الخميس، أبريل 09، 2015

مجموعتي الميك ابيه وَ ريفيو عن شنطه الميك اب الهوليوديه ♥


السلام عليكم وَ رحمه الله وَ بركاته  ..
تكلمت عن شنطتي الميك ابيه بالسناب وكثير جتني استفسارات عنها فقررت اسوي بوست عنها 
اول شي مادري شنو يسمونها بالضبط ، هي شنطه ميك اب بالاساس وتنسحب ووقت الشغل تنفتح ولها ستاند من تحت واضاءه ، سميتها شنطه الميك اب الهولوديه لان كثير ميك اب ارتيستس يستخدمونها ..


بس بما اني مو ميك اب ارتيسيت حبيت اني اخليها تسريحتي الاساسيه والتسريحه خليتها للعطورات .. بالنسبه للشنطه بالاساس هديه بس الي اعرفه انها طلبيه من امريكا ، ماركتها ان واي اكس 


الكواليتي عالي يعتبر لان شفت قبل بدبي تشابهه لها والكواليتي سيىئ وسعرها مرتفع ..
الي ماحبيته انو التواير واحد منهم متضرر :( لانه شحن وماشاءالله الي عندنا مايقصرون بالحذف 
بس مو مهم لان ماراح اخذها معاي بالاساس بتكون ثابته 


اكثر شي حابته فيها اني اعرض الميك اب قدامي لان استمتع بشوفته هههههه
وعلى الاطراف علقت اكياس لاشياء احبها ولها ذكرى او موقف معاي ، اقدس الذكريات جدا :)
-المرايه مو وسخه بس في كتابه عليها p: -


الشنطه وسيعه جدا .. اول ماشفتها ماتوقعت تشيل شي ، تمنيت اصورها وهي فاضيه :\
لها رفين متحركين بكل الطرفين ومن داخل مقسم ، بتوضح لكم بالصور


حبيت ان اخر رف له غطا عشان لو في اغراض ماتطيح مع الحركه اذا سكرت الشنطه


فيه مآخذين للكهربا ينفع لادوات الشعر اذا حابين 


وفيها لمبات تتحكمون بالاضاءه 


بالنسبه للكهربا ، الواير يحتاج توصيله لان مايدخل بافياش الكهربا بس يعني مو شي كبير عادي لقيت توصيله مناسبه ويشبك على كهربتنا عادي.


بالنسبه للمستويات نقدر نخليها ع الارض او تكون مرتفعه بشكل متوسط او ع مستوى عالي مثل مو انا حاطتها ، المستوى العالي لازم اوقف عشان اوصل للاغراض ، اتوقع لو تبون تحطون كرسي لازم تنزلون مستوى تحت


تقريبا هذا كل شي عن الطاوله ، بحط اخر البوست مواقع شفت فيها اشياء تشبهه لطاولتي .. الحين بتكلم عن الميك اب الي استخدمه ، حاولت اصور بشكل عام ، كل شي عارضته يعتبر جديد لان صارله سنتين وشي تقريبا ، وكله استخدمه لان الي مايناسبني ع طول اوزعه ع الي حولي ، لازم نحط ببالنا ان الميك اب مثل اي شي بالدنيا له تاريخ انتهاء ، هذي صوره توضح لكم المنتجات وتاريخ الانتهاء من مكياج وغيره


وعشان نكون دقيقين اكثر ، ورا كل منتج علامه مثل هذي


معناته عدد اشهر صلاحيه المنتج ، اما يكون ٣ او ٦ او ١٢ او اكثر
اكثر شي اتخلص منه بسرعه هي الفاونديشنات والماسكرات والكونسيلرز او اي شي سائل
وماشتري كثير منهم الا وانا ضامنه مخلصه جزء من الي عندي .. بس الشدوهات والارواج مستحيل نخلصهم كلهم بفتره قياسيه فماتوقع في ضرر اذا طولت عندنا ،، اللهم اذا حسيتي ان ريحه الروج تغيرت ارميه بدون تفكير وخاصه الي مو غالي بسرعه يخرب من تجربتي 

ناخذ جوله ميك ابيه ؟


الترتيب ماعتمدته للان فلو عندكم افكار افضل قولولي :)
اول رف خليته للماسكرات ومرطبات الشفايف


حطيت ٤ اكواب زجاج اصلا مخصصه للشموع من ايكيا اول اثنين فيه العينات الصغيره والي ورا للماسكرات


ثاني رف للبلشرات وشدو الحواجب


ورا هالارفف في مربع صغير خليته للبرايمرات وفي غيرهم بس تحت الرف ..


بالجزء هذا حطيت الباليتات للشدو والبلشرات والبوكسات الميك ابيه


بالنص حطيت ستاند للارواج والشدوهات والباودر والبرونزرات 


 الستاند للارواج اخذته من الهزازي زماان كثييير يخدمني جددا وموضح كل شي قدامي ، عندي مشكله مع الارواج اكثر شي تضيع!!! المفروض عندي دبل هالمجموعه بس والله مادري وين تروح :"( في احد يعاني مثلي ؟


باليتات الشدو والبرونزر وبودرات الوجه



نجي للرف الثاني ، حطيت الفرش للوجه والعيون بالبوكس هذا للفرش من سيقما


جنبه افضل شنطه مكياج بالحياه هههه ، اتوقع كل البلوقرز مدحوها! مع انها صغيره بس تشيل مييك اب بشكل!!
هي هديه من بينفت بس ياليت يوفرونها للبيع :( 


حطيت داخلها القلوسات والمرطبات والمحددات والاسفنجات والاكحال يعني اي شي حسيته بيحوس منظر الطاوله حطيته داخل ..


جيت بصور افضل منتجات الميك اب الي احبها بس فعلا احترت لان كل شي احبه تقريبا ، لان مثل ماقلت الي ماناسبني قطيته .. بس صورت كذا شي هم التوب حاليا وممكن يتغيرون بالمستقبل لان هذا ميك اب كل فتره ينزلون شي جديد!

باليت شدو لوراك ، طالبته من امازون كتبت عنه بالموضوع هنا


ماسكرا شانيل لافوليوم .. اكثر ماسكرا شريتها بحياتي احبها!


كونسيلر ماك برو لونق وير للمناسبات وكونسيلر ماك سيلكت كوفر يومي لانه خفيف يعتبر


مرطب الشفايف فلكسي تول احطه قبل مابدا ميك اب ، ومرطب ديور اذا حاطه ميك اب خفيف مع محدد شفاييف جميل


جل حواجب من انستازيا بيفرلي هيلز بلون التشوكليت شوي غامق تمنيت اخذ افتح


بلشر فرات بوي من ذا بالم ، لونه وردي بس جمميل احطه بنص الخد اذا حاطه ميك اب خفيف احبه كثير!


برونز لقونا من نارس اسوي فيه الكونتور ، درجته مناسبتني 


بودره دولتشي اند قابانا .. اكتشفت اني مو راعيه بودره الي عندي ينعدون ع الاصابع بس هذي جدا احبها واضح اصلا من العلبه تعطي تغطيه قويه بس لازم البشره تكون اوك ومو ناشفه


وهذا بوست اليوم ، بالنسبه للشنطه مثل ماقلت ماعرف السعر ، بس شفت مشابهه لها في دبي سوق الصين بس حسيت جودته اقل من هذي ، وسمعت انها تنباع بطيبه ، ع العموم في نفسها بامازون كثييير انتو ابحثو وقارنو ولاتنسون ان الشحن يكلف ع الوزن ،

http://www.amazon.com/Crocodile-Aluminum-Professional-Organizer-Cosmetic/dp/B008RQ0MSE

http://www.amazon.com/NYX-Makeup-Artist-Lights-Silver/dp/B005JRTDMA/ref=pd_sim_sbs_bt_3?ie=UTF8&refRID=0A1Q80889JZHQZGG6JPB


الي عندي الكواليتي عالي بس انتبهو من الاطفال ديم كل ماشافتها ركضت ومسكت الستاند وتهزه :| بس دايم غرفتي مسكره ، بس حبيت انبهكم ع هالنقطه ..



اشوفكم ببوستات ثانيه ان شاء الله. 
 

هناك 33 تعليقًا :

  1. Amazing 💕

    ردحذف
  2. حبيت البوست شيوم وانبسطت وانا اعمل زوم لصور واشوف ايش عندك عشان اقلدك :p
    ويعطيك الف عافيه حبيبتي ويسعدك على كل حرف كتبتيه ونفعتي فيه غيرك ويخليلك هالديم وتشوفيها عروس 💜

    ردحذف
  3. ما عجبتني لانها مو عملية والاشياء داخلها حوسة :(

    ردحذف
  4. عجبتني أكثر شي الشنطة كيوته من بنفت ياليت يبيعونها
    أما لإستاند مرة حلو وجميل ما شاء والله وطريقة ترتيبك وكل شي أبهرتيني
    نفسي أمتلك زيها بس المشكلة أنا مو راعية مكياج دايم وعارفة نفسي ههههههههههه
    يعني بس بالمناسبة أستخدم وللجمعات بنات
    الله يعطيك عافية ونتظر جديدك =)

    ردحذف
  5. جمييييله ياريت تتكلمين عن مسكره شانيل وايش اللي عجبك فيها والاهم ايش طبيعية رموشك طويله او كثيفه ؟ انا دائما ابحث عن مسكرة تكثف وشريت مسكرة توفيسد اللي نازله الان تكثف بس عدمتلي المكياج تتفتت بشكل !!!

    ردحذف
  6. ربي يعطيك العافيه ، برجع للبوست واتفحصه أكثر ، بس استمتعت❤️

    ردحذف
  7. حلوة بس احسها حوسه
    مو ترتيبك لاا بس اقصد هي مدري كيف
    عموما اهم شي عاجبتك انتي

    ردحذف
  8. ما شاء الله
    شفت مثلها من قبل بس ما توقعت ممكن تشيل كمية كبيرة من الأغراض
    تسلمين عزيزتي و ربي يعطيج العافية ^ ^

    ردحذف
  9. جميبع وعمليه وحلوه للمساحات الصغيره .. تتهني فيها يارب .

    ردحذف
  10. مرررررررة روعه حبيتها حيل
    وش زينها لاجيت اسافر لاهلي اقفلها واخذها
    تتهنين فيها ي رب

    ردحذف
  11. حبيتها كثير و احس الميكب فيها افضل من الأدراج و توفر مساحه
    تتهني فيها يارب
    و الله يعطيك العافية

    ردحذف
  12. اعجبتني كثير *_* براي اشوفها تناسب في غرفة ملابس بعيده عن التسريحه بتطلع اجمل ...
    بس عموما ترتيبك لها وانك اضفتي لها لمساتك الخاصه شي جممميل ،يعطيك العافيه شيوم ^_^

    ردحذف
  13. تجنننننن ماشاء الله تتهني بيهاا يارب ♥
    ان شاء الله اذا نقلنا اشتري زيها ♥ ♥

    ردحذف
  14. جميله بس احسها تصلح للي عندهم مكياج كثير . انا ماحب اجمع مكياج اشتري الاساسيات بس واذا خلصو غيرتهم _ بس تبقين ذوق ومشكورة لوقتك

    ردحذف
  15. جميله جدا عندي مثلها شريتها تقريبا من سنتين رتبت لي مكياجي
    عجبني طريقه توزيعك للمكياج راح اعتمدها ان شاءالله في شنطاي

    يعطيك الف عافيه حبيبتي

    ردحذف
  16. جميله الشنطه تنفع للناس الي غرفهم مساحتها صغيره و عمليه بعد و تشيل حوسه الميك اب

    ردحذف
  17. حلوة انها كبيرة وشايلة كل الاغراض احس اذا اوفها قدامي كأني في صالون .. صج عور الميكب المعروض يجيب السعادة ثانكس شيومة💋😘

    ردحذف
  18. استمتتتتتتتتتعت ؛ مررة البوست جميل
    إيه والله إنه هوليوودي الموضوع !
    انتي جميلة يا شيّوم ، حبيتها بس لآ غيّرت غرفتي أو نقلت لغرفة أكبر ممكن أقلدك وأخلّيها تسريحتي (عيون قلوب)
    عاد طقتني اللقافة وش مكتوب عالمراية .. :d
    تتهنين وتستاهلين كل زين
    على فكرة اسمهآ / ميك أب ترين ـ إذآ مو غلطانة :* :*

    ردحذف
  19. حبييييتها وحبيت ترتيبك لها وتعليقك للاكيآس الجميله زادها جمال

    تتهنن فيها :*

    ردحذف
  20. جميله تتهني فيها وشكراً على الإفادة الاكتراث من رائعه

    ردحذف
  21. جميله جدا ويعطيك العافيه وربي استفدت منك كثير🌹

    ردحذف
  22. يعطيك الف عافيه وربي استفدت منك كثير🌹

    ردحذف
  23. يعطيك العافيه ي حلوه بوست رائع يسلم مجهودك ي بطله💜💜💜💜💜✨.
    نوف🌸.

    ردحذف
  24. حبييييت البوست شيوم والتصوير روعه مشالله
    صراحه هالشنطه اذا ماعندك مساحه بالتسريحه او غرفة النوم جداا عمليه حبيتها ممكن مستقبلا افكر اشتري زيها
    يعطيك العافيه عالبوست المتألق كالعاده ❤️

    ردحذف
  25. مرررره جميله ماشاء الله تفتتح النفس حوستها ,, احب فيك انك ماتبخلين ابد بشي عسى الله يسعدك ويرزقك

    ردحذف
  26. كالعادة بوست جميل من صاحبته الأجمل 💐

    ردحذف
  27. انا جربتها وعجبتني مره لانها تحمي المكياج من الغبره بالذات اللي زيي مايستخدمو المكياج الا من فتره لفتره وريحتني مرره من ناحيه تنظيف المكياج

    ردحذف
  28. حلوة. تحمي المكياج من الغبار. وكمان عجبتني انها تتحرك. في بالي فكرة اني اعمل كورنر صالىني الخاص فيا من ميك اب واجهزة شعر لاني اكره اروح الصوالين الا اذا اضطريت.

    بس فكرة تعليق الاكياس ما حبيتها. احسها عفش.

    لكن عجبتني عمىما ان شاء الله ربي يقدرني اشتري زيها. واعمل كرورني الخاص ؛:)). شكرا جزيل.

    ردحذف
  29. التاجرات في الانستا هاليومين طالعين فيها بس مو عارفة اذا الكواليتي كويسة او لا لكن حبيت عندهم اللون الفوشي جمييييلة ♥♥

    ردحذف
  30. اختي ياليت تخبريني كم حجم الشنطة، ١٨ ك.ج ؟

    ردحذف
  31. اللمبات لو خربت من فين تشتريها ؟

    ردحذف

التعليقات الجميله ♥♥

Blogging tips