الجمعة، أغسطس 30، 2013

سلسله العوده للمدارس ، مدرسه\جامعه جديده وَ كيف اكون صداقات.. حياه جديده وَ أيام جميله ♥




السلام عليكم وَ رحمه الله وَ بركاته  ، يمكن احد يقول شفيها المفهيه حاطه عوده للمدارس + ايام جميله مايجتمعون !!، الا يجتمعون ههههههههه .. جدا جدا استغرب من حلطمه النااااس ماتبي تداوم ، ياليت لو انو العطله مستفيدين منها اصلا عشان مايبون يداومون :( قبل ع ايامي كنت انبسسط اذا قربت المدرسه اجهز ملابس المدرسه كلها واشتري شنط ودفاتر وادلع نفسي حتى استيكرز اشتري ههههههههه ، لحد الثانويه العامه وانا اسطر دفتري وارتبه!


ايام حلوه انو اقابل صديقاتي واجلس معاهم ، يومي يكون منظم  .. اصلا بحياتي ماسهرت بالبيت متعودين ننام بدري ١٠ البيت طاااافي ونقوم شبعانين نوووم .. احس اشياء كثييره تغيرت هالفتره دوام او مو دوام السهر والطلعات والسفريات موجوده ، متخيلين انو لحد الجامعه ماكنت اغيب ابد ابد الا اذا مريضه وطايحه بالسرير :\ واذا مره مالي نفسي للمحاضره كنت اداوم بس ماحضرها لان عارفه غيباتي بكل ماده كم بالضبط وماتعداها .. ماكذب واقول الدراسه جميله واو والعلم نور ، بس ليش مانستمتع ، انا ماكنت شاطره مره مره بس كنت استمتع بايام المدرسه ، الحين ماشاء الله الكل معاه اجهزه وحاضر بكل مواقع التواصل الاجتماعي يعني مافي مجال نشتاق لاحد هههههه ، بالبوست هذا بيكون بس نصايح شلون اندمج ببيئه جديده وَ أكون صداقات جديده 

مدرسه جديده وَ عالم جديد :
اول شي سواء كنتي رايحه متوسطه جديده او ثانوي او جامعه ، الجديد دايما غامض وَ يخوف خاصه لو ماعندك احد تعرفينه ، بس ليش مانشوفها من جانب ثاني ، فرصه انو ابدا بدايه جديده اكون علاقات جديده وَ أترك انطباعات جميله!

البدايه الجديده ماتعني انو اتصنع واغير شخصيتي عشان اكسب ناس لا .. ممكن في شي بشخصيتك مو حابته او مو عاجبك وتبين تغيرينه بس بيجونك صديقاتك او زميلاتك بالصف ويستغربون من تصرفاتك الجديده وممكن تخافين من التعليقات والكومنتس عشان كذا ماغيرتي هذا التصرف ، ابدي بدايه جديده بانو تطلعين افضل شي فيك  ممكن انتي تخجلين ترفعين يدك وتجاوبين بالكلاس وودك تشاركين بس فيك خوف من كلام الناس او اجابتك تكون غلط ، كلناا مرينا بالتجربه هذي طبيعييي جداا ، فتكون فرصه جديده لك انو تبينين للناس لا انا من النوع الي احب اشارك واحب ابدي رايي واحب يكون لي وجود ، ممكن تكونين من النوع الخجول وعندك صديقات محددات وخلاص تعودتي عليهم ، اعرف شعور انو تنتقلين لمكان جديد ماتعرفين فيه اي اي احد ، بس لاتخافين انتي كونتي علاقات من قبل بس ممكن كانت من فتره طويله ونسيتي كيف الشعور لما تكونين علاقه جديده ، هذي مو تجربه جديده عليك انتي قدرتي من قبل فلاتترددين من تكرار هالتجربه ، ومثال ثاني انو انتي متعوده مع صديقاتك دايما تجلسون ورا ومسوين قروب ومطنشين ابو الكلاس غلط غلط اذا حابه تبدين بدايه جديده كوني دايما قدام جالسه واتركي انطباع للمدرسه او الدكتوره والبنات انا موجوده! ومثل قلت شوفي لتجربه انتقالك لمكان جديد تجربه ايجابيه وانك بتبدين بدايه جديده بتتركين العادات الي ماكنتي تحبينها بنفسك وخايفه تغيرينها عشان كلام الناس ، وتصيرين الشخص والانسانه الي تتمنين تكونين دايما!

كيف اكون علاقه جديده!

خليك لطيفه! مدري كيف اذا هالعاده تكون مكتسبه ولا فطره بس ممكن اذا مو موجوده فيك تتعودين عليها ، حلو لما احد يجلس معك او يتعامل معك ويروح تكونين تركتي انطباع جيد عنده ، تكونين لطيفه مو معناته ضعيفه شخصيه ، لطيفه تكونين خلوقه وَ محترمه وَ انسانه مهذبه ، احب الناس اللطيفه وحتى لو ماصادقتها بتكون تركت فيني انطباع اذكرها فيه دايما واقول الله يذكرها بالخير ..

طيب شلون اكون لطيفه ماعرف!

١. عاملي الناس كما تحبين ان يعاملوك ، مثلا دخلتي من باب والباب هذا من النوع الي يقفل من نفسه اذا شفتي احد وراك امسكي له الباب لحد مايجي ، مو معناته يكون بينك وبينه عشره متر وتنطرين كأنك بواب لا! احد يمشي وراك بالضبط او معاه اغراض كثيره ساعديه بان الباب تكونين ماسكته لو ثواني ، ان شاء الله فهمتو علي خليك لطيفه بس لاتكونين بواب للناس هههههههه ، وحده طاحت كتبها وهي عندك ممكن تساعدينها ، وحده زلقت لا سمح الله لاتضحكين رجاء هههههه اذا ماقدرتي تساعدينها روحي وخليها بدون ضحك ، وحده عطست قولي يرحمك الله ، بس دايما اختاري الوقت المناسب يعني لو البنت معك وانتي مو مشغوله بشي معين او معك احد ، مو تسولفين ووحده بينك وبينها عشرين طاوله وعطست تقولين يرحمك الله بصراخ ومن بعيد مستحيل p:

٢. لسانك مهذب ، لما تكونين بمكان عام الصراخ الهمجي ماله اي معنى غير انو بيخلي عنك انطباع همجيه دفشه مافيك ذره انوثه ، بتزعجين الناس وبيقرفون منك :( حتى لو مزح احترمي المكان الي انتي فيه ، ومو شرط اذا كل البنات همجيات وماعندهم الا الصراخ كانهم اولاد تخلين هالشي عادي عندك بعد ، غير هذا السب والشتم ابدا ابدا مو حلو :| اذكر لما كنا بالمتوسط اذا بنت قالت ياحيوانه الصف كله يشهق هههههههههه ، مابي اقول مثلو تكونون بيرفكت بس لاتتمادون بالكلمات الي مو زينه حسني ملافظك لنفسك اولا مو عشان الناس وبس ، ثالثا حلو لو لسانك يكون ينقط عسل p; في ناس ماتتقبل تقول لغيرها ياقلبي ياحياتي وغيرها ،، مدري انا تربيت ببيئه دايما اسمع هالكلام ومتعودين عليه ، بس لو لناس اول مره تشوفينهم ممكن يكشون منك اذا قلتي هالكلام ويقول خير سلامات وش هالميانه! اذا انتي ماتحبين هالكلمات ولاتستخدمينها ابدي بكلمات الطف بعيدا عن الغزل لوول ، مثل ( لو سمحتي ، من بعد اذنك ، ماعليك امر ، ممكن ، والي يعافيك ، تسمحين لي ، يسعدك ربي ، الله يجزاك خير ، من ذوقك ، شكرا ، عفوا مع السلامه ) امزح .. :$ الناس بتحس انك مهذبه ولبقه بكلامك  ، عن نفسي ماحب اتعامل مع ناس جافه مدري ، ويختلف من شخص لشخص بس حلو لو تدخلين هالكلمات لو بعضها بجملك وبالوقت المناسب ومع الوقت بتتعودين.

٣. ابتسمي! هذا افضل واحسن شي لتكوين علاقات ، الابتسامه بتخليك مريحه وتدخلين القلب بسرعه ،، مافهم ابدا ابدا الناس المكشره ووجهها عابس كأنها مغصوبه ع الحياه ، الابتسامه طريقه سهله رخيصه ومتوفره لكسب الناس فليش مانستغلها! مو معناته انو تمشين وتضحكين بيقولون شفيها هذي ههههههه ، الابتسامه انو وجهك يكون بشوش اذا احد طاحت عينه عليك ابتسمي ابتسامه خفيفه ، اذا احد جا بيكلمك ابتسمي حتى يحس بالراحه وهو يكلمك اذا كشرتي بيصد ويرتبك وممكن ينسى موضوع ليه جا يكلمك ههههههه،


طيب طبقت كل الخطوات الي فوق بس جد كيف اكسب صديقات ! ، بالاغلب بتكسبين صداقه بنات بيكونون معك بنفس الصف ، وتكون بشكل تلقائي وعاادي وماراح تحسين بنفسك ، ممكن اذا جيتي بدري قبل الدكتوره او المدرسه وشفتي بنات سولفي معهم عادي ، عرفي عن نفسك او اسئليهم اذا هم من زمان بالمدرسه هذي وانك جديده او لو كنتي بالجامعه اسئليهم قولي قد سمعتو شي عن الدكتوره اي سالفه ابدي فيها وسالفه راح تجر سالفه ، الشي الثاني ممكن تشتركين بنشاطات غير الدراسه ولو قدرتي بليز بليز اشتركي غير انو النشاطات بتوسع مداركك وتشغل وقتك وتحسسك بالانجاز راح تكسبك صديقات وراح تنبسطين جدا! شوفي النشاطات المتوفره ودوري اقرب شي لميولك واشتركي ، كان بجامعتي جمعيه لتنظيم النشاطات والفعاليات وكنت ابي اشترك مرره بس صديقاتي كانو يكسرون مجاديفي يقول اف فضاوه ، ماراح تلقين وقت ترتاحين فيه بيأثر ع دراستك ومن هالخرابيط ، مايبون يشتركون لان مالهم خلق هذا العذر الوحيد والى الان ندمانه اني ماشتركت صراحه :| فاذا مدرستك او جامعتك تقدم نشاطات اشتركي فيه ممتعه وبتفيدك كثير وتكسبين صديقات واذا مدرستك من النوع الفاشل الي كل تركيزه ع الدراسه وبس اقترحي عليهم تسوين نادي اي شي واصري وقولي انك بتتكفلين فيه وقولي لاحدى المدرسات تساعدك وبتحسين بالانجاز العظييييم :)

بالاضافه لهذا كله ، الشكل مهم جدا جدا ومحد ينكر هالشي ، بتكلم عنه بتدوينه منفصله بس اهم شي حافظي ع نظافتك + شكلك مرتب مو شرط تكشخين بس يكون شكلك جميل وبفصل هالنقاط بتدوينه غير ان شاء الله.

نقطه ثانيه اذا منتقله لمكان جديد ، بعد ماتاخذين جدولك والاوراق المهمه تعالي قبل محاضرتك بوقت واكتشفي المكان الي انتي فيه ، شوفي وين القاعات وين الكفتريا وين بوابه الخروج والمعيدات وين مكانهم والعماده وين مكانها ، واهم شي قاعاتك لان مو حلو تتأخرين وتعطين انطباع مو كويس للدكاتره ، اذكر اول يوم بالجامعه انا وصديقتي جايين مع بعض وبنروح القاعه وقاعتنا كانت برا بعيده شوي عن الجامعه نفسها كنا ندخل من البوابه نروح يسار نمر بالكفتريا وبعدين العماده وبعدين القاعات الاساسيه وبعدين المكتبه وبعدين الكوبي سنتر لحد مانوصل القاعه هلكانيييييين ويوميا على هالحال ونتأخر ونقول واو جامعتنا كبيره! ومره ماحضرت الدكتوره والبنات بيطلعون لبيوتهم اقول لصديقتي شوفي يروحون بطريق ثاني خلينا نلحقهم واكتشفنا ان قاعتنا جمب البوابه بالضبط وطول الاسبوعين نلف الجامعه وبدال لانروح يمين للقاعه دايركت نفر الجامعه بكبرها :)) ليش! لان كنا ندخل القاعه ونطلع مانروح مكان ثاني وضيعنا وقت وتعب طول هالفتره وحسينا بالغباء هههههههههههه ، فتعرفو ع المكان الي انتو فيه عشان ماتتأخرون وعشان ماتضيعون وتقدرون تقَدرون كم وقت يلزمكم تطلعون من قاعه للثانيه.

من الاشياء الي حابه جدا انبه عليها ، الثانوي والمتوسط او الناس الي متعوده عليهم والبيئه المتعوده عليها بالغالب بتكون نفس تفكيرك وطبايعك ، اذا رحتي للجامعه بتواجهين ناس من مختلف التوجهات والتفكير والتربيه ، بتنصدمين بالبدايه وخاصه مجتمعك قبل كان محدود والناس الي فيه محدوده وفجأه!

عشان كذا خليك اوبن مايند ، الي مو نفس تفكيرك او طبايعك هو جاي من بيئه مختلفه لاتحكمين ع الناس وتصنفينهم! مو معناته مو نفسك هو غلط وانتي صح ، الجامعه بتغير من تفكيرك كثيييير وحطي ببالك لازم يكون للاحسن ، لاتسمحين لاحد يلوث تفكيرك ابدا! ممكن انتي من مجتمع عادي البنت ماتتغطى وتشوفين بنت لابسه عبايه راس ع طول بتحكمين عليها ، بالحاله هذي مافي صح ومافي غلط ومافي وحده احسن من الثانيه ، تقبلي انها من مجتمع وتربيه واعتقاد مختلف عنك ، وممكن العكس اذا شفتي بنت ماتتغطى حاطه ببالك انها ماتستحي في ناس كذا اذا انتي مو متغطيه انتي مو متربيه :| هذا الي متعودين عليه وهذا الي يسمعون عنه دايما يسمون هالشي stereotype شنو يعني ستريو تايب معناته النمطيه ، يعني تقسيم الناس لفئات حاكمين عليهم بحكم من زمان يعني تعممين ماتلتفتين للشخص نفسه ..

فئه مو متغطيه = ماتستحي
فئه تلبس عبايه راس = متزمته
مثل لما الاجانب اذا شافو عرب او مسلمين اعتبروهم ارهابيين
احنا لو نشوف هندي راكب سياره فخمه نقول كيف لان مزروع بعقلنا انهم بمستوي اقل منا
ومثل الاجانب اذا شافو اسمر راكب سياره فخمه او عايش ببيت فخم يعتبرونه سرق هالشي لان معروف عنهم جرائمهم كثيره،

النمطيه هذي اسوء شي ، لاتنظرين للبنت كيف شكلها شنو تلبس وين تروح وين تسافر ، شوفي شخصها واخلاقها اهم لو محترمه ولا!!! مو معناته تتعرفين ع بنت ٢٤ ساعه تحط صورها بالمايوه وتتعرف ع شباب ويعني انها اوبن مايند وتتقبلينها وخلاص لا في حدود للناس ، اذا هي محترمه ومحترمتك واخلاقها كويسه تحكمين عليها بالشي هذا وشيلي فكره الاحكام المسبقه الي متربين عليها ، صعب بالبدايه بس مثل ماقلت لان احنا دايم نعيش بمحيط ضيق والي حولنا دايما نفس تفكيرنا ونفس عاداتنا ماراح نتقبل الناس الي مختلفه عنا ، الجامعه بتفتح عيونك وتقابلين ناس اشكال واجناس منهم الصالح ومنهم الطالح ، دايما خليك مع البنت المحترمه الي تحافظ ع حضورها وعلى تسليم واجباتها ، صدقيني البنات الكول الي ٢٤ ساعه ساحبه ع الكلاسات وتهايط ماراح تنفعك ابدا ، حلو نستمتع بايام الدراسه بس بالنهايه مصلحتك اهم ، وهذا درس تعلمته بالجامعه جدا ندمت اني ماشديت حيلي اكثر وجبت درجات افضل ، لاتخلين السيئين يأثرون عليك دايما احيطي نفسك ببنات ايجابيات خلوقات يساعدونك مو اذا جا وقت الجد سحبو عليك او قالو غششينا :|

بالنهايه ، مرحله جديده خليها ممتعه انبسطي فيها ، مافي احلى من ايام الدراسه مافي شي سهل مع الاجتهاد والاستعداد ، بتكسبين صداقات اذا انتي بنت حبوبه بشوشه ومبتسمه ولطيفه p: لاتخافين حتى لو ماكسبتي صداقات بالبدايه بالاول والاخير راح تقدرين اذا سعيتي للشي هذا! وبليز بليز لاتقولين طفش يع الدراسه اوف مالي خلق ، ازرعي طاقه ايجابيه بنفسك وراح تنبسطين بكل دقيقه بمشوار الدراسه ، انتي = افكارك ، خلي افكارك متفائله بتكونين متفائله ، والله يوفقكم وسنه جميله مليئه بالانجاز ان شاء الله 

للتواصل معي ع التويتر والانستقرام 
الايكونز ع يمين الشاشه
|


لاتنسين الاشتراك بالمدونه ليصلك كل جديد ..
كونو دائما جميلين  ..

xo Gorgeous

هناك 35 تعليقًا :

  1. مميز ومختلف...هيفيد كتير ان شاء الله كيييب ات اب

    ردحذف
  2. معلومات كثيرة ووافره . شكرا يالحب

    ردحذف
  3. يسعدك ربي على هالتدوينه ..
    حببييييييييييييييييييييتتتت كل حرف كتبتيه ❤_❤
    انا جامعيه واستفدت من كلامك واعطيتيني جرعة تفاؤل وايجابيه ^^
    شكرآ ❤

    ردحذف
  4. السلام عليكم
    الله يحفظك وين ما كنتي
    أنا بنت جدا ايجابيه في بيه متزمته
    لكنك أعطيتيني دفعة للأمام \
    شكرا جزيللا لكي اخيتي
    و راح أطبقها في القريب العاجل ......
    عن جد شكككرا جزيللللا

    ردحذف
  5. شكرا شكرا على الدرر
    الله يحفظك

    ردحذف
  6. يانااااسسس عليك ماقصرتي جججدا
    يعطيك العااافيه كلاامك ميه ميه
    ومنجد اتبع هالطرق احيانا وبجد النتايج مذهله اتعرف ع اشخاص حبوبات جدددداا

    يخليك لنا يااارب اسستمري احنااا معك

    ردحذف
  7. كلامك تحفيزي جداً , مرره استفدت يسعدك ربي ,,

    ردحذف
  8. كتبت كلام بس مدري وين راح بكتبه مرة ثانية :$

    مرة مررة حبيته
    كلام واضح ومرتب
    صراحة كنت بالبداية خايفة إني ببدا بيئة جديدة وماحب أبدا الصداقات وماعرف
    بس بعد كلامك عطيتيني دفعة إجابية مررة


    ننتظر الجزء الثاني بس اممم متى لأن بكرا دواماتنا عشان نبدا بداية كاملة :p ❤❤
    مرة شكرًا قوورجس ❤❤

    ردحذف
  9. مرررا شكررا قورجس استفدت كثير من كﻻمك

    ردحذف
  10. السلام عليكم..
    يعطيك العافية ياجميلة ♥
    وربي كلامك يعطي دفعة تفاؤل لنفوسنا
    وكل كلامك سليم ميه بالميه
    يعجبني اسلوبك الخفيف والممتع والمفيد بنفس الوقت ♥♥
    مو زي البعض يعطيك المعلومة كأنها درس !!!
    أكثر مدونة أستفيد منها ومن كلامها خصوصا انك مختلفة
    بالعادة كل البلوقرز كتبوا عن الميك اب واللبس
    بس انتي تتعمقين لشي اهم وهو نفسية البنت
    اسفة اذا كلامي كثير بس منجد انتي انسانه رائعة ♥♥
    بانتظارك البوست الجاي :)

    ردحذف
  11. بصراحه اتمنى انك تتكلمي عن بداياتك في الدراسه الجامعيه انا اخر سنه في الثنوي ومتخوفه جدا جدا ﻻنني دايما اسمع ان الجامعه تختلف كليا عن المدرسه وغير كذا اتذكر مره زرت الجامعه صراحه اول مادخلت حسيت برهبه كبيره وانا حاليا اعاني من مشكله زياده والي هي اختبار القدرات + التحصيلي .. اتمنﻻ القى منك مساعده وشكررا للطفك .

    ردحذف
  12. تدويينه جمييله مثلك ياعسل وضحكتيني كثيير انتي وصحباتك ع اللفه ف الجامعه ههههههههههههههههههه

    ردحذف
  13. كتبت كلام و اختفى المهم الله يسعدك و في شيء كمان انو الوحده مو لازم تهمل دراستها و تقل ادبها مع المعلمين او الدكاتره و تراعي اهلها في الاشياء دي و غير كدا المعلمين و الدكاتره حرام يجتهدوا عشان يوصلوا المعلومه بسلاسه و بساطه و لو جربنا نشرح حنعرف كمية التعب و نقدرهم و شكرا على كلامك الجميل يا جميله 😘

    ردحذف
  14. الله يسعدك قورجس، من جد تدوينه رائعه جداً وأنتظر بفارغ الصبر التدوينه الثانيه، كلامك جداً راقي وجميل، هذي سنتي الثالثه واستفدت من كلامك كثير حبيبتي،، جزاك الله خير والله يسعدك دنيا وآخره.. (جاري ارساله للبنات)

    ردحذف
  15. كلامك على القلب على طول .. الله يسعدك ياررب

    ردحذف
    الردود
    1. كلامك مرا جميييل
      انا انسانة ايجابية بس مشكلتي عندي خوف من المجتمع
      مدري كيف أساعد نفسي ياليت تكتبين شي عن هذا <3

      حذف
  16. بوست ممتع جدا ♥
    اهم شي البواب ههههههههههههههههههههههههههههههه xD ♥
    انا رايحه للثانوي قعدت افكر شلون اكون صداقات ؟
    لما كنت بالأبتدائي كنت اجتماعيه كثيير بس اذا جيت العب مع البنات ما يخلوني العب معاهم و يستهبلون علي من اول لسادس وهم معاي و يسوون نفس الحركات !
    علما بأنيي كنت اجملهم فكانوا يكرهونني بشهاده من امي ومن معلماتي :$
    هههههههههه عشان كذا تحملتهم ههههههههه xD
    بس يوم صرت بالمتوسط ما كان احد يقولي شي بس كنت اخاف ما احد يتقبلني و ارجع زي اول :(
    بس الحمدلله استعدت ثقتي بنفسي و زادت بعد ما قريت هالبوست بس مو بشكل سيئ طبعا هههههه , بما انني كل اللي كتبتيه فوق فيني بصير محبوبه <واثقهxD
    شكرا عالكلام الجميل الممتع ما احس بنفسي و انا اقراه , جدياً يعجبني هالنوع من البوستات اكثر من البقيه احسه يجيب السعاده ♥


    عشان كذا صرت الحين مو واثقه بنفسي

    ردحذف
  17. كلااام جميل و رااائع .. يسعدك ربي:)

    ردحذف
  18. رااااااااائعه ومميزةبطرحك كالعادة

    دمتي متألقة عزيزتي ..

    ردحذف
  19. السلام عليكم ورحمة الله وبركاته.
    كلامك مرا ربحني لاني كنت خايفه كيف بختلط مع الناس
    وانا في طبيعتي انسانه خجوله بس احب الناس
    وكمان لو سمحتي اتكلمي عن لبس للمحجبات لان أنا في جامعه مختلطه وما
    نلبس عبايات

    ردحذف
  20. يعجبني التفائل اللي فيككك واسلوبك دائما مشوق وومممتع ، يازييينك شيمو ربي يوفققك

    ردحذف
  21. كلام جميل جدا حلو انك تكونين متفائله مرحه تقومين كل يوم للجامعه فرحانه حتى لو كنتي كارهه الدوام تذكري المثل اللي يقول اذا كنت مجبر فاستمتع يعني كذا كذا انتي مداومه ودارسه ورايحه جامعه فليه ما استانس ليه ما تكون الدراسه شي جميل بحياتي ..

    ردحذف
  22. كلام جميل جدا حلو انك تكونين متفائله مرحه تقومين كل يوم للجامعه فرحانه حتى لو كنتي كارهه الدوام تذكري المثل اللي يقول اذا كنت مجبر فاستمتع يعني كذا كذا انتي مداومه ودارسه ورايحه جامعه فليه ما استانس ليه ما تكون الدراسه شي جميل بحياتي ..

    ردحذف
  23. أشكرك من قلبي غيرتي مفاهيمي وكمان اشياء كثير فيني وخاصة انتي منتقله مدرسة جديدة مع صحباتي حمستيني على الدراسه وعلى أني اعطي المعلمات والطالبات الجديدات علي انطباع كويس وأكون صداقات ♡ ♡ ♡

    ردحذف
  24. أشكرك من قلبي غيرتي مفاهيمي وكمان اشياء كثير فيني وخاصة انتي منتقله مدرسة جديدة مع صحباتي حمستيني على الدراسه وعلى أني اعطي المعلمات والطالبات الجديدات علي انطباع كويس وأكون صداقات ♡ ♡ ♡

    ردحذف
  25. أشكرك من قلبي غيرتي مفاهيمي وكمان اشياء كثير فيني وخاصة انتي منتقله مدرسة جديدة مع صحباتي حمستيني على الدراسه وعلى أني اعطي المعلمات والطالبات الجديدات علي انطباع كويس وأكون صداقات ♡ ♡ ♡

    ردحذف
  26. شكرا على هاي الممعلومات ياسكرة

    ردحذف
  27. السلام عليكم
    البوست جمييييييييييييييييل جدااااااا و انتي انسانه رائعه و ايجابيه و انا افضل الناس الايجابيين و المتفائلين دائما لانهم يعطوني طاقه ايجابيه و من اقره هالنوع من البوستات اشعر بالطاقه و السعاده مع انه ما عندي دوام ودراسه بس عجبني كلامك كثيييييرا و كانما تقرين افكاري طولت الرد كثييييير مشكوووووووووووره جورجس انتي انسانه جميله جدا

    ردحذف
  28. الله يسعدك ويكثر من امثالك ويجعلني زيك

    ردحذف
  29. ربي يسعدك ،، أنا مرة شايلة هم الجامعة و كلامك و مدونتك و إنتي كلك زرعتي فيا التفاؤل و غيرتي فيني كثير و ما زلتي تغيري للأحسن ربي يوفقك ف حياتك و يكثر من أمثالك ..

    ردحذف
  30. سلمت يداكِ يا عسل :)

    ردحذف
  31. X متخرجة لا تكلمني X هههههههههههههههه
    يعطيكِ العافية ♥♥

    ردحذف
  32. ادري الموضوع قديم لكن والله مره شكرا انا السنه الجايه بصير ثانوي وبنقل مدرسه جديده يعني مرحله جديده ومدرسه جديده بعد لاااا😭😭😭 ان شاء الله بطبق كل اللي قلتي عليه في اول يوم دراسه مارح انسى ان شاء الله🙊

    ردحذف
    الردود
    1. حتى انا طالعه ثانوي الله يسهل لنا ياارب


      الله يسعدك شكراً كثري من هالمواضيع

      وعندي معلومة اضافيه
      اهم شي دينك ثم دينك ثم دينك
      لان اذا كنتي انسانه تعرفين الله وتخافينه وتحبينه
      ربي بيحبك وبيخلي امورك كلها خير ويسهلها وييسرها لك
      وبتلاقين الناس يحبونك ويحترمونك
      لان دينك بيعكس شخصيتك

      وكمان لازم تكونين انسانه واثقه من نفسك وتحبين الخير للناس وتساعدينهم ف دروسهم وغيره وكثري مشاركات متميزة مع الاستاذة

      وشكرررراً

      حذف

التعليقات الجميله ♥♥

Blogging tips