♥ رحله غريبه مع حكايات عطريه في بوتيك لودوريه المميز ♥

السلام عليكم ورحمه الله وبركاته ♥♥ ، مثل ماوعدتكم ببوست عن محلي المفضل الجديد لودوريه ، بالبدايه بوضح هالبوست ابدا مو دعايه بس جوله بمحل عجبني كفكره غريبه وعطورات وحابه اشاركم فيها ، انا اشوف انها غريبه لان متعودين دايما اذا بنشتري عطر ناخذه ع السمعه او اخر شي نزل بالسوق بس مع تجربتي هذي تختار العطر وتعرف تاريخه وحكايه تصنيعه واصحابه حتى ! يعني تجربه متكامله ..

.

.

محل لودوريه هو محل سعودي مختص بالعطورات "النيش" معناته العطور النادره والي ينتجونها بكميات محدوده ، طبعا سعرها بيكون مرتفع تقريبا ، لسببين اما العطور نفسها مكوناتها تعتبر نقيه ونسبه الكيماويات فيها اقل من العطور التجاريه والسبب الثاني ان علبها تكون معبأه ومصنوعه يدويا ، يعني باختصار انت راح تمتلك قطعه فنيه مصنوعه بحب بعيدا عن العطورات التجاريه الي مليانه بالسوق. ♥♥♥♥

ويسمونها بعد عطورات "هات باغفيوماغي" يعني العطورات الفاخره وهالمصطلحات يستخدمونها لوصف شركات العطور المستقله ، الي يكون لها ارث عائلي عريق ، واغلب العطورات الي موجوده بالمحل ، نفس الشركات الي باسم صانعيها هم الي يتواصلون بشكل شخصي مع الناس يعني الي صنع العطر هو الي يروج لعطره ، مو نفس الشركات الكبيره الي تدفع مبالغ كبيره على الدعايات ، بالعكس عطورات النيش دعايتها اقل لانها موجهه لفئه معينه ، الناس الي تحب العطر وتشوفه كفن ، لان كل شخص انتج العطر تعب عليه وحط مجهوده فيه لدرجه في عطر يصدر بكميات محدوده لسبب واحد ان الورد المستخدم فيه صاحبه العطر تقطفه بنفسها من مزرعتها! شفتو شغف اكثر من كذا ماشاءالله♥♥!!

اختصاص محل لودوريه توفير هالعطورات الفاخره ، استاذ سلطان صاحب هالمشروع هو بنفسه سافر مع فريقه في رحلات اوروبيه كثييره بس عشان يكتشف افخر انواع العطور من اختياراته ويوفرها بالمحل الي يعتبره شغفه وكان ثمره سنين من التعب والاستكشاف!

صراحه اقدر الناس الي تتعب ع حلمها وتحاول تبدع فيه بشغف وهذا الي لامسته مع مقابلتي مع الاستاذ سلطان ، الي اخذنا برحله حضاريه وتاريخيه لما شرح لنا قصه كل عطر وكيف تم انتاجه!

هدف الاستاذ سلطان نشر الوعي ان العطورات هي فن وانعكاس لشخصيه كل انسان ، هي هويه مو مجرد "ماركه" او اسم معروف فلازم اقتنيه!

بالبدايه لما شميت العطور استنكرتها صراحهه ، الروائح قويه جدا جدا ، وبعضها غريب! بس لما بردت بدت اكتشف الجمال والابداع بكل عطر ، مع ان كثير عطورات مو ذوقي الشخصي بس حبيتهم وممكن استخدمهم!

وحبيتهم اكثر لما جلس استاذ سلطان يحكي قصه كل عطر ، الي كان يستورده من مصانع العطور المستقله ، الي اصحابها اصدقاء مقربين له وهالشي زاد قيمه كل عطر لانهم دايم يحكون له القصص الجديده!

بستعرض معاكم بعض العطورات والقصص الي عجبتني وصور من المحل!

Bruno Acampora

عطورات برونو اكامبورا من ايطاليا ، هذي العطور الي يميزها انها هاند ميد "صنع اليد" حتى العلب والختم فوق كل علبه مختومه يدويا ، قصه هالشركه بدت من ٤٠ سنه لما كان صاحبها ايقونه بالازياء بس تركها لعشقه للعطور!

اكثر شي لفت نظري دهن العود ، لما بردت ريحته شي خياالي بدون مبالغه! انا ماحب دهن العود صراحه الا لمناسبات معينه بس ، ويذكرني بابوي دايما لانه يعشقه فعندي دهن العود مرتبط بالوالد دايما الله يحفظه! بس ع كثر ماشفت نفس هذا ماشفت صراحه p: 

نيرو دهن العود الايطالي فيه باتشيولي وعنبر وحمضيات والخشب الشرقي والمسك! فتخيلو فخامته! ♥♥♥♥

Lorenzo Villoresi 

عطورات لورينزو لاحظت هي الاشهر خليجيا! اتوقع لسبب واحد انو عطرهم تينت دي نايج "عطر لون الثلج" كان عطر اميره قطر الاميره موزه فاشتهر عندنا ، بدت قصه هالشركه لما صاحبها سافر للشرق الاوسط سنه ١٩٨١ والهمته البهارات وروائحها وقرر يدرس فن صناعه العطور وطرق التقطير ، وانشهر لورينزو بتصنيع العطور الخاصه.

عطر تينت دي نايج المشهور بعطر الاميره موزه ، هو عطر باودر فيه الياسمين والروز وورود ومسك ، انا ماحب العطورات الباودر ولا اميل لها بس استغربت شلون ذوقي تغيير مع كل عطر اشمه وعجبتني روائح كثييره ماكنت اتوقع احبها مثل رائحه التبغ ههههه!!

Andy Tauer

عطورات اندي تاور من سويسرا الي يميزها انه حتى ادق التفاصيل مثل العلبه من تصميمه الشخصي ، وعطوراته اغلبها وراها قصص مشوقه وكيف مواقف معينه خلته يصنع عطر يجسد هذيك اللحظه مثل عطر موروكان : 

هذا العطر مستوحى من سفرته للمغرب ، لما رجع الفندق كان وقت غروب الشمس والقمر بيطلع قريب ، وهو مستلقي ع سريره كانت الدريشه مفتوحه وكان وقتها حر وريحه السوق الصغير الي تحت دريشته مليانه بهارات وتوابل ملت الغرفه والقمر وقتها بيطلع وحراره الصحراء بوقتها خلته يحلم بالليله المغربيه وكان هذا العطر يمثل كل تفاصيل الليله ، طبعا شرح الاستاذ سلطان افضل مني p: لان تخيلت كل شي كأنه جزء من فيلم هولويدي وجد جد مع ريحه العطر تتخيلون كل التفاصيل الي تنقلكم للمكان هذاك ، شي جمميل كيف عطر يقدر ينقلكم للحظات واماكن حتى انتو ماكنتو فيها!

وكان في عطر ثاني استوحاه من تكساس امريكا ، ماتتخيلون ريحته ابد!

Ormonde Jayne

ارموند جاين من لندن ، بدا عشقها للعطور من عمر صغير لما كانت تبيع ورد بجنب بيت اهلها كاول مهنه لها ، بعدين لما كبرت اشتهرت بصناعه الشموع والزيوت العطريه ، الانواع الي كانت تسويها خياليه لدرجه الناس صارو يطلبون منها تسوي عطورات وشجعوها لحد مابدت تصنع العطور وصارت تزور دول كثيره عشان تدور روائح جديده ومنها السعوديه!

زارت ارموند مدينه الطائف بالسعوديه وعجبها الورد الطائفي فاستوحت منها عطرها الي سمته الطائف p: 

طبعا مو بس هذي الماركات الي عندهم ، عندهم فوق ال١٣ ماركه اذا مو غلطانه ، ولاتنسون اذا رحتو تسألون عن قصه المره الكبيره بالسن الي راحت تدرس لما صار عمرها فوق ال٧٠ ♥♥♥♥ و قصه الورد والايسكريم شلون طلع منه عطر ♥♥♥♥ والكثيير منها ،،

انا استمتعت بزيارتي وصار تقديري للعطورات اكثر من انها مجرد روائح ، صرت افهم اكثر ان كل شخصيه لها عطر وكل مزاج له عطر ، حتى لو تشاركنا بنفس العطر الريحه مو نفسها ابدا لان كل انسان جسمه يتفاعل مع العطر وتطلع ريحه مميزه له بس!

المحل موجود بالفيصليه الهارفي نيكلس ، وقريبا بيكون في فرع لاكسري بابراج رافل كمبنسكي ، الاسعار متنوعه وتبدا من ال٧٠٠ بس اشوفها تستحق ، خاصه لما وقتها رحت بشتري عطر شانيل نوير الي سعره مقارب له بس غيرت رايي لما شفت روائح جديده مو متكرره وانيقه بنفس الوقت!

بالاخير اشكر استاذ سلطان على الهديه الانيقه واتمني لهم كل التوفيق ،

اذا عندكم تجربه مع احد العطور الي ذكرتها يسعدني تشاركوني فيها. ♥♥♥♥♥♥

للتواصل معي ع التويتر والانستقرام 
الايكونز ع يمين الشاشه

لاتنسين الاشتراك بالمدونه ليصلك كل جديد ..

كونو دائما جميلين ♥ ..

xo Gorgeous