الأربعاء، أبريل 29، 2015

لون الشدو مو واضح او ثابت ؟ ٧ طرق لتوضيح اللون وثباته باستخدام باليت نيكد ..


السلام عليكم وَ رحمه الله وبركاته ♥ ..
بوست اليوم لمشكله اعتقد الكثير يعاني منها بس مو عارف السبب او يتوقع بسبب سوء جوده الشدو
كثير منا يشوف الوان شدو جدا روعه بس اذا حطينا اللون ع العين يصير بااهت او مايبان او مايثبت ويتطاير
انا كثير لما اشوف دروس ع اليوتيوب يستخدمون نفس الوان الشدو الي عندي بس لما اطبق يطلع اللون غير تمااماا واصيب باحباط مع اني استخدم نفس الادوات والالوان بالضبط!
                                                         
هذا كان زمان وبعدين بديت ادور حلول للمشكله وصرت اعرف شنو استخدم بالضبط ومشت الامور ..
ليش اللون مايطلع واضح معاي ؟

١. جوده اللون مو قويه حتى لو كان ماركه عالميه.

٢. اللون مو مخصص لبشرتك ودرجتها (مرات نشوف الشدو تستخدمه وحده اجنبيه ولما نجربه يطلع علينا باهت ، لان الاجنبيه البيضاء او الشقرا لما تحط لون اسود مثلا يبان عليها قوي لانها بالاساس بشرتها فاتحه جدا ، بس لو جينا للسمرا وحطت نفس اللون يطلع لونه باهت ، فدايما قارنو الالوان ببشرات قريبه من لونكم عشان يكون لون واقعي اكثر)

3. لون العين او تجويف العين - اقصد الجفن- مو موحد ممكن يكون كلف او لون فاتح جدا يعني مو لون واحد.

4. ماتستخدمين الفرشاه الصح ، بعض الفرش ماتشيل اللون بشكل مناسب او جودتها مو مناسبه.

5. طريقه وضح الشدو ، لما تحطين الشدو كلون واحد ع الجفن حطيه بطريقه الطبطبه لان المسح مايفيد ولايوزع اللون او يوضحه اما الدمج هذا شي ثاني.

6. فرشاه الشدو مو نظيفه ، يعني الفرشاه فيها الوان كثييييره ومستخدمه من فتره طويله ولاغسلتيها ، هنا احلمي يطلع لون صح او نظيف! لازم تغسلين الفرشاه من فتره للثانيه اذا يوميا تستخدمينها ، وخاصه لما تستخدمين لون قوي مثلا كحلي وبعدين تستخدمين بني بدون ماتنظفينها ماراح ينفع وتحوس الدنيا ، ممكن تستخدمين غسول فرش مؤقت اذا بتستخدمين نفس الفرشاه بنفس الوقت ، عندك خيارات مثل ماك او سيفورا او انقلوت او كولور سويتش.

٧. الجفن دهني او يمتص اللون بسرعه يعني بعدها بساعتين تلقين اللون طاير

8. الاضاءه ، معروف الالوان بالاضاءه الصفرا تختلف عن البيضا ، بالبيضا تكون فاتحه وقويه واي غلطه بالميك اب توضحها عشان كذا بالمناسبات نثقل ونهتم بالميك اب اكثر لان يبان بعكس الاضاءه الصفرا تبهت اللون ومرات تحليه ههههههه.

9، بعض الصور بالنت مو واقعيه لان يستخدمون اما فلاش او فوتوشوب فلاتعتمدون عليها.

تقريبا هذا الي ببالي والي اشوفه منطقي بالنسبه لي من خلال تجربتي ، اذا عندكم اي اضافه او تجربه ضيفوها بالكومنتات عشان الكل يستفيد.

،


طيب انا جربت كثيير حلول واغلبها صراحه ضبطت معاي بس بالاول والاخير يرجع لتفضيلك الشخصي
يعني جربو كذا طريقه وشوفو الي يضبط معاكم ..

اغلب الطرق تبدا بوضع بيس او قاعده للون بس بطرق مختلفه 
استخدمت لون من باليت نيكد اسمه كريب وهو اسود رمادي لان الاغلب عندهم هالباليت والبعض يشتكي منه وان الوانه مو واضحه ..


لون الشدو بدون اي اضافه ، حطيت كذا طبقه وبالغصب بان اللون :\
( ملاحظه: حاولت اوضح اللون قد ماقدر بس الكام ماتاخذ اللون الحقيقي اما بالصوره هذي او الباقي بس بالواقع هي اغمق واوضح)


،

شلون نوضح اللون ونبرزه ؟

١. توحيد لون الجفن باستخدام الفاونديشن او الكونسيلر.
عن نفسي ماحب هالطريقه مع انها فعاله بس لان جفني من النوع الي مايثبت عليه الشدو فبعد فتره بتلقون الخط البايخ بنص العين ، بس ممكن تضبط مع البعض ومن مميزاتها ماتحتاجين ادوات اضافيه.

٢. توحيد لون الجفن باستخدام شدو فاتح
هذي الطريقه احبها للمناسبات لان تفتح اللون وتبرزه ، استخدم لون فاتح قريب من لون بشرتي يكون مطفي واوزعه ع الجفن كللله قبل مابدا باللون الاساسي ، اكثر لون استخدمه هو انومنس من باليت اربن ديكاي.


اللون قبل وبعد الشدو الفاتح :


- ملاحظه اللون ع العين اوضح من اليد بكثير.

٣. استخدام لون كريمي كقاعده.
اللون الكريمي اما يكون نفس لون الشدو او لون فاتح يعتمد ع الي تحبين ، في الوان كثيره بماك نوع اسمه بينت بوت جودتها رائعه او استخدمي اي لون كريمي عندك ، انا استخدمت لون بيرل من ماك


اللون قبل وبعد اللون الكريمي :



ملاحظه : لون بيرل استخدمه اكثر مع الالوان الفاتحه من نفس فئه لون الشدو الكريمي بس حتى مع الغامقه غير لونها للون حلو : )

٤. استخدام قلم كحل كريمي.
حتى اقلام الكحل الكريميه بعضها تنحط ع الجفن مثل اكحال اربن ديكاي كاساس للشدو بس وزعوها بسرعه قبل ماتنشف ، تعمدت اصور لكم هاي براو من بينفت عشان احط الوان متقاربه للطرق وتشوفون الفرق بنفسكم 


اللون قبل وبعد اللون الكريمي :


شفتو اللون شلون وضح ؟ تغيير شوي بس احسن من قبل.

5. استخدام فكس بلس.
اي بخاخ للوجه اما فكس بلس او اي نوع ثاني ومرات بعض البنات يستخدمون قطرات العيون او محلول العدسات ع الفرشاه قبل استخدام اللون ، عن نفسي اذا الشدو غالي ماغامر بالطرق الثانيه واكتفي بفكس بلس لان اذا نشف الشدو بالعلبه مايخرب ، اما محلول العدسات اذا وصل لعلبه الشدو ممكن يخربه فانتبهو ، وفي بعض الشدوهات تنفع باستخدام الماي او تكون جافه فاسئلو عن هالنوع بعد


تبخين الفرشه بخه وحده من الفكس بلس ع الفرشه مو الباليت انتبهو! وبعدين استخدمي الشدو ع طول 

اللون قبل وبعد الفكس بلس :


شفتو اللون شلون وضح! مره مره تنفع هالطريقه اذا عندك شدو فيه لمعه حيل تبان مع الفكس بلس 

٦. قطره ادرولاين من انقلوت
القطره نسيت اصورها ، فكرتها تختلف عن الفكس بلس شوي ، توضح اللون بشكل خيالي واذا الشدو باودر تقدرين تخلينه سائل واذا عندك كحل او شدو جل ناشف يخليه سائل بعد ، انا كنت احبه لان يخلي اللون ثابت جدا جداا وخاصه لو بستخدم باودر ع حواجبي جدا يخليه واضح ، بس انتبهو تحطون القطره ع الشدو حطوه ع سطح املس واخذو نقطططه منه بالفرشاه ، استخدمو هالطريقه بالمناسبات فقط لان ازاله اللون تتعب شوي



صوره من النت توضح قوه اللون باستخدام شدو نيكد



7. برايمر للشدو
هذي اسهل واشهر طريقه لتوضيح الشدو وتثبيته ، عن نفسي اكثر شي استخدمه يوميا بس للمناسبات ازيد طريقه من الطرق الي ذكرتها عشان اوضح اللون قد ماقدر ومايضيع بالتصوير والاضاءات ، يعني احط برايمر وفوقه شدو كريمي او استخدم فكس بلس وغيره ، حاليا استخدم ستاي دونت ستراي من بينفت وجددا حابته ، اذا تبون بوست عن البرايمرات لان جربت كثير قولولي 


اللون قبل وبعد البرايمر :


ان شاء الله يكون البوست مفيد وقد ماقدرت وضحت طرق كثيره عشان الاغلب مايضطر يشتري منتجات جديده ويكتفي بالي عنده ، اذا جربتي شي ومانفعك جربي الي بعده الا مافي طريقه تضبط معاك ان شاء الله ..

اشوفكم ببوستات جديده 


هناك 28 تعليقًا :

  1. ماشاء الله كفيتي ووفيتي مشكووووره

    ردحذف
  2. حبيييت البوست مرررة وصدق مشكلة مع بعض الشادوهات، الله يسعد قلبك يارب ويجزاك كل خير

    ردحذف
  3. يعطيج العافيه حبيبتي، اول مره اسمع عن منتج انقلوت، مشكوره ع المعلومات 💞

    ردحذف
  4. اليوم بس كنت أحط مكياج ولاحظت هالشيء وامي سألتني عنه، بالوقت المناسب جاوبتيني أنتِ 🙊❤️❤️
    مره شكراً ويعطيك ألف عافية، حيل أستفدت 💕

    ردحذف
  5. حبيت البوست واستفدت مع اني مو من اللي يحبون يحطون شادو بس ممكن مستقبلا:p شكرًا نحبك شيوم.💗

    ردحذف
  6. واااو واااو حدي استانست على الطرق متنوعة وسهلة وحييييل فرق اللون من ناحية الوضوح .. هالمشكلة ازلية عندي لان جفني يدهن عجبتني كذا طريقة منها الشدو الكريمي والفكس بلاس او اي بخاخ وجه .. يسلمووو ما قصرتي فديتج 😘😘😘💋💗

    ردحذف
  7. حببت حبيييييت
    بجد أفدتيني ٠٠ أنا استخدم طريقه الشدو الكريمي احيانا حتى بس أوحد لون جفني لو الطلعة بسيطه
    شكراً قورجس

    ردحذف
  8. يعطيك العافيه ي جميلة

    ردحذف
  9. بوست جمييييييل ومفيد يعطيك العافيه حبيبتي
    وياليت تتكلمي عن البرايمرات 💜

    ردحذف
  10. جميل البوست حلو انك حطيتي اكثر من حل ❤️ يعطيك العافيه شيوم

    ردحذف
  11. يعطيك العافيه
    ي حبي لك كل يوم لازم اشوف المدونه نزلتي حاجه اولا حتا لو ماقراه بس لام اشوف
    وفي السناب لمن تتكلمي ماودي تسكتي مرهه احب طريقة كلامك

    ردحذف
  12. يعطيك العافيه انا كنت استخدم لون افتح او كونسيلر والحين عطيتينا عدة حلول وخلت الشدو أوضح مرا شكرا.

    ردحذف
  13. جميل جداً هالبوست ❤️❤️

    ردحذف
  14. جدا مفيد ماقصرتي ♥♥♥
    وايوه نبغى بوست عن البرايمرز :$

    ردحذف
  15. جداً جميل البوست انا ما احب الشدوهات الغامقه احب الطبعيه الفاتحه بس اتعب وانا احطها لانو صعب تبان بس بعد المعلومات الجميله حقتك ماعندي اي معانات شكراً

    ردحذف
  16. اي والله انا والشادو حالتنا حاله 😩 يعطيك العافيه ونبي بوست البرايمرز 👌🏼👌🏼

    ردحذف
  17. يعطيكِ العافية أفكار جميلة و رائعة ان شاء الله بجربها

    ردحذف
  18. السلام عليكم ’ السواعد عوره يا قلبي :*

    ردحذف
  19. بوست رااااائع جدا وجميل والكل يحتاجه
    وشرحك رائع ومميز ودقيق وبنفس الوقت سهل جدا
    الله يسعدك ويكتب أجرك

    ردحذف
  20. أزال المؤلف هذا التعليق.

    ردحذف
  21. أزال المؤلف هذا التعليق.

    ردحذف
  22. مفيد جداً ويبرد الحرة على الباليت ههههههه
    يعطيك العافيه شيوم ❤️

    ردحذف
  23. واووووو مررررااا مفيييد وفي وقته شكككككككككررررااا❤️❤️❤️❤️

    ردحذف
  24. بوست جداا جميييل ومفيد 🌷

    ردحذف
  25. يعطيك العافية عالبوست مررا استفدت منه. وعرفت انه احيانا بشرة العين حتى البرايمر ما يزبط الشدو مررا

    ياليت تكتبي لنا بوست عن البرايمرز وعن كمان انواع بشرات العين وكيف نعتني بها.

    يعطيك العافية()

    ردحذف
  26. كلهم يستخدمون برايمر للعيون قبل الشادو عشان يظهر واضح اقصد عاليوتيوب عجبني مستحضر انقلوت ما كنت استخدمته قبل كده ححاول. اجربه
    يعطيكي العافية.
    و يشرفني متابعتك لمدونتي الجديدة 😉 :
    Meeramakeup.wordpress.com

    ردحذف
  27. ما شاء الله... الله يعطيكي العافية. شرحك وافي وبسيط ويعجبني أسلوبك، ومررررررررررررررره شكرا لأنه فعلا أعاني من دي المشكلة وخصوصاً إنه عيوني مبطنة وجفوني دهنية. بس يا ريت لو تضيفي معلومة إيش الأنواع إللي تنفع للجفون الدهنية وإيش إللي ينفع للجفون الجافة. وتسلم يدك

    ردحذف
  28. اكثر نتيجة حبيتها اللي بالفكس بلس مره طلع اللون واضح وحلو للمناسبات, والبرايمر حقت بنفت وضح اللون بس بطريقة ناعمة تنفع بشكل يومي
    يعطيكِ العافية شيوم ♥♥

    ردحذف

التعليقات الجميله ♥♥

Blogging tips