سلسله باي باي صالون ، استشوري شعرك بشكل بروفشنال ♥ blow-dry ur hair like a pro

السلام عليكم وَ رحمه الله وَ بركاته ♥ ، في سلسله من زماان كنت حابه ابدا فيها وقلت الحين الوقت المناسب ، تقريبا من سكنت هنا رحت لكذا صالون او مشاغل من اردى شي لافخم شي وَ الي لاحظته انو كل اسعارهم غاليه مقارنه بالشغل العادي جدا ، ماقدر اقول اني فريت كل الصوالين صراحه بس رحت الي اكثر شي معروفه ، ماحسيت بشي يرضيني او حسيت انو شي متعوب عليه بجد ! سويت ويفي ب٣٥٠ ريال ،، شعر ياااابس ومسوين بف واصل للسما خير ان شاء الله ؟ وانا اصلا سويته لمناسبه صغيره وحرصت عليهم كثييير وعادي مستمرين بالجل والسبراي غرقوني ههههه ، رحت لواحد ثاني وطلبت منهم ويفي وحرصت انو لمناسبه عاديه ومن كثر ماكان شغلهم ناعم اول ماطلعت من المشغل طاح الويفي وتفكك ههههههه ، مارتحت ولا اظن بلقى شي يناسب الي متعوده عليه ، فقلت ليه مابدا اعتمد ع نفسي وصارلي سنه عن المشاغل وَ حوستها كل شي اسويه بالبيت بدون صرف فلوس واهم شي اهم شي راحه البال ، ومين راح يعرف لنفسك غيرك انتي ؟ عشان كذا حبيت ابدا السلسله هذي الي طفش من الصوالين والانتظار ودفع الفلوس من غير شي يستاهل بالمقابل بيحصلون كل الاجابات بالسلسله هذي ان شاء الله ، بس بالبدايه حابه اوضح نقطه .. اذا انتي مو متعوده تسوين شغلك بنفسك اول عشر مرات ماراح تعجبك النتيجه بس بعدين بتعرفين لنفسك وتصيرين احسن من المشاغل ان شاء الله ، عن نفسي صرت اتقن كثيير شغلات وكل مره اتحسن فيها واهم شي اذا جت مناسبه فجأه ماشيل هم واتنح وادور مشغل يستقبلني صرت اعتمد ع نفسي الحمدالله ♥♥ ، وَ اغلب الاشياء الي ممكن تسوينها بنفسك بحر كبيييير .. يعني طريقتي هذي صح حلوه وَ عمليه بس ممكن لو حصلت طرق افضل راح اطور من نفسي ، عشان كذا انا ممكن اعطيكم البدايه بعدين انتو انطلقو كل وحده تشوف الي يناسبها وتبحث عن اشياء ماشيه مع نوع بشرتها وَ شعرها وبالنهايه كلنا راح نستفيد ان شاء الله ، خلصت قرقر يلا نبدا بالطريقه ..

اول شي حابه اتكلم عن طبيعه شعري ، شعري ويفي بس نفس الشعره ناعمه مايتعبني بالاستشوار كثير لان من مرتين لثلاث اعيد عليه وَ يضبط .. فانتو امشو ع حسب نوع شعركم لو كان كيرلي بياخذ جهد اكثر اكيد ..

اول شي اسويه لازم اغسل شعري بما انو يميل للدهنيه ، واحط بلسم او حمام زيت ع حسب وَ بعدين اطلع بالغالب اخلي شعري اخر شي اسويه لان ابيه ينشف بدون ماعرضه للهوا لان معروف الهواء الطبيعي افضل بتنشيف الشعر عشان مايفقد الشعر لمعته وَ حيويته مع تكرار تنشيفه بالاستشوار ♥

 بعد كذا احط زيت المكديميا ع اطراف الشعر وَ تقدون تحطون الي يناسبكم بس انا مرتاحه عليه ، وَ في كريمات كثيره تنحط ع الشعر يسمونها leave in cream او leave in conditioner الهدف منهم تغذيه الشعر وترطيبه .. والصيدليات مليانه منها بس ماكان لي تجارب كثيره معهم صراحه وَ ان شاء الله بجرب وَ اقولكم لو حصلت شي يستاهل انو اتكلم عنه ..

بعدين احط سبراي يحمي الشعر من الحراره ، اخذته من صيدليه بوتس من فتره طويله ريحته جدا جددا جميله واحس شي ضروري تستخدمون سبرايهات حاميه من الحراره ، طبعا مو شرط تتقيدون بنفس المنتج بس انا دورت كثير وخاصه منتج تيراسيمي وماتحصلونه بسهوله اما هذا السبراي اخذته من صيدليه بوتس فان شاء الله راح تحصلونه ، وظيفه السبراي انو يغلف الشعر ويحميه من الحراره وبنفس الوقت مايعيق شغل الاستشوار بالعكس احس يساعد ع سهوله الاستشوار.

الطريقه :

قبل الاستشوار او استخدام اي جهاز خاص بالشعر ، رشي السبراي بشكل بعيد شوي تقريبا طول ذراع بعدين مشطيه ، ونصيحه منهم انو اذا قسمتي شعرك وتبين تبدين فيه رشي ع كل جزء قسمتيه بس بصراحه انا اكتفي بمره وحده.

ثاني خطوه ابدا اقسم شعري ترا هالشي جدا مهم ، لان بيسهل لك عمليه الاستشوار ، عن نفسي استخدم هذي الكلبسات اخذتها من صيدليه بوتس بس عادي استخدمو اي كلبس ، ابدا اقسم شعري من عند الاذن لقسمين مثل هالصوره :

وبعدين اقسمه لاربع اجزاء مثل هالصوره :

وننتبه لو في غره تشيلونها بكلبس بروح اكيد، بعد التقسيم يجي دور الاستشوار اخذ قسم واحد من ال٤ اقسام واجزأه ل٣ اجزاء او ٤ بالكثير ، شي مهم انو ماتحطون شعر كثير ولا قليل مره .. اذا استشورتي وماحسيتي انو انفرد الشعر فقللي الكميه ..

الاستشوار ماركه بالسون ٢٢٠٠ واط .. على كلام الخبراء احرصي لما تشترين استشوار هوائي انو مايكون اقل من ١٧٥٠ واط ولا بتضيعين وقتك على مايسخن , اذا مشتريه الاستشوار عشان تفردين شعرك احرصي يكون سيراميك ،  اخذته من اكسترا وكان سعره حول ال٣٠٠ ماخذته من مدح او شي بس شفته وشفت قوته واخذته والحمدالله ماندمت ♥، وزنه خفيف نسبيا مقارنه بالي استخدمتهم قبل ، غير هذا انو فيه زر للهواء البارد وزر للهواء الحار وَ اهم شي سلكه طووويل عشان مالزق بالجدار اكره الزق بالجدار تعقدت هههههه ، اظن انو مصنع للمشاغل بس كاداء حبيته جدا.

هالمشط بيني وبينه علاقه حب وَ كره ! جربت كذا فرشاه للشعر ومحد اعطاني النتيجه الي ابيها الا هالمشط بس حرقني مرتين وحرق مو لسعه :( لان راسه اظن من حديد او بلاستيك قوي ماقدرت احدد ولما يسخن يسخن مرره ، اخذته من نزيه حول ال٥٠ ريال او اكثر شوي ، هو صناعه فرنسيه بس تقدرون تحصلون بدائل له بس افضل شي من محلات تجهيزات الصوالين ، جربت من السوبر ماركت وجربت من المحلات العاديه ماجابت نتيجه ، اذا بتاخذون شي مو تمشيه حال اخذو من مكانه المخصص ، شفتو الشعر كيف كثثثيف وقريب من بعض وقصير ؟ اهم شي تنتبهون لنوعيه الشعر.

اذا شعرك طويل تحتاجين حجم فرشاه اكبر واذا شعرك قصير تحتاجين العكس ، تقدرين تستخدمين فرشاه سيراميك نصحو فيها اذا تبين نتايج اسرع بس ماجربتها للاسف ، موضوع الفرش كبييير فماقدرت اغطيه كله ممكن اخليه لبوستات ثانيه باذن الله.

الحين نبدا بالاستشوار اول ماتقسمين شعرك لاربع انصاف اخذي اول نصف ، انا احب ابدا من ورا بيكون اسهل وبعدين اسوي الي فوق ، اخذي جزء حطي الفرشاه عند جذور الشعر وامسكي الاستشوار ، لاتمسكينه من اليد حقته امسكيه من فوق -بحط فيديو تعليمي اخر شي- وابدي لفي الفرشاه ومشي الاستشوار عليها وارجعي كرري العمليه مرتين لثلاث لحد ماتحصلين النتيجه الي تبينها اذا تبين يكون في فيليوم او الشعر مو هابط من الجذور لما تستشورين شعرك اسحبيه لفوق بدال لتحت بعدين كملي باقي الشعر، انا ضبطت الاستشوار من المره الرابعه تقريبا فانتو حاولو تتدربون اكثر لان كل مره بتتقنونها ان شاء الله ، بعد ماخلص اول سكشن ابدا بالثاني من تحت وبعدين الجهه الي فوق والي جمبها ، شعري شبه طويل لنص ظهري فالعمليه تاخذ مني نص ساعه ممكن انتو ماتطولون بس انا بطيئه واروق ع كل شعره ههههههه ، اخر شي اسوي غرتي بس بالسيراميك لان الفرشاه كبيره مره وتلف غرتي بشكل يضحك :|

بعد ماخلص احط سيروم كريستال *وهل يخفى القمر* ههههههههه ، كنت بنزيه وبيسكرون للصلاه وقلت ابي سيروم للشعر وطلعه لي وحتى ماشفته لما رجعت البيت قلت اووه كريستال ماغيره :| جربته ٣ مرات ممكن ماقدر احكم عليه بس اظن معروف ، بس اخلص استشوار احط ضغطه تقريبا واوزعه بيدي وبعدين احطه ع شعري بس ماكثر عشان مايدهن ، وبس اخلص احط مسك للشعر هالخطوه اختياريه بس كيفكم ههههههههه ، وبس تمتعو باجمل شعر بلا صوالين بلا هم p:

مثل ماقلت مع التدريب بتتقنونها ان شاء الله ، دورو المنتجات الي تناسب طبيعه شعركم اكيد وهذا فيديو تعليمي استفدت منه بشكل خاص :

كلامها طويل ههههههه بس مفيد مره ونفس طريقتي بالضبط ، راح تبدا من الدقيقه الخماسه تقريبا ♥

في طرق كثيييره وحتى في فيديو استفدت منه بشكل كبير بس ماحصلته للاسف بس تقدرون تبحثون باليوتيوب how to blow dry your hair وبيطلعلكم مليون فيديو ، وبس هذا بوستنا لليوم ان شاء الله تكونو استفدتو واذا عجبتكم بكمل السلسله معاكم ان شاء الله ومع بعض نقدر نستغني عن المشاغل وغيرها وتبدا نعتمد ع نفسنا بشكل اكبر ان شاء الله.

للتواصل معي ع التويتر والاسك -غيرت اللنك- والانستقرام الايكونز ع يمين الشاشه

           

 

لاتنسين الاشتراك بالمدونه ليصلك كل جديد ..

كونو دائما جميلين ♥ ..