الاثنين، نوفمبر 03، 2014

مفضلاتي لشهر اوكتوبر | OCT favs ♥♥


،

السلام عليكم وَ رحمه الله وَ بركاته ..
من زمان مانزلت مفضلاتي او الاشياء الي استخدمتها بكثره الشهر الي فات ..
فهذا بوست اليوم D=


منتجات الشعر :



اليسار زيت جوز الهند الي مررره انشهر هالفتره ، استخدمه كل اسبوع كزيت للشعر واخلط معاه زيوت ثانيه بس بالغالب 
احط جوز الهند ومرات اسويه كماسك للشعر ، بكتب بوست عنه ان شاءالله 

شعري بعد الولاده صابه تلف وتساقط شديد!!
وقصيته وجالسه اهتم فيه بشكل مكثف والحمدالله بدا يصير فيه حياه وبستمر بإذن الله 


اليمين زيت الارقان او الاركان الطبيعي ، استخدمه بعد الشور احطه ع الاطراف بس يحمي من التقصف
وبرأيي مافي علاج للتقصف الا القص لان الشعره ماتت خلاص شلون نرجع الحياه لشي ميت؟!
ريحته لطيفه ومايدهن الشعر ومرات ادهن وجهي فيه من فتره للثانيه بس احاول ماكثر عشان مايطلع حبوب 
لان بشرتي دهنيه

المنتجين طلبتهم من موقع Iherb 

منتجات الجسم


بخاخ ايفيان للوجه
سعره بدينار و ٧٥٠ دينار كويتيp: كتبت عنه بوست (هنا)
ساعد بترطيب بشرتي وخاصه جالسه اقشر الحبوب الي طلعت لي :|
والحمدالله خفت الحبوب كثييير 

تحصلونه بالصيدليات والسوبر ماركتس انا اذكر اخذت هذا من وجوه


مرطب الجسم من كلارينس
ترطيبه جددا جميل بس حسيت كميته شوي وخاصه ماستخدمه يوميا وبدا يخلص :(
بس ترطيبه بشفع له 
اخذته من سيفورا



شور جل الصابون الافريقي
ماحسيت ذاك الفرق معاه يمكن لان ماستخدمته مده طويله 
بس ريحته حلوه ومافيه كيماويات كثييره
هو بالاساس مصنوع للبشرات الافريقيه بس احس يناسب كل الانواع ، هو عباره عن غسول مع سكرب خفيف بنفس الوقت
فيه املاح البحر الميت وحبوب الجوجبا وزبده الشيا ، حبيت انه مانشف جسمي ابد وبستمر عليه لان قريت مدح كثيير عليه
بس للان ماقدر احكم الا لما اخلص نص العلبه بإذن الله.

طلبته من Iherb


مقشر شفايف من صنع يدي 
انا اظن اكثر بنت شفايفها ناشفه بالحياه مع ان اشرب ماي كثير وارطب واقشر وتتعدل 
بس لو اهمل نقطه يرجع كل شي مثل ماكان :|
الحمدالله ، المهم هذا مقشر سويته بنفسي وحطيته بعلبه مقشر لش واقدر اقول انه افضل من مقشر لش بالنسبه لي
بسويله بوست لو حابين!


زيت الاظافر والكيوتيكل من او بي اي
هالزيت ينعم ويرطب الاظافر والجلد الي حوله ، من اول كذا استخدام حسيت بفرق!
طبعا او بي اي شركه معروفه ومتخصصه بالعنايه باليد والقدم عشان كذا اثق بمنتجاتهم
المشكله الوحيده ان غطا العلبه بسرعه ينفك فدايم حاطته برا ، اتوقع العيب بعلبتي بس وافكر افضيه بعلب اصغر 

تحصلونه بنزيه وممكن بعض الصالونات

المكياج




بلشر من ماك اسمه sunbasque
سواتش من النت


لونه بنك مع مشمشي وفيه شيمر خفيف هو نوعه sheer tone يعني صبغته مو قويه
ممتاز مع التان بس انا ماسوي تان فأحبه مع البرونز

الي حبيته فيه هذا الشهر اني غيرت الفرشاه صرت استخدم فرشاه الفايبر ديو من سيقما

مع ان هالنوع ممتاز لتوزيع البلشر القوي لانه ماياخذ كميه كبيره بس انا حبيته لان في شيمر ويطلع ناعم مع هالفرشاه
ومهما ازيد من البلشر ماحس اوفر والدمج سهل يكون


فاونديشن ماك ستيديو 
العشق الممنوع :"(((
من أفضل الفاونديشنات الي استخدمتهم حتى اجمل من دولتشي اند قابانا!
اتكلم للمناسبات لان بالصباح اوفر احسه ، مشكلته طلعلي حبوب مع ان نادرا ماستخدمه واحرص انظف بشرتي
بس الي عدم بشرتي هو او منتج ثاني للان ماتأكدت p: بس دايما اسمع عليه ذم من هالناحيه :\
بس كتغطيه ودمج مع البشره ممتاز جدددا ..


روج مات من ايلف
مرره انصدمت من هالروج! مع ان سعره رخييص بس جودته جدا ممتازه 
واللون قوي وثابت ومانشف شفايفي ابدا ، لما طلبت من موقع اي هيرب شفت ماركه ايلف وقلت اطلب لي منهم
وماتوقعت بيعجبني لهدرجه! للاسف الالوان اغلبها مو متوفره مخلصه بس بالمستقبل برجع اطلب منهم اكييد

اسم الروج praline


لاتدققون ع الشعر يع بس اكثر صوره واضحه حصلتها بالنت :|!!!
هو ثاني لون يمين ، وعندي الناتشورال بس حسيته فاتح بزياده علي وناويه اطلب الكورال والتي روز جمميليين
وسعرهم مايتعدا ٣ دولار يعني تقريبا ١٠ ريال!

طلبتهم من Iherb


ايلاينر سيفورا
بالنسبه لي هو الافضل ، مشكلته اول ماتشترينه مرره سائل بس يخف مع الاستخدام
احب فرشاته لانها قصيره وسواده رائع هذي العلبه الرابعه الي استخدمها واحبها


فرش ريل تكنيك جد تستاهل الضجه!
ماجربت الا فرش الوجه ، هذي جداااا حلوه للتوزيع وتقريبا ماستخدمت غيرها بالفتره الي فاتت
احسها مرات احسن من سيقما اف ٨٠ مع فرق السعر طبعا! p:

طلبتها بعد من اي هيرب "احس بتذبحوني من كثر ماطريته اليوم بس الموقع ممتاز هههههه"


مجموعه البرونز من بينفت


يحتوي على اكثر منتجات احبها!!
برونزر هولا المشهور ، اضاءه واتس اب ، ماسكرا ذاي ار ريل ، شدو كريمي بيكيني تيني وشدو ثانكس الاتيه وقلوس هولا 

المجموعه جدددا حلوه وعادي اسوي لوك بس فيها ،، بكتب عنها ريفيو ان شاء الله مع سواتشات
هي هديه من بينفت بس تحصلونها بسيفورا ووجوه

متفرقات 


عطر لوكستيان بالعنبر ،
اعشق ريحه العنبر والروائح القويه بشكل عام ماااحب الفانيلا والفواكه والسويتس
العطورات بشكل عام ماغير فيها كثير اشتري عطرين واعلق عليهم لحد ماطفش وهذا الي صار مع هالعطر ههههههه
هو من اكثر المبيعات بالمحل وسعرهم يعتبر كويس اخذته ب١٨ دينار كويتي او ٢١ ماذكر صراحه
بس احبه مع البخور جدا فخم! 



سواره توري بورش


الاسواره هذي جلد وتنلف مرتين ع اليد عمليه جدا وكاجوال تمشي مع الجينز والفساتين الناعمه
اخذت البني المحروق عشان اكرفه ولايبان عليه p:

ملاحظه بسيطه : (اللوقو عباره عن حرف الT مقلوب وابدا ابدا مو صليب فبليز مابي نقاشات لان لو صليب مادخل وانباع كماركه معروفه ببلادنا الخليجيه المحافظه)

ان شاء الله يكون عجبكم البوست ولو جربتو شي من الي ذكرته اسعد بكومنتاتكم هنا او بالانستقرام
اشوفكم ببوستات جديده! 








هناك 16 تعليقًا :

  1. شكرًا ع التدوينه الجميلة ناطرين الباقي :)

    وانا عندي ملاحظه بسيطه : ( صاحبه ماركه توري بورش يهودية ، فآضن ماله علاقه للي بيقولون صليب )

    ردحذف
  2. شكرا عالتدوينه بس ممكن تقولي عن سكرب الشفايف

    ردحذف
  3. لي اربع شهور استخدم ماك ماجاب لي حبوب أتوقع ياعزيزي فيه شغله ثانيه.تستخدمينها تطلع حبوب وشكرا

    ردحذف
  4. بجم خذيتي السواره :$

    ردحذف
  5. شكرا ع التدوينه الجميله

    ردحذف
  6. جميلة تدوينتك
    انا جربت روج ايليف مرره رهيب وحتى طعمه حلو =d
    وموقع اي هيرب جدا رهيب بس لو يحطون فيديكس بعد طلعو يهبلون

    ردحذف
  7. يعطيكي العافية .. رائعه مدونتك..
    ويا ريت عملي تدوينة عن سكراب الشفايف..
    مشكووورة

    ردحذف
  8. تدوينه جميله يعطيك العافيه ..
    محتاجه اهتم بشعري اكثر شكلي راح اجرب
    اللي قلتي عنهم ؛ و فاونديشن ماك جدا جميل
    عشقي للسهرات و الميك اب الثقيل ؛ و لوكسيتان
    احبها جدا و اخذت من كريماتهم بس دايم احتار
    بالعطورات و اطلع ما اخذت شي 😂 شكلي
    بقلدك بهالعطر .. شكرا يا جميله

    ردحذف
  9. يديكي العافيه ع البوست الحلو .. بس كم سعر الاسواره؟ /

    ردحذف
  10. يعطيك العافيه و مفضلات جميله ♥️♥️

    ردحذف
  11. وانا زيك احب موقع Iherb بالنسبة للاسوارة مع انك طلبتي عدم التعليق بس برضو بعلق خخخ لاني مازلت مستغربه انو في ناس لسه مو مصدقه انه صليب !! تراني مو معقده وأحب الموضه بس جدا حريصه من ناحية اللوقو والعبارات الموجودة على بعض الماركات توري بورش مره عجبتني اول مانزلت بس ماشريت منه ولا قطعه ! ليش لاني عرفت انه صليب بدون بحث لاني قد شفت من زمان نفس الشكل بقناة مصر مرة كانو ناقلين قداس (اتليقف بشوف وشلون صلاتهم خخخ) وشفت الصليب واضح تبع الاقباط اسمه Coptic Christian cross اي نعم ذكرت انو فكرتها دبل تي طيب اذا ركبو على بعض يعطي شكل هذا الصليب بتقولي فيه فراغ تعرفين انو فيه اشكال للتصميم كتضمين الفراغات بين الاشكال بس بالنهاية اذا طالعتيها تعطيك شكل واحد متصل عن جد ذكيه حطت لوقو باسمها مع شعار ديني مطوعه هههه عموما مو بس انا اللي فهمت هالشي ابحثي حتى الاجانب علقو على الشعار وانه يحوي معنى ديني حتى ذكرو نوع الصليب ...ماذكرت لك هالشي إلا لاني احبك في الله

    ردحذف
    الردود
    1. شكرا لردك حبيبتي ♡ بس ترا المصممه يهوديه مو مسيحيه ابدا :*

      حذف
  12. صح نسيت بالنسبة للاسواق اللي اعرفه انو سوقنا مابوه البراند على حد علمي ...اما اللي حولنا فمهناش دقه وعلى قولتهم مجرد اختصار لاسم المصممه ..تحيااااااااااتي

    ردحذف
  13. العفو ....يب ادري انه يهوديه عشان كذا استغربت!!

    ردحذف
  14. ودي تحطين المواقع الي تطلبين منها الماركه لاني مااعرفه ودي اطلب منها ومشكوره 😍

    ردحذف
  15. عندي فرشة ريل تكنيك مرررره جميلة استخدمها للفتونديشن بالطبطبة ♥♥

    ردحذف

التعليقات الجميله ♥♥

Blogging tips