الخميس، مارس 26، 2015

تجربتي بالطلب من موقع فرانك وانطباعي عن مقشر فرانك الخرافي! ♥


السلام عليكم وَ رحمه الله وَ بركاته ،
بوست اليوم عن منتج اشتهر بالفتره الاخيره ، اذكر اول مره شفته قبل سنه ونص عند بلوقر استراليه وحمستني عليه مره
بس وقتها كنت حامل وقلت بس اولد بطلبه ونسيته هههه!

بس مع انتشار المنتج وكثرت المدح عليه قررت اجربه واكتب رايي بالضضبببط
في نقطه محيرتني ، كثير منتجات الناس تتكلم عنها انها غيرت بشرتها او شعرها ويقدسونه

انا ماذكر في منتج جد جد غيرلي بشرتي او شعري بشكل خيالي!
ممكن روتين معين بس منتج واحد مقدر اعيش من دونه مستحيل!

فلا تنتظرون مني اي تقديس لاي منتج كان الا اذا فعلا حسيت بفرق معاه وماقدر اتخيل حياتي من دونه 


،

شنو هو مقشر فرانك؟

منتج فرانك هو سكرب او مقشر مصنوع باستراليا من منتجات طبيعيه واهمها القهوه ، عندهم ٤ انواع من المقشرات
وجديدهم مرطب جسم.

شنو وظيفه المقشر للجسم ؟
المقشر يشيل الجلد الميت ويخفف من الستريش مارك والسليوليت والاكزيما والصدفيه وحب الشباب والعلامات بالجسم.

شلون استخدم المقشر ؟
بللي الجسم بالماي ، اخذي كميه بسيطه من المقشر لان كافي ، طبطبي ع جسمك بالمقشر لتوزيعه لسبب واحد اكتشفته ان اذا مسحتي المنتج ع جسمك كميه كبيره بتطيح وماتستفيدين منها بس اذا اخذتي شي بسيط ووزعتي بالطبطبه ع كامل الجسم وبعدين وزعتي الباقي بالمسح ماراح تفقدين كميه كبيره "يارب فهمتو علي :$"

بعد التوزيع قشري جسمك بحركه دائريه من تحت لفوق وركزي ع الاماكن الي فيها مشاكل ، استخدمي اليد لان المقشر شوي خشن فلاتستخدممين ليفه وخلي المساج بيد خفيفه لاتخلون الجلد يصير احمر مو زين لان بعدين بيسمر ،،

بعد ماتخلصون خلو المنتج عليكم من دون غسل لمده 5 ل 10 دقايق وبعدين غسلوه ، اذا بشرتكم دهنيه استخدمو غسول للجسم اخر شي وبس.

كم مره استخدم المنتج ؟
ذاكرين انه يستخدم مرتين الى ٤ مرات بالاسبوع.


تجربتي مع فرانك سكرب :
بالبدايه استخدمت السكرب الي فيه زيت جوز الهند وكنت شايله الكيس اصوره لكم بس قررت الخادمه تحذفه من نفسها :|
المهم ، استمريت عليه قريب الشهرين يومين الى ٣ ايام بالاسبوع ، النتايج الي شفتها نعووووومممه من اول مره ، انا بشرتي الحمدالله ناعمه لان اهتم فيها بس مع السكرب حسيت بالنعومه الزايده من اول مره ، فالي اهتمامها قليل ببشرتها اكييد بتشوف نتايج احسن ، اول مره استخدمته قلت واو بدون مبالغه شفتو الشعور الي تحسونه بعد الحمام مغربي نفسه بالضبط ، بالنسبه للنتايج غير النعومه انا اخر ساقي في علامه جرح من الشرابات الشفافه الي تلبس مع الشوزات عرفتوها ؟ كانت ضيقه وسببت لي جرح برجلي فكانت عيني على الجرح كلل مره اجرب السكرب بشوف لو في تغيير ، صراحه في تفتيح بسيييط يمكن مايبان مره بس انا حسيت فيه ، مانطر نتائج خياليه من اييي منتج واكيد النتيجه من شخص لشخص تختلف بس عن نفسي ماحسيت الا باحساس النعومه والنظافه وتفتيح بسيط بالجرح ، بالنسبه للستريش مارك ، انا عندي من ايام الولاده ببطني والحين شبه اختفت ماقول اذا من المقشر نفسه لان اصلا ناسيه في ستريش مارك بس اذكر كنت مداومه على زبده بالمرز من زماان واكيد لها دور مع المقشر ! 

المنتج بشكل عام ماحس الي ممكن يغير حياتك الا اذا كان في روتين كامل متكامل معاه كل شي يساعد فلاتعتمدون ع شي واحد بسس ، بالنسبه لي هالمقشر من احسن المنتجات الي جربتهم ، وجددا احبه بس مابيكم تحطون امال كبيره عليه ، انا بداوم عليه طبعا واذا استجد شي اكيد بقولكم عنه واكيد برجع اشتريه لان حابته جدا ومتآمله نتايج افضل مع الاستمرار ان شاءالله 

سلبيات المنتج :
من سلبياته ان لازم تنتظرين بالشور ٥ او ١٠ دقايق لحتى ينشف السكرب ، يعني مو عملي الي تبي تحطه وتطلع بسرعه مع انهم ذاكرين انو عادي تسوين سكرب وتغسلين بس لافضل النتائج انطريه ينشف ، وشي ثاني المنتج يووسسسخ الحمااامم بششكل فحطو ببالكم هالنقطه عند الاستخدام يعني يطيح منك بكل مكان ، الي خلصته ريحته جوز هند وكانت لذذذيذذذه حبيتها اما الي استخدمه بالصوره الي فوق الي هو الاورجينال الاصلي فمعاه ريحه برتقال حامضه مااحبييتهاااا وانطر بسسرعه ينشف عشان اغسله ، تطلبينه اون لاين يعني مو متوفر عندنا الا اذا تاجرات جايبينه.

ايجابياته :
النعومه الي بتحسين فيها من اول مره والتفتيح مع المداااوومممه اكيد وكل جسم له استجابه غير اكيد ، سعره حلو تقريبا 56 ريال الى 67 ريال يعتمد على النوع ، ممكن تحتفظون بالمنتج بكيسه الي جاي فيه لان فيه من فوق تسكيره بس عن نفسي افضل افرغه بوعاء له غطا عملي اكثر يصير.


تجربتي بالطلب من الموقع :

هذا موقعهم الامريكي http://us.frankbody.com
طلبت منه 3 انواع الاوريجنال والكيكاو وجوز الهند وشحنت مجاني لصندوقي الامريكي وماخذ يومين او 3 ووصل بس لو شحنتو دولي ممكن ياخذ 10 الى 21 يوم!! فالافضل تشحنون للصندوق الامريكي لو عندكم ، تجربتي كانت حلوه معاهم بس الموقع غبي! ماحصلت مكان ادخل فيه على حسابي القديم صارلي ساعه ادور ولا قدرت اتوقع كل مره بطلب لازم اعبي معلوماتي من جديد!


ممكن تصنعين سكرب مشابهه له من البيت اذا حابه مو لازم تطلبينه ، عن نفسي ماجربت بس كثار جربو وحبو النتايج


اختاري الي حابته وحاولي تستوحين من المكونات وتسوين سكرب خاص فيك :)

وبس هذا بوست اليوم ، ياارررب يكون افادكم واذا لك تجربه اكيد اتشرف بكتابتك لها تحت بالكومنتات
اشوفكم ببوستات ثانيه 

هناك 62 تعليقًا :

  1. انا طلبته قبل شهر تقريبا واليوم وصلني طلبت الي على ككاو والاورجنال ان شاءالله نجرب.. بس ماجربتيه على الوجه؟ ����

    ردحذف
  2. التاجرات يبيعونه بفوق الميه !! شكرا لك يا عسل مرره افكر اجربه من زمان

    ردحذف
  3. التاجرات يبيعونه بفوق الميه !! شكرا ي عسل راح اجربه ان شاء الله 😘

    ردحذف
    الردود
    1. تزيد على سعره سعر الشحن و عمولتها ، انا طلبته وكلفني مع الشحن ٩٠ ريال ، واكيد بيحطو عموله فوق ٢٠ ريال

      حذف
    2. لو سمحتي من وين طلبتيه؟ ابي الحساب الله يسعدك💜💜

      حذف
    3. لو سمحتي أبي اعرف من وين طلبتيه؟ ابغى الحساب الله يسعدك..

      حذف
    4. انا اوفر سكراب فرانك مع مرطبه ب 170 ريال ومقشر فرانك وحده ب 100 ريال بحميع الانواع ماعدا جوز الهند 110

      حذف
    5. أزال المؤلف هذا التعليق.

      حذف
    6. عطيني حسابك حبيبتي ، انستقرام او اي شيء !

      حذف
    7. انا ابيعه هذا حسابي ihyundai@

      حذف
  4. شكرًا وحبيت فيكي انو ما تخلي املك بمنتج وبجربو وانشاءالله يعجبني ومتجر اميره يوفرو للبنات الي ما يعرفو يطلبو من المواقع ❤️❤️🌹

    ردحذف
  5. جميل جدا انا لي فتره استخدمه وحبيته ولااستغني عنه

    ردحذف
  6. يا سلاااام ��❤️
    جا بوقته ناويه عليه من اسبوعين مشكوره شيوم ❤️
    ان شاء الله راح اجربه ع السترتش مارك ذبحتني من بعد ولادتي ��

    ردحذف
  7. مقشر فرانك اشتهر كثير بالفترة الاخيرة و حلو انك طرحتيه ببوست منفصل و تكلمتي عنه بتفصيل 💜💜

    ردحذف
  8. انا لي شهر طايحه بمقشر القهوة التركية جد لاحظت تحسن فبشرتي اثار الحبوب بصدري خفت حيييل ورقبتي فتحت واكواعي بعد تحمست صراحة لمقشر فرانك 😍

    ردحذف
    الردود
    1. من فين جبتيه ولا كيف سوتيه

      حذف
    2. من فين جبتيه ولا كيف سوتيه

      حذف
  9. ع الجرح البوست ذا ههههههههه اول مره اعلق ع بوست وانتي اول بلوقر في الحياة الدنيا اعلقلها واناا اتابعك يمكن من سنه ونص اخخخخخخخخ ي عشقي لك ولبنتتك الطعمه ربي يحمها قبله بحجم السمااااااااء ي شيخه. «زينه»

    ردحذف
  10. ابغى اعرف كم استخدام له احسه مررره صغير و ينفع للوجه ؟؟؟وشكرا قورجس على كل حاقه قميييله ❤️❤️❤️

    ردحذف
  11. اليوم اتذكرت البوست وانا أنظف التسريحه وجا في بالي المقشر ورايك بنتايجو وحسيت نفس نتايج ملح الحليب اذا تعرفي استخدمتو فتره مدحو كتير بس وقفت استخدام من شهرين كان نتايجو ترطيب يخلي البشره ناعمه جداً ومع الاستخدام تفتيح بسيط كمان مدري اذا جربتي وعندك رأي تاني بنسبه ليا انا ما جربت مقشرت فرانك بس احس نفس النتائج وشكراً

    ردحذف
  12. جد تحمست اجرب المنتج ، دايم المقشرات تختلف من مقشر الى ثاني واذا كانت مع روتين معين تعطي نتائج اكثر 👌😍❤️

    ردحذف
  13. جمييييل البوست من اول ادور احد تكلم عنه ثقه

    يعافي قلبك شيوم و يحفظك و يحفظلك ديوم

    ردحذف
  14. شكرا لك علي الافاده ، ياليت لو تقدري تنزلي طريقة الطلب من الموقع وشكراا لك مره ثانيه

    ردحذف
  15. حبييت التدوينه ،، ان شاا الله باطلبو ❤️❤️

    ردحذف
  16. حبييييت البوست وانشالله لنا تجربه مع فرانك 👌❤️

    ردحذف
  17. شكرا على الموضوع فادني الصراحة خصوصا الكل هابين بسكراب الكوفي.. انا عن نفسي ماجربت سكرب فرانك، بس جربت سكرب كوفي انت تصنعينه اخذت الطريقة منBethanyMota y

    ردحذف
  18. ي جميله عادي استخدمه الوجه ولا هو بس للجسم روسيا افضل نوع لحبوب الشباب ردي علي ربي يسعدك

    ردحذف
  19. عندي مناسبه ب شوال وودي من الان استخدمه

    ردحذف
  20. كيف طريقة استخدامه للشعر؟!

    ردحذف
  21. مره شكرا على عرض تجربتك بس ما عرفت كيف اطلب من الموقع 😥

    ردحذف
  22. طلبته وماحبيته زي ماقلتي يوصخ الحمام وطريقة وضعه صعبة بس يشفع له السعر والكمية ونعومة الجسم وترطيبه

    ردحذف
  23. اذا بستخدم المقشر لمعالجة الحبوب واثارها اخذ اي نوع ؟ فيه انواع كثيره ومب عارفه :(

    ردحذف
  24. اذا بستخدم المقشر لمعالجة الحبوب واثارها اخذ اي نوع ؟ فيه انواع كثيره ومب عارفه :(

    ردحذف
  25. ايييه القمال ياقميله تسلمين على هالبوست اللزيز

    ردحذف
  26. يعطيك العافية ..
    اذا ممكن عندي استفسار ..
    انا بطلبه على بريدي الامريكي ..
    و بفرانك بس حاطين ادريس ١ .. ادريس ٢ اللي هو السعودي عشان لمى يوصل شوب اند شيب يعرفون انه تبعي مافيه ..
    كيف دخلتي بيانات العنوان ؟

    ردحذف
  27. السلام عليكم هل استطيع ان الغي الطلب من الموقع بعد الدفع واسترجاع المبلع

    ردحذف
  28. هذي اسعارها بدون الشحن مع الشحن يوصل سعر الوحد ل٨٠ 😅

    ردحذف
  29. انا استخدمت فرانك نفس كلامك ما يعطي غير نعومة واحس بنظافة بس احس من بعدها تطلعلي زي الشامات مدري هل هو من فرانك ولا غيره ، وكمان التاجرت يبيعوه بدبل سعره !

    ردحذف
  30. كيف تطلبونه او فيه احد يقدر يطلبه لي😭😭😭😭😭

    ردحذف
  31. كيف تطلبونه او فيه احد يقدر يطلبه لي😭😭😭😭😭

    ردحذف
  32. تحمست اشتريه واجربه .. والتاجرات ما يشترون المنتج بنفس هالقيمه ترى وراه سعر الوزن والجمارك يعني ما بيفرق عليك لو بتاخذينه الا ٢٠ سعر الانتظار الشهر

    ردحذف
  33. انا اخذته من تاجره سعر١٤٥غير سعر التوصيل
    واليوم اول يوم لي استخدام ورااح اقولكم وش يصير معي��انا جسمي الحمدلله مافيه حبوب وناعم بس لاني استخدم ادويه سببت لي خطوط حمراء

    ردحذف
  34. حبيت البوست وان شاء الهه اجربه

    ردحذف
  35. ممكن سؤال
    انتي كم طلبتي عبوة
    لاني ابا اطلب بس كثير قالوا انه اذا كان اقل من 5 عبوات يطول الطلب وهو ماوصل

    ردحذف
  36. بنت خالتي ادتني منو عينة عشان اجربو من كثر ما مدحتو ونسييييتو في الدرج
    ذكرتيني فيه بجربو هههههههه

    ردحذف
  37. اوفره في متجري..وقت الجمال
    ‏⁦‪instagram.com/center_sss/‬⁩

    ردحذف
  38. اوفره في متجري بعموله بسيطه @nevo__store

    ردحذف
  39. مسف اسوي صندوق امريكي وكذا 🌚✋🏻

    ردحذف
  40. كيف اسوي صندوق امريكي وكذا ✋🏻🌚

    ردحذف
  41. هاذا واحد عنده حساب في استقرام متوفر جميع انوع المقشرات وتجميل RAMZE_SADEQ

    ردحذف
  42. انا صدري مليان اثار حبوب كيف اشيله افيدوني وشكرا💓

    ردحذف
  43. متوفر لدينا حساب الانستقرام ffrank99

    ردحذف
  44. ابغى اعرف ينفع استخدمه وانا حامل .. اشتريته ومتردده في استخدامه

    ردحذف
  45. مررررا شكرا بس تخيلو شريته ب١٣٠ ليش التاجرات كذا يبالغون حسبي الله عليهم

    ردحذف
  46. انا جربته شيوم
    انا عندي صدفيه وكانت مختفيه الحمدلله لها 5 شهور
    من اول استخدام ل فرانكك
    صحيت اليوم الثاني عندي حكه بجسمي اليوم الثالث طلعت الصدفيه
    المقشر هيجها ليا

    ردحذف
  47. انا اطلبه لك نفس سعره الشحن عليك kik .. mlkkwhdkM

    ردحذف
  48. التقرير مفيد و شامل بس يا ريت لو قلتي انو كيف نحطه على الجسم يعني كل الجسم بالوجه بالمناطق الحساسة ؟! يا ريت تردي على سؤالي !!

    ردحذف

التعليقات الجميله ♥♥

Blogging tips