#البائعه_السعوديه_تستحق_الافضل | نطالب بالتغيير !

،

السلام عليكم وَ رحمه الله وَ بركاته

من مبدأ التغيير يبدا بالفرد الواحد ويمتد للمجتمع كامل حبيبت أكتب هذا البوست !

كثييييير مضايقني هالموضوع كثير كثير ، وَ أشوف بنات متأذين منه

وحتى أمس البلوقرز تناقشو فيه

وَ طلعو ما في جعبتهم وَ حسيت للان باقي كلام بقلوبهم !

وأكيد الكلام لايودي ولا يجيب ، لازم يكون في خطوه ملموسه

حتى لو ماحصلنا النتيجه الي راح ترضينا نكون وصلنا صوتنا ع الاقل : )

خطوه تأنيث المحلات جدا كانت رائعه وكثير انبسط فيها وَ حبها ،

غير انو حصلو بناتنا وظايف محترمه ، احنا كزبونات عمليه الشراء صارت اريح وَ آفضل

وَ خاصه بمحلات اللانجري وَ الميك اب ..

مشكلتنا آو آعتبرها مشكله الشركات الي وظفت البنات بالأصح !

انو أغلب الموظفات -مو كلهم- اغلبهم وَ هذا مو كلامي كلام كثييييير بنااات 

حسيتها مو مشكله تواجهني أنا كشخص واحد ! مشكله تواجه بنات كثار ومتأذين منها

بدال لايصير التسوق متعه صار شي ينرفز وَ يرفع الضغط !

موظفات بدون خبره بأي شي ، المحلات صايره حوسه مافي ترتيب

تسأل عن أبسط شي مثل السعر محد يعرف !

صرت اذا دخلت مابي احد يساعدني بس ابي اخذ الاشيا الي ابيها واطلع بسلامه

اذا شفت وحده جايه من بعيد اقول بقلبي يارب لاتجي يارب لاتجي هههههههههه

مايعرفون شي ويغثونك بتعاملهم حتى لباقه مافي !

في مواقف كثييره صارت معي والله صرت أتجنب إدخل هالمحلات

آو قبل لا آروح آكتب كل شي أبيه بورقه ومرات اصوره عشان ابحث عنه بنفسي :\

أغلب الموظفات مالهم علاقه بالمجال هذا ، مو غلطهم اببدا

اكيد كل وحده تدور لقمه العيش ، الغلط من الناس الي وظفتهم

المفروض في دورات ، في أحد يوقف معهم وَ يفهمهم الاساسيات عَ الاقل

ولا قبل الرجال يبيعون وشاااااطرررين من وين عرفو ؟

أكيد أحد دربهم وأحد وقف معهم وَ فهمهم ..

مانبي فنانات ميك اب نبي اقل شي وحده فاهمه ايش تبيع 

فاهمه بإبسط الاشياء الي قدامها :\

من المواقف الي صارت معي في سنتر بوينت :

١)

أدور روج مات -مطفي- وماحصلته سألت الي تبيع قالت ايش مات ؟

قلت مطفي ، قالت يعني ايش مطفي ؟

:\ ؟؟!

٢)

كنت أدور عن ماسكرا من ميبيلين بس ماحصلت الكاونتر حقهم

سألت وحده مايمدي اسأل ومسكت يدي وجلست تحط ارواج

اول شي انصدمت قلت لحظه بس انا ابي ميبيلين مابي ماكس فاكتور

قالت لا انتظري هذا جديد ومستمره !

قلت ابي ميبيلين اصلا ارواج مااااابي !

قالت شفتي الشدوهات الجديده الي نزلناها ؟؟؟

قلت ماكس فاكتور ماااحبه اصلا انا ابي ميبيلين !!

قالت اخر كاونتر هو ميبيلين وقلت وين مشت وانا امشي وراها ادور عن منديل

امسح الحفله الي بيدي ، شافتها الي بميبيلين قالت لها شتبي هذي "تقصدني"

قالت مدري عنها شوفيها شتبي

هههههههههههههههه حتى لباقه وتأدب بالحديث مافي !

حسيت جالسه بحراج بن قاسم :\

٣)

هذي من المواقف الي قالو لها البلوقرر :

تقول فاطمه @AllForYou__

انو كانت بسنتر بوينت وشفت موظفه تفتح علبه المناكير

وتحط منها وهي جديده اصلا !

وجت بنت من بعدها وشرتها 

غير انو مافي ذمه او ضمير ، العلبه انفتحت فتاريخ صلاحيتها بدا 

بما انو تعرض للهوا ، وَ مضر صحيا اصلا :\ !!!

٤)

وفاء @WafaA7med تقول كل ماراحت تشتري ماسكرا منهم

تحصلها مفتوحه ومستخدمه ، المعروف المساكرات مثل شركه ميبيلين 

تجي ببوكس مغلف ، وحتى المنتجات الثانيه تكون مستخدمه او مفتوحه

مع انو اغلب الكاونترات يوفرون تيستر بس مافي أحد مسؤول عن الكاونتر

يرتبه ويهتم بنظافته ومايخلي الزباين تلعب بالمنتجات !!

جد حوووووسه حوووسه ، رحت لاماكن كثيييره بس ماعمري شفت

نفس حوسه محلاتنا ، احنا دافعين فلوس نبي ناخذ شي مقابل يستاهل !

في مواقف كثيره بس قلت اختصرها

هذا بالنسبه لسنتر بوينت

من المواقف الي صارت معي في ماك :

١)

كنت أدور بودره مينرلايز ، ماحصلتها سألت عنها تقول الموظفه مدري ايش قصدك

قلت بودره وجه قالت مدري روحي شوفي هنااااك وتأشر بيدها

وهي تسولف مع صاحبتها !

عصبت وقلت لها طلعيلي الي قلت لك عليه ، طلعت لي فاونديشن مضغوط

قلت هذا كريمي قالت اي طيب 

قلت ابي بودره بودره ، طلعت لي بودره فكس بلس قلت شفرقها عن المنرلايز

قالت مدري يمكن العلبه

زوجي الي ماله علاقه بالميك اب جلس يضحححك لهدرجه ماتعرف اي شي :| !!!

٢)

مو مشكله يعرفون الانواع بس لما جيت احاسب وسألت قبلها قالت لي ب١٧٠ ريال

لما جيت بحاسب طلع ب١٥٤ ريال

وجلست تضحك تقول قبل شوي محاسبه لبنت ب١٧٠ ريال هههه

مدري الغلط منهم ولا من الجهاز !

المفروض الاسعار تكون ثابته ومعروفه ولو انو ماك كل شوي يغير سعره

بس مو كل يوم اكيد !!

من المواقف الي صارت معي في سيفورا :

١)

كنت ابي برايمر للعيون ، دورت ماحصلت فاضطريت انادي الي تبيع

دورت وقالت مافي ، قلت طيب دوري بالدرج قالت لا مافي

قلت طيب افتحي الدرج وشوفي

وبالغصب فتحت الدرج وحصلت كميه كبيييره 

سكرته وقالت مافي هههههه قلت انا شايفه طلعي

قالت لا هذا منتج ثاني ، مدري مالها خلق تدور ولا وش سالفتها

فتحت الدرج ودورت وحصلت الي ابيه ورحت :\

زين ماتربعت بالمحل وجلست ابيع معهم بعد :|

٢)

كنت ادور هاي بيم من بينفت اقولها في

تقول مخلص قلت طيب متى تجيبونه قالت مدري

وكل هذا وهي معطتني ظهرها وتسولف مع الثانيات !

محسسيني اشحد منهم :\ ؟!!

من المواقف الي صارت معي في وومن سيكرت :

١)

كنت آدور سليبر -شحاطات بيت- قلت ابي الي عليهم خصم

قالت مدري شوفي بنفسك قلت وين فيه ١٠٠ سليبر ومافي علامات !

قالت يوووو ماحطو البنات عليهم علامات انتي اختاري وانا اشوف بنفسي اذا عليها خصم ولا

يعني ماعنددي شغل الي اروح ادور حبه حبه وانتي تشوفين سعرها :\

هونت ماخذت -ــــ-

٢) 

الي يبيعون كانو كلهم بالمخزن جالسين يسولفون لو انسرق المحل محد درا عنه

هههههههههه ، والي قاهرني الصياح

يافلاااااانه وين جوااالي يافلااااانه وين الشاااااحن

وهي باول المحل والثانيه بالمخزن :\

عيب يماما المفروض يكون الشغل بروفشنال لو نقطه بس لاتجلسين تصايحين

بالمحل اصوات مستفزه وتخرب علينا متعه التسوق ههههه :(

،

المواقف كثيييره وبمحلات اكثر والله بس مابي اذكرها كلها احس اكتئبت هههههههه

يعني قبل الرجال موظفين وفاهمين كل شي !

من نفسهم بيفهمون او احد مدربهم ؟

طبقو النظام الي طبقتوه قبل ع الرجال سوو نفسه ع الحريم 

مانبي شي والله نبي ندفع فلوس واحنا مرتاحين ومبسوطين

مانحس انو تم استغلالنا او احد ضحك علينا

وخاصه البنات الي مايعرفون كثير بالميك اب والي تبيع بتحوسها وتبيع لها اشيا ماتناسبها

أنا مو ضد شغل المرأه بالعكسسس خطوه ممتازه وَ الله يعطيهم الصحه والعافيه

مخلين عيالهم وبيوتهم ويتعبون 

بس اقل القليل ماننظلم احنا بعد !

بس اروح اشيل هم وحده تنشب لي ولا تعكر مزاجي ولا بسبب كسلها ماتخدمني ،،

المطلوب منكم حاليا ، تدخلون هاشتاق

#البائعه_السعوديه_تستحق_الافضل

اكتبو تجاربكم والمواقف الي مريتو فيها !

بس رجااااء بدون تجريح او سب ، اكتبو رايكم وشاركوني فيه ..

نبي نوصل رساله احنا كزباين للشركات انو نبي تعامل افضل

نبي بضاعه افضل :\

نبي مكان ومحلات انظف وارتب

نبي موظفات لهم خبره لو بسيطه جدا بالي يبيعونه

نبي لباقه وشغل كالمحترفات

نبي لهم تدريب او دورات تساعدهم يطورون نفسهم !

الهدف من الهاشتاق ندعم البائعات السعوديات مانخرب عليهم

نخليهم يطورون من انفسهم عشان نفسهم وعشانا احنا !

واذا في وحده من البائعات تتابعني وعندها اي استفسار تقولي ماراح اقصر

وبشرحلها كل شي يخص المكياج عادي جدا ،

اهم شي اشوف وحده تبي تطور من نفسها مو بس كذا عايشه بجهل :(

كثار من البنات صارو مايشترون من المحلات الي هنا

وانا منهم قلت مشترياتي جدددا ماخذ الا اذا شي مهم

نطلب من النت اكثر او اذا سافرنا

اذا ماحسينا في تطور او احد سمع مطالبنا بتصير مقاطعه

وانا جاده بالموضوع هذا :\ 

عن نفسي لو ماحسيت في تحسن اتعهد انا قورجس ماراح اشتري من محلاتنا ابدا !

*حسيت نفسي شي وانا اقول اتعهد انا قورجس ههههههه*

بشوف رده فعلكم لو جد في احد متضايق من الموضوع هذا مثلي !

اذا بخاطركم شي اكتبوه بالهاشتاق وحاولو تنشرونه ..

نقدر نغيير من الوضع الي احنا فيه ، نتساعد وبنغيره ان شاء الله

يمكن البعض يعتبر الموضوع تافهه ومايستهال ابد

بس هذا ابسط ابسسسط ابسسسط حقوقنا ، وهذي البدايه بس

نقدر نغيير المجتمع لان التغيير يبدا من الفرد !

وعن نفسي بحاول اوصل الرساله للشركات

- البندريه او دار البندر "سنتر بوينت"

- الشايع "ماك ، بودي شوب "

- الحكير " لافي ان روز ، لاسنزا"

لو في محلات ثانيه قولولي وعن شركاتها ..

يد وحده ماتصفق ، واذا تعتبر الموضوع تافهه يكفي انو نحاول نبدا بالتغيير

فاحتفظ رايك لنفسك لان مايهمنا ،

مانبي نضر احد بس نطالب الشركات بتدريب طاقم العمل واختيار الموظفين الصح

وأنا متأكده بننجح باذن الله بس ساعدوني شوي ()

كن أنت التغيير الذي تريده باالعالم *غاندي

لاتنسون تكتبون بالهاشتاق :

#البائعه_السعوديه_تستحق_الافضل

مطلبنا بسيط ، مين معي بالحمله هذي !

لتواصل معي أو استفسارات أو ملاحظات :

| |

الايميل :

gorgeousta@gmail.com

كونو دائما جميلين \ قورجس