الاثنين، أكتوبر 17، 2016

كيف اغير حياتي ! #غيمه٩ ♥♥



اهلا وسهلا بصديقاتي! 
اولا اعذروني علي الصور مالها علاقه بالموضوع بس صورت الي قدامي لان حسيت فجأه ابي ادون حتى لو مو كل شي بيرفكت ..

"شلون اغير حياتي؟"
كثير يطرح هالسؤال بس مو عارف وين يبدأ ، ممكن هالتدوينه ماتساعدك بس راح تلهمك ان تبدأ!


،

لحظه تفكيرك بان ودك تغيرين حياتك للافضل هذي بدايه التغيير ، انك تكونين واعيه ان في حياه افضل بكثيير من الي تعيشينها وانك تستحقين الافضل منها كافيه تخليك تبدين ، الكل يبي يعيش الحياه "البيرفكت" والكل له صوره للحياه هذي ، سواء يكون عندك فلوس اكثر ،، يكون عندك حريه اكبر او حتى حياه اجتماعيه او شهره او او ..

،

غمضي عيونك وتخيلي حياتك الي تبينها ، شنو تشوفين؟ لانكون سطحيين ممكن السعاده تكون باشياء بسيطه وتغييرات ابسط تخليك تعيشين الحياه البيرفكت الي تحلمين فيها ..

دايم وابدا اقول مابي اعيش نفس الناس العاديين الي همهم على جوالاتهم ويجتمعون وحش بخلق الله وكل يوم نفس الي قبله ونفس الي بعده! اتوقع لو متابعتني من زمان بتذكرين هالجمله كتبتها باحد البوستات.

شغلي الشاغل كيف اخلي حياتي افضل! شلون اوصل للحياه البيرفكت هذي الي احلم فيها؟؟
اكتشفت مافي شي بيرفكت اوووو مافي شي يجي مره وحده ، حاليا جداا سعيده بحياتي الحمدلله!
صح مو كل شي مثل ماابي بس لما اشوف التغيرات الي مريت فيها وشلون تعبت على نفسي ووصلت لمرحله حلوه بدون مساعده احد اشكر ربي!

عشان تغيرين حياتك اهم شي تكونين واعيه انك مسؤوله عن حياتك واختياراتك!
يمكن الكثير يقول اهلنا مايعطونا حريتنا ،، دراستنا شاغلتنا ،، ماعندنا فلوس وووووو 

لما تحطين عذر انتي تحطين عذر لكسلك "مو الكل"
مثلا وحده قالت لي ، عندك خدامه انتي مايحق لك تتكلمين عن وقت الفراغ وتسوين رياضتك ع راحتك!

صحيح كلامها الخادمه نعمه وساعدتني كثييير بس مو كل حياتي كان في احد يساعدني ، اذكر لما جبت ديم وكنت بسوي رياضه ارضعها واحطها قدامي واسوي رياضتي وهي ترضع والاعبها لحد ماخلص وتقطع علي وقت الرياضه مليون مره لكن ماحطيتها عذر

ووحده تقولي انجازاتك بسبب دعم اهلك لك المادي!
هههههه مدري وين الناس تجيب سوالف من مخها ولا ادري شنو دخل اهلي اصلا ، بس اكتشفت ان مانقدر ننجز وننجح لان نشوف غيرنا وشنو عندهم ونطلع اعذار لفشلنا 

لو عندي نفس فلوس فلانه بنجح .. لو عندي وقت فلانه بعيش حياتي .. لو عندي زوج فلانه بسوي وبسوي
وغيره من الاعذار .. اول شي نحط ببالنا الحياه مو سفر وتسوق ومطاعم .. صح انها تخلي للحياه متعه بس اعتبرها ناتج

يعني لما اتعب على نفسي واشتغل واغير بحياتي بوصل للكماليات هذي ،،    


قبل فتره افتتاح فلوريست والي بعده ، كنت زعلاااننننه ماعندي وقت للسفر او المناسبات الاجتماعيه او او
كان وقتي شغل وديم وبيتي وبس ، وصلت لمرحله بس ابكي هههههه
اقول الحياه مو بس شغل لازم اعيش واطلع واسافر

بعدها بفتره قابلت "جويل" يالله كأن ربي راسلها لي من السما صدق!
البنت هذي ناجحه وصنعت نفسها بنفسها ووقت ماكانت تسولف عن شغلها اقول ببالي من وين لها وقت ؟؟
شلون تقدر توفق بين كل شي بحياتها!! لحد ماسألتها وقالت

لازم تتنازلين عن جوانب بحياتك .. عشان توصلين لهدفك لازم شي يطغى ع شي
تقول وقتي ثمين فمخليته لشغلي وعيالي ، الحياه الاجتماعيه ماعيشها وشبه شايلتها من حياتي
وقتي لناس احبهم ويحبوني بعيدا عن المجاملات .. 

وقتها عرفت ان احنا نختار نعطي وقتنا لمنو فعلا ، هل لناس يهمونا او مجامله ؟
ممكن الكل مايوافقني الراي ، لكن المسأله ترتيب اولويات ..

يعني لو ببالك تدخلين الرياضه بحياتك بتلقين وقت ،، بدال لاتنسدحين ع جوالك تتحلطمين اخذي نص ساعه من يومك سوي رياضه فيها ، بدال لاتنامين ١٣ ساعه باليوم خليها ١٠ ساعات ، بدال لاتطلعين كل شوي وتزورين فلانه وفلانه او تروحين المول او تروحين كوفي ، خلي هالوقت خاص بالشغل على نفسك

رتبي اولوياتك وبتقدرين تتغيرين .. اذكر وحده من متابعاتي قالت لي I hope this is not a phase يعني اتمنى كلامك عن الاكل الصحي والرياضه مو بس مرحله وتعدي ،، كلامها استوقفني حيييييل ، متخيلين ان كل كل كل كل سنه اول شي اكتبه بقائمه امنياتي اهتم باكلي وجسمي ؟ وكل سنه تعدي وهالامنيه ماتتحقق ، فقررت ان امنياتي ماربطها بوقت

ماقول اذا اكتملت اغراض الرياضه ببدا او اذا بدا الاسبوع ببدا او اذا قريت معلومات كافيه ببدا
لاني ببساطه ماراح ابدا ، سالفه اني اقرا عن الشي الي ببدا فيه او بسويه اكثر شي يضيع لي وقتي
صح اني استفيد واسوي الشي بشكل صحيح بسسس العلم بحررررر كبيييررررر كل يوم بتطلع معلومه جديده
دراسه جديده سواء بالتغذيه - بالتربيه - الرياضه - الميك اب او او

فبكذا ماراح اخلص ولا راح ابدا ، ابدي بالي متوفر عندك ، او وفري اشياء بسيطه وابدي فيها ومع الوقت تعلمي واكبري
its a process of learning

عشان تغييرين حياتك غيري الي حولك ، ماننكر تأثير الناس علينا وعلى نشاطنا ، الشخص الي مايضيف لك بحياتك
وبس مجرد عثره بسلبيته او استقعاده على اتفه الامور ببساطه غيره! خاصه الاصدقاء لهم تأثير كبييير وهم اول ناس بتشجعك او تحطمك ، خلي المحيط الي حولك محيط ايجابي مع ناس تساندك تقدرين تناقشينهم وتقولين شكثر هالتغيير مهم بالنسبه لك لكن لو مافي استجابه بعدي عنهم ، في ناس ثابتين مثل الاهل والزوج ولو كانو سلبيين ببساطه سوي نفسك ماتسمعين عندي ايمان اذا تغيرتي انتي ممكن غيرك يتغير وياك بدون ماتحسين .. اذا لا ببساطه استمري وطنشي وخليك قويه!

التغيير يبدا حبه حبه ، اي شي يجي بسرعه بيروح بسرعه ، تقدرين تبدين بخطوات صغييره وشوي شوي تكبرين والتغيير يكبر معاك .. خليك واثقه بنفسك وبقدراتك متآكده مليون بالميه ان كلنا عندنا قدرات ماكتشفناها ومتأكده في اشياء بداخلنا اعظم تنتظر الوقت الصح عشان تطلع! ثقي بنفسك عشان غيرك يثق فيك!

دايم اقول محد بيشجعك وقليل الي راح يؤمن بالي تسوينه ، اذا عندك هالشخص انتي محظوظه اذا ماعندك انتي عندك "نفسك" الشخص الي بتقضين كل حياتك معاه هي انتي ، شجعي نفسك وحبيها وخليك قويه ، الناس ماتحط حساب للضعاف الي ماعندهم اراده!!

ابدي بدري ، احس او اقدر اقول متأكده ان الحياه الصباح بسس ، ويمكن تلاحظون بالسناب ان كل كل تصويري الصبح بالليل قليل اصور ، لان اقوم بدري واخلص كل شغلي اكون مروقه وعندي وقت طووويل بس يرجع زوجي خلاص ماحاتي عندي شي لازم اخلصه او اشيل هم ممكن احد يزورني او اطلع وانا ماخلصت رياضتي بالعكس اكون فاضيه تماما بعد العصر لوقت النوم ، هالشي يخليني انجز كثييير وقومه الصباح اقدر اقول غيرت حياتي :))

حطي لك هدف وركزي عليه ، صح نقدر نسوي كذا شي مع بعض بس لما تبدين التغيير ابدي بشي واحد وركزي عليه وبعدين انتقلي للي بعده عشان ماتقصرين بحق نفسك او بيتك او اهلك كلهم لهم حق عليك!!


من الاشياء الي كانت تمعني من التغير "الخوف" ، اخاف اني مو قدها ، اخاف اني ماقدر اوصل لهدفي واكون محبطه واخاف اني ماستحق هالشي ، تعلمت اني قادره .. صرت اشوف الاشياء الي بحياتي واكتشفت ان كثيير اشياء ماتوقعت اوصلها ووصلت لها ، تعلمت "اجرب" اضيف تجارب لحياتي ، يمكن هالشي مايعجبني وماكمل فيه عاااادي الحياه تستمر ، وتعلمت ان عندي امكانيات كبيره وتعلمت حتى لو اصبت باحباط بكره يوم جديد ابدا فيه ،، واهم شي تعلمته احارب "مالي خلق" هالشي يرفع ضغطي لان المزاج عندي يتحكم بحياتي تقريبا ،، بس اقوم واغصب نفسي القومه بس صعبه ولا الباقي سهلللللل واخلصه وانا راضيه عن نفسي :))

الخوف شي بعقلك وبس ، الحياه مالها حدود احنا الي نحطها ببالنا .. بس تؤمنين ان الخوف بس ببالك وانك تقدرين تعيشين الحياه الي تبينها بتقدرين!

،

التدوينه غير مخطط لها فالافكار مو مرتبه تماما لكن اتمنى انها وصلت لقلب احد لان كتبتها من القلب بدون توقف
الحياه الي تتمنينها بتوصلين لها اذا وثقتي بنفسك وبقدراتك بعيدا عن الخوف وكلام الناس واحكامهم

اتمنى لكم حياه جميله




هناك 52 تعليقًا :

  1. يا الله
    تدوينتك لمست قلبي
    راح اقراها كل ماحسيت بفتور

    شكرا لك

    ردحذف
  2. كلام جميل ورائع

    ردحذف
  3. دايم كلامك مثل البلسم و قريب من القلب
    انا شخصيا استفدت منك و ما زلت استفيد
    و غيرت اشياء كثير و ان شاءالله القادم اجمل
    بعض تدويناتك مثل هذي اعتبرها مرجع
    كل فترة ارجع اقراها و تعطيني طاقه
    شكراً جزيلاً و يعطيك الف عافيه قورجس 💓

    ردحذف
  4. ماتتخيلين قد ايش تلهميني😩💖وكل تدوينه منك حافظتها زي اسمي لان محفووره بذاكرتي وكمان لان الحكي اللي يطلع من القلب يخش القلب ع طوول😍👏🏻👏🏻كنتي ومازلتي مُلهمتي وقدوتي والغيمه اللي حكيها يظلل جوانب من حياتي❤️✨ كوني بخير..

    ردحذف
  5. ما تدرين قد ايش كلامك اثر فيني و أعطاني ايجابيه مو معقوله ربي يسعدك

    ردحذف
  6. اول مره اكتلبك بس ابعترفلك اعتراف انو هذي مو اول تدوينه تاثر فيني وتلمس قلبي انتي طاقه و إيجابيه منتشره انتي فعلا غيرتي فيني اشياء كثيره ومن اهمها انو انا قادره , انا استطيع .. شكرا من قلبي ..

    _ ومن جد ترتيب الافكار و الاهداف شي مره مهم ويرتب المخ , وما يمنع الواحد يبدأ حبه حبه ,
    _ وبرضو من جد الحياه اعمق من طلعه سوق او مطعم ما تضيفلي ولا تحقق احلامي ..

    ردحذف
  7. جد اشتقت لغيمه تسعه كلامك جميييل وملهم واكيد طبعا كعادتك تعطين دافع اكثررر للنجاح وان الانسان يغير من نفسه اكثررر 👌🏽😘
    الله يوفقك ويرزقك قد مانتي مصدر الهام لغيرك 💞

    ردحذف
  8. يالله وش كثر انتي جميله:(
    لي 4 سنين وانتي تلهميني؟؟
    متصوره ق1
    فعلا ممتنه لك :)

    ردحذف
  9. 💜💜💜💜يالله قد ايش الهمتني هالتدوينة

    ردحذف
  10. جمال الكلام كلمات بسيطة وتدخل القلب قريت الكلام ب السريع لانو عندي شغل بس دايم وقت فراغي ادخل المدونة حقك ، جد احس ب البساطة والاناقة والجمال ، انا قد ما اقدر اكون إيجابية بحياتي وحياة الي حولي ����
    برإڤو عليك ي قورجس إستمري ��

    ردحذف
  11. استمري بنشر الإيجابية والإلهام والحلو انه كلامك مو مجرد تنظير هو واقع وتجربه تلهمينا فيها أنا كمان بغير حياتي وأول خطوة سويتها عودت نفسي أقوم الصباح فعلاً فيها بركة ونشاط وإنجاز

    ردحذف
  12. كلامج جميل شيوم. 💙💙 وايد محتاجة أسمع هالكلام. بديت فالرياضة من كم يوم عشان أرتب نومي وان شاء الله مستمرة عليها للأبد. 😩💙 الله يسعدج 💙

    ردحذف
  13. شيوووووم مره نفسي اجلس معك و اتكلم معاك في كل هذي الاشياء... حاسه بطاقة إيجابية كبيــــــره...
    فعلا لمتى ننتظر للاسبوع الجاي والا بكرا و الا فلوس والا مساعدة.. ابغا اسوي شي رح ابدأه بنفسي و كل شي رح يتسهل بعدها...
    فـ 2016 ماكتبت أهداف و لا خطط.. كتبت بس كلمه وحده POSITIVITY و ربطتها لكل جوانب حياتي.. و الحمدلله صرت اشوف نتائج الايجابية هذي و مكملة عليـها 💖

    ردحذف
  14. جدا استمتعت وانا اقرا جد اتمنى اسوي رياضه وأصير صحيه بس دايم اقول بجمع لبس وأدوات وأبدا بس للاسف هذا كله حجه !! تدوينه رائعته وتلامس القلب والواقع

    ردحذف
  15. كلامك مليئ بالطاقه الايجابيه وجاري التنفيذ😍❤️

    ردحذف
  16. يا زينك وزين التدوينات العفويه،
    بسبب نونتي ما ارقد الا خمس ساعات تقريبا في الليل واصحى الصبح واخلاقي قافله ادور النوم، واحيانا اصحصح الفجر بس اقول خليني ارقد شوي واصحى بعدين واذا صحيت كسلت 😩 بس الحين تحمست مع كلامك يصير لو صحيت الصبح يمديني اتعلم الانتاج اللي ماجلته لي مدري كم واهتم بنفسي شوي

    ردحذف
  17. يسلمووو كتير حبيبتي تدوينتك رائعة

    ردحذف
  18. اول مره اكتب لك كومنت بس فعليا التدوينه جت بوقتها و عطتني طاقه ايجابيه يومي كان سئ جدا اسوء يوم مر علي كنت محبطه بعد ما قريت كلامك تغير الاحساس شكرا لك من القلب شكرا لكل كلمه كتبتيه ما يوفيك الشكر والله على الاحساس اللي وصلني من كلامك فعليا اشوفك اخت لي و محفزه الله يسعدك دنيا و اخره

    ردحذف
  19. بتمنى اتغير للاحسن .. اول خطوة دائما سهله عندي مشكلتي بالاستمراريه ..
    كلام حلو كنت بحاجتو😢❤

    ردحذف
  20. من قبل لاتكتبين هالتدوينة كنت بكل صباح انتظر سنابك على احر من الجمر عشان احس بالدافعية وان في ام مثلي وعندها مسؤلياااأت تقدر تحقق اهدافها رغم كل شي وجت هالتدوينة تترجم وتوصل صوتك لنا وتلامس قلب كل انسانة تتمنى تحقيق احلامها 😘

    ردحذف
  21. كلامك جميل وفيه من الصحه كثير لكن احب اضيف انو الاهداف لازم ينحطلها وقت فعلا اذا ماحددلنا لها وقت معين مارح نعرف مقدار نجاحنا..لكن نقسم الهدف الى اهداف صغيره على مدى قصير.. وان شاءالله انا اقدر اصير انسانيه صباحيه زيك و هو فعلا اهم عنصر للنجاح. موفقه عزيزتي

    ردحذف
  22. أشتتقت ل غيمة 9 ، وكلامك هنا جد احسها من القلب ووصل للقلب <3 .
    كلامك ألهمني جداً واعطاني طاقه ايجابيه كبييييرة ، أكثر شيء أثر فيني سالفة الأعذار
    كنت عارفه هالشيء من قبل بس كنت محتاجه أحد يصحيني أو ينبهني عليه ، اذا كنت عازمه ع فعل شيء راح اسويه بدون لا أختلق أي اعذار تمنعني عنه .
    شكررراً شكراً شكراً شيوووم ربي يسعدك ويوفقك .

    ردحذف
  23. ممتنة لكي يا اختي اتمنى تتوفقي في كل امور حياتك انا اول مره اقرالك تدوينة بس ضايفتك انستقرام و امانه احس بألفة و روحك و صلتني بكتاباتك و كأني اعرفك الله يديم عليك السلام و السعادة و السرور

    ردحذف
  24. تدوينة ملهمة ✨💜
    لازم ارجع لها على رواق ☕️

    ردحذف
  25. تدوينة ملهمة ✨💜
    لازم ارجع لها على رواق ☕️

    ردحذف
  26. الله يسعدك يارب و ان شاء الله تكمليع نظامك كذا و افضل
    ان كنت مهتمه با اكلي و رياضتي قبل الزواج
    لفتره طويله و بعد زواجي تغير الوضع بحجة م عندي وقت و دراسه و زواج بس قررت انظم وقتي و انجز اكثر

    ردحذف
  27. كلامك جميل خصوصاً اخر فقرة🌷🌷

    ردحذف
  28. تدوينه جميله وعفويه وتدخل القلب،، وفعلا سناباتك الصباح تعطيني نشاط احبهاااا واحرص اني اشوفها .. لانك ام مثلي وعندنا مسؤليات كثيره والشاطره الي تقدر ترتب وقتها وتنجز .. يعطيك العافيه👏🏼

    ردحذف
  29. الله يسعدك دائماً وابداً ويعطيك على قد نيتك على طوول يااارب ^_^

    ردحذف
  30. ما شاء الله تبارك الرحمن عن جد كلامك يوصل للقلب💜🌷 بعد هالالهام والتحفيز وبعد هالتدوينه الرائعه قررت انجز الاشياء اللي مأجلتنها الى اشعار غير معلوم 🙈😂💔

    الله يسعدج ويوفقج ان شاء الله 😘🌷

    ردحذف
  31. ️شكرًا لكِ بحجم السماء،،

    عزيزتي وصلتني تدوينتك اليوم ع الايميل و( جت في وقتها) خاصة موضوع الخوف ،،

    أنا أم لأربعة أطفال وأدرس الماجستير بلغة غير لغتي الأم طبعاً تجاوزت الاختبارات السابقة بتفوق لكن فيني خوف من تعدي هذي المرحلة وبدت ثقتي بنفسي تهتز لكن زي ما ذكرتي هو في العقل فقط وإن شاء الله راح تتغلب عليها لان بالمناسبة ذكر اليوم كمان ياسر موضوع مناسب الى حد كبير مع ما ذكرتيه وهو حمية الدماغ ،، قد يفيد من طرد بعض الافكار السلبية لينطلق كل واحد منا ويكتشف قوته ،،
    https://m.youtube.com/watch?v=diPSagLiZGY&feature=em-uploademail


    ️شكرًا لكِ مرة أخرى ��

    ردحذف
  32. ما شاء الله عليك و على عقليتك المتفتحة الله يهني زوجك و عيالك و اهلك فيك و إن شاء الله اتجاهك للأعلى دائما ( التدوينة لمست قلبي بشكل! خصوصا إني قريتها بصوتك ) يعطيك ألف عافية

    ردحذف
  33. كلامك جميييل ����.. كلامك عن الخرف هذي انا �� لان اخاف اتوظف لان مجالي تدريس وكان تدريبي فاشل كتعامل مع اداره المدرسه و للاشراف �� اخاف اعيد التجربه و اتوظف و تتعب نفسيتي و مخليه الوضع كذا بسبب الخوف ��

    ردحذف
  34. اثررررت كثير فيني التدوينة 💔🌚
    يا الله ، احسّك تتكلمين عني .. 😫
    احس برجع أقرأها مرة ثانية وثالثة .. لين توصل مخي مو بس قلبي
    🙈

    ردحذف
  35. شيوم انا مرا احوووبك جد انتي سعاده انا غيمه ٩ الهام ليا لما سافرت على امريكا كانت رحلتي كلها صباح وانا جم الشباك حق الطيارة كلها غيوم وكان ينزل تلج قليل قعدت ادعيلك من قلب السما لما يكون فيها غيوم تزكرني فيكي جد سعاده الهام يسعدك ربي زي ما تسعدينا انا دايمن بدايت دراسه يجيني شعور احباط دكاتره جدد الكتب بتكبر ويكتر الصداع الجدول يتلخبط تزبيط انتي الوحيده الي دايمن الجئلها بهادي الأوقات تدوينت غيمه تسعه سعاده الله يسعدك ويوفقك ويحققلك كل الي تتمني ويصفيلك بالك

    ردحذف
  36. قورجس احبك 💜
    تدرين عيوني تدمع لما قريت كلامك احس كنت محتاجه هذا البوش لي يمكن شهر ضايعه جدياً ضايعه ومختنقه ومو عارفه هدفي ومتشتته وعندي اشياء مو قادره انجزها
    احس اشعلتي شي بقلبي احبك من زمان وللحين احبك
    تابعتك من ثالث ثانوي والحين بتخرج وانا متاخره سنه يعني احسبي 💜💜💜 الله يسعددددك
    فجاه رحت ابوس ولدي وحسيت الدنيا حلوه 💜💜💜

    ردحذف
  37. احب هذا النوع من التدوينات .تدوينة ملهمة ربي يوفقك و ييسر امورك

    ردحذف
  38. ممتنة لك ولكلماتك الجميلة ، شجعتيني كثيير وان شاء الله اصير مثلك واتغلب على " مالي خلق " يارب ♥♥♥

    ردحذف
  39. مرررره جميله التدوينه الله يسعدك

    ردحذف
  40. حبيييت حروفك وﻻمست القلب واضح انها من قلبك وحبيت اكتب لك من دون مراجعة الكﻻم وبدون توقف
    عندي حكمه في الحياه دايم اقولها اذا تبغين تسوين شي حتسويه اقصد اذا فعﻻ فعﻻ صادقه ومن قلب تبين تسوين كذا حتسويه ﻻ الوقت حيمنعك وﻻ شي ثاني حيمنعك اذا كانت ارادتك قويه والاراده تجي من القلب وايمانك به اﻻحظ نفسي دايم اذا حبيت اسوي شي ابدأ اسويه على طول اما اذا مثﻻ قرأت الرياضه حلوه الكذا مفيد ومصدقه هالشي بس مو نابع مني ومو من قلبي فراح القى مليون عذر وعذر عشان امتنع عنها او اطمن قلبي واريح ضميري اني صدق ودي اسويها بس مو قادره بس الحقيقه انو مو من قلبي
    متى مابدأت احط لنفسي اعذار اراجع قلبي ومشاعري هل فعﻻ صادقه في المخطط الي في عقلي هل فعﻻ ابي انجزه واول كلمه لقولها لنفسي انتي كذابه اعترفي ﻻ تضحكين على نفسك . يمكن اكون مررره بالغت في هالشي ما ادري بس شخصيا 80% تقريبا من اي شي نفسي انجزه وما انجزته اعتقد السبب مني ﻻ الوقت وﻻ الناس وﻻ شي هم السبب
    في فتره كنت فعﻻ فعﻻ مضغوطه وامور كثير ﻻزم انجزها كنت اﻻقي وقت للرياضه صح اقل من قبل بس مازلت امارسها وبعد هالفتره قطعت الرياضه ماكنت مشغوله بنفس ذيك الفتره الغريب في الموضوع اني اﻻقي اعذار لنفسي واعذار صادقه ولو مثﻻ اقول لأحد يقول فعﻻ مافي وقت مايمديك صعبه ﻻ تلومين نفسك بس داخلي يقول ارادتك خفت ماصار يهمك الموضوع وقل ايمانك فيه .
    لو عندي نفس فلوس فلانه بنجح .. لو عندي وقت فلانه بعيش حياتي .. لو عندي زوج فلانه بسوي وبسوي
    وغيره من الاعذار .. اول شي نحط ببالنا الحياه مو سفر وتسوق ومطاعم .. صح انها تخلي للحياه متعه بس اعتبرها ناتج
    حبيييييييت كلمة (نااااتج ) قرأتي الي في نفسي اختصرتي مليون جمله في كلمه .
    شكرااا شيووووم استمتعت بحروفك 💕🌹

    ردحذف
  41. بالعكس .. حمدلله انك كتبتيها .. كل شي يدخل القلب ووصلتني كل كلمة كتبتيها .. من بعد مااتخرجت من الجامعه في خطط فبالي كثير اشياء مأجلتها كثير بس ليا يومين أردد جملة لنفسي ( افعل اكثر مما تتقول ) وتدوينتك جات فوقتها �� شكرا لك شيوم ❤️

    ردحذف
  42. معليش شيوم
    كلامك هذا المفروض أطبعه وأبروزه على مكتبي
    شقــــــــد أنتي ملهممممممة

    ردحذف
  43. كل كلمة كتبتيها لامست قلبي. فعلا انا وحدة من الناس اللي الخوف من الفشل مسيطر على اغلب قراراتي احس حياتي موقفه بسبب تفكيري في الفشل! الفشل وسيلة للتعلم مو عيب ولا شي مستحيل حدوثه ولا هو شي ممكن نتحكم بحدوثه بالعكس ممكن نستفيد اكثر لمن نفشل في شي معين من اننا ننجح فيه على طول بس الانسان اكبر عدو لنفسه. احاول دايما اني ماخلي شي يوقفني وبعدت عن كل الناس السلبيه اللي سواء تحبط او سلبيتها تأثر عليا وحقيقي حياتي اتغيرت, عرفت نفسي اكثر ثقتي بنفسي زادت حبي للحياة وتفاؤلي وثقتي بالله زادت سرت اشوف كل يوم كل يوم في حياتي مفيد ومليان امكانيات وقرارات واهداف وانجازات وتقديري للاشياء الصغيرة اللي ممكن في نظر غيري بسيطة او ولاشي زادني ثقه ورضا والحمدلله اننا انخلقنا مسلمين نشكر ونحسن الظن بالله وندعي ونتوكل ونعزم الامر ونوصل لاحلامنا مافي شي مستحيل على الله بس للاسف الحواجز اللي الانسان يحطها لنفسه هيا اللي تمنعه من الوصول. كلامي ممكن يكون ملخبط بس اتمنى اني عبرت بطريقة صحيحه عن اللي ف بالي وشكرا على موضوعك الجميل والله يوفقك دائما وابدا.

    ردحذف
  44. تدوينة ترفع المعنوية والنفس والإيجابية لفوووووق والهام جميل شكرا جزيلا اختي شيماء

    ردحذف
  45. ماشاء الله الف الف الف مبروك البنوته توووق الله يرزقك بره وصلاحه صرااحه انا كنت اتابعك من ايام حملك بالجميله ديم واحبك واحب تدويناتك بس للاسف انقطعت بسبب ظروف وتدوينتك هذي رجعت فيني الحياااه الله يجزاك الجنه والله يبارك لك بدنياك ويوفقك دنيا واخره

    ردحذف
  46. راح يكون لك الفضل بعد الله في كل بنت كنتي السبب في تغير حياتها للافضل وتكون وصلت لهدفها شكرا من اعماق قلبي على لطافت كلامك وقوته المؤثره وشكرا على الدافع القوي الي عطيتيني عشان اغير حياتي اول مره اقرا كلام يلامس قلبي .. دبمتي بخير وسعاده

    ردحذف
  47. ي عسولة مااعندك انستقرام فيس سناب اي مكأن نتعابعك فيه

    ردحذف

التعليقات الجميله ♥♥

Blogging tips