الخميس، يناير 08، 2015

مشترياتي من موقع امازون وانطباعي عنه | Amazon haul


السلام عليكم وَ رحمه الله وَ بركاته
صارلي فتره ادمنت الشراء من النت وخاصه اخر شهرين كان فوق الحد صراحه ههههه بس خلاص بعقل السنه الجديده ان شاء الله :$ قررت كل فتره اوريكم مشترياتي من كذا موقع وانطباعي عن الموقع نفسه ، ماراح اتكلم عن طريقه الطلب اون لاين لان قوقل مكفي وموفي ، بليييز بليييز اخذو طله ع قوقل واقرو كثيييير الطريقه سهله اهم شي تكون لغتك الانقلش شووي حليوه عشان تقدرين تختارين صح اما الباقي مره سهل!




بوست اليوم عن طلبيتي من موقع امازون ، موقع امازون من اشهر المواقع اون لاين ، الحلو فيها كأنه مول كبييير فيه متاجر من كل مكان ، فيه الصاحي والمجنون ع قولتهم ههههه ، اي شي ممكن يخطر ع بالك بتحصلينه عندهم حتى الاكل!! ممكن المنتج الواحد ينباع عند كذا تاجر وممكن المنتج مقلد مو دايما مضمون فالافضل تقرين انطباعات الناس على التاجر وتقييمهم له ، بالنسبه لي ماحب اطلب منهم صراحه!! بس زوجي كان بيطلب فقلت دام بنشحن مره وحده بطلب الي ناقصني ، بس بالنسبه لي الافضل اطلب من مواقع غير لان مثل ماقلت ماحب امازون مره!


LORAC PRO Palette


اول شي طلبته باليت لوراك برو باليت ، كانت ببالي من زمان لان الالوان مطفيه ، طفشت من الالوان الميتاليك والشيمر صراحه ، بس لان شريت نيكد بيسك الي كله الوان مات وكان جدددا خادمني كحجم والوان بس ضاع للاسف "مادري ليش كل شي احبه يضيع :| " فقررت اخذ هالباليت لان المدح عليه قوي ، عباره عن ٨ الوان مطفيه و٨ الوان فيها شيمر ، حجمه حلو وضعييف ، ومعاه برايمر للشدو ، صوره من النت للالوان :


الرابط بالامازون :
هنا وسعره ١٧٥ ريال

FarmHouse Fresh Pajama Paste



ماسك للوجه من فارم هاوس ، هالشركه امريكيه منتجاتها تميل للطبيعيه بس مو تماما اهم شي مافيها سولفات ولا باربان ، اخترت هالماسك مو بس لان اسمه جميل ههههه بس حسيت انسب شي لي حاليا ، اسمه بيجاما بيست وهو عباره عن زبادي وعسل وشوفان واشياء ثانيه بعد ، صراحه انا ماحب اسوي ماسكات طبيعيه مع انها متوفره دايما بس اتكيسل فصرت ادور بدائل قريبه للطبيعي واهم شي متوفره متى مابغيت حطيت ع طول بدون خلط وغيره! هالمنتج تقييمه عالي باغلب المواقع ، بس بجرب منهم هالشي لو جد نفعني برجع اطلب اكثر منهم!

الماسك ينظف المسام ويضيقها ، يرطب البشره ويخفف الاحمرار يعني ببساطه كل الي احتاجه!
الرابط بالامازون :
هنا وسعره ٧٥ ريال -مسوين تخفيض حاليا-

Natural Republic Aloe Vera Gel



جل الصبار! ومادراك ماجل الصبار! كنت ابي شي لشعري واذكر دايما لما اروح الصالون اكثر ترتيمنت اطلبه لشعري الصبار ، فكرت اجيب شي طبيعي بس دايما الجاهز بديل افضل! هذا مو صبار طبيعي ١٠٠٪ بس اقرب شي للطبيعي لقيته من خلال بحثي ، مادري شلون بيتفاعل شعري معاه للان بس لازم اعطيه فتره كافيه من التجربه اولا بعدين احكم ، بس بشكل عام الصبار فوائده كثيييره وبالغالب على البشره وتخفيف الاحمرار والحكه وغيره ، مذكور انه افضل الجل مبيعا حول العالم وهو منتج كوري بس الاراء حوله متضاربه صراحه ، اذا احد جرب هالمنتج يسعدني لو شاركتوني برايكم ..

الرابط بالامازون :
هنا وسعره ٤٥ ريال

Aztec Secret Indian Healing Clay



اكثر شي متحمسه له من كثر ماشفته عند الاجانب والبلوقز ههههه ، طين معالج هندي و اكثر منتج عليه تقييم بالامازون وكثاار حبوه ، هو طين تخلطينه مع الماي او الخل ويصير ماسك سائل يميل للزوجه ، استخداماته كثيييره بس هدفي الاولي للوجه ، ماودي اتكلم عنه اكثر بس وعد اول شي بسوي عنه ريفيو هذا لما اجربه بشكل كاافي!

الرابط بالامازون :
هنا وسعره ٤١ ريال

Maybelline Instant Age Rewind Eraser Concealer



اخر شي الكونسيلر ، ترا ابدا مو من عوايدي اخلص شي من الميك اب!! بس هذا غيرررررر مره مره احبه مايخطط ولايسيح ولا يكتل ويغطي الهالات بنسبه حلوه ، اذا رجعت اخذت شي معناته ١٠ من ١٠ بالنسبه لي ، لان احب اغير واحب اجرب جديد بس هالكونسيلر صديقي الصدوق مقدر استغنى عنه! درجتي فيه ميديوم ودرجاته كثيييييره انصحكم تشوفون سواتش له وعلى وجه ناس كثيير قبل لاتطلبون لان اللون يختلف من شخص للثاني ، ماركه ميبيلين موجوده عندنا بس هالمنتج بالذات ماقد شفته الا عند تاجرات!

الرابط بالامازون:
هنا وسعره ٢٦ ريال

نجي للخلاصه :
مثل ماقلت المميز بالموقع انه جامع اشياء كثييييرررره ، تقدرين تشترين من امازون نفسه ومن تجار موثوقين متعاملين مع امازون بس الي يختلف اسعار الشحن وممكن الشحنه تجي متأخر ، مثل ماقلت في تجار غير موثوقين وهم تجار صغار يبيعون بامازون مستقلين ، لازم لازم تشوفين التقييم من الي اشترو منه وعدد النجوم ، بالنسبه لي اذا حابين تشترون افضل شي الاجهزه لان اسعارها فررررق عن الي عندنا اما غيره في بدائل اضمن لان ممكن تنغشون بالتاجر وممكن الي يجيك مو مثل الصوره مع ان ماقد صارت لي بس نفسيا مارتاح الا اذا وصل طلبي ، يمكن غيري يحب هالموقع بس عن نفسي اذا مضطره اشتري منه ، بالنسبه للشحن شحنت لصندوقي الامريكي لان كنت طالبه من كذا موقع فبجمع الشحنات ، وقتها شحنت مجاني لان استخدمت كوبون ووصل بسرعه الحمدالله بس اذكر قبل لما طلبت وصلت طلبيتي مجزأه!! يعني مره المرطب بروح ومره مكياج بروح بس هالمره مع بعض وصلو! مادري لو شحنتيهم دايركت بتواجهكم نفس المشكله ؟ انا ماقد جربت اشحن دايركت للسعوديه صراحه ، وصح في بعض التجار مايشحنون برا امريكا فلازم تتآكدين قبل الطلب اول ، نسيت اذكر لو بتشترون اجهزه تآكدو انها تمشي مع الكهربا الي عندك ، وامازون فيه امريكي وبريطاني وصيني فالاضمن بالنسبه لي الامريكي.

ان شاء الله البوست يكون مفيد واي استفسار اكتبوه بالكومنت عشان ارد عليه والكل يستفيد.

هناك 24 تعليقًا :

  1. جمييل البوست ولاحظت فعلا اختلاف التجّار ملحوظ ، والاضمن الأجهزة الكهربائية بس ماعرفت أجهزة الشعر شلون افرق اذا اصلية ومضمونة او لا .
    الكونسيلر جربت مرا بس حسيته فاتح رمادي مو فاتح بدرجات يعني مع العلم انه ماعندي هالات ومن وقتها احاول اقنع نفسي اعطيه فرصة بس للحين ماعزّمت هههههه
    جل الصبار جربته كترطيب لليد صراحة حسيته كأنه مويا ماعرف المشكلة فيني ولا فيه نفسه أما للشعر ماجربته ، تتهنين حبيبتي باللي شريتيه وعقبال أخذ الطين الهندي أنا بعد ❤️

    ردحذف
  2. قورجس يا محطة الهامي انتي مررره احب اقرا مدونتك يعجبني فيك انك انتي
    صحيح ماقد شفتك بس اسلوبك مو متكرر يعني مو زي الاسلوب الاصلي
    بس ترا منجد احب تدويناتك على الفكرة المدونة الوحيدة اللي اتابعها لاني ما
    احب اقرا عن الميك اب والخرابيط احب فيديو بس انتي اسلوبك يجذب
    احب غيمة 9 ركزي عليها الله يوفقك في مسيرة حياتك

    ردحذف
  3. قورجس بليز تكلمي عن طلبيتك لشنطة d&g ودي اطلب وخايفه

    ردحذف
  4. شيوم ابي اطلب كلاروسينك من امازون كيف اعرف اصليه او لا والمكياج زي ايلف مره رخيصه كيف تجار يعني معقوله تجار ماياخذون زياده لسعر ولا شلون

    ردحذف
    الردود
    1. اقري الريفيوز ع المنتج بيكتبون الناس لو هو اصلي او تقليد وكيذا .

      حذف
  5. عرفت انه امازون والله من جل الصبار وماسك فارم هاوس
    امازون || أعتبره صديقي الصدوق
    أفضل المواقع على الاطلاق بالنسبة لي ..
    مستغربه ليش تكرهينه - أحس هو بداية اي تجربه لتسوّق إلكتروني :)
    لسهولته
    تجربتي مع الأمريكي والبريطاني فقط !
    طبعًا أنا برايم ، بسبب مشترياتي الكثيرة منه + أشتريت منه أشياء كبيرة
    بس كل مشترياتي تكون من امازون نفسه / أو التجّار الي تكون بضاعتهم موجودة في مخازن امازون نفسها
    عمري ماتعاملت مع تجارهم بنوب بنوب ><"
    مرة جيت بشتري كفر جوال هي المرة الوحيدة وسمّيت وتوكلت ، انرفضت
    طلع التاجر ما يقبل البطاقة السعودية
    استانست وقلت خيرة D:
    ليش أحب أمازون ، كل شي بمكان واحد + ماياخذ ضريبة + لأني برايم شحن بيومين مجاني + غالبًا أرخص من باقي المواقع
    طبعًا لا أحد يجي يقول تقليد ××
    أنآ قلت فوق مااشتري من التجار وتعاملي فقط مع بضايع اماازون !
    وبس - أحبك ❤️

    ردحذف
    الردود
    1. كيف أعرف انه من مخازن أمازون؟
      ما عمري طلبت من الأمازون وعندي نفس نظرة شيوم له بس ابغى اكسر الحاجز

      حذف
  6. ماشاءالله جممميل تتهني باغراضك ياعسل ..
    انا ولاول مره جربت اطلب اون لاين من امازون
    وطلبت وسادة الحمل الطويله وكان سعرها ٢٠٠ وشي
    وكلفني الشحن٧٠٠😳 مره كثير اعتبره
    مادري هل هذا طبيعي ولا انا يمكن غلطانه بشي
    واخذ وقت حول اسبوعين ورحت استلمتها من فيديكس
    وبصراحه ماتستاهل ٩٠٠ ريال على مخده
    مش مريحه .. اول النوم تكون اوكي وبعدين تحسين انها تضايقك ومتينه ف اشوتها بعيد بالنهايه 😂

    ردحذف
  7. حلوووو شيووم تتهني

    ردحذف
  8. المااسك صدقيني راح يعجبك جممميل و خصوصا الشوكلاته منه 😢❤️ ، بسألك كيف اعرف تقييم التجار من وين 😶.. ابي اطلب و متخوفه مرا 😭💔

    ردحذف
  9. ربي يسعدك ، من جد من اكتر الناس الي احب اقرا كل مواضيعهم ..
    استمري <3

    ردحذف
  10. مشكوره مدونتك جميله جدا
    اذا اشتريت من امازون اي شي مثلا مكياج و مكتوب
    By Nars
    او مثلا
    By Sigma
    هل ممكن تكون الفرش مقلده؟ او المكياج ماهو اصلي ؟؟
    اتمنى تردي عشان اتطمن :"(

    ردحذف
  11. بنات للي مايعرف يطلب ويبي يطلب فيه تجار بالاقلاع يطلبون لك وبمبالغ جدااا رمزيه منهم اعتقد شخص اسمه سكر ينبعاوي دلتني عليه وحده من البلوقرز اعتقد اسمها سعوديه كانت تشتري منه زبدة شيا
    بس حبيت افيدكم

    ردحذف
  12. شيومو تكلمي عن جهاز الليزر من مليسة اقصد طريقة الطلب من موقهم وايش يجي بالبوكس تبعه واكون شاكرة لك

    ردحذف
  13. السلام عليكم اختي ابي اسألك هل فارم هاوس يبع منتجات كوريه لانه شفته معروضه بقائمه مشتريات ممكن تفيدني بنقطه او نتواصل مع بعض على اميل وشكرا

    ردحذف
  14. مرحبا اختي ماردتي علي سؤالي

    ردحذف
  15. شكلي الوحيدة اللي للان ماقد طلبت من امازون ههههههههه
    بس من اول عندي فضول اشوف فرق السعر اللي الكل يتكلم عنو بس للان ما شفتو
    راح اطل عليه ان شاء الله

    ردحذف
  16. ثنكيو على التدوينة الحلوة ياحلوة :)

    ردحذف
  17. طيب اي موقع تنصحين فيه للشراء؟ويكون موثوق؟لأني لسة جديدة بالشراء من النت

    ردحذف
  18. للي حابة تطلب من امازون او غيرة من المواقع
    انا اطلب لك بعمولة رمزية ٢٠ ريال
    حسابي في الانستقرام shop_with_ja

    ردحذف
  19. لو سمحتوا كيف اشحن طلبيتي للامارات مجاناً او بسعر رخيص؟ ؟

    ردحذف
  20. لو سمحتوا كيف اشحن طلبيتي للامارات مجاناً او بسعر رخيص؟ ؟

    ردحذف
  21. السلام عليكم، لو سمحتوا انا ابى اشحن للامارات كيف اشحن اغراضي مجاناً او بسعر معقول؟ ؟

    ردحذف

التعليقات الجميله ♥♥

Blogging tips