شعرك دهني ؟ بقولك سري للتخلص من الدهون بثواني ! بس لاتعلمين احد :$

-

السلام عليكم يَ جميلاتي  

هالموضوع اهداء للحلوات الي صاحيات ينتظروني ولا النايمات مالهم شي < كن احد درا عنك :$

المهم ، اليوم صحيت متأخر شوي من النوم ، ( الي يحبني يدعيلي انو اعدل نومي :"") )

يادوب سويت روتيني وخرابيطي وتغديت فجأه فجأه انعزمنا ، 

اكره العزايم الفجأه بس مرات لها طعم ولما احط ميك اب سريع يطلع احلى من الي اتعب عليه < في احد ملاحظ ولا بس انا < ياكثر قرقتي

الي متابعني كويس كويس يعرف انو شعري دهني واخر مره لما اخذت شور ماستخدمت شامبو فيشي الي جد احسه كنز !! لانو يتحكم بدهون الشعر فثاني يوم ع طول ماكأني غسلت شعري وبدا يدهن كني سيلانيه "مع احترامي لاخواني بالسيلان بس محد ينكر حبهم للدهن :$" المهم مافي مجال اخذ شور لان مستحيل وحطو تحتها مليون خط اني اخذ شور باقل من نص ساعه ماعرف مستحيل عشان كذا اكره العزايم الفجأه محد يراعي برودي واحتاج وقت عشان اتضبط :$

فكان الحل السحري الي مخترعه يبيله حبه راس < يارب تكون حرمه < تبطين 

الاختراع العجيب ينفع للي عندهم دوامات وشعورهم تبهذلهم !! معروف اصلا الي ياخذ شور يومي يقطع الشعر ! ومعروف بعد انو الدهون الي تفرزها الفروه مفيده للشعر جدا جدا واسألو اي خبير ، فاخذو يومين لاتطلعون فيها وخلو شعوركم تدهن ونعم للتعفين بس لحد يشوفكم كذا وتقولون لا قورجيس قالت مابي استأثم باحد لو سمحتو :$

لحد يدقق عَ التصوير لانو من الايفون :$

اسمه ال Dry shampoo اي الشامبو الناشف ! شامبو ينظف فروه الراس كانك تو ماخذ شور ! جد ماستهبل هههههههههه انا اول ماسمعت فيه قلت مستحيل وين يروح الدهن ! بس فيه ماده تمتص الدهون كلهااا وتعطي الشعر فوليوم جممميل ، تحسين فريش ومافي حتى ريحه دهن ! استخدمته اليوم الظهر وللان مارجع الدهن :$

شريته لما كان عندنا مناسبات ورا بعض وتعيجزت صراحه كل يوم بسوي شعري وخاصه ياخذ وقت طويل ومن ثاني يوم يبدا يدهن يبهذلني وجربته وضبط :$ بس امانه ماستخدمه الا لما احتاج يعني مو كل مره استخدمه ، صارلي ٥ شهور مشتريته واستخدامي له ماتعدا ال٥ مرات ، صح فعااال وصح مايضر الراس وبالعكس عاادي ،، بس انا احب اغسل شعري احس افضل فمخليته اخر حل .. لازم يكون عندي خطه بديله جاهزه دايما :$

طيب كيف نستخدمه ؟ 

الدهون عاده تتركز بالفروه من قدام و قريب من الرقبه من ورا ، انتو شوفو المكان الي تحسونه دهني و قربو العلبه تقريبا ٣٠ سانتي بعيد عن الفروه ورشوه .. الي استخدمه فيه ماده بيضا ماكان موجود غيرها يوم شريتها بس سمعت انو نزلو غيرها بدون لون فتأكدو !

الماده البيضا عااادي تروح ! لما تبخون مسجو فروه الراس "نفس المكان الي بخيتوه" وبعدين مشطوه ويختفي كل شي ابيض :)

مرره سهل ويفك ازمات وينفع للي يداومون وبشده !

اماكن الشراء : صيدليه بوتس 

المكان : العثيم مول الربوه - صحارى مول - الخيمه مول بخريص 

السعر : قلت قبل ٥ شهور ماخذته ماذكر الصراحه بس ماكان غالي اببد اقل من ٤٠ ريال اتوقع.

في منه انواع كثيره الي اخذته : كول اند كريسب

اسم المنتج : Batiste Dry Shampoo

نقدر نستخدمه يوميا ؟ عن نفسي ماحبذ بس حاولت ادور بالنت لو مضر ماشفت شي :(

بس الافضل تستخدمونه بين الغسلات يعني لو تغسلون شعركم كل ثلاث ايام تستخدمينه :)

سمعت انو بودره الاطفال آو البيكنج باودر ممكن تكون بديل ! بس ماجربت :(؟

ان شاء الله استفدتو وغطيت ع كل الاسئله اشوفكم ببوستات احلى ان شاء الله :$

أي إقتراحات أو طلبات 

عَ التويتر:

https://twitter.com/Gorgeous_blog

أو الأسك:

http://www.formspring.me/GorgeoustaBlog

كونو جميلين دائما  / قورجيس ××

أحبكم :$ ()