الأحد، أكتوبر 11، 2015

مقارنه بين فيتامين ماكسي هير وفيتامين برايورين ، اي واحد رجع الحياه لشعري ووقف التساقط ؟ ♥


السلام عليكم وَ رحمه الله وَ بركاته 
تدوينه اليوم كثير ينتظرها ومتحمس لها فإن شاء الله ماتخيب توقعاتكم
حطيت بأخر الموضوع "الخلاصه الي حاب يقرا زبده الكلام وبس"
،
الفيتامينات والمكملات الغذائيه مهمه بس ماتغني عن الأكل الصحي والحياه الصحيه بشكل عام
دائما لما اروح لدكتور اطلبه يصرف لي فيتامينات والأغلب يرفض! يقول اخذي الناقص من اكلك واشربي ماي وسوي رياضه
المعادله بسيطه جدا جدا وسهله بس الا مايكون للكسل او ظروف الحياه لها دور ويصير تقصير من هالناحيه



حطو ببالكم مافي شي سحري ينقلك من حاله للثانيه
اخذت نوعين من الفيتامينات بفترات معينه من حياتي وكل وحده لها تأثير
دايم اصعب شي اكتب عنه ريفيو منتجات البشره والشعر! لأنها ترتبط باللايف ستايل حقك
مثلا هل تنامين صح! هل عندك ضغوطات! هل تسوين رياضه او لا
كل شي له تأثير وهذا الشي يمنعني اكتب عن العنايه بشكل كبير
لأن كثير اجرب ومافي شي خارق الا:
رياضه + اكل صحي + ماي + عنايه بسيطه
دايم الاحظ ان كل ماصار اكلي صحي واشرب ماي احصل نتيجه رائعه! 
فتحصلون نتائج مختلفه لنفس المنتج من شخص للثاني وبعد تقبل الجسم له دور او لا 



فيتامينات الشعر ( ماكسي هير - Maxi-Hair )
بعد ولادتي صبغت شعري ونصحتني الدكتوره ماقطع فيتامينات الحمل بس طبعا شيوم لازم تعاند لان شعري كان قوي وكثيف بعد الولاده ، صار بعدها تساقط فضيع قلت بس خلاص راح اقرع ههههههه ، من هنا بديت اخذ ماكسي هير ، طلبته من موقع اي هيرب ، الي عندي بلس في نوع اخف بس انا اخذت اقوى شي البيوتين فيه 5000 ، ومعروف فوائد البيوتين للشعر والاظافر والبشره بشكل عام ، المميز بالحبوب هذي انها نباتيه وتعتبر الافضل من ناحيه نسبه الفيتامينات فيها من خلال مقارنتي لها بفيتامينات ثانيه.

طبيعه شعري:
شعري طبيعته كثيف وقوي لكن سهل التأثر اذا اهملته وصبغته بسرعه يتضرر ، قبل ماخذ الفيتامينات كان اكلي عادي بس التساقط كبير وهو طبيعي بعد الولاده وصبغته مره وحده.


استخدامي:
حبتين باليوم ، مو محدد مع بعض او لا ، بس انا كنت اخذهم مع بعض ، مذكور تاخذين ٤ حبات بس حسيت الكميه كبيره! اخذتها لمده شهرين.

تجربتي:
اول شي لاحظته باسبوعين صارت اظافري اقوى بس مو كثير ، شعري بدا يخف التساقط فيه ، انا اخذته لمده شهرين ، بس خلصت الشهرين شعري صار قوي الحمدلله ، طلع لي بيبي هير بالمقدمه لما امشط شعري مالاحظ كميه كبيره تطيح بالعكس التساقط الطبيعي ، لاحظو ان بالفتره هذي اكلي كان صحي واشرب ماي قد ماقدر واسوي ماسكات للشعر ، واسوي رياضه بفترات متقطعه ، يعني نظامي كان صحي وهذا اثر على نفسيتي وشعري بنفس الوقت ، واكيد الفيتامينات لها دور كبير.

ملاحظات:
ماخلصت العلبه كامله ، بس المفعول استمر معاي فتره حلوه ، ريحت شعري من الصبغات والاستشوار ، طعم الحبوب سيئ وريحتها مو حلوه ، ابدا ماقدرت اكملهم بس النوع الاقل من هذا ريحته وطعمه مقبولين، بس برجع اطلبهم لان شفت نتايج حلوه معاها ، واخذي الحبوب على شبع واشربي معاها عصير او حليب لتغيير الطعم.

معلومات أكثر عن الحبوب بمدونه صديقتي منى ( هنا )
سعر المنتج ٦٨ ريال ، رابط المنتج ( هنا ) ماتحصلونها الا اون لاين للاسف

فيتامينات الشعر (برايورين - Priorin) 
من أشهر فيتامينات الشعر المنتشره بينا لأنها متوفره بالصيدليات ، حمسني عليها ان كثيررر اعرفهم يمدحونها ، هو مستحضر عشبي اهم محتوياته خلاصه بذره الدخن وزيت بذره القمح ، يساعد على تخفيف تساقط الشعر وتكسر الاظافر 

 طبيعه شعري:
قبل ماصبغه كان التساقط خفيف ، صبغته مرتين ورا بعض وسويت تريتمنت البروتين وسويت رينساج ، بعدها بدا التساقط حتى الي تسوي شعري سألتني ليش شعرك تغير ماكان كذا! المهم الفتره هذي بالذات كنت مشغوله مع محلي ومشغوله بكذا مهمه عندي ، فحياتي بالاساس كانت ملخبطه.


استخدامي:
حبتين باليوم قبل ماأنام ، في كثير ياخذون حبه بعد الغدا وحبه بعد العشا ..

تجربتي:
اخ بس! بالبدايه لاحظت اظافري صارت قويه! وصارت بيضاا وماتتكسر او تنكسر من نص الاظفر وهذا الشي اسعدني جدااا وخاصه النتيجه بانت من اول اسبوع ، شعري خف التساقط بنسبه بسيطه ، انا اخذت الفيتامينات برمضان تقريبا ووقفتها فتره العيد ورجعت لها لمده شهر ، لاحظت اول شي ان رائحه جسمي تغيرت مع اني اخذ شور يومي واستخدم الديودرنت ، ولاحظت ايضا طلعت حبوب بيضا بجبهتي صغااااااار ، قلت يمكن من ميك اب استخدمه جديد بس صديقتي سألتني اذا طلعت لي حبوب لان انا وياها اخذنا الفيتامين بنفس الوقت ، وقالت لي انها ماجربت شي جديد غيره ، وفي متابعه لي تقول ان دكتورتها نصحتها ماتاخذ برابورين لانه تغير الهرمونات بالجسم ، يمكن عشان كذا غيرت ريحه الجسم وراحت بس وقفت الكورس العلاجي ! الحبوب خفت بشكل كبير بعد ماوقفت بعد .. انا ماضمن لكم رده فعل كل الاجسام بس من خلال بحثي محد تطرق للنطقتين هذول مادري هل مالاحظو او ماحبو يتكلمون عنها او بالاساس ماواجهوها ..

ملاحظات:
ماقدرت اكمل الكورس العلاجي وقفته قبل عيد الاضحى لان منظر الحبوب ازمني! اكلي ماكان صحي للامانه وشربي للماي قليل بس مع هذا ماطلعت لي الحبوب الا فتره الاستخدام ، صديقتي تقول انه اثر ع شعر جسمها بس انا مالاحظت وهي مالاحظت تغيير برائحه الجسم ، بس هي استمرت بالشهر الثاني وتقول الحبوب خفت عن نفسي ماقدرت اكمل واكتفيت بعلبه وحده ، طعم الحبه جدا مستساغ وعادي وحجمها صغير يعني قابله للبلع.

سعر المنتج ٢٥٠ ريال تقريبا .. مكان الشراء صيدليه بوتس


الخلاصه
مقارنه بين برايورين وماكسي هير:

بالنسبه للحجم برايورين اصغر واسهل بالبلع ، ماكسي هير من زمان ماخذتها ماذكر تماما اذا سببت لي اثار جانبيه
بس متأكده انها ماسببت لي رائحه بالجسم ، لاحظت مع برايورين ان شهيتي مفتوحه وخاصه للحلا اكثر مادري لو له علاقه بس حبيت اذكر هالنقطه ، ماكسي هير ماطلعت حبوب بوجهي بعكس برايورين ، شعري تساقطه صار اخف مع الماكسي هير بس اظافري صارت احسن مع برايورين مع اني ماخلصت الكورس كامل ، ماطلع شعر زياده بجسمي من خلال استخدامي لكل النوعين ، الافضل تسوين فحص قبل تاخذين اي شي وتستشيرين الدكتور ، بالماكسي هير نظام حياتي كان افضل وهذا الشي ساعد بنتائج ايجابيه ، بالنهايه برجع اخذ ماكسي هير لان شفت معاه نتايج احسن ، وتذكرو الفيتامينات مو شي معجزه اذا اكلك واللايف ستايل وعنايتك بنفسك ماكان بمستوى جيد ماراح تستفيدين بشكل واضح.

ان شاء الله تكونون استفدتو ،، اشوفكم ببوستات أجمل 



هناك 31 تعليقًا :

  1. و عليكم السلام و رحمة الله ..
    الله يسعدكي على هالموضوع .. لانه ان شاء الله راح اولد قريب و جالسة ادور فيتامينات كويسة للشعر اقدر استخدمها بعد ولادتي ان شاء الله .. لانه مثل مانتي عارفه تساقط الشعر بعد الولادة بشهرين قريبا مرا يخوف .. فبحاول اخفف منه قد ما اقدر ..
    ارتحت لماكسي هير اكثر و ان شاء الله ناوية عليها .. خصوصا انه لاحظتي تحسن مع انه مذكور تاخذين 4 حبات و اكتفيتي باثنين و لاحظتي نتيجة ما شاء الله .. طبعا بحاول قد ماقدر انتبه للنقاط الاساسية اللي ذكرتيها اللي هي المويه و التغذيه و الرياضة ...الخ
    عسى ربي يكتب لكي الاجر و لا يضيع لكي تعب ..

    ردحذف
  2. يعطيك الف عافيه يَ شيييييوووم 💜
    التدوينه جميله ويارب قريب اتحمس واخذ ماكسي هير 😩❤️ لان بدأ شعري يتسااقط بكثره 🚶🏻💔
    شكراً لك من القلب 💜🌸

    ردحذف
  3. يعطيك العافيه يَ شيييووم 💜
    التدوينه جميله 😍 ويارب اتحمس قريب واطلب ماكسي هير 😩 لان بدأ شعري بالفتره الاخيره يتساقط بشكل فضيع 💔😩🚶🏻
    شكراً لك من القلب 🌸💜

    ردحذف
  4. يسعدلي مسآك
    يعطيك العافيه عَ الموضوع المفيد هذا ...
    أنا كنت على وشك اشتري البرايورين ولاكن موضوعك خلاني اركد شوي 😅😅 لانه اساسا صاير اللايف ستايل حقي سيء للغايه 😩😩💔 اولا اعدله ومن ثم اقرر هل اخذه او لا ... شكراً ع الطرح 💋🌹

    ردحذف
  5. اخيرا💜💜 انا تقريبا بكمل شهر من اخذت برايوين وماحسيت بفرق يذكر ابد .. اما بالنسبه لريحة الجسم ف في الفتره الاخيره لاحظت ان في ريحة بجسمي واعرق بسرعه 😭توني اعرف ان من هذا شكلي بوقفها خلاص 💔 ملاحظه بعد حتى ريحتهم قويه مع البول وانتم بكرامه🌚عذرا عالشفافيه بس حبيت اذكر تجربتي 🚶🏻يعطيك العافيه شيوم ❤️❤️

    ردحذف
  6. فعلا انا لاحظت حبوب بوجهي وفيها كمية زيوت لان الحبوب الي تطلع واضح انها دهون علشان كذا وقفت استخدامها مو نعالج مشكله بمشكلة ثانيه جدا سيئه بالنسبه لي

    ردحذف
  7. اولاً اشكرك على هذا البوست الرائع 😍❤️
    ثانياً انا استخدم ماكس هير اعتقد هو الافضل من بين الفيتامينات الي اخذتها من قبل بس يحتاج وقت طويل عشان تظهر النتائج واعتقد انه يحتاج ايضاً الى نظام غذائي جيد حتى تظهر نتيجه بشكل افضل

    ردحذف
  8. ماتصدقين قد ايش حابه اشكرك على هالبوست اللي فادني بشكككككل ❤️
    اللي يقهر ان توني اكلت حبة برايورين على اساس بقرا بوستك وبنام 🌚
    وفعلاً رائحة جسمي تغيرت وكنت جداً مستغربه ليه على اني استحمامي يومي واستخدم ديودرنت + الحلا اشتهيه بشكل غريب على اني مو من عشاقه

    جد جد شكراً وضحتي لي اشياء ابداً ماكان يطري لي انها منه ❤️❤️

    الله يسعدك ي رب قد ماتفيدينا ❤️❤️

    ردحذف
  9. انا استخدمت البرايوين وكانت النتيجه جدا جميله بس استخدمت معها امبولات للشعر وكانت حالتي مثلك تساقط مابعد الولاده والنتيجه كانت رائعه لكن واجهتني مشكله انه الدوره ماوقفت معاي لمدة شهر ونص تروح يومين وترجع وقريت انها تلخبط الهرمونات فتركتها قبل اكملها وعالجت عند دكتوره والحمدلله انتظمت الدوره .. ورجع التساقط بعد فتره بشكل فضيع لاني صبغت وسحبت فطلبت من اي هيرب حبوب البيوتين 10000 وماشيه عليها فيه تحسن بس للاسف لو اتركها كم يوم رجع التساقط

    ردحذف
  10. ماكسي هير قد جربته وكتبت عنه ريفيو بمدونتي
    جداً حبيته ولاحظت نتيجه على البشرة بعد

    يعطيك العافية ياعسل على البوست ..

    ردحذف
  11. حمستيني لماكسي هير
    انا اخذت علبتين مت برايورين اممممم مالاحظت الا ان التساقط خف شوي مع اني كنت استخدم وقتها زيت للتساقط

    شكراً شيوم

    ردحذف
  12. شكرا شيوم ع البوست اللي محتاجته من زماااان استفدت م ن قراته ومتحمسه اجرب شي يفيديني ويطلع معي بنتيجه كويسه

    ردحذف
  13. اهلين الغلا .. يعطيك العافيه على المقارنة .. انا استخدمت برايورين - Priorin .. اول اسبوعين حسيت باعراض جانبيه كلها اعراض نشاط الغدة .. مع العلم الغدة عندي طبيعية مافيها شي.. الاعراض كانت اتوتر واحس برجفه و وقت النوم احس بـ حر وما انام كثير .. واذا احد دخل علي او اي صوت اسمعه وانا نايمه انقز متخرعه .. شي مو طبيعي وربي .. وكان وزني 49 نزل خلال هالاسبوعين وصل 44 تقريبا.. ورحت المستشفى وقالوا اعراض نشاط بالغدة ووقفتها فترة ورحت كشفت على نفسي الحمدلله الغدة رجعت طبيعية .. ممكن غيري تناسبه لكن انا ماناسبتني ..

    ردحذف
  14. البوست جا بوقته انا حالياً استخدم برايورين صار لي كم اسبوع لاحظت شعرالجسم يطلع بسرعه
    و عندي جفاف في بشرتي وشفايفي بشكل مو طبيعي بس مو متاكده منه او لا رغم اني اشرب مويه كثير ومن تمر دقيقه احس حلقي ناشف ماسمعت عنه مدح كثير لكن اخذته من باب التجربه وبخلص العلبه اللي عندي
    وبحكم اذا استمر او لا :؟
    يعطيك العافيه شيوم على هالبوست

    ردحذف
  15. جربته وجميل جداااا حبيته ولاحظت نتيجه على البشرة بعد افادك الله

    ردحذف
  16. شكرا ربي يسعدك ع الموضوع .. انا هالفتره محتاره ودي اخذ بيوتين لانو شعري صاير خفيف و بصعوبه يطول بس حيرتي باني حاليا اسوي جلسات ليزر و اخاف يأثر :( سؤالي لك هل لاحظتي انو شعر جسمك كثر ؟؟ اللي مخوفني هذي النقطه

    ردحذف
  17. شكرا ربي يسعدك ع الموضوع .. انا هالفتره محتاره ودي اخذ بيوتين لانو شعري صاير خفيف و بصعوبه يطول بس حيرتي باني حاليا اسوي جلسات ليزر و اخاف يأثر :( سؤالي لك هل لاحظتي انو شعر جسمك كثر ؟؟ اللي مخوفني هذي النقطه

    ردحذف
  18. روووعه ماكسي يطول الشعر
    ويقووي الاظافر ماتتكسر بسرعه
    اخذته من هالمتجر بسعر رخيص،بنات 0500553089 واتس

    ردحذف
  19. مساء الخير ... من زمان و انا ابغى اجرب فيتامينات Maxi hair و قررت اجزم يوم قريت التدوينة طلبتها من أسبوع و أمس استخدمتها لاحظت انو لون البول و انتي بكرامة تغير و صار اغمق مع انو اكثر من شرب المويه ، هل هذا طبيعي؟ صار لك نفس الشي؟ :( ، و غير كذا انا الحين اسوي جلسات ليزر هل يأثر على النتيجة؟
    و شكراً الله يسعدك 🙊💘💘💘💘

    ردحذف
  20. من جد البرايورين بكل مكان احصل الناس تتكلم عنو
    حجرب اول شي الماكسي هير لان مشكلة التساقط عندي في تزايد :(((
    شكراً شيوم ♥️♥️

    ردحذف
  21. طيب ماكسي ينفع للمرضعه ؟

    ردحذف
    الردود
    1. ضروروي المرضعة تستشير الطبيب

      حذف
  22. سلام عليكم
    حبيت أسال هل ﻻزم اسوي فحوصات قبل أخذ الحبوب؟مع إنوا عندي اكثر اﻻعراض إللي تخليني أتناول الحبوب؟
    وإيش هي الفحوصات؟
    و إذا سويتيها ممكن تكتبي كم كلفتك؟

    ردحذف
  23. سلام عليكم
    حبيت أسال هل ﻻزم اسوي فحوصات قبل أخذ الحبوب؟مع إنوا عندي اكثر اﻻعراض إللي تخليني أتناول الحبوب؟
    وإيش هي الفحوصات؟
    و إذا سويتيها ممكن تكتبي كم كلفتك؟

    ردحذف
  24. شكرًا على التدوينة الرررااااااائعة ..
    البرايورين فعلاً يطّلع لي ريحة بجسمي ، ومثل ماقالت وحدة من البنات اللي فوق سبب لي توتر وقلق نوعاً ما ، إن شاء الله بطلب ماكسي هير قريباً ����

    ردحذف
  25. من يوم ما اخدت البرايورين طلع شعر بوجهي ونفخو خدودي بشكل مش طبيعي

    ردحذف
  26. من يوم ما اخدت البرايورين طلع شعر بوجهي ونفخو خدودي بشكل مش طبيعي وطلعلي الف حبه على الجبين

    ردحذف
  27. من مكونات البريورين جيلاتين خنزير وبقر مخلوط انا شفت المكونات بره بامكانك تزري موقع اجنبي وتتاكدي بنفسك بس هنا في السعوديه مو كاتبن بس بره انا قريتها بنفسي وكنت ابي استعملو حسب نصيحه الدكتور وهونت الله الغني عنه

    ردحذف
  28. ضيقتوا صدري عاد مب رخيصه وصدق احسها حل حلو لشعري

    ردحذف
  29. محتارة هيا ولا حبوب برفكتيل

    ردحذف
  30. احترت بينها وبين بيرفكتيل

    ردحذف

التعليقات الجميله ♥♥

Blogging tips