هل هالزيت ممكن يكون الزيت المعجزه ؟ Extraordinary Facial Oil review

السلام عليكم وَ رحمه الله وَ بركاته ..

كثير توصلني استفسارات عن كريمات او تقنيه تعطي نظاره للبشره ، ماجربت شي ابهرني لحد مارسلت لي شركه لوريال هالزيت!

الزيت هذا اقدر اسميه الزيت المعجزه ، يمكن البعض يدري اني جربت منتج زمان وجاب لي رده فعل سيئه وطلع لي حبوب

الحمدالله عالجت بشرتي بس صايره بعض المناطق جافه بمثل الخد و الانف صاير جاف مع اني اهتم بالترطيب بس ماكنت اشوف شي فعال مره ..

 استخدمت هالزيت اسبوعين متواصلين عشان اكون فكره عنه ، خفت بالبدايه انه يطلع لي حبوب وانا ماصدقت افتك منها! بس توكلت ع الله بعد ماقريت عنه كثير ريفيوز ايجابيه ، للامانه جربت منتجات كثيره قبل هالزيت وجربت زيوت طبيعيه وكذا شي بس ماكنت اشوف الا نتيجه لحظيه وتنتهي.


اول شي الزيت اسمه Extraordinary Facial Oil ماركه لوريال باريس ، يحتوي على ٨ زيوت طبيعيه :

زيت لافندر وزيت الافندن

يعمل على تحفيز خلايا الكولاجين بالبشره

زيت الورد

مقاومه الشيخوخه وتوحيد لون البشره

زيت الروزماري وزيت المرقدوش

مقاومه البكتيريا

زيت قشر البرتقال

يحافظ على الكولاجين بالبشره

زيت الجيرانيوم

زيت ملطف للبشره ومناسب للبشره الدهنيه

زيت البابونج الروماني

زيت ملطف للبشره

الزيت يوعدك بتغذيه فوريه للبشره ونظاره ونعومه ، الي لاحظته بالزيت ان البشره تمتصه بسرعه ومايدبق على البشره وخفيف جدا!

طريقه الاستعمال :

له عده طرق للاستعمال اما :

- صباحا بعد الغسول تحطين ٣ نقط بس وتطبطبينه على بشرتك 

- مساءا تحطينه يابروحه او تحطينه وبعد كريم المساء.

- تحطينه ع المناطق الجافه بس ببشرتك 

عن نفسي كنت اخذ ٣ نقط واحطها بعد الغسول مباشره ، ولان بالغالب ماطلع الصباح ماتعرض للشمس والمساء احط ٥ نقط قبل مانام ..

الزيت فعلا خفيف وتمتصه البشره تماما بس لاتكثرون منه كميه بسيطه جدا كافيه ، ويحته جدا حلوه مو مزعجه بس ممكن البعض يتحسس من الروائح ، ريحته عشبيه وخاصه ماي الورد والروزماري ..

شكل العلبه الخارجيه مرتب واحلى شي الاداه الي تستخدم تطلعلك كميه كافيه ، مع اني استخدمته كثير بس الكميه للان كبيره

تجربتي :
للامانه بشرتي صارت مترطبه ونااااعممه! الي يستخدم كريمات تقشير بيعرف معاناتي مع الجفاف ، الميك اب صار اجمل وبشرتي فيها لمعه صحيه مو دهنيه لا ابدا! استخدمه قبل الميك اب مرات ويطلع الفاونديشن ديوي فيه لمعه ويندمج بشكل احلى ، سعره حلو تقريبا ٩٠ ريال لكميه بتبقى معك مطولا.

ملاحظاتي :
بما انه زيت ممكن مايناسب البشره الدهنيه مع اني ماعانيت من اي مشكله بس الافضل تستشيرون دكتور خاصه لو بشرتك معرضه للحبوب لان الي يناسبني ممكن مايناسب غيري ، الزيت انصح فيه للي يبون نعومه للبشره ونظاره وخاصه البشرات الجافه ، العلبه مو مكتوب عليها معلومات عن المنتج وانا من النوع الي احب اقرا المعلومات والمكونات ، حتى بموقهم مو مكتوب ..

اماكن التوفر :
صيدليه بوتس ، بعض السوبرماركت الكبيره مثل كارفور ، اغلب الاماكن الي توفر منتجات لوريال ان شاء الله تحصلونها عندهم.