الخميس، أكتوبر 16، 2014

شلون قدرت ارجع الترطيب والحياه لبشرتي ، روتين البشره الحالي ♥♥


السلام عليكم وَ رحمه الله وَ بركاته  ..
قبل فتره نزلت ريفيو بالانستقرام عن هالمنتج من نيتروجينا 



صارلي فتره اجرب منتجات جديده من ميك اب ومنتجات عنايه ووحده منهم طلعت لي حبوب تحت الجلد
وللان ماعرفت اي واحد منهم :|
فجربت نيتروجينا وهو مقشر يومي بس ماستخدمته يوميا لان ادري التقشير اليومي مايناسب بشرتي
ومع هذا سببلي جفاف سييييييئ بشكل اول مره يمر علي كذا!

جفاف ع الخدود كلها والجبهه والانف وبشرتي مختلطه تميل للدهني ..
المقشر يعدك بشره نظيفه من البثور والبقع من دون ان تسبب جفاف "على كلامهم بالموقع"
سبب اختياري له ان فيه حمض السيلاليك الي يعالج الحبوب ..

حسيت هالمنتج فاشل وماناسب طبيعه بشرتي ابدا ، كثار ناسبهم عن نفسي ابدا لا
المهم ، كان وقتها عيد ومناسبات واجتماعات والفاونديشن صاير فاشل اذا حطيته ، اذكر جلست اسبوعين ماخليت 
ماسك مرطب او كريم مرطب او فازلين او زيوت مثل الارقان وغيره ولافاد معاي ، قبل العيد بيومين قررت اغير الروتين كللله والحمدالله بيومين رجعت بشرتي وقدرت احط ميك اب بدون مايتقشر او يتجمع بوجهي وصار شكله مقبول جددا 

( ملاحظه بسيطه: كثار قالو شلون عالجتي الحبوب بيومين ، لا ماعالجت الحبوب لانها صارت تحت البشره بس عالجت الجفاف وصارت بشرتي رططبه وطريه واقدر احط ميك اب وشكله حلو ، الحبوب قاعده اجرب منتجات ثانيه وللان ماتخلصت منها)

منتجات افين


 من اليسار غسول افين
avene gentle gel cleanser

معلومات عن المنتج:
- مخصص للبشره المختلطه الحساسه والعاديه
- معزز بالمياه المعدنيه ويساعد على تهدئه الجلد.
- عباره عن جل ويذوب بسرعه مافيه صابون عشان كذا مايرغي ابدا ، يزيل بقايا المكياج "ماحسيت هالنقطه صح الا اذا استخدمت الكليراسونيك معاه بس"
- يخلي البشره ناعمه ورطبه "اهممممم نقطه بالنسبه لي"
- الغسول فيه ترطيب ويغذي ويرطب الطبقات العليا للبشره.

انا جربت قبل غسول افين للبشره المختلطه الدهنيه وللاسف ماقدرت اكتب عنه لان انكب كله ومارجعت اشتريته :|
بس منتجات ايفن مخصصه للبشرات الحساسه اكثر شي ولطيفه ع البشره عشان كذا رجعت اخذ منها.

الغسول جدددا لطيف وماحس بحراره او يكشط الجلد او يجففه مثل باقي الغسولات ، ماتوقع يناسب البشره الدهنيه لان مايشيل الدهن ع الجلد ابد.


avene hydrance optimale كريم

هذا رابع كريم اجربه من ايفين واكثر كريم حبيته  ، كلهم صراحه يشتركون بالترطيب اللطيف بدون ماتحسون في طبقه فوق الوجه ، خصائص الكريم مثل مو مذكور بالموقع :
• حاصل على براءة اختراع التكنولوجيا ويعيد ترطيب الجلد
• يعيد الرطوبه البشرة و يمنع فقدان الرطوبة
• لطيف على البشره وخفيف الملمس وسريع الامتصاص.
• يمتص الزيت الزائد ، ويترك الجلد مطفي غير دهني.
• يحتوي على مياه أفين الحراري لتهدئة و تليين الجلد
ليش اخترت هالكريم؟
خفيف على البشره لان مثل ماقلت مابي شي ثقيل خفت يطلع لي حبوب اكثر ، ترطيبه خفيف ومع هذا بسرعه تمتصه البشره ويحبس الترطيب بالبشره " ان شاء الله جملتي مفهومه :$"

حبيت هالكريم جدا بالبدايه قلت ماراح يسويلي شي لان خفيف وكنت اصلا مقرره اخذ كريم البيبانثين 
بس لما بديت اقرا عنه شفت انه مرطب مرره مرره ثقيل وللبشرات الجافه جدا ، صح بشرتي جافه بس من منتج معين مو لان هي طبيعتها كذا فحطيت هذا بالحسبان لان قلت زياده ترطيب بتطلع حبوب اكثر!



evian thermal water
البطل الاخير سبراي ايفيان ، فيه نفسه من شركه ايفن بس هذا من زمان عندي وكنت راكنته ع جنب
لان شفته ماي عادي كاني ارشه ع وجهي مافيه فايده ، بس قررت ارجعله زياده ترطيب ومهدئ للبشره

وتغيرت الفكره وصار صديقي الي معاي دايما ، من فوائده :
- يهدئ الجلد والاحمرار.
-  يرطب الجلد الجاف.
- يعيد للبشره توازنها وترطيبها.
- يساعد ع تحسين الميك اب مثل الفكس بلس حق ماك بس اتوقع الفيكس بلس افضل
(هالشي مذكور بموقعهم انو بعد وضع الفاونديشن يرش البخاخ)

،

روتيني كان كالتالي:
- اغسل وجهي الصباح بالغسول
- احط بخاخ ايفين وانتظر يجف
- ارطب بشرتي بالكريم

البخاخ معاي طول اليوم متى ماحسيت بجفاف حطيت

-قبل النوم اكرر الخطوات
بعد يومين رجعت لبشرتي الترطيب والحيويه الحمدالله ، الحبوب ماخفت بس خف الاحمرار
نصيحتي لاي بنت ، انا عادي العب ببشرتي واجرب اشياء جديده احب هالشي بس اذا ماتعرفين طبيعه بشرتك وعندك مشاكل كبيره ، كريمات مثل هذي ماراح تساعدك يبيلك كريمات طبيه اقوى افضضضل شي استشاره الدكتور وتمشين بروتين معين معاه ، اذا بشرتك جافه بالاساس في بنفس الشركه خط مخصص للبشرات الجافه ممكن تجربينه ويكون مثل خطواتي الي استخدمتها ، اذا عانيتي من جفاف بعد منتج معين ان شاء الله طريقتي راح تنفعك ، وبالاول والاخير اكيد البشرات تختلف وتقبل المنتجات يختلف قبل ماتشترون اي منتج اقرو عنه وعن تجارب الناس عشان تكونون فكره صح وبالاكيد التجربه خير برهان.

- تمنيت اكتب الاسعار بس ماعرف للاسف كم بالضبط :( -
اشوفكم ببوستات جديده بإذن الله.

هناك 16 تعليقًا :

  1. يعطيكي العافيه شكراً

    ردحذف
  2. حبيت البوست مررا شكرا 💕

    ردحذف
  3. بذمتك بلوقر وللحين بشرتك حبوب ليش ماتروحين طبيب تعالجين

    ردحذف
    الردود
    1. وبذمتك انتي قريتي البوست اصلا يامها؟ قلت لك جربت منتج وطلعلي حبوب وقاعده اعالجها حاليا ترا طبيعي واذا بلوقر يعني المرأه الخارقه مثلا؟ عيب كلامك :/ الي يضحك اجرب منتجات جديده حتى لو ع حساب بشرتي عشان افيد الناس ويجي هالتعليق السقيم

      حذف
  4. اكتشفت مدونتك من قريب و أ د م ن ت ه ا ❤️
    مشكورة على كل شي حلو تكتبينه هنا ❤️


    حبيبتي إذا ممكن محتاجين بوست عن العناية بالبشرة وقت الحمل! أنا في الشهر الثاني و بشرتي صايرة مأساة :( جفاف و حبوب و تقشر و سمار مع إني مستمرة على طريقة تنظيفها و ترطيبها قبل الحمل ، أفيدينا

    ردحذف
  5. اكتشفت مدونتك من قريب و أ د م ن ت ه ا ❤️
    مشكورة على كل شي حلو تكتبينه هنا ❤️


    حبيبتي إذا ممكن محتاجين بوست عن العناية بالبشرة وقت الحمل! أنا في الشهر الثاني و بشرتي صايرة مأساة :( جفاف و حبوب و تقشر و سمار مع إني مستمرة على طريقة تنظيفها و ترطيبها قبل الحمل ، أفيدينا

    ردحذف
  6. يسعدك ي شيماء ،، دايماً استفيد منّك واكيد كثير استفادو منّك ، رائي احدهم م يمثل العامه والكلام يرجع لصاحبه ولأخلاقه ،، شكراً للمره المليون شوشو 💙

    ردحذف
  7. انا قبل سنه قشرت وجهي وكان مرره يجنن واختفت الحبوب واخر حلاوه وكنت بعمل تنظيف بشره كتير لانو بشرتي دهنيه وبحط كريمات كتير سارت تتطلعلي حبوب دهون تحت الجلد كتير واشيلها ترجع تطلع بسرعه
    فسارت بشرتي دحين حساسه رحت قبل يومين عملت فيشل بصالون جويل بجدة بتقولي الحبوب تحت الجلد من كتر الكريمات والاكل السئ والكلارسونيك تذم فيها مع انها مره بطله الي فهمته منه انو البشره تتعب من الضغط والشغل الكثير بيها بتقول خففي من الاهتمام الزايد والكريمات وحطي واقي وكريم باليل واتغذي كويس ومويا والحبوب حتروح قررت امشي على كلامها وادا لقيتي حل للحبوب دي اتمنى تفيديني

    ردحذف
  8. شكرًا شيوم يعطيك العافية ��
    ممكن أسألك؟ :* ينفع استخدامها للحامل صح؟ :*
    برضوا إذا ممكن تتكلمين في مدونة عن العناية بالبشرة للحامل؟ مره بشرتي صايرة حساسة وأحس فيه حبوب صغيرة تحت الجلد .. كانت بشرتي تجنن ماشاءالله والحين :( مع إنه مو باين مره الحمدلله بس أحس متضايقة لأني فرقتها عن أول وما أدري ايش مشكلتي! :/

    شكرًا لك ����

    ردحذف
  9. شيوم هادي الشركه فين القيها ممكن في صيدلية بوتس ؟؟
    انا سويت زيك استخدم وبشرتي طلعت حبوب سرت مضايقه مرا :(

    ردحذف
  10. قورجس ، مع الغسول بدت تطبع لي حبوب دهنيه صغار مره بالذات بمنطقة بين الحاجبين على الجبهه وشوي على الخدين مدري بالضبط وش سببها ومضايقتني مره �� ياليت اذا تعرفين حل لها :(
    مع العلم انه غسول نيتروجينا البرتقالي وانا بشرتي عاديه مائلة الى الدهنية

    ردحذف
  11. من المتاابعات لمدونتك الراائعة ..... استفدت من تجربتك وناوية ان شاؤالله اشتري مرطب ايفين حبيته من وصفك
    امنياتي لك بحياة سعيدة ❤️

    ردحذف
  12. وين ألاقي منتجات افين ي قلبي ؟

    ردحذف
  13. يعطيكِ العافية شيوم ♥♥

    ردحذف
  14. يعطيك العافية ❤

    ردحذف

التعليقات الجميله ♥♥

Blogging tips