مقارنه بين الكليراسونيك وفريو لونا وتجربتي معاهم ♥

،

السلام عليكم وَ رحمه الله وَبركاته ♥

تدوينه اليوم تجربتي مع جهازين تنظيف بشره انشهرو كثير الفتره الي فاتت ، والبعض يحتار شنو ياخذ او يجرب!

قبل ماتشترين اي منتج جديد بالسوق حطي ببالك هل فعلا احتاجه ؟ 

لأن اشوف البعض يشتري لمجرد الشراء وانها هبه وتبي تكون مع الناس 

وثاني نقطه اسألي وأبحثي التجارب تختلف ، قبل ماكتب البوست سألت صديقاتي عن رايهم بالجهازين حتى اكون فكره عامه والاراء انقسمت بينهم وكل شخص حسب بشرته وحاجته ♥

الكليراسونيك

وظيفتها:

جهاز تنظيف بشره بالبيت تستخدمينه ، ينظف بشرتك بشكل عميق افضل ب٦ مرات من استخدام اليدين ، يوعد انه يعطيك بشره صحيه ونظيفه تسمح بامتصاص المنتجات وتتقبلها بشكل احسن ، الجهاز الي بالصوره ميا ٢ يختلف عن ميا ١ بالسرعات ، وبالنسبه للبلس تقدرين تستخدمينه للجسم بس ماحس عملي ابدا لان حجمه يعتبر صغير وياخذ وقت حتى يغطي كل مناطق الجسم بس بالاخير يرجع لتفضيلك الشخصي.

طريقه استخدامها:

تغسلين وجهك بالماي والجهاز بعد وتحطين الغسول على البشره ، لما تحطين الجهاز على البشره لاتضغطين ابد يادوب تلمس بشرتك الفرشاه وحركي يدك بحركات دائريه وهي تكمل الباقي ، مدتها دقيقه وحده وهذا الحلو فيها للعجازين :)

٢٠ ثانيه للجبهه

٢٠ ثانيه للانف والخد

١٠ ثواني للخد اليسار

١٠ ثواني للخد اليمين

يعطيكم تنبيه كل مره عشان تنتقلون بين اجزاء الوجه ، السرعتين بالجهاز هذا الاولى للبشرات الحساسه والثانيه للبشرات المتنوعه وتنظيفها يكون اعمق بشوي.

تجربتي:

بشرتي مختلطه معرضه للحبوب وحساسه ، الجهاز صارله سنتين عندي تقريبا ، حبيتها جدا جدا بس توقعت نتائج افضل من كثر ماسمعت عليها مدح ، توقعت الحبوب ماتطلع لي مع استخدامي للجهاز او تقلل منه بس الحبوب نفسها نفسها تروح وترجع وتكون صغار تحت الجلد ، يعني الجهاز ماساعدني من هالناحيه ، مقدر الومه لان البشره ماراح تعتمد على شي واحد فقط بالعكس في عوامل كثيره وخاصه الاكل والهرمونات وغيره ، بالنسبه لتوحيد لون البشره مع استخدام المنتجات المخصصه للشي هذا ، ماشفت نتيجه منها بصراحه ، بتقولون ليش عاجبك ؟ احساس النظافه بعد استخدام الجهاز جدا جميل ، قبل الميك اب اذا استخدمتيه يخلي مكياجك انظف بكثير لان يشيل القشور من الوجه ، بعد الميك اب وتنظيفه ، لاحظت مهما جربت منتجات ازاله ميك اب ماتفيد بدون الكليراسونيك ، يعني لما انظف بشرتي بمزيلات ميك اب وغسول للبشره وارجع عليه بالقطنه احصل بقايا بس هالشي ماحصله مع الكليراسونيك ، يعني ادت مهمتها بشكل ممتاز "كتنظيف"  ♥

عيوبها:

- الفرشاه لازم كل فتره تغيرينها

- سعرها يعتبر مرتفع نوعا ما

- الشحن مايطول وياك

- اذا شحنتيها لازم تخلينها ٢٤ ساعه تنشحن

السعر واماكن التوفر:

سعرها بين ٧٠٠ الى ١٧٠٠ ريال وتحصلونها بسيفورا

فوريو لونا

فوريو لونا ايضا اداه تنظيف بشره بس تختلف عن الكليراسونيك ولو انهم نفس المفهوم ، الي عندي حجم ميني وصلني من صيدليه وايتس اتوقع كمل السنه معاي ، الفرق انو الفوريو فرشاتها سيلكون وغير قابله للاستبدال وهذا شي ممتاز مقارنه بالكليراسونيك ، لها جهتين الي بالصوره الرقيق للتنظيف الخفيف والجهه الثانيه للتنظيف العميق للمناطق الدهنيه مثلا ، تشتغل على الذبذبات واحساسها على البشره جدا ناعم ، الحلو شحنه يطول كثييير كثييير يعني ماشحنته الا مرتين للان بس.

طريقه استخدامها:

نفس الكليراسونيك تحطين الغسول على البشره مباشره ، وبعدين تبللين الجهاز وتمشينه ع البشره ، الوقت الي فيه دقيقه .. ١٥ ثانيه بعدين يعطيك تنبيه تنتقلين للجزء الي بعده ، فوزعيها بالتساوي على البشره ، حاولي الحركه تكون لاتجاه واحد بعكس الكليراسونيك الي يكون بحركات دائريه.

عيوبها:

- السعر المرتفع لان الحجم الميني بحدود ال٦٠٠ ريال

- تنظيفه شبه سطحي وماتحسين فيه ومايشيل القشور الي على البشره او يعطي احساس النعومه

تجربتي:

استخدمت الفوريو ميني مرتين باليوم لمده متواصله ، بعدين على فترات متباعده ، للامانه ماحسيت فرق معاي بولا شي :)

لدرجه شكيت بنفسي وقلت لا بكمل استخدام وغيرت الغسول عشان قلت يمكن السبب منه ونفس الشي ماحسيت بفرق ، اللهم تحسين بشرتك انظف بشوي ومشدوده مع الاستخدام وهذا الشي ذكرني بفرشاه سيلكون كنت استخدمها زمااان من سوب اند قلوري لونها وردي اتوقع تعرفونها ♥ حسيت بتعطيك نفس النتيجه ، للامانه ماعندي روؤس سودا كثير فمافرق وياي ، الحبوب الي تطلع لي من فتره للثانيه استمرت مع وبدون استخدام الجهاز ، حاولت اغير الروتين ونفس الشي مافي نتيجه.

السعر واماكن التوفر:

الميني ب٦٠٠ ريال والكبير ب٩٣٠ ريال اتوقع وتحصلونه بصيدليه وايتس

السؤال المهم لو خيروني بين الكليراسونيك والفيريو شنو اختار؟

طبعا الكليراسونيك .. مع ان مثل ماقلت ماحسهم يتشابهون ، الكليراسونيك تنظيف اعمق للبشره من الفيريو حتى لما انظف مكياجي وبعدين استخدم الفيريو يبقى بقايا بالقطن ماتروح تماما مقارنه بالكليراسونيك ، الفيرو استخدمها يوميا وماخاف على بشرتي مع ان مافي فايده شفتها بس اقدر اقول احساس الامان! بعكس الكليراسونيك ماستخدمها الا مرتين الى ٣ بالاسبوع بس ماحس احتاج اكثر من كذا ، الكليراسونيك يفرق معاي لما انظف بشرتي من اول مره بعكس الفيريو ، البشرات الحساسه اخذو فرشاه حساسه للكليراسونيك افضل لكم ، بتطلع لكم حبوب بالبدايه مثل ماسمعت من البنات بس بعدين تروح ، بالنهايه البشرات تختلف فشوفي الانسب لك من خلال ماطرحته انا او باقي صديقاتي ، وهذي تجربتي بكل صدق وشفافيه. ♥♥

الاجهزه هذي ماتصنع المعجزات مثل ماتم ترويجه بالعكس كل شي يكمل شي ، فاحرصي على روتين متكامل سواء من داخل او من برا عشان تشوفين نتيجه حلوه ان شاء الله ♥

ان شاء الله يكون البوست مفيد واذا لكم تجربه من الجهازين ارحب فيها بالكومنتات :)

اشوفكم ببوستات ثانيه.