الجمعة، أبريل 04، 2014

اعترافات ماما جديده ، تجربتي مع الحبيب التخصصي ، وسوالف ٤ شهور فاتت!!

،


السلام عليكم وَ رحمه الله وَ بركاته احم مستحيه منكم :$ أدري من زمان عن المدونه ، بس الي يتابعني عارف إنو كنت حامل وَ بعدها جبت بنوته مثل القمر p:

هالبوست تصبيره لبوستات جديده افضل وَ أجمل إن شاء الله ، وكل شي وعدتكم فيه من صور تحضيرات لاستقبال ديم ونصائح للحمل والولاده وتجربتي ان شاء الله كلهااا بنزلها بس استقر ..


فاتحه الاب ببالي كل شي بس مدري ليه مو راضي يطلع الكلام :$
ببدا بالحمل وفتره الحمل وفتره النفسيه .. حملي كان سهل الحمدالله ووحامي خفييف ، بس من بعد الخامس بديت اتعب ، اقدر اقول تعب نفسي اكثر ، خمووول وبس مابي اسوي شي ابي اجلس بسريري ومابي اطلع ومابي اشوف احد ، اهملت بشرتي ونفسي :| من السابع بدت البشره تتغير وتطلع لي حبوب بشكل يخووف كنت بس اشوف نفسي بالمنظره تنسد نفسي وابكي هههههه ، كرهت المطبخ ومادخله اببد اذا دخلته احس برجع وكان عذر ماطبخ p: اراجع لدكتوره جلديه تقولي لاتحطين شي ولاتسوين شي خلي البشره لان فتره حمل وكل شي يأثر وشي طبيعي الحبوب تغير هرمونات!

صح حملي خفيف وماتعبت فيه بس التغيرات الجسميه اكثثثر مثل الكلف والتشققات والحبوب :"( نفسيا تعبت :"( ومن كرهت المطبخ اكلي خرابيط اي شي خفيف او مطعم ، لحد ماراجعت بأخر السابع اذا مو غلطانه وقالت لي الدكتوره وزنك مايزيد الا شي بسسسيط والبيبي صغير صغغير وزنه اقل من كيلو! انا صراحه ماخذت الموضوع بشكل جدي والدكتوره ماشددت علي بس قالت زيدي اكلك واكلي اشياء صحيه حتى وجهك شاحب كثيير ، لما طلعت وبحثت عن الموضوع انصدمت اقل من الطبيعي بكثير وطقيتها صيحه وحسيت بالذنب لان مو اهملت نفسي ، اهملت بنتي وانها امانه برقبتي ومعتمده علي بتغذيتها ، صح حتى لو ماكلت بتاخذ مني بس انا اكره الحليب واكلي خرابيط جدددا والخضار والفواكه ابتعدت عنهم عكس قبل الحمل لما تغذيتي صحيه! رجعت البيت وعبيت الثلاجه خضار وفواكه وكل يوم اخذ عصير فريش بس فتره ورجعت مثل قبل ،، راجعت الدكتوره قالت وزنها زاد بس للحين لازم تشدين حيلك بالاكل ، هنا قلت لازم اروح لامي توكلني هههههه فقدت الامل بنفسي ونفسيتي اصلا من التغيرات الجسمانيه والكرشه وجسم اسمر وكل شي ممنوع الكعب ممنوع والكل ينصح لاتحطين لاتسوين وكل مارحت السوق بشتري شي كل شي للحوامل شييييييين وارجع اكتئب زياده ، احس لما تغيرت بشكل خارجي اثر علي وكنت انانيه افكر بشكلي شلون تغير ونسيت انو لازم اهتم بالبيبي ، وكل ماقرا عن البشره وغيره الكل يقول مستحيل ترجعين مثل قبل واتحببببط :|

رحت لاهلي بالثامن وبدا مشروع التسمين مع الوالده الله يعطيها العافيه p: ماسمنت ابد بحملي اللهم ٤ كيلو بس لما رحت لامي ١٠ كيلو بشهرين ماشاء الله تبارك الله هههههههههه ، حطيت ببالي كل شي بيرجع مثل قبل جسمي وبشرتي وكلل شي حتى لو سمنت وصرت سمرا اهم شي بنتي بصحه وعافيه انا وهي وكل شي تتعوض وبديت ارتاح نفسيا وارجع لتفاؤلي .. وارتحت عند اهلي ودخلت التاسع ووصلت نصه تقريبا ، وبعدها رجعت لبيتي وولدت بالمستشفى الي اراجع فيه ، مستشفى الحبيب التخصصي ، ع كثر ماقريت عن مستشفيات بالكويت والرياض وسألت كثيييير كل شخص له تجربته وكل بنت تذم بشي وتمدح بشي لان كل شخص يشوف او يدقق بالاشياء الي يرتاح لها ، البعض يبي مستشفى نظيف والبعض اهم شي الدكتوره نفسها لو تشتغل بخرابه تولد عندها والبعض السعر والبعض يبي شي قريب منه ، فاحترت مع الناس وتركت الكلام كله ورا ظهري وشفت احتياجي انا ،،

الحبيب التخصصي قريب من بيتي ، ماعليه زحمه ، نظييييف ، اسعاره تناسبنا ، نظامهم حلو ، السسترات متعاونات ، استخرت واستخرت وقلت خلاص بولد حتى لو الغرف مو ذاك الزود كتصميم لاني بسوي استقبال فيه بس اهم شي نظيف ..

وفي يوم من الايام كان وقتها باقي انو اخلص التاسع وادخل العاشر يومين بس ، ماكنت مستعجله مره مره بس اقول يارب متى اولد ، وبديت اروح امشي وامششي وماحس بأي اعراض للولاده ابداااااا ، قلت بشرب اعشاب بعدين خفت قلت يوم يومين حتى لو اسبوع هي راح تطلع ماراح تقعد ببطني لاخر العمر ، فيوم ١٧ فبراير كنت لابسه شوز الرياضه بروح امشي بس قلت بمر كوفي قبلها ، اخذنا قهوه واخذت حلى ، معروف الحلا يخلي البيبي يتحرك ، واكلت وخلصت وطالعين للممشي ، فجأه زوجي يسألني تحركت ديم اليوم بعد الحلا "مسمينها وهي ببطني :$" قلت تصدق لا حتى اليوم كله ماتحركت واضحك ،، قال هااا مو الدكتوره قالت اذا ماتحركت تجين ع طول ، قلت لا مافي شي هيهيهي "ضحكه وحده متوهقه :$" قلت بروح الطوارئ اشوف!

بالطوارئ حطولي قياس النبض والطلق ، مافي طلق وشوي واعتفس وجه الدكتوره قالت دكتورتك منو قلت لها سناء قاسم ، وكلمتها وجتني قالت يلا حبيبتي ولاده طبعا الدنيا قامت تفر فيني وجاك الموت ياتارك الصلاه ههههههه ، قلت في طلق قالت لا قلت طيب المويه طلعت قالت لا قلت ليش تولدوني ؟؟؟ قالت احسن الحين انتي اصلا بتخلصين التاسع خلاص لازم نولدك ، وزوجي يشجع قال يلا اولدي طفشنا :| قلت طيب بروح اجيب اغراضي بالبيت ، ووقعوني ع خروج ع مسؤوليتي وقتها بديت اخاف حسيت مو طبيعي الوضع ، لما وصلت البيت قلت مابي ارجع هههههههه قالي زوجي ماراح يولدونك الا في شي ، وتوكلت ع الله واخذت شور وشلت اغراضي الي اصلا كانت بشنطه بس رتبتها ، قلت دقيقه برتب البيت عشان اذا جت امي تشوفه مرتب طبعا مايحتاج اقولكم الرد كان شنو ههههههه وطول الوقت ابكي ، لان مادري شنو بيصير ومافي اي الم وبيولدني غصب غصب ، حطولي مغذي وصعدوني غرف الولاده وقالو البسي لبس الطبيب ، شفته قمت اصيح حسيت بموت وانا اصلا مافيني شي ههههههه ، لبست وتعوذت من ابليس تمنيت وقتها استشور شعري صراحه بس مافي وقت ههههههه ، غرفه الولاده غرفه كبيييييييره كأنها تنويم عاديه وفيها جلسه جانبيه وتي في ، وسرير للبيبي وسرير فيه لمبه للبيبي عشان يفحصونه اول مايولد انا بكيت لما شفتهم حاطين اسمي باسواره بينك وحاطينها ع السرير "بيبي شيماء" :"( الغرفه توحش باارده وتخوف بس حاطه ببالي هنا بنتي بتكون وكلها يوم واااحد وبتجي الاميره وينتهي مشوار الحمل وبدال لاتكون ببطني بتكون بين ايديني ، واصبر نفسي واقرا الادعيه والاذكار اظن وقتها ختمت القرأن ههههههه ، كلمت امي قبلها وقلت لها بولد وماكنت ابي اقولها بس هي محلفتني وقلت لو مت وهي مو راضيه عني ماراح ادخل الجنه p: *تفكير سوداوي* بديت رحله الولاده من الساعه ١١ الليل ١٧\فبراير ، وماحسيت بشي ، الفجر الساعه ٥ حطولي الطلق ولا تغير شي لان طلقي بارد وانا اتصبر ومشغله البقره وقريت الزلزله والاذكار وكل شي :(

شعور يخوف ماتدري شنو بيجيك ولا كيف نوع الالم ، اسووووء شي كان الفحص الداخلي عشان يشوفون التوسع :((( كانو النيرسس مريحاااات وبشوشات كلللهم ماعدا وحده ، انا مرو علي٥ خلال ولادتي وكل وحده افضل من الثانيه ويجون يسولفون علي واذا بكيت يمسحون دموعي ويقولون بتنسين كل شي اذا شفتي بنتك ، حتى يساعدونك لو بتروحين الحمام وانتو بكرامه ينتظرونك عند الباب لحد ماتخلصين .. واذا طلبتيهم يجونك ع طوول ، وعندهم برا يراقبون النبض لي وللبيبي والطلق ، الساعه ١١ الصباح رجعو عطوني طلق ونفس الشي ماتغير وصل ل٢ بس ، جت امي واخواني وجلسو عندي ، كنت اقدر اولد بدون امي ماكنت ابي اتعبها ولا اخليها تشيل همي بس مهما كان وجود الام حولك يحسسك بالامان الله يخلي لنا امهاتنا ويرحم الاموات منهم ..

بالنسبه للكشف الدكتوره المناوبه هي الي تكشف والدكتوره تمر عليك من وقت للثاني وبس وقت الولاده تجيك ، صراحه المناوبه يدها بالكشف اخف بكثييييير من دكتورتي بس ماعرفها ، هي باكستانيه ومو متحجبه بس مره يدها اخف ، دكتورتي اردنيه ، انا طلبت ابره ظهر ، قالو مانقدر نعطيك الا لما توصلين ٣ ونص او اكثر ، امي معصبه علي ماتبيني اخذ ابره ظهر بس قلت اذا الم الكشف كذا شلون لو ولاده ، تخيلو انو الماي عندي اصلا مانزل واكلم اميره وابرار وجوجو واروى خوفوني يقولون يمكن يولدونك غصب عشان تتحول لعمليه وياخذون فلوس ، انا وقتها قلت خلاص بقوم ارجع البيت ههههههه مابي اولد ماحس بالم ولا طلق عندي ، وفجأه قالت لي الدكتوره خلاص فتحت لك الماي عاد انا صحت هههههههههه قلت لا خلاص بدا الجد ع اساس الي قبل كله خرابيط ، زاد الطلق ل٣ ونص وقلت يلا يلا ابره الطلق وطلبت اخصائيه دكتوره ، سألت عن الابره كثيييييير واستخرت فيها الكل يقول اخذيها ، ولحد يقولي نبي ناخذ اجر ، ربي مو موقف الاجر ع الولاده بس ، الكل يقول التربيه والسهر اصعب واصعب والولاده بس يوم واحد ، وكل واحد ينام ع الجنب الي يريحه ههههه وكنت وقتها اسمع الغرفه الي جمبي وحده تولد وصراخها واصل لاخر المستشفى وقلت لااااا والله لاخذها :|

جت الاخصائيه وهي مصريه ، طلبت مني اجلس ع طرف السرير واتسند ع مخده وثبتتني النيرس ، وقالت لاتتحركين لان راح يحطونها بالظهر ومكانها صعب شوي ، عاد وقتها كان في موفي بالتي في ومكتوب "انه سيصبح مشلول" وامي تقرا وتبكي هههههههههههههه تقول الله ياخذكم مو وقتكم ههههههههههه

طلبت يمسكوني النيرسس لان ادري بتحرك وثبتوني حييييل والدكتوره مرره متعاونه معاي وطيوووبه حتى خلتني وجلست تهدي امي هههههه ، الم الابره الم محتمل عادي اهم شي دكتوره متخصصه وماتتحركين وركبو مثل الدريب او المغذي وموصلينه من ظهري لانبوبه عشان يزيدون نسبه التخدير مع الوقت او حسب المطلوب لحالتي ، وبعد الابره بديت اتخدر رجولي تخدرت يعني من المنطقه الي تحت صدري لتحت كلله مخدر ، شعور يخوف :| حتى ماقدر اعدل جلستي ، تذكرت المعوقين الله يشفيهم ويعافيهم ، وقتها كل شي مو زين فكرت فيه وكل احساس بالدنيا فكرت فيه حتى بعد ماتخدرت قمت اضحك بشكل هيستيري امي قالت بنتي استخفت هههههه ، ماصرت احس بشي لا كشف ولا شي وارتحت الحمدالله وعطوني طلق ثالث الساعه ٧ المساء وانتظرت الولاده ، جت الساعه ١٠ ويلا الرحم توسع يلاااا البيبي بيطلع طلعو كل الي بالغرفه ، وجت دكتورتي ، وقالت لي يلا ادفعي قلت شلون ماعرف قالت كانك رايحه الحمام بتسوين خروج "وانتو بكرامه" وجلست ادفع كل ماجا طلق ومافي فايده ، ماعرف مع خوف وتوتر ، شوي الي طلع راس بنوتي وقصت الدكتوره من شعرها وقالت شووووفي هذا شعرها يلا ادفعي تبي تحمسني وانا لاحياه لمن تنادي اقول ماعرف مااعرف وفجأه عصبت علي وقالت تبين تذبحينها فقمت ابكي ههههه ، قلت خل النيرسس يساعدوني فكل ماجا طلق ضغطو ع بطني حييل وانا ادفع ، حسيت بالمووت مو الم قد ماهو خووف خايفه بنتي يصير فيها شي :( وماطولت واخر دفعه كانت قووويه وطلعت وحطوها ع صدري ولاشعوري قلت يع وخروها ههههههههه! يمكن اللحظه الوحيده الي تندمت عليها اني ماضميتها او بستها وقتها ، وبعدها ارتفعت حرارتي بششكل وصرت اتنافض وعطوني مسكنات ونمتتتتتتت ، كنت اقوم من الرجفه ودايخه افتح عيوني اشوف ضباب وارجع انام ، كان اكثر شي خوفني الحراره حسيت بموت لان وصلت ٤١ ، الدكاتره يقولون بسبب الابره وبعضهم يقولون المغذي مادري ، جلست الحراره معاي يومين تروح وترجع بس الحمدالله ع كل حال ، وبعد الولاده قالت دكتورتي احنا ولدناك لان نبض البيبي ابدا مو مستقر فخفنا عليها بس مابغينا نخوفك ،،

وجو اهلي يباركون لي وبدت رحله التصوير للبيبي واشوفها من بعييد بس مامسكتها الا ثاني يوم لما نزلت لغرفتي ، الغرفه الي حجزتها غرفه خاصه ، في اكبر منها بس انا هذي حسيت مناسبتني ، الاسعار والله ماذكر بس بحدود ال٩ الاف مع الولاده ويومين بالمستشفى وزدتها يوم ثالث بس مادري كم صراحه :$

غرفهم نظيفه وخدمتهم حلوه ، التنظيف يجيك كل شووي وينظفون كل شي وخاصه دوره المياه وانتو بكرامه ، حتى تجيك وحده تشيك على الغرفه كل شوي وتسأل شنو تقيمك لخدماتنا وشنو تقييمك للنيرس وشنو تقيمك للأكل ، كل شي كان ممتاز من خدمه ورعايه صحيه بس الاكل مو حلو ابد صدق اكل مستشفيات ، من دايت سنتر وماحبيته ، سويت استقبالي ورتبت كل شي واستقبلت اهلي وصديقاتي ..

وهذي قصه ولادتي ورايي بالمستشفى ، بسوي بوست خاص لتجهيزات استقبالي ونصائح للمستشفى ، ع فكره كل شي ملحوق وماقتنعت بهالفكره الا بوقت متأخر للاسف لان نفس الشي بالنفاس جاني اكتئاب ههههه ، الجسم بعد الولاده وكائن حي جديد ماتعرف تتعامل معاه وتحس كل شي فوق راسك وناس داخله طالعه عليك وتعب تعب !!

بس رجعت لاهلي رتبت اموري ، خليت الاستقبال والناس الي بتزور بس بالويك اند وارتحت كثيييييير ، البيبي امي والخدامه ساعدوني كثييير وبديت افهم لها واعرف اتعامل معاها ، صح للحين في صعوبه وخاصه انها بكاااايه درجه اولى وبطنها كله غازات وكل شوي احد يقولي حطي وسوي وميه راي وميه نصيحه ، الحين الححمدالله راجعت عند دكتوره جلديه ورجعت بشرتي نفس قبل وافضل صح الكلف ماراح بس خف بشكل الحمدالله ، وطبيعي جدا مايروح ع طول بس مو مشكله كل شي ملحوق وبيروح ان شاء الله ، بالنسبه للتشققات كنت مبسووطه وصلت للتاسع ومافيني شي لان اهتم بالتررررطيب بس صدمه باخر التاسع طلع لي بالبطن لان سمنت بالتاسع بشكل ، ومع الترطيب بدت تخف ويارب تروح .. وامس تسولف علي وحده تقول شيوم ماشاء الله بشرتك فتحت حيل عن قبل اول يوم شفناك واستانست ههههه لان مهتمهه كثيير حاليا وبكمل لحد مارجع مثل قبل ان شاءالله..

حطيت ببالي مافي شي يروح كل شي بيرجع لطبيعته ولازم استمتع بكل لحظه لانها ماتتكرر والافكار السلبيه ماخليها تتملكني ولا ادخل بدوامه حزن لان كل شي وله حل ، وبس اشوف الاطفال المرضى احمد ربي انو بنوتي بصحتها وعافيتها وهذا اهم شي ..

كتبت قصه حياتي ههههه لان ابيها مرجع لي بعد فتره ارجع اقراه ، ويمكن يفيد احد بشي بسيط لان كنت ادور قصص ولاده والكل كان يخوف وعيشونا بقصه رعب وبالعكسسس الولاده مو صعبه وفتره وخلاص تعدي ، وتذكرو "لايكلف الله نفسا الا وسعها" يعني صح في الم بس نقدر نتحمله وهو الم منسي ، فكرو فيما بعد الولاده وبالبيبي والتربيه ، وانصح بابره الظهر والحين صارلي شهر ونص من ولادتي ماحس باي شي من الي كانو يقولونه ولو له اعراض فهي مؤقته مثل الم الظهر والصداع واستمرت معاي اقل من اسبوع وراحت ، بالنسبه لاكل النفاس كنت احسبه خرررابيط وماكلته اول ١٠ ايام وامي تغصبني وانا اقول مستحيل ريحتي تصير اعشاب مابي انتفخ من الادويه واصلا الاجانب ماياكلون وعايشين عادي!!

لحد ماقالت لي وحده انو زوجها يعرف اجنبي ويسولف له يقولون زوجاتنا مقرفات حتى ماينظفون بعد الولاده ومانرتاح معهم ، مدري لو صادق بس اجزم لكم انو الاعشاب تساعد ع تنظيف الرحم واهتمو بالخيااااط اهم شييي ، يبيله بوست ثاني ، بس قلت لكم انو نظريتي تغيرت للاعشاب والي كنت اسميها خرابيط النفاس ، وخاصه لما ثنتين من صديقاتي الي زاروني بالنفاس كانت عليهم الدوره وانتو بكرامه واكلو معاي وبعدها بكم يوم يقولون لي شيوم ماتتخيلين شلون نظفنا!! "كانت تنزل معاهم كتل وهذي اول مره بحياتهم بس لانهم اكلو معاي من اكل النفاس ودورتهم الثانيه الالم كان اخف" وسوري ع الكلام مابغيت اكتبه بس ابي الناس تهتم وتلحق ع نفسها بنظام صحي بدون خرابيط كثيييره وبنزل لكم نظامي ان شاء الله ، واي شي حابين اتكلم عنه خبروني ، وسوري طولت عليكم بس طلعت سوالف ٤ شهور ماسولفت تحملوني ههههههه ، اشوفكم ببوست جديد ان شاء الله واحتمال كبير استقبالي وتجهيزاتي لديم الحلوه ..

الايكونز ع يمين الشاشه




لاتنسين الاشتراك بالمدونه ليصلك كل جديد ..
كونو دائما جميلين  ..
xo Gorgeous


هناك 34 تعليقًا :

  1. الحمدلله ع سلامتج و سلامه البنوته اليديده ، تتربى في عزج إن شا الله و يسخرها لج و لأبوها ..
    كنت اتابع مدونتج من فترة طويله و هذي أول مره اكتب فيها رد :) ، الحمدلله الي يسر لج كل شي
    و خلاه خفيف عليج ! كل شي سمعته عن ألم الولادة يتلخص بكأنه الموت ، أول مره أشوف يتكلم
    عن هالتجربه بكل هالإيجابيه ♥ .. أترقب البوستات القادمه إن شا الله ، بس بغيت اسأل الأعشاب
    الي كنت تشربينها بس للنفاس يعني ؟ و لا عادي نحن البنات الي مب متزوجات نشربها فتره الدوره 3: ؟

    تحياتي ..
    عذرا ♥

    ردحذف
  2. يالله ذكرتيني بولادتي بغيت اصيحححح
    منتظرين نظامك لان من جد احتاجه
    والله يقومك بالسلامه

    ردحذف
  3. الحمد لله ع سسلامتك
    تخيلي شيووم انا مغتربه برا والحين الساعه ٥ الفجر وبننننفجر نوووم
    بس ماقدرت اقرا بالانستقرام انك نزلتي بووست ولا اقراها
    بالله موهـذا ادمااااااان

    ردحذف
  4. الحمدلله على سلامتك شيوم
    تتربى بعزكم ديوم.. الشي جميل ولدت قبلك بشهر وابشرك كل تلونات الحمل والتشققات والكرش راحت بنسبة كبييييرة وانا عنايتي بسيطة وهذا الحمل الثاني لي وانتي أول حمل رح ترجعين اسرع ..
    طبيعي أنه تتغير بشرتك وعموما تحتاجين سته شهور لين ترجعين تمام من كل النواحي بشرتك وجسمك وحتى آلام الظهر.. لذلك لاتخافين وطولي بالك والعناية تعجل بالنتايج الحلوة..
    الله يحفظ لنا العسولات ويجملنا بالصحه والعافيه

    ردحذف
  5. هههههههههههههه وربي ضحكت من قلب الله يسعدك
    يختي فيك كمية برائه تهبل
    الف مبروك والحمد لله ع سلامتك ربي يخليلك الاميرة ديم

    وننتظر بوستاتك الجااايه

    ردحذف
  6. الحمدالله ع سلامتك ي أجمل شيوم ب الدنيا💖💝
    مرااا أنبسطت ب الأم الجديده أكيد بتكونين أحن أم بهالدنيا👪
    م تتخيلين قد ايش ضحكت من حكيك م ذبحني الا كلمة الموفي(سيصبح مشلولا) لالا أبدا مش وقته الله يرجهم😂😂
    وبعدين جوجو واروى وأميره م عندهم وقت ع طووول تخويف😰😥😬
    حبيبتي انتي والله انا سعيده فيك ي اجمل أخت بهالدنيا💖 وحبيبة قلبي ديييوم👶
    الله يخليها لك ويكبرها ويسعدها ويكبر حظها يارب وتفرحين فيها وفي برها يارب
    بعدين تراني حاجزتها لولدي اللي لسى م شرف مالي شغل تفاهمي انتي وأبوها خلاص حجزتها وبزوجها ولدي 😄😜

    ردحذف
  7. الحمدالله ع سلامتك ي أجمل شيوم ب الدنيا💖💝
    مرااا أنبسطت ب الأم الجديده أكيد بتكونين أحن أم بهالدنيا👪
    م تتخيلين قد ايش ضحكت من حكيك م ذبحني الا كلمة الموفي(سيصبح مشلولا) لالا أبدا مش وقته الله يرجهم😂😂
    وبعدين جوجو واروى وأميره م عندهم وقت ع طووول تخويف😰😥😬
    حبيبتي انتي والله انا سعيده فيك ي اجمل أخت بهالدنيا💖 وحبيبة قلبي ديييوم👶
    الله يخليها لك ويكبرها ويسعدها ويكبر حظها يارب وتفرحين فيها وفي برها يارب
    بعدين تراني حاجزتها لولدي اللي لسى م شرف مالي شغل تفاهمي انتي وأبوها خلاص حجزتها وبزوجها ولدي 😄😜

    ردحذف
  8. الحمدلله على سلامتك شيوووم
    مررره انبسطت لما عرفت انك جبتي بنوته وكنت متحمسه امتى ترجعي تكتبي وتحكيلنا
    تتربى فعزك والله يخليها لكم ان شاء الله ♥ ♥ ♥

    http://l-s-beauty.blogspot.com/

    ردحذف
  9. ي عمري حمدلله ع سﻵمتك وتتربى بعززك ان شاءالله مرا شيء جميل البووست حبيته مرا عفوية بشكل جمميل في مواقف ضحكت عليها احسك حكيتي كذا من قلبك واخذتي راحتكك الله يسعدك يآرب وﻻ يضيعلك تعب

    ردحذف
  10. ي عممممري حمدلله ع سلامتك وتتربى بعزك ان شاءلله وعقبال م تشوفيها عروسة والبوست جممميل لين خلاص حبيته مرآ كلامك عفوي منجد احسك اتكلمتي كذا من قلب في مواقف ضحكت عليههه ومرا ثانية حمدلله ع سﻵمتك والله يسعدك يآرب وﻻيضيعلك تعب يآرب ♡♡~

    ردحذف
  11. الله يسعدك على هالبوست ويخليلك القمر ديوم 😍 ويبلغك فيها يارب وتحمست بصراحة يكون عندي بنوتة 😭😭

    ردحذف
  12. الحمدلله ع سلامتك وسلامة ديم
    الله يسعدك كلامك جميل وايجابي عكس اللي نسمعه
    ننتظر جديدك

    ردحذف
  13. ياقلبي يا شيوم والله تحمست وانا اقرا الحمدلله على سلامتك والله يخلي لك اهلك وزوجك وديوم ويقر عينك فيها حببتيني بهالمرحلة..♡

    ردحذف
  14. الله يسعدك و يحفظ لك ديم
    قتلتيني يوم في عز الاكشن قلتي ابغى استشور شعري ههههههههههههههههههههههههههههه
    جميلة مشاركتك للتجربة و الله يرزقني يا رب :$ صح شويه بدري لكن الأمومة جميلة :$

    ردحذف
  15. الحين الساعة 2:52 و عندي اختبار فكشن بكره و توني ماخذة بريك < احس مااحد صاحي الا اناه ._. !!
    المهم مممم
    ايش اقول !
    زواجي على الصيف ان شاء الله
    و موضوعك جاء على الجرح
    احسسس مافي احد في الحياة يعطينا الصورة الواضحة للحمل و الولادة , والله بدون مبالغة اني لحد الان ما قابلت احد وصف لي التجربة من دون الاضافات العقيمه .-. !!!!!!!!!!!
    ماادري لية كذا و يخفوني من كل شيءءء و كل شيء خطير و بيسبب لك مدري وشو ! و بالمقابل شوفي الاجانب كيف !
    كل اللي بقولة اني احبكككك $" , جد يااختي ما تدري قد ايش شيء في داخلي تعزز بسبب طرحك لتجربتك
    صدق شيء جمممممميل منك و انساني و كلوه < بتبكي:""

    ما براجع الكلام حتى < تحس انها خبصت

    و يحفظللك ديم و يصلحها لك و يهنيك فيها و يسعدك دنيا و اخرة ياامي :""

    ردحذف
  16. الحمدلله على سلامتك وسلامة ديم جدا استفدت نستنا جديدك

    ردحذف
  17. ياقلبي دحين اللي عرفت اسمك ترا ههههههههه .. اولآ الحمدلله ع سلامتك ياختتي ومبروك ديم
    عسى ربي يحفظها ويرزقكك برها يارب .. آنبسطت وانا بقراء كلامك عشت جو والله ..
    والحمدلله آنو ربي رزق هاللحظه والامومه .. ربي يسهل لك تربيتها ويهون عليك كل صعب ياارب
    * آختك ميمي السهلي

    ردحذف
  18. ياقلبي دحين اللي عرفت اسمك ترا ههههههههه .. اولآ الحمدلله ع سلامتك ياختتي ومبروك ديم
    عسى ربي يحفظها ويرزقكك برها يارب .. آنبسطت وانا بقراء كلامك عشت جو والله ..
    والحمدلله آنو ربي رزق هاللحظه والامومه .. ربي يسهل لك تربيتها ويهون عليك كل صعب ياارب
    * آختك ميمي السهلي

    ردحذف
  19. الحمد لله على سلامتك شيماء والف مبروك البنوتة الجميلة :$ حبيت البوست وحسيييت معك بكل لحظة الحمد لله اللي قومك بالسلامة وساعدك على انهاء فترة الحمل :) منتظرة بوستاتك الجاية ومتحمسة مررره اقراها ومتحمسة لخلطات التنظيف تكتبينها معها من ايدي مامتك :$

    ردحذف
  20. سﻻمتك شيوم
    ياليت تتكلمين عن الاعشاب ومين دكتورتك
    ضروري الله يسعدك :(

    ردحذف
  21. الحمدلله علي سلامتك ،، الف الف مبررررروك علي البنوته الله يحفظها ويخليها لك ، شكرا علي مشاركه قصه ولادتك لنا صرراحه خنقتني العبره بس الحمدلله علي قولتك الم منسي ... الله يعطيك العافيه والصحه ياررب

    ردحذف
  22. الحمدلله على سلامتك شيوم والله يخليكم ديم وتفرحون فيها عروس😚

    ردحذف
  23. الحمد لله على السلامه
    اسلوبك جميل , الله يخلي لك صغيرتك ويخليك لها

    ردحذف
  24. الحمد لله على سلامتك ياقمر .. وتتربى بعزك وعز ابوها
    الله يخليها لك يارب .. مره حبيت بوستك عن جد الكل يخوف من الولاده هيا صعبه صح بس مو لدرجة الخوف الي يوصلوه لنا ههههه تدكرت اول ولاده لي طول فترت حملي يخوفوني وانها سكره من سكرات الموت لدرجه بس اتدكر اني راح اولد اجلس ابكي ونفسيتي عدم وصغيره في السن زاد الخوف بس وقت الجد وبعدها عرفت ان فعلا الحريم يهولوا الموضوع هو اصعب شي الغرز تبع التوسيع بس والكرش وهمها متى تختفي هيا والتشققات والحمد لله تعدي كل الالم وقت ماتحملي البيبي هههه طولت اسفه
    وياليت تفيدينا في موضوع الاعشاب وشو من مشد ايستخدمتى بعد الولاده

    ردحذف
  25. أزال المؤلف هذا التعليق.

    ردحذف
  26. أزال المؤلف هذا التعليق.

    ردحذف
  27. مبروك تتربي في عزك ان شاء الله ويرزقك برها وصلاحها يارب
    اشياء وخرابيط النفاس تنفع للبنات او لا وماتفيد الا بعد 40 يوم والا ينفع لو مرتين اسبوعيا؟

    ردحذف
  28. مبروك ادري متأخر , بس الله يسعدك شكثر أدخل مدونتك وأقرأ كلامك الي كله إجابية , صحيح إن ميولي واهتماماتي ف أشياء ثانية بس مدونتك جد جد جد شي غير , ومررة أنبسطت ب هالبوست الله يسعدك ويحفظ ديم .

    ردحذف
  29. مبرووووووووووووووك اسفة انا عارفة الرد متأخر الحمد الله على السلامة تتربى في عزكم الله يحفظها من كل عين وحسد وشر ويجعلها من مواليد السعاده

    ردحذف
  30. هههههههههههههههههههههههههههههه ياضحكت ضحك
    الحمد لله ع سلامتك والله يخليلك بنتك وتشوفينها عروس سارب

    ردحذف
  31. أول مرة أشوف مدونتك و أعجبني البوست وجاي في وقته
    الله يسعدك و يرزقك لاحها وبرها ^_^ و يسهل علي وعلى المسلمات ولاداتهم

    ردحذف
  32. وانا اقرأ كلامك مدري ليش بكيت 😂 شكله من الخوف ولادتي بعد شهر ونص واول مرا 😞 مااعرف شي ابد بس كلامك طمني الله يسهل علي و ع الحوامل جميعاً .. مرااا شكرا شيوم حبيبتي..

    ردحذف
  33. مت ضحك على سيصبح مشلولاً هههههههههههههههههه
    بوست جمييييل جداً وراح يفيد بنات كثير
    يعطيكِ العافية شيومة القلب ♥♥

    ردحذف
  34. اقرا وابكي معك مااعرف ليش :( الحمدالله على سلامتك وسلامة البيبي
    ياليت اسامي بلوقرز اجانب كتبو عن تجاربهم بالحمل والولاده :p

    ردحذف

التعليقات الجميله ♥♥

Blogging tips