الأحد، ديسمبر 14، 2014

صيري أميره وصيري انيقه بفستان واحد وطلتين! Lati fashion | هديه لكم




السلام عليكم وَ رحمه الله وبركاته .. 

بأخر بوست عن تنسيقاتي كثير طلبو اجيب منيكان وابدا اصور التنسيقات بشكل اوضح وطبعا ماصدقت خبر وجبت المنيكان تراراراا D: احذركم البوست طوووويل بس استمتعت وانا اكتبه :)))

حبيت أبدا ببوست التنسيقات بتعاون مع بوتيك لاتي! 
بوتيك لاتي موجود بالرياض بمملكه المرأه وأكيد كثير عارفينه وعارفين مستوى شغلهم ، الجديد انهم فتحو موقع اون لاين
Lati Fashion


www.lati-fashion.com

لصاحبته لطيفه ، حبيت القصه اللطيفه الي ورا افتتاح محل لطيفه  "ترا احب التفاصيل واعتبرها الهام فتحملوني شوي p: "

تقول لطيفه فكره المحل بدت لما اختها الي  تدرس بنيويورك رجعت ومعاها فستان من ماركه ماسمعت عنها من قبل وبسعر جدا منطقي وبالمقابل الفستان جدا جميل على اختها وابدا ماتعطينه هالسعر! وانبسطت كيف قدرت اختها تجمع الاناقه مع الراحه وبسعر معقول ، بعد فتره رجعت اختها بفساتين اكثر من ماركات مختلفه جديده ، ففكرت اذا انا وخواتي نبحث عن فساتين سهره باسعار مناسبه نقدر نخليها كلاسي وبنفس الوقت نقدر نخليها كاجوال اكثر ومرتبه اكثر فأكيد في غيرنا الكثير! ومن هنا جت الفكره. 

لطيفه حبت تخلق بيئه جميله مريحه وانيقه للمتسوقات ، شي نفتقده بالسعوديه وخاصه الرياض لان في كثير محلات لملابس سهره بس مو تجربه ممتعه تخوضينها ، انا شفت محلهم جدا انيق وجدا مهتمين بالتفاصيل وخاصه غرفه التبديل ، تطلع من المحل بنفسيه مرتاحه وبخيارات كثيييره من الغالي والرخيص بتحصلين الي يناسبك!

طيب الي مايقدر يروح الرياض ؟ يقدر يحصل على نفس التجربه وهو بالبيت!
جد ابدا مو مجامله موقعهم بروفشنال ومتعوب عليه ، حبيت اهتمامهم بالتفاصيل كثيير ، حبيت انهم يقولون اذا تسوقتي you are not a lone يعني يبون يخلقون الجو كأن معك شخص يساعدك مثل المحل تمااماا .. 

،



دايم انصح البنات يطلبون اون لاين صراحه لان دايماا السوق فاضي هههه! بس كثير يتخوفون وخاصه لو مامعاهم لغه ، فخطوه حلوه ان المشاريع العربيه تتحول لمحلات الكترونيه ، نفس اللغه ونفس العمله يعني العمليه صارت اسهل واجمل

في واجهه الموقع اسئله تساعدك على فهم شخصيتك والشي الي يناسبها ، هو مجرد اقتراح مو شرط تلتزمون فيه

طلعلي

وحطولي كم خيار ممكن يناسبني .. 

،

الشي الي جدا حبيته بالموقع التخصيص ،

تختارين الخيار الي يناسبك حتى تقللين البحث وتحددين احتياجاتك


خاصه لما يكون عندك ميزانيه معينه ، تحددين ميزانيتك تبدا من كم لكم ويطلعلك الخيارات
في كثير مواقع تسوي نفس هالخيارات بس بموقع لاتي سهلوها وخاصه باستخدام الرسومات احس في حياه بالموقع مو جامد!


لما قلت انو يحاولون يخلقون لك جو تسوق مريح وكأن شخص يساعدك هذا كان قصدي ..
ملاحظات لاتي الي بجانب كل فستان فيه شرح وملاحظات شخصيه منهم وكيف ممكن تنسقينه او يناسب اي جسم او اي لون وغيره.


بجانب كل فستان اسم الماركه وشرح عن الماركه ، انا جلست افتح ماركه ماركه اقرا عن تاريخهم
اعشق التفاصيل احس الموقع تثقيفي بنفس الوقت هههههه 

وتحت كل فستان شارات او هاشتاق ، حاطين انواع الاجسام الي تناسب لهم الفساتين
مثل ماقلت يساعدونك بكل التفاصيل صراحه ، لما تضغطين ع اي هاشتاق يطلعلك الفساتين الي مستخدمه نفس الخام او اذا اخترتي نوع جسم يطلعلك فساتين تصلح لنفس النوع ..

،

نجي للبارت الي يخوف البعض وانا منهم صراحه p:
هل بيجي الفستان مقاسي بالضبط!! طيب ممكن اوسع او ممكن اضيق كيف ؟؟


اول شي اذا اخترتي الفستان شوفي المصمم وادخلي على صفحه المقاسات
حاطين كل مصمم هل يناسبك تاخذين مقاسك بالضضبط او اقل او اكبر من مقاسك برقم؟


هذي صوره للمقاسات واذا مو متأكده ممكن تاخذين قياساتك بالسانتي ..

،

طيب اذا سويت كل هذا وطلبت وكل شي وطلع المقاس مو مضبوط ؟
ببساطه ترجعين طلبيتك يبدلونها لك بخطوات بسسيطه ، انا تحمست وطلبت مقاسي الغلط
وطلبت منهم يبدلونه وبدلوه بكل سهوله! وفي امكانيه للترجيع بعد الا الاكسسوارات ماتترجع

،

هذا فيديو سريع سويته لطريقه التسجيل والطلب مع ان الطريقه سهله بس للي خايف تشجع p:

- الاصوات بالفم مو موسيقى-

،

خلصنا من السوالف نجي لطلبيتي! 



الطلبيه وصلت لي ببوكس انيق جدا ، حبيت فكره لو بتهدين لاحد شي من الموقع بيجيهم ببوكس مرتب


هذي الورقه تجي مع الطلبيه اذا حابه ترجعين او تبدلين شي تتبعين الخطوات بالورقه بالضبط ، لاترمونها مره ضروريه


الفستان الي اخترته من المصمم الفرد سانج 


يمكن البعض يشوفه عادي ، بس انا اشوفه قطعه اقدر استثمرها!
اخترت فستان ساااده اقدر اغيره تماما باكسسوارات ، وبنفس الوقت انا جسمي
الساعه الرمليه فحسيته بيطلع حلو علي ، واكتشفت كاتبين بالموقع بيناسب الساعه الرمليه!
حبيته كثيير كثيير ع اللبس ، تعرفون القطعه الي تلبسونها مو هي تلبسكم ؟ هذا كان احساسي لما لبسته
انيق بسيط وبنفس الوقت محليني و مناسب جسمي ..

،

وحبيته زياده عشان الجيوب الي فيه p: ترا ابدا مو مبينه باللبس ونافش اكثر ع الطبيعه
خامته تفته بس تفته مرتبه مو رخيصه ابد .. حسيت الصور ظالمته ع الطبيعه جدا اجمل
*واضح اني عاشقته :$؟*
،

تنسيقي لفستان واحد بطلتين مختلفين
الطله الاولى : الاميره




الفستان معاه حزام ، حبيت بالطله الاولى البس عقد الماس نااعم ومناسب لقصه الفستان من قدام ، بتشوفون كل شي ناعم بالطله الاولى لان تخيلته لبرينسس مانبي زحمه :$


الاكسسوارات والشوز




التركيز كله ع الشوز لان لونه اخضر حبيته pop of color ماحبيت اكثر الوان باللبس حسيته اركز كذا 




الشنطه مو كلتش للاسف! بس حبيت فكره البس شنطه حجم ميني مع ملابس سهره ، والحلو بالشنطه اقدر اشيل السير الكروس وتصير تنشال بالبيد و ترا ع الطبيعه نقطططه الشنطه ولمعتها مناسبه للسهره!


الاكسسوارات اكتفيت بحلق ناعم واسواره وخاتمين الماس ، ممكن ممكن نلبس حلق اخضر مع اللبس يعطي فخامه اكثر ،
مثل كذا :

بس نسيت اصور الحلق الي عندي للاسف!





اللوك كامل ، ع اللبس اجمل بكثير :(



فتحه الظهر مو كبيره ابدا ،،

،
تفاصيل اللبس
الفستان : الفرد سانج ، موقع لاتي
الشوز: مونولو بلانك
الشنطه : دولتشي اند قابانا
الالماس : ماعرف هديه من الوالد 

الطله الثانيه : الانيقه الجريئه





هنا اوضح نفشه الفستان!!
الطله هذي اجرء من الي قبل وخاصه الالوان الي فيها متنوعه بس تدور حول بعض 



العقد من شفته بالموقع وعااااجبني!!
عندي حب للعقود الكبيره ، الستيتمنت نيكلس احسها تغيير اللبس ١٨٠ درجه ، يعني بس حطيت هالعقد تغير اللوك كامل
لونه ابيض باحجار كحلي واصفر





غيرت الحزام ل حزام ال في ، اللوك صار كاجوال اكثر بس ينفع لسهره بنفس الوقت ، احس ينفع لسهره عشا او مناسبه بسيطه مو زواج 



الاكسسوارات والشوز



الشوز اخترت لون كحلي غامق مستوحى من العقد يعني ماطلعنا برا الالوان وبنفس الوقت ماحس صار ممل اللبس



اخترت ساعه ذهبيه ناعمه مع اسواره ناعمه لان العقد كبير ماحبيت اكثر اكسسوارات





خاتمين سيلفر وذهبي بكل يد وحده وبس!

،
تفاصيل اللبس:
الفستان : الفرد سانج ، موقع لاتي
العقد : موقع لاتي
الحزام : الف في
الساعه : فالنتينو
الاسواره والخواتم : الف في
الشوز : زارا

اخر شي اخترته من لاتي هذا العقد ، ماقدرت مانجذب للونه الغريب صراحه!
مانسقت له شي للان ، بس لو انتو مكاني شنو تختارون : ) ؟



اخر شي الهديه وهي كوبون خصم بقيمه ١٠٪ من مشترياتكم 
رمز الخصم : igorgeousta10
اذا مو عارفين شلون تستخدمونه شوفو الفيديو الي فوق ..

وهذي اختياراتي ، فستان واحد ونتيجتين مايشبهون بعض ، حاولت اتحدى نفسي بالتنسيق واطلع من المألوف وخاصه باللوك الثاني وان شاء الله يعجبكم! الهدف من الموضوع ممكن يعطيكم فكره لقطع عندكم تلبسونها بشي يشبه للي ذكرته 

بالنسبه لتجربتي بالطلب من الموقع ، مثل موعارفين دايما اكتب رايي بصراحه ، التجربه جدددا سلسله وسهله ، خدمه العملاء فوق الممتازه ، يحترمونك بكل اختصار! مو عشان بلوقر تعاملو معاي كذا هذا كلام كثار وخاصه الي زارو المحل فمتفائله بالموقع اكثر ، نقدي الوحيد كان على تشكيله الموقع مو متنوعه بس وعدوني مجهزين اشياء كثييييره وتشكيلات اكثر من لندن وباريس وغيرهم ..

شكرا لبوتيك لاتي على التجربه الممتعه و "اللطيفه" وان شاء الله يعجبكم البوست .. 


هناك 18 تعليقًا :

  1. أمل العتيبي14 ديسمبر، 2014 8:14 ص

    حبيت يعطيك العافيه جميل الفستان وينفع معاه تنسيقات كثير حبيت اللوك الاول بس الثاني ماحبيت العقد والشوز 💜 ثانكيو

    ردحذف
  2. بوست ممتع وتنسيقات جميييله وحبيت فكرة الموقع بالتوفيق لهم ❤

    ردحذف
  3. مشاءالله ،لبس العافية 💕.
    شي جميل صراحة تحمست اطلب من الموقع واجرب 👌💕.
    والعقد الازرق ممكن يجي مع توب ابيض وتنورة ميدي كحلي او مع شي اوف وايت ولا وش رايك 😌✋،أنتضر أشوف تنسيقك معاه 👌.
    وجميلة التنسيقات حبيت بوستات الفاشن مشاءالله موفقة .

    ردحذف
  4. ماشاء الله عليك
    شيئ راقي وكلاس
    تتهني قورجس :$

    ردحذف
  5. حبييييت مره مره ماشاءالله 😍
    تمنين يكون اكثر من تنسيقين من كثر ماانا مستمتعه 😍❤️❤️❤️❤️
    يعطيك الف عافيه❤️

    ردحذف
  6. قد شفت تجربة البلوقر خلود قبل وشدني المتجر وعجبتني اختيارتها انيقه وذحين 😢😭💖💖💖شدتني اختياراتك انيقه ماشاءالله انيييقه جدا وناعمه تخيلت الفستان عليا كمان شايفه كيف 😂💖 حبيته جداًًًاًً تتهني فيها يارب والاكسسوريز حكايه حبيتهم كمان خاصة الثاني💝

    ردحذف
  7. يجنن يجنن حبيته جدا جدا
    ذووووق الله يسعدك شيوم
    حبيت الموقع جداً

    ردحذف
  8. الأسعر في الموقع بالريال السعودي و لا الدولار لأني أشوف علامة الدولار $ ؟!!

    ردحذف
  9. اللوك الثاني حبيته أكثر فيه شيء من المغامرة بس طلع حلو وحسيته فعلا باللبس جميل ..

    ردحذف
  10. جميل وانيق مثل صاحبته ..

    بس عندي تعليق بسيط اتمنى تتقبلينه بصدر رحب☺

    بالفترة الاخيرة صرت الاحظكم يالبلوقرز بديتوا تفقدون مصداقيتكم بعرض تجاربكم
    تروجون لمستحضرات ومواقع وحسابات ماتستاهل
    والسبب ان العروض والمنتجات تجيكم مجانية هذا اذا ماكانت مدفوعة لكم عشان تمدحونها ..
    انا مااشكك بمصداقيتك ابداً!
    بس لاحظت بالنسبة لهالبوتيك ثلاث بلوقرز بنفس الوقت قاموا يمدحونه ويسوون لها ريفيوهات ووصلوه السماء..

    اتمنى ماتزعلين من كلامي وياليته يكون نقد بناء واذا ضايقك الكلام امسحي البوست كامل وبانتظار جديدك ��

    ردحذف
    الردود
    1. بالعكس اي انتقاد باحترام انبسط فيه ومستحيل احذفه .. انا ذكرت فوق ان هالبوست تعاون مع البوتيك يعني هم الي دعوني لتجربته
      اي اعلان اسويه لازم اكون مقتنعه فيه بالبدايه .. ولا كان حصلتي مدونتي او انتسقرامي حراج اعلانات D=
      ماسوي الا الي يعجبني وثقه متاعباتي اهم شي عندي .. عشان كذا نادرا جدا اعلن
      شكرا لك

      حذف
  11. العفو حبيبتي وهذا اللي نعرفه عنك ...

    بالتوفيق والله يخلي لك ديومه 😘

    ردحذف
  12. شيووم انتي انسانه جدا راقيه ومصدر الهام لكل وحدة حابه تنجح في شي هي تحبه >> قلوب من عندي لعندك ❤️❤️❤️❤️

    ردحذف
  13. ما شاء الله ملبوس العافيه ..
    شدني الموقع و طريقته حبيت آخذ فستان من عندهم من ليلا روز
    بس اللي خلاني اوقف و استفسر منج ممكن عندج فكره يعني ..
    بدليل المقاسات ابي اختار مقاسي مالقيت دليل لـ ليلا روز ..

    فمادري شالحل بهالحاله او يمكن مو فاهمه انا =/ ؟

    ردحذف
  14. جميل ان شاء الله راح اخذ منهم قريب ♡

    ردحذف
  15. آنيقه تبارك الرحمن حبيت كل اطلالتك

    ردحذف
  16. جميييل ما شاء الله ♥♥

    ردحذف
  17. ماشاء الله تبارك الله انيق و جميل ربي يبارك لك و يهنيك

    بس اللي ما يقدر وش حيلته؟ الحمدلله من قبل و من بعد الله يرزقنا من فضله العظيم

    ردحذف

التعليقات الجميله ♥♥

Blogging tips