو اللبس ، بالنسبه لعطورات النيش احطها على جسمي وانا مرتاحه لان عارفه ان مافيها كحول الا نسبه بسيطه وماراح تضر ان شاء الله ، افضل مكان للعطور طيات الجسم مثل الساق والذراعين واماكن النبض مثل اليد والرقبه ، لان عطورات النيش بالغالب من زيوت عطريه فهي تفوح مع حراره الجسم ، بعد التعطير احب اتبخر ببخور عود وبعدها ارش مره ثانيه من العطر.

معلومه خاطئه تقول كل مابخيتي عطر اكثر كل ماكان الفوحان اكبر ، بالعكس انا ابخ بالكثييير ٦ بخات والعطر ثباته هو هو مايتغير! بالعكس بتكون الريحه مزعجه وتكتم الناس خاصه لو عطر تجاري وغير هذا تتلوث البيئه p: فعلا لان اغلب العطورات التجاريه فيها كحول بنسبه اكبر فتضرون نفسكم وغيركم.

بالاخير عطر صندل عود على فخامته بس فيه رقه بالنهايه بس يبرد♥♥♥ ، الحجم الي بالصوره ١٠٠ ملي وهو اي دو بيرفيوم يعني ماء عطري .. صار اول خيار لي بالمناسبات المهمه ، وان شاء الله اذا مريتو البوتيك وعجبكم لاتنسون تقولون لي وتشاركوني هالشغف!