مين أنا ، ليش عايشه ؟ .. #غيمه٩

،

السلام عليكم وَ رحمه الله وَ بركاته ، ماتدرون قد شنووو اشتقت لغيمه ٩ :"( كثير تجيني ايميلات وَ كومنتات انو يحبون غيمه ٩ ويبون تدوينات أكثر فيها ، وأنا عارفه هالشي لان نفس الشعور بس صعب أكتب كلام مو حاسه فيه او يعنيني لمجرد انزل تدوينه جديده ، غيمه ٩ احط ببالي انو موجهه لي اول شي وكل كلمه اكتبها اقصد فيها نفسي واشجعها وَ أعطيها طاقه ايجابيه ، عشان هالطاقه توصل لغيري لازم توصل لي أولا عشان كذا دايم أتأخر بتدوينات غيمه ٩ خصوصا :$ البوست طويل حبتين جيبولكم كوب كوفي او شي تحبونه واوعدكم بتستمتعون فيه باذن الله :)



وصلني ايميل 

هو السبب الي خلاني اكتب هالبوست ، لان عانيت من هالنقطه ولازلت اعاني منها ، كثير منا مرت عليه جمله "انا شنو هدفي بالحياه؟" او ليش عايش او غيره ، وبنفس الوقت كثار هدفهم يتلخص انو يتخرجون باي تخصص كان يتزوجون يجيبون اطفال وخلاص تنتهي الحياه بالروتين ، الامومه شي ابدا مو سهل ولا اقلل من قدر اي ام كرست حياتها لخدمه اطفالها بالعكس هذي اصعب مهمه ، بس عن نفسي ماتخيل حياتي تتلخص بجلسه بالبيت وقهوه عصريه وحش وغيره :$ احب لما يخلص يومي ولما اجي انام افكر بشنو قضيت يومي حتى لو بانجاز صغير هالشي يسعدني جدا.

من هنا نقدر نحل معضله "مين انا؟" لما تفكرين بينك وبين نفسك انا شنو احب ؟ شنو يميزني عن غيري ، عندنا مواهب وقدرات بس للاسف مدفونه ، مدارسنا وحتى عائلتنا وأهلنا اغلبهم بس يبونك تاكل تشرب تدرس وتتخرج بدرجه عاليه ، الشهاده مهمه ، بس طيب وبعد الشهاده ؟ انا تخرجت بشهاده برمجه معلومات ومن بعد التخرج انشغلت بالزواج ، حلمي كان اكمل دراستي ، بس شي غريب كيف افكارك تتغير وطموحاتك تتغير ، حاولت اكمل دراستي بس ماحصلت لي فرصه وبعدين جلست افكر هل جد هالشي الي انا ابيه وابي اكرس حياتي الحاليه وشبابي فيه ؟ 

الشهاده اقدر اخذها بأي وقت ماحس راح يعيقني هالشي ان شاء الله . بس ابي بحياتي انجاز اكبر ، يمكن الغير يعتبرونه مضيعه للوقت بس انا اشوفه كبير لان هالشي احبه ، طيب شنو هدفي؟ للان مو واضح صراحه بس حاسه جالسه امشي ع الطريق الصح وأحس حياتي جميله لان اسوي شي احبه منها المدونه واشياء ثانيه تخصني ، وكلها من وين بدت ؟ كلها بدت من مدونه بسيطه وهدف ابسط وكان عفوي ماحطيته شي كبير بحياتي لازم اسويه كان شي عفوي جدا ومنها قادني لاشياء افضل.

ماقدر اعطيكم خطه او شي اكتبوه واحد اثنين ثلاثه وخلاص بتعرفون انتو منو وشنو هدفكم بالحياه ، في ناس كثار للحين مو عارفين هدفهم او مو واضح لهم بشكل كبير ، بس هل معناته  خلاص نستسلم للحياه وننتظر شنو بالمستقبل ؟ لا ممكن اجلس مع نفسي اقول انا شنو احب ؟ شنو الشي الي اسويه يبسطني ؟ ترا مو شي صعب ابدا ابدا ..

هل انتي تنبسطين بمتابعه الازياء والفاشون شوز وتتحمسين لها وتعرفين كل المصممين واصحاب الماركات ؟ طيب ممكن تبدين من الشي هذا وتدخلين هالمجال ، مو شرط تصيرين مصممه ازياء ، ممكن تصيرين ناقده في الموضه ، ممكن تصيرين منسقه مظهر ممكن تصيرين كاتبه بمجله للفاشون ، ممكن تشتغلين بمحل يبيع ازياء وتساعدين باختيار القطع الدارجه ، ممكن تفتحين متجر الكتروني ، ممكن تصممين اشياء بسيطه ، الخيارات كثيييره بس اول شي تعرفين الشي الي يسعدك وتدخلين بالمجال هذا.

شلون اعرف الشي الي يسعدني ؟ لاحظي نفسك ولاحظي اهتماماتك ، هل اذا شفتي مسلسل تهتمين بلبسهم ؟ هل ميلوك تشوفين ايش الجديد والدارج وتتابعين جديد السوق ، هي مؤشرات صغيره ممكن تساعدك تلقين نفسك ، شوفي لما تفتحين الانستقرام شنو الحسابات الي تتابعينها ؟ شنو اكثر شي تصورينه ؟ شنو برامجك المفضله ، هذي اظن من اول الخطوات الي ممكن تساعدك.

وشي ثاني ممكن يساعدك لما تعرفين شخصيتك ، هل انتي صعب تجلسين بمكان وتحبين تتحركين وفيك نشاط؟ شيلي فكره انك تتوظفين بمكتب اجل ههههههه ، هل انتي تحبين الاب توب وتجلسين بالساعات عليه والروتين مايتعبك ؟ يمكن ينفعك الوظيفه المكتبيه ، اعرفي شخصيتك ولاتدفنين نفسك بشي يقتلك ، ترا مو الكل موظف بشي يحبه وكثير طموحاته اكبر بس الفرص الوظيفيه محدوده ، بس اقل اقل شي اتوظف بشي يناسب شخصيتي ممكن مايعجبني انا بس اقدر اتأقلم منه واقدر ابدع فيه ، وبوقت الفراغ اقدر امارس هوايتي ، عادي كثاااااااااااار عندهم وظايف وبس يخلص دوامهم يمارسون حياتهم طبيعيه مو شي غلط ، اهم شي يناسبني كشخص لان بقضي اغلب يومي بالدوام.

نرجع للسؤال الكبير :$ "شنو هدفي بالحياه؟" اذا عارفه شنو تبين او تبين توصلين له ارفعلك قبعتي او طرحتي احتراما هههههههههه ، لان صعب بس معناته انتي عارفه شنو تبين بالحياه اهنيك صراحه واشجعك توصلين لحلمك :)

طيب انا ماعندي ميول او هوايه لشي معين :|؟ خلاص اوقف عن التفكير والاحلام ، لا لا لا حطي ببالك لازم اعيش ولازم اخلي بصمه بالحياه حتى لو بقلوب الناس مو شرط اكون مشهوره ومعروفه عشان احقق هدفي ، خلي ببالك لازم حياتي ماتكون اكل ونوم وتي في وخلاص ، عن نفسي من زمان وهدفي "اكون شي مهم بالحياه" شنو وليش مادري بس هذا هدفي هههههههه ، هل حققته ؟ اقدر اقول تقريبا وببدايه تحقيقه وَ صرت تقريبا معروفه عند بعض الناس وكثير يجيني فيد باك واراء جميله واني تركت اثر بحياتهم بشكل كبير!! طيب انا ماكنت محدده هدفي مخليته شي عام بس كنت ادور مدخل لو بسيط اني احققه ، منها المدونه وهدفي اساعد الناس فبكذا تركت بصمه وصرت شي اطمح له الحمدالله ، طيب حققت حلمي وخلاص ؟ لا المدونه فتحت لي مجال ثاني تماما عن كنت الي اتخيله ، من الاشياء الي كنت اطمح لها بشخصيتي انو ابعد عن الخجل شوي وابدا اتعرف ع الناس طيب هذا مو هدف بس امنيه وحققتها الحمدالله ، ومن الاشياء الثانيه تطورت بالميك اب بسبب المدونه اقدر اقول :| هذا ماكان هدفي بالحياه بس حققته لان مشيت بهدفي الاول اني اترك بصمه ، فتحت لي مجالات ثانيه كثيره ماكنت اطمح لها بس حابتها جدا ، يعني مع الوقت اقدر احقق نفسي ومع الوقت جالس يتضح حلمي بالحياه ، شي بسيط ساعدني لاشياء اكبر ومنها طورت نفسي لاشياء افضل يعني جالسه اشوف شنو استفدت لو اشياء بسيطه تحسسني بالسعاده والانجاز.

لاتقللون من قيمه الاشياء الصغيره بحياتكم ، اي فرصه لو بسيطه اخذيها ع طول ، حتى لو ماكنتي حابته بس مستحيل تخلصين منه الا وانتي طالعه بنتيجه ، لو انتي بالجامعه وشفتي اعمال تطوعيه تطوعي لو عندك وقت "بعيد عن الكسل" ، هالشي بيضيف لك ولشخصيتك ويطلعك بتجربه تغيير فيك ، لو حصلك فرصه تقابلين شخص مشهور او تحضرين مؤتمر او ندوه احضريها ، اسعي لتطوير شخصيتك ، اي شي راح يضيف لك ، لو حصلك وظيفه بدوام جزئي والمعاش مو الواو بس انتي عندك وقت فراغ اشتغلي عااااادي ، ممكن تكتشفين بشخصيتك شي جديد ممكن المكسب البسيط هذا يساعدك بمشروع ثاني ، لو موعارفين هدفكم بالحياه اسعو واسعو تطورون شخصياتكم تجربون اشياء جديده اذا ماضبطت معك التجربه الثانيه بتضيف لك ، ترا مو مضيعه للوقت انك تنجحين بالحياه ، النجاح مو سهل ابدا ، كثار من المشاهير والناس الناجحه تعبت على نفسها ، انا كنت اعتبر نفسي ساذجه هههههههه ، لما اشوف احد مشهور واتمنى اصير نفسه واحاول اذا جتني عقبه صغيره اتحطم واقول اف هل يستاهل اضيع وقتي ع الشي هذا ، بس لما اقرا سيرهم الذاتيه وكيف قضو وقت كبييييير ع احلامهم تعبو عليها وكانو مايشوفون مردود ابدا بس كملو لانهم حبو هالشي ونجحو اتحمممس ، احب اقرا سير الناس الناجحه واتابعهم وانبسسسسسط لما اشوف احد نجح احس انا الي نجحت ههههههه احب الناس الطموحه.

خلو حولكم ناس طموحه وتحب تنجح يعطونكم طاقه ايجابيه والهام وان شاء الله تصيرون مثلهم واحسن ، نصيحتي لاي بنت تبي تعرف نفسها وتعرف هدفها بالحياه ، اول شي محد راح يمسك يدك ويقولك سوي كذا او كذا ، اهم شي انتي شنو تبين ؟ تخيلي حياتك بعد ١٠ سنين وين ؟ دايما دايما خلي تفكيرك ايجابي ، اكثر شي يقهرني لما تجي وحده تقول وين بكون يعني يمكن بالقبر او قاعده بين ٤ جدران :| لا لا الموت حق ويمكن نموت بكره بس اذا ما مت بكره انتظر بعده يمكن اموت ؟ شنو هالحياااه البائسه :| تفاؤولو بالخير تجدوه ، دورو لكم شي لو بسسسيط تحبونه وابدو فيه ، لو تحبين التصوير صوري اشياء بسيطه وطوري موهبتك ممكن تتعاملين مع شركات كبيره بكره ، لو ماحسيتي عندك شي معين تحبينه جربي تتعلمين اشياء جديده بالحياه ، تتعلمين تصوير تتعلمين طبخات تتعلمين تصميم تتطوعين جربي وجربي لحد ماتحصلين شي تميلين له وتحسين نفسك منجزه اذا سويتيه ، واخر شي دايما خلي هدفك الاكبر بالحياه انك تكونين افضل من جميع النواحي ، تطورين نفسك ، لاتجي السنه الجايه وانتي بنفس مكانك نفس الشكل نفس الروتين نفس كل شي ، الحياه حلوه والحياه كبيره لاتخلين احد يمنعك انك تعيشين حياتك مثل ماتحبين وتستمتعين فيها ، بتجيك عقوبات مو كل شي سهل بس اوقفي وحاولي وحاولي وحاولي ..

اتمنى لكم حياه سعيده مليئه بالانجازات ويارب هالبوست ساعدكم لو بشكل بسيط واحد اخذ فائده منه حسيت جالسه اسولف مع نفسي هههههههه ، انتظر انطبعاتكم عن البوست ولو عندكم افكار اتقبلها بصدر رحب وتفاعلكم يسعدني والله p:

للتواصل معي ع التويتر والانستقرام 
الايكونز ع يمين الشاشه

|

لاتنسين الاشتراك بالمدونه ليصلك كل جديد ..
كونو دائما جميلين ♥ ..

xo Gorgeous