الاثنين، أكتوبر 05، 2015

تجربتي ومشترياتي من موقع ماك وموقع بيوتي دوت كوم ♥♥


السلام عليكم وَ رحمه الله وَ بركاته 
شلون عيدكم وعطلتكم ان  شاء الله انبسطتو فيها ؟ ♥
انا اخذت اجازه جميله ورجعت كلي حماس للتدوين ولكم اكيد
قبل فتره طلبت اون لاين من موقع ماك الرسمي وموقع بيوتي دوت كوم فتدوينه اليوم بتكون عن مشترياتي وتجربتي مع هالموقعين بالذات



من اليمين برايه من نارس الي حبيته ان فيها حجمين صغير وكبير تنفع للاقلام والارواج
سعرها ٦ دولار = ٢٣ ريال
رابط المنتج ( هنا )

الي جنبه عينه من ماك جت مع الطلب برايمر للوجه بيس فيزاج 


هيلثي ديودرنت مزيل عرق ، مره انتشر الفتره الاخيره وتحمست اطلبه واخترت بريحه الفانيلا بس بعد ماطلبت صديقتي اميره قالت انه فاشل! فشكرا اميره p: بس مايمنع نجربه يمكن يختلف من شخص للاخر
سعره ١٤ دولار = ٥٢ ريال
رابط المنتج ( هنا )


مرطب جسم ماركه يو-بي ، عليه تقيمات حلوه هو منتج ياباني من اكثر المنتجات مبيعا باليابان مصنوع سنه ١٩٥٧
الحلو فيه مافيه الوان اصطناعيه وخالي من العطور ، من اكثر المنتجات الي متحمسه اجربها ، بس لاحظت سعره غالي شوي مقارنه بحجمه الصغير!
سعره ٢٥ دولار = ٩٤ ريال
رابط المنتج ( هنا )

الي ورا نفس الماركه ، سقط سهوا ماصورته صور واضحه بس هو شراب مخصص للاكواع وكعب الرجل ، المميز فيه مصنوع من ماده كيتوه سان الي تمتص البكتريا المسببه للروائح وتساعد ان الجسم يمتص الكريم كامل بدون ماتوسخين شي وخاصه ان الكريم يو-بي ثقيل شوي ، نجرب ونوافيكم بالتجربه ان شاء الله :)
سعره ١٣ دولار = ٤٨ ريال
رابط المنتج ( هنا )


من اليمين فرشاه اوربن ديكاي مصنوعه مخصصا لباليت اوربن ديكاي الي فيه برونز وهايلايتر وبلش ، بس انا حبيتها لان ابي شي عملي اخذه بالسفر او بطلعات سريعه ، فرشاه وحده لها جهتين الي فوق للهايلايت والي تحت للبرونز والبلشر ، بس بشكل عام لاتتقيدون بالفرش تقدرون تستخدمونها بأكثر من طريقه ابتكرو!
سعرها ٢٦ دولار = ٩٨ ريال
رابط المنتج ( هنا )

اليسار برايمر سماش بوكس الحب الجديد ♥ ، استخدمته بالعيد شي جميل يسوي شي حلو للميك اب بجربه اكثر واكتبلكم عنه ان شاء الله ، هو برايمر بس مائي يكون بخاخ والي شريته حجم السفر ، اتمنى لو كل الماركات تسوي احجام صغيره منها نجرب ومنها تنفع للسفر :\
سعره ١٥ دولار = ٥٦ ريال
رابط المنتج ( هنا )


فيرست ايد فاب فايفز ، مجموعه من افضل منتجات فيرست ايد مبيعا بحجم السفر يعني صغيره ، في المجموعه هذي غسول وجه ومرطب وبادز تعطي البشره نظاره ، مره احب المجموعات تعطيني فرصه لتجربه منتجات اكثر بسعر حلو ♥
سعرهم ٣٠ دولار = ١١٣ ريال
رابط المنتج ( هنا )

اليمين مرطب شفايف تقيمه عالي والريفيو عليه حلو ، لان المرطبات الي عندي بدت تخلص فحبيت اجربه
سعره ١٢ دولار = ٤٥ ريال
رابط المنتج ( هنا )


من اليمين باليت تارت الجديد ، مره مره حلووه الوانه ، ولحظه صمت للباكيج الجمييييل ♥
صوره من النت
الوانه بنيات على بنفسجيات فيه المطفي وفيه اللمعه ، هو للوالده طالبته لان تبي الوان جديده بس بسرقه منها قريب واكتب عنه ترقبوني p: 
سعره ٣٨ دولار = ١٤٣ ريال
رابط المنتج ( هنا )

اليسار ماسكرا توفيسد بيتر ذان سكس ، موجوده عندنا بس مغيرين اسمها لبيتر ذان لوف ، مادري لو نفس التركيبه بس مرات المنتجات الي مصنوعه لامريكا جودتها تختلف عن المنتجات المصنوعه لنا ، وخاصه لوريال بس نجرب ونشوف ان شاء الله
سعره ٢٣ دولار = ٨٦ ريال
رابط المنتج ( هنا )



الحب الحب! زمان توفيسد نزلو باليت اسمه بلاك بوك اوف برونزر ، كان فيه ٨ الوان برونز اشهر ماصنعت توفيسد بحجمها الكامل ، بس كان ليمتد وخلص تمنيت اشتريه لان احب الباليت الي يجمع كذا شي ، غير شكله الحلو! وهالايام توفيسد نزلت نفس الباليت بس حجم صغير ليمتد بعد ، مره مرررره حبيته وماصدقت وصل وجربته جميل! واحجام البرونزر صغيره ، عندي عقده من الاحجام الكبيره احس ماتخلص هههه ، بس هذا جدا مناسب حتى كحجم لان القديم حجمه ضخم جداااا
صوره له من داخل 

صوره من النت
سعره ٤٩ دولار = ١٨٣ ريال
رابط المنتج ( هنا )


هذي عينات عطوني الموقع بعد ماشريت منهم كثر خيرهم ! :\



نجي لموقع ماك! كذا مره اجربه ومريح بالتعامل جدا ، بتكلم عنه بشكل مفصل بس اخلص ،  من اليمين مزيل ميك اب بسايز السفر 
سعره ١٠ دولار = ٣٧ ريال
رابط المنتج ( هنا )

اليسار فكس بلس بحجم صغيرون! 
سعره ١٠ دولار = ٣٧ ريال
رابط المنتج ( هنا )


اقلام حواجب من ماك اخذت درجه سبايكد ، جربتهم مرره حلوين ، كثير قالولي انه يخلص بسرعه يمكن لانك تضغطين عليه بقوه بس بجرب واقولكم كم اخذ معاي ان شاء الله ، الحلو فيه ان لما رسمت ع الجلد بان طبيعي ولونه فاتح مثل ماحب ، اكره الحواجب الغامقه
سعر الحبه ١٦.٥ دولار = ٦٢ ريال
سعر المنتج ( هنا )


ارواج ماك ، طلبت ٤ ارواج لي وللوالده ، طلبت فيلفت تيدي - فيوكس - ٢ كابتيف ، للان مادري ليه طلبت كابتف حبتين! لان عندي منه قبل :\ بس اللون مره حلو انصحكم فيه دايم انسأل عنه ..
سعر الحبه ١٧ دولار = ٦٤ ريال "صدمه صح ؟"
رابط الروج ( هنا )


من اليمين روج نارس طلبته من بيوتي دوت كوم او بالاحرى جا بالغلط ، للحين مادري شلون شريته صراحه هههه مع اني اراجع الطلب اكثر من مره! ولونه فوشي بعد بس لما استخدمته لونه فوشي بارد فحبيييته الحمدالله وتغيير حلو اسمه نيفر ساي نيفر ♥
سعره ٢٦ دولار = ٩٨ ريال
رابط المنتج ( هنا )

اليمين اسفنجه للوجه من ماك ، ابي استخدمها مع اللوس باودر لتحت العين بطريقه البيكنق !
سعرها ١٢ دولار = ٤٥ ريال
رابط المنتج ( هنا )

موقع بيوتي دوت كوم
http://www.beauty.com

هالموقع المميز فيه انه قسمين ، قسم بيوتي دوت كوم فيه الماركات المتوسطه للغاليه من اربن ديكاي \ تو فيسد \ نارس وغيرهم
عندهم ميك اب ومنتجات شعر وجسم وبشره وعطورات واكسسوارات مثل الاستشوار وغيره
وفيه قسم اسمه درق ستور
http://www.drugstore.com
هالموقع نفس الصيدليه بالضبط فيه فيتامينات وادويه وميك اب رخيص مثل ميبيلين وريل تكنيك ونيكس ولوريال
اي شي تشترينه من الموقعين ينحط بسله شراء وحده وتشحنينهم مع بعض
بس المشكله وين! ثاني مره اطلب منهم ، لما تخلصين طلب وبعد كم يوم يقولك المنتج الفلاني غير متوفر او فجأه يتكنسل
مايسحبون فلوس الا بعد مايشحنون المنتج ، بس فكره اني احط شي بالسله والقاهم مكنسلينه ترفع الضغط :\
وثاني عيب بالموقع ان مايشحنون السلع مع بعض يشحنونها منفصله
ومايقولون لك الا بعد الدفع ..

ع العموم انا اشحنها لصندوق امريكي والشحن بالغالب يكون مجاني لاني اشتري فوق ال٣٥ دولار
مرات الشحنات تتأخر فحطو هالشي ببالكم اذا مستعجلين او لا!

خدمه العملاء سيئه من تجربتي قبل سنه ، هالمره ماكلمتهم ابدا فمادري اذا تغيرو او لا
ماياخذون تاكس على المنتجات بعكس موقع ماك ياخذ ضريبه!

انا اشتري بفيزا سعوديه عادي بس احط ال Billing و ال shipping نفس العنوان الامريكي بالضبط ويقبلون فيزتي

موقع ماك كوزمتكس
https://www.maccosmetics.com

مره احبه وهذي ثالث مره اطلب منهم ، غير انه ارخص من المحلات كل شي متوفر فيه
اغلب الارواج والمحددات المخلصه احصلها ، تعامل سهل ولامره اضطريت اتواصل وياهم بخصوص طلبيتي
بسرعه المنتجات توصل لصندوقي الامريكي ، ماتوقع يشحنون برا امريكا
بس عيبهم ياخذون ٧٪ ضرائب ، ورافعين الاسعار
طلبت ٢٠١٣ الارواج كانت ٥٦.٢٥ ريال\ ١٥ دولار
طلبيتي بشهر ٤ ميلادي الي فات ٦٠ ريال\ ١٦ دولار
وطلبييتي هالشهر ٦٣ ريال\ ١٧ دولار
يعني دولار زياده كل مره!!
بس مع هالزياده تضل ارخص وافضل من محلاتنا ..

الحين نجي للشحن للسعوديه
شحناتي كلها ارسلها للورلد شيب
سعر الشحن كامل ١٩٥ ريال
انا اشوفه مناسب لسبب واحد .. مشتريه راحه بالي لان تجاربي بالشراء من سيفورا الي هنا جدددا سيئه 
غير تعاملهم الي مدري شنو  ..٣ مرات ورا بعض يعطوني منتجات غلط 
غير جملتهم "مخلص" والمنتجات الي ماتجي لسوقنا بالاساس

فانتو قيسوها لو تستاهل تطلبون من النت او لا ..
وهذي تجربتي بالتفصيل مع الطلب بالنت
بالنسبه لشرح الطلب دايم اقول المواضيع بالنت مكفيه وموفيه ماتستاهل اعيد كلامهم فابحثو بنفسكم
وان شاء الله تستفيدون

أشوفكم ببوستات ثانيه 



هناك 24 تعليقًا :

  1. حبيت ♡
    انتي نفسي احب هالموقعين ؛ خصوصا بعد ما سيفورا صار ما يقبل يشحن لبريد وسيط ..
    احب موقع ماك لما يسوي شحن ثاني يوم محاني 😁
    مدري وش احس فيه ؛ بس كل مرة لازم اشتري اذا سوا هذا العرض
    مشترياتك تشووق عليك بالعافية وتتهنين فيها
    كابتيف عندي .. بس مو حابته مرة لازم ادمجه مع اي لون ثاني !
    يمكن الحين لا جا الشتا ارجع له
    بس سؤال .. تشحنين طردك للسعودية بأي شركة شحن ؟ دي تش ال ؟؟

    ردحذف
  2. ياجمال مشترياتك ماشاءالله 😍 انا جربت الديودرنت 😅 غير فعال على الإطلاق 😩 حتى بدون ما تسوي شي .. اعطيته كذا فرصة وما حبيته ابد .. بس يمكن على قولتك يختلف من جسم لآخر .. و كثير متحمسة اجرب منتجات فيرست أيد بيوتي 😍 نفسي اجرب الترا ريبير كريم و الكريم و الماسك الليلي و البادس حقت الوجه .. ان شاء الله قريب راح اطلبه .. حبيت منتج الشفايف .. بما ان شفايفي جافة و تتشقق بسرعة تحمست اجربه 😍 روج كابتيف من اجمل الارواج الشتوية اللي تناسب النهار و السهرة كمان .. و قلم حواجب سبايكد اتعب اقلك عجيب ك لون و تركيبه و ثبات و كل شي .. بس عيبه يخلص بسرعة😔 الله يهنيك بمشترياتك و يبارك لك فيها يارب 😘

    ردحذف
  3. يعطيك الف عافيةةة احب تدوينات الشوبينق اونلاين مررره استمتع اشوف ايش تطلبي من برا واهتماماتك انا كمان مريحه راسي عندي كل فترة اجمع الاشياء اللي ابغاها من ماك وغيره واطلب من نوردستروم جربيه كمان

    ردحذف
  4. انا معك في اني اشتري راحه بالي
    مره الي هنا بغض النظر عن كلش مو موجود التعامل الخايس 💔

    ردحذف
  5. تتهني بالمشتريات.. مستريات جميله.. وحبيت فكرة ان المنتجات صغيرة تساعد عالتجربة والسفر...عجبني ترتيب البوست والتصوير ما شاء الله.
    ودي💗

    ردحذف
  6. حبيت المشتريات
    بس انا ما اطلب اونلاين احسه عوار راس احب اشتري شيء من قدامي افضل

    ردحذف
  7. حبيييت مشترياتك تتهني فيهم ياجميلة
    بس عندي سؤال موقع ماك تشحنين من حسابك الامريكي في ورلد شيب؟

    يعطيك العافيه شيوم ^^

    ردحذف
  8. مشتريات العافية ان شاء الله
    تتهني يا قمر <3

    ردحذف
  9. انا احب اطلب من موقع نورديتستوم و تو فيسد مرره جميلين و اكثر الماركات موجودة و اسعار تجنن مقارنة بالمحلات اللي عندنا و غير اكثر الماركات مو موجودة عندنا و التاجرات يرفعون السعر بشكل كبير و كذا استمتع مررره 👌❤️❤️❤️و مرره دخلت موقع بيوتي و درق سيتور خبصت بالطلب و مو كل شيء موجود

    ردحذف
  10. جمييييل احب التدوينات حقت الشوبينق عشششق طحت بغرام باليت تارت مرررة تجنن الوانه ..شكلي هالمرة بجرب اطلب من ماك لان مو معقول اسعارهم اللي عندنا دبل الدبل.. مشككورة شيوم ع تعبك وتصويرك وكل شي تسوينه لنا go ahead❤️

    ردحذف
  11. تتهني فيهم شيوم مشتريات جميله

    ردحذف
  12. يعطيك العافية
    وتتهني فيها يااارب

    ردحذف
  13. البوست اللي انتظرته بفارغ الصبر 😍😘

    كنت متحمسه للبوك تبع توفيسد 😰وما اشتريته عشان حجمه. دحين لما شفت صغير وانا الريدي مشتريه برونزرين 😓

    مدري اقول راحت عليا ولا اشتريهم ولا كيف.


    مشكورة قورجس.


    ياليت لو حتجربي برش زويفا تكتبي لنا تجربتك وايش اخذتي منهم وكيف طلبتي او من اي موقع.
    للان محتارة بينها وبين سيقما. 😇والله يسعدك دايما زي ماتسعدينا يارب

    ردحذف
  14. لا ارواج ماك موصدمن هنا اللي حرامه زياده لانو سعرها الحقيقي٦٠ ريال سعودي

    ردحذف
  15. يعطيك العافيه ياشيوم حبيت التدوينه
    بس بنبه على شغله سعر روج ماك 70 ريال لانه وقت ماتسوي شيك اوت يحطون ضريبه على كل منتج وتختلف من منتج للثاني مثلا الارواج يزيدون دولار وشوي ومع سعر الشحن بعد للسعوديه يصير السعر اغلى فما يفرق عن المحل كثير الا اذا شريتي كميه كبيره بتحسين بالفرق

    ردحذف
  16. البوست جميييل عزيزتي وعليك بالعافيه يارب
    المشتريات أكثر من رائعه حبيت باليت توفيسد وكمان منتجات فريست ايد بالذات مرطب الشفايف عليه كثيرر ريفيوهات عليك بالعافيه وننتظر ريفيوهاتك 💜💜

    ردحذف
  17. شيوم انا طلبت من الدرق ستور عالبريد الامريكي طبعا بس كيف اعرف اناها وصلت عندهم وشلون توصل عندي ؟

    ردحذف
  18. قد اشتريت فيكس بلس الحجم الصغير و ارواج من الموقع ماك و تطلع ارخص من السوق و ان شاء الله موقع بيوتي اطلب منه

    ردحذف
  19. الله يهنيك بمشترياتك
    حابه افهم نقطه انتي قلتي( لما تخلصين طلب وبعد كم يوم يقولك المنتج الفلاني غير متوفر او فجأه يتكنسل
    مايسحبون فلوس الا بعد مايشحنون المنتج ) يعني تدفعين قيمه السلعه ويكنسلون طلبك ؟ او انتي باقي ماخلصتي طلب بس حاطتها بالسله ؟

    ردحذف
  20. عليك بالعافيه حبيبتي
    مرره فرق الاسععاار !!
    بعد هالبوست قررت اني ما راح اشتري الا من موقع ماك
    خصوصاً ان فوق فرق السعر تعاملهم مررة سيء ؛ما احب اجمع بس اكثر من مرة اروح ومايلقوني وجه /:

    شكراً شيوم D:

    ردحذف
  21. جميله مشترياتك
    جربي مره ثانيه تشتري منتجات ماك من نوردستروم
    يشحن دايركت للسعوديه 👍

    ردحذف
  22. ؤائع اشكرك لانى جدااا استفدت

    ردحذف
  23. مرحبا انا دخلت موقع ماك بس ماعاد حصلت مثل قبل الاسعار مختفيه وماحطو سله حاطين اختاري اقرب متجر مادري هم مكنسلين الطلب اون لاين؟ حتى الروابط الي حطيتيها اذا ضغطتها يعطيني فشل ؟

    ردحذف

التعليقات الجميله ♥♥

Blogging tips