الجمعة، أكتوبر 30، 2015

مفضلاتي الفاشونيه والميك اب وغيرها للخريف + جوله في محل ايترو ♥


السلام عليكم وَ رحمه الله وَ بركاته  ،
تدوينه اليوم من التدوينات الي احبهاا ومن زمان ماتكلمت عن مفضلاتي ، فاليوم بيكون شوي مميز لأنه عن مفضلاتي مخصصه لفصل الخريف ، المفروض هالوقت يكون خريف عندنا ههههه! بس كأنه الجو بدا يتحسن ولا ؟

الوان الخريف والشتاء مافيها اختلاف كبير ، بس بالنسبه لي الوان الخريف تكون ادفى بشوي من الشتاء بس بنفس الوقت فيها من روح الصيف ، هل ضروري اتبع الموضه واغير من الوان لبسي ومكياجي ؟ مو ضروري بس اللبس خاصه السوق الالوان اوتوماتيك بتتغير وبتكون ع الموضه الدارجه وبتضطرين تغييرين الوان لبسك ، وخاصه كل سنه الالوان تتكرر مثل (الرمادي - العنابي - المسترد او لون الخردل - الاوف وايت وغيره ) اما بالميك اب احس الانسب تختارين نفس مود اللبس يعني ماينفع تلبسين فرو وشي ثقيل مع روج فوشي صارخ ، لان الفوشي يوحي بالصيف والوان فرحه والشتاء العكس الناس تميل للخمول وتدور الدفا فهي نسبه وتناسب ، ذكرت هالموضوع لان قبل طرحته وجت اعتراضات "فااضيين نشتري لكل فصل لون!)

بالعكس اغلب الي بعرضه عندي من قبل بس هي مسأله اختيار وتعرفين شنو المناسب لك وللفتره نفسها .. 





اول شي الشوز وانتو بكرامه ، اخترته من ماركه ايترو ، الدارج مثل مو عارفين الشوزات الرياضيه او السنيكرز ، كثير حابتها وخاصه من شانيل او ديور او ال في ، اغلب البراندات منزلتها حتى زارا والدو بس الي لفتني بإترو غرابه الالوان والشكل وتداخل الخامات ، كثير يمكن مايعجبه الشكل بس حبيت انع غير تقليدي او منتشر بإختصار مميز


احلى جزء البايثون او جلد الحيه ، والشامواه بعد فيها خلاها شتويه بامتياز .. في الوان صورتها بالسناب لو متابعيني مثل الاورنج والكحلي ، بس حبيت بهذي اقدر البسها مع كذا ستايل لان الوانها ماتحدني ، مع فستان رمادي قصير ، مع بنطلون ابيض او جينز ، مع تنوره وسيعه قصيره ، طبعا اتكلم عن اللبس السبورت وزياره لصديقاتك مو العزايم او شي رسمي 


صوره اوضح للشوز ، هو من الكولكشن الجديد ومنزلين ٣ قطع بس ، وانا اخذت وحده باقي مقاس ٣٨ و٣٩ ، بس قالولي يمديك تختارين ويطلبونها لك .. بالنسبه لمحل ايترو  كنت بزياره لهم قبل فتره وتعرفت على تاريخهم بشكل افضل ، بكتب عنه بأخر البوست 


ثاني قطعه هي الشنطه الكروس من توري بورش ، كولكشن الخريف والشتاء يعني يمديكم تحصلونها ان شاء الله ، انا اخذتها من لندن ، ومتوفره بس بجده بالسعوديه وموجوده الماركه بالكويت والامارات وقطر اتوقع ، وتقدرون تطلبون اون لاين بعد .. هذي الماركه احبها اسعارها مناسبه والجوده حلوه وغير هذا شكلها وموديلاتهم جمييله ، على فكره اكيد بتقولون هذا صليب ، حبيت اطمنكم هذا مو صليب لان مصممه الماركه توري نفسها امريكيه يهوديه واللوقو مستوحى من اول حرف الT


اللون بالواقع اغمق وشتوي بامتياز ، ومن داخل تشيل تشييييل وسيعه ، الكروس مريح ومرات امسكها بيدي مثل الكلتش ، باختصار هذي اكثر شنطه استخدمها هالفتره ، انصح فيها وسعرها بعد حلو "شوفو موقعهم للاسعار" 


المناكير ومادراك ما المناكير ، اغلب الالوان ممكن تستخدمينها للخريف بس هذي اختياراتي ، من اليمين :
زويا : اسم اللون كولا لونه احمر مايل للاورنج غريب لونه .. هالماركه مظلومه لان الوانها بطله! اخذتها من معرض والكواليتي مو ذاك الزود لان تخزينهم فاشل جدا ، بالضبط مثل ايسي واو بي اي ، كلهم ممتازين اذا استخدمتهم بصوالين بس اذا اشتريتهم القى اللون منفصل او خربان لان تخزينهم سيئ خرب المنتج فانتبهو للنقطه هذي.

انقلوت الحب: هالماركه شهادتي فيها مجروحه وخاصه المناكير جدا احبها ، هذا رقمه ٣٨٦ ، لونه بين البنفسجي والوردي الباهت.

ايسسي : الماركه هذي جمميله بس مثل ماقلت سوء التخزين يخربها للاسف ، رقمه ٦٢٤ واسمه اوفر ذا توب ، لونه اسود مايل للرمادي وفيه شيمر خفييف ، مره حلو! 


الارواج :
اتوقع كلنا نتفق ان بالشتا الارواج حلاتها غامقه وتميل للاحمر ، مع اني مو صحبه مع الاحمر بس اذا لقيتي اللون الصح بتعشقييينهم .. من اليمين:

توم فورد : اسم اللون كازابلنكا لونه روز "السواتش تحت بالنص" التغطيه بيرفكت وكريمي ، بصراحه اللون ماقدر اقول مميز وسعره مره اوفر على روج ، بس حابته وحابه احساسه على الشفايف مايلصقها ولايختفي بسرعه وكأنه زبده بالضبط.

ماك : الكل عارف ماك مايحتاج شهاده مني ، بس هاللون دايم اذا حطيته انسأل عنه ، اسمه كابتيف captive ، تركيبته ساتين ، لان شفايفي جافه فهذي احلى تركيبه بالنسبه لي ، تميل للمطفي بس بنفس الوقت فيها ترطيب او قلوس خفيف مثل مو شايفين بالسواتش تحت "اول واحد يمين" لونه كرزي مايل للوردي ويتغير على حسب الاندر تون ، حاولت اوضح اللون بالتصوير بس لان اليد الي صورت عليها تميل للون الاصفر كثيير فمطلع اللون غير ، عشان كذا جربوه قبل لاتشترونه ، عن نفسي هاللون من مفضلاتي الي احبهاا،

فورايفر ٥٢: هذي الماركه المانيه مره منتشره عندنا بالكويت ، بس هنا تنباع اتوقع بطيبه ، الوانها خيال! وثباتها موو طبيعي ♥ ، اللون هذا تكلمت عنه زمان ورجعت استخدمه ونسيت شكثر كنت احبه ، لونه عنابي بس مايل للبنفسجي ، حسيت فيه من ديفا ماك ، بس هذا على احمر شوي ، بس يظل للشتاء والخريف بطل مع مكياج عيون ناعم!

من اليمين ماك - توم فورد - فورايفر ٥٢


شدو على شكل قلم من ميك اب فور ايفر ، لونه ذهبي مايل للنحاسي ، حيل حلو وثابت ، احبه كبرايمر قبل الشدو وممكن تحطينه بروحه وتدمجينه باصابعك اذا حابه او تحطين لون بني فاتح على الاطراف ، التعامل معاه سهل جدا ، رقمه ME-50

البلشر من ماك اسمه جينجرلي ، تكلمت عنه بالسناب وكثار اشتروه ووروني شكثر حبوه! شكرا لمشاركتي الحب ههههههه ، اللون بالصوره غير عن الطبيعه ، بالطبيعه مشمشي مايل للبني ، هو شيرتون تغطيته خفيفه بس تقدرون تزيدون الطبقات وهذا الي حابته فيه استخدمه للصباح ولليل


عنايه الجسم ، اعتمدت على روائح الكيكاو مع الصندل عود من مولتن براون ، ماتخيلت اني بحب هالمجموعه! اخذتها للسفر وصرت استخدمها شبه يومي مع اني ماحب المنتجات المعطره لكل يوم ، الريحه جميله والثبات ماقدر احكم صراحه لان ماستخدم المجموعه كامله معاه ، بس الحمام وانتو بكرامه تظل فيه الريحه ..

بالنص الشور جل ، وابشركم ديم فاتحته وكتت نصه :((( على اليمين كريم اليدين نفس الريحه الترطيب حلو ، اليسار مقشر للجسم سايز السفر ، بريحه عنبر خيااااال ، جد حبيييت وناويه اخذ الحجم الكبير ، الماركه بشكل عام روائحها حلوه بس يعيبها سعرها المرتفع تقريبا وانه موجود فقط بالنخيل مول على حد علمي


عطر دماسكس او دمشق من الجزيره للعطور ، مكوناته العود والعنبر والباتشولي وروز بيري ، يعني كللل الي احبه بعطر واحد!♥ ريحته سويت بس ع ثقيل شوي ، الي يحب ذوقي بيعجبه العطر .. من زمان مشتريته بس باقي ماستخدمته ان شاء الله تحصلونه.


الجزيره للعطور موجودين بالرياض قاليري وبنوراما وابحثو عن افرعهم الثانيه بدول الخليج.


اهم شي بالاجواء البارده "اي اتخيل ان عندنا برد وامطار p:" مشروب الكوفي لاتيه مع السينمون ، احب الطعم السبايسي بالبرد وبيكون مشروبي المفضل هالفتره هو مع الزنجبيل طبعا 

،

نجي لايفنت ايترو ، للامانه انا مو من عشاق هالماركه لاني اميل للبس الساده والالوان الهاديه ، ايترو يشتهر بنقشاته "البيزلي " حسيت تنفع للكبار اكثر من البنوتات والي بعمري ، بس تغيرت نظرتي لهم واني ممكن احصل قطع تنفع لذوقي ..


كانو حاطين شخص يصنع شنطه قدامنا! مره حبيت واستمتعت بالفقره هذي وكيف شغلهم متعب .. 


تمنيت اصور الاشياء الي عجبتني بس المحل كان زحمه وصعب اني اصور ، بس حبيت الشنط الي لون واحد ومنزلين منها احجام صغيره ، بشكل عام اكثر شي لفتني الشنط والسنيكرز♥ كان في وحده تشرح لنا عن الماركه وجايه من ايطاليا مره لطييييفه وشرحت لنا ان سبب غلاء بعض القطع لان الاقمشه من تصميمهم وتنفيذهم بعكس الماركات الثانيه الي تستورد الخام من مصانع والشنط الي تشوفونها بالصوره هذي بالاساس قماش يتم تحويله لجلد وانا ع بالي طباعه من زمان ههههه!


حبيت الهاي هيلز واللوفر ع اليمين تنفع للي رجلها عريضه بتناسبها ، لان نقشتهم ناعمين ، من الاشياء الي شفناها كولكشنات الخريف والشتاء ، شفناها ع الايباد وكيف عندهم اشياء شبابيه كثييييير بس الوكيل يختار على ذوقه والي متوقع يمشي بالسوق ، فتلاحظون اغلب الي عندهم يناسب مجتمعنا لان كله اكمام طويله وفساتين طويله .. حبيت الكيب عندهم بعد شكله انيق جدا!


ايترو موجود بالمملكه ، شوفو مدونه ولاء (هنا) ومدونه سلطانه (هنا) مصورين صور اكثر لقطع ايترو
ان شاء الله تكونون استمتعتو بالبوست ، قولولي شنو اكثر شي عجبكم ؟

اشوفكم ببوستات ثانيه! 

هناك 22 تعليقًا :

  1. حبيت الشوز ♥♥ وفعلاً لون الكروس عجييب عندي بلان اني اقتني وحدة من توري بورش بنفس اللون بس الموديل يختلف .. تتهني عزيزتي ♥♥♥

    ردحذف
  2. انا ذبت في التفاصيل الحلوووة .. حبيييت كل كل كل شي😍😍😍.. السنكرز جداً مميز وتداخل الخامات أعطاه فخامة 🌟.. الشنطة سوبر واااو حبيييتها وعجبتني ولو نزلت عندنا مابتردد آخذها لونها وتفاصيلها الداخلية أسرتني .. المناكير والأرواج حاااجة ثاااانية ❤️❤️❤️يطلع مني قلوب .. والمشروب في كوب سي اتش له لذة أخرى 😋😋🌸👸.. العطر تحمست أشمه لاني مثلچ أحب كل هالمكونات ولو عجبني بقتنيه أكيد .. انتي ذووق وايليغنت الله يبارك لج في مشترياتج وملبوس الهنااا😘😘😘

    ردحذف
  3. الكروس اعجبتني
    روج ماك مررره نفسي اجيبه لأختي عاد نفسها بهاللون و مالقيته وبس شفته تذكرتها

    تتهني يا جميلةة

    ردحذف
  4. لما شفت بسنابك انك نزلتي تدوينه جيت ✈️✈️✈️
    حمستيني للشادو الكريمي حق فور ايفر
    وترا تدويناتك بالنسبه لي ❤️❤️❤️❤️
    الله يسعدك شيووم ..��

    ردحذف
  5. حبيت مفضلاتك حلوة و مميزة <3
    و التصوير خطيير ماشاء الله <33

    ردحذف
  6. جميلة اختياراتك انا أحب الواني تكون مناسبة للفصل اللي احنا فيه طبعًا اكثر شي أحدد فيه الالوان والميك اب هو الشتاء ، لأن الصيف طويييل ونضطر نلبس كل الالوان والاشكال والموديلات ماشاء الله
    ومارمة اترو احبها جدًا
    شكرًا قورجس

    ردحذف
  7. احب تدويناتك يختي ..
    يا بختنا فيكم ♡
    شنط الكروس بودي .. صايره هوس عندي من سنتين
    كل مانويت اشتري شنطه ألتفت لهم بالذات لو كانت بنية او تان !! 💔
    المشكلة من كثر ماانا متعلقة فيهم ؛ للحين مدقرة ماشريت شنطة
    لأني احس صرت متكررة .. ماقدرت اتحرك من هالنقطة ..
    روج كابتيف علي يصير من الألوان البنفسجية !
    عندي من فترة بس مو كثير استخدمه مو حابته مرة !
    احيانا ازيد عليه رتوش حمرا يصير واو
    و بس

    ردحذف
  8. احب تدويناتك يختي ..
    يا بختنا فيكم ♡
    شنط الكروس بودي .. صايره هوس عندي من سنتين
    كل مانويت اشتري شنطه ألتفت لهم بالذات لو كانت بنية او تان !! 💔
    المشكلة من كثر ماانا متعلقة فيهم ؛ للحين مدقرة ماشريت شنطة
    لأني احس صرت متكررة .. ماقدرت اتحرك من هالنقطة ..
    روج كابتيف علي يصير من الألوان البنفسجية !
    عندي من فترة بس مو كثير استخدمه مو حابته مرة !
    احيانا ازيد عليه رتوش حمرا يصير واو
    و بس

    ردحذف
  9. كلك ذوق شيوم قلدتك في اشياء كثيره وانا مغمضة ��

    ردحذف
  10. حبيتهم تتهني فيهم حبيبتي ♥️

    ردحذف
  11. ذوقك بالعطور مشابه لي ..بجرب العطر ان شاء الله ❤

    ردحذف
  12. حبييييت لون المناكير 💔 تدوينه ممتعه😌😻

    ردحذف
  13. تدوينة جميلة جداً ،، عجبني لون الشنطة كثيييير
    عندي زيه بس في بوك
    والمناكير والأرواج تجنن ، كل شي ينطق جمال تبارك الرحمن
    تتهني بأغراضك يا ذوق

    ردحذف
  14. حبيت اختياراتك الزوق
    وصفك للبلشر يحمس يبالي اجربو
    حلوه فكرة ادخال عرض صنع الشنطه للايفنت ✨

    ردحذف
  15. تدوينه رائعه ومتكامله حبيت كل شي

    نحبك شيوم مبدعه

    ردحذف
  16. السلام عليكم
    حبيبتي نبي منك طلب لو ممكن
    انا حواجبي رسمتهم حلوا لكن في شعر زئد يعني انا مش منظف حواجبي لان نمصة انا منبيش فيريت لو عندك فكرا نخفي بيها شعر زائد غير تشقر يعني بي ميك اب ياريت تساعديني لاني مبتدئة في ميك اب

    ردحذف
  17. التدوينة حنونة استمتعت وانا اقراها بالتوفيق شيوم

    ردحذف
  18. حبيبتي تتهني بأغراضك ممكن اسالك سوْال إِيش الأغراض اللي تنصحي بشرائها من امريكا في البلاك فرايداي

    ردحذف
  19. بوست جميييل كالعاد, حبيييت الارواج هذي الالوان المفضلة عندي والشنطة او ماي قااااد مره تجنن ماشاءالله حجمها مره باين حلو ولونها اجمل شي ف الحياة 3>
    keep up the good work, I wish you all the best! xo

    http://sparklingcoffee23.blogspot.com/

    ردحذف
  20. جد حتى انا مو مره مع هالماركه
    شكرا ع الطرح 🌞🌼

    ردحذف
  21. شكرا علي هالتدوينه الرائعه

    ردحذف
  22. من وصف عطر دمشق ومن شكلو جاني فضول اجربو
    يعطيكِ العافية ♥️♥️

    ردحذف

التعليقات الجميله ♥♥

Blogging tips