صور حفله إستقبال بنوتي "ديم" وَ تجهيزاتي بالتفاصيل ♥♥ ..

،



السلام عليكم وَ رحمه الله وَ بركاته ♥♥♥، رجعت لكم ببوست جديد مثل ماوعدتكم عن صور إستقبال ديوم .. الاستقبال كنت ناويه اسويه ببيت أهلي وهو ركن مرتب وثيم متكامل عن ديم مع التوزيعات وركن العصير وَ غيره وبأخر لحظه قررت أسويه بعد بالمستشفى الي بولد فيه "مستشفى سليمان الحبيب التخصصي" كتبت تجربتي عنه بالبوست الي قبل هذا ، بالنسبه للترتيبات ماكان ببالي ثيم معين بالبدايه صراحه وَ كنت أجمع أفكار من هنا وَ مرحله البحث كانت أصعب مرحله! اما التنفيذ ماأخذ اسبوع تقريبا وكان كل شي جاهز.


الثيم طلع مثل ماأبي الحمدالله ، كان ناقصه شي واحد ويصير بيرفكت الا وهي الخلفيه بس ماكان عندي وقت اضبطها واستصعبت الامر :$
الثيم المفترض يكون مستوحى من "لادوريه" وحورفت فيه لحد ماصار شي ثاني تمامااا هههههههه ، استقبالي بالمستشفى كان ٣ ايام ، يومين لأهلي ويوم لصديقاتي وبعدين أخذته لبيت أهلي ، الصور شي بيكون من الانستقرام وشي من الكام عشان اغطي أغلب الجوانب عشان كذا بعض الصور مو واضحه ، ويمكن اعدل ع البوست بعدين واضيف صور جديده لو حصلت فرصه ... نبدأ بالصور!

أول شي كان لوقو ديم هو المحور الأساسي بالعمليه هذي كلها ، وصارت براند هههههه كل كل شي حطيت فيه ديم ديم ديم :$ اللوقو تصميم زوجي وساعدني كثيير الله يعطيه العافيه ، سوينا أول شي اللوحه الكبيره عليها اللوقو وتحتها مكتوب:
"مثل الحلا طلت مع بهجه النور ، ديم خلتني اليوم ماما" ♥♥♥♥♥

وستاند الأحرف سويناه عند نجار بإسم ديم وعبيناه ورد صناعي عند زهره الربيع - انقهرت ماحصلت صور واضحه :( فأخذت من الانستقرام والصوره في بيت اهلي ولا بالمستشفى كنت حاطته ع الارض-

الثيم كان معتمد ع اللون الوردي والاخضر ، والمورد ،



مفرش السرير طلبته من محل بالكويت اسمه كفراتي واحب اشكرها على تعاملها المحترم وشغلها الأنيييق والراقي ، إخترت مفرش دانتيل فرنسي مع المخدات نفس الشي والكوشيات الصغيره او الخداديات مطرزه على الطرف مع كوشيه لونها بنفسجي فاتح على وردي مخمل نااعم ودانتيل ، مع الثرو او القطعه الي تنحط ع طرف السرير نفس الفنادق ، مع تغليف للزباله وانتو بكرامه والكلينكس ، وحبتين كلينكس صغير خدمه ، بالصور مو مبينه فخامه المفرش للأسف :|



الستاندات سواهم لي نجار ، حطيت عليهم علب الماي والعصير ، ستيكرات الماي نفس ثيم ديم ♥♥♥♥



العصير فازتين كبار وكنت اعبي الصغار منهم قبل لايجون الضيوف ، وكنت بربط مع كل علبه عصير مزازه او سترو بس مامداني الوقت :| كان في صوره لها وهي معباه مدري وين اختفت!!



الحلا جبت ماكرون من جوي وحطيته بستاند ، وتحسفت صراحه غير انه كلف محد أكله لأن الأغلب كان يجيب تشوكليت معاه فمحد ياخذ الماكرون p:



حطيت فازه مارشميلو وفازه حلاو صغير وفازه للتشوكليتات ، نظامنا احنا اي احد يزور يجيب معاه حلا وَ فطاير وَ تشوكليت فما حبيت أكثر أشياء ، وَ خليت هذي للأطفال الي بيزورونا ، بس لما زاروني صديقاتي طلبت لهم من محل كارمييه ومحل ماي سناك اكلهم لذيذ ويواجه ♥♥♥

بالنسبه لتشوكليت ديم سويته نفس الثيم طباعه حفر من محل بستاني وَ الطعم لذيذ الصراحه! وعبيتهم بصينيتين وأخذت الزايد معاي وكل ماخلص رجعت عبيت ، الصينيه أصلا مرايه بس حولتها لصينيه تقديم :$





والتوزيعه الثانيه ، كتيب حصن المسلم عليه اسم ديم ومن وراء دعاء ، سويته بالبيت ياتعبت تعب بس تستاهل ديوم ههههههه



طبعنا الاسم ع شريطه بعد !



اللوحه الخشبيه حطيتها مع فازه الورد جنب السرير ، ومكتوب عليه معنى اسم ديم الي هو "الغيمه الماطره" ماله صوره للاسف فأخذت من الانستقرام :(

ستاندات خشب او تغريسه يسمونها وزعتها على الحلاو والفازات ،،









طبعت لها ع مخده وعلى بطانيتها ،،





لبس ديوم كان عباره عن لبستين واحد ماركه كوكونز وواحد مفصلته ع اسمها طقم مع المفرش ، بدورله صوره يارب احصل لان اذكر طلبت يصورنها لي :(

بالنسبه للبسي ، سويت روبين لونهم ابيض ، واحد فستان مع رداء قصير مع ورد مادري شلون اشرحه ههههه وتوربان للشعر والثاني بنطلون وفوقه روب كله دانتيل ، اشكالهم فخمه وبنفس الوقت ناعمه وكثيير عجبتهم الحمدالله ،

لما رحت لأهلي نفس الشي ترتيب الطاوله فما صورتها ، الي اختلف توزيعات ديم حطيتها ببوكسات سويتها بعد بنفسي طلع شكلها أجمل لأن الي زاروني كثار فمو كل شوي نعطيهم التشوكليت بروح والكتيب بروح! الصوره من الانستقرام ♥♥♥

والشاي امي كانت تحطه بصينيه صغيرونه مع الفطاير وحبه كلينكس والسكر والطرف ورد طبيعي ، ماصورته بشكل مرتب للأسف ماكانت الكام معاي فهذي صوره من الانستقرام

السكر طلبته من وحده بالكويت ونسيييييت اصوره قبل لايتوزع شاطره ياأنا :$
سكر التراجي اسمه او الحلق p: يتعلق ع طرف الكاسه والثاني سكر ع شكل ليبتون فيه نكهات متنوعه "الزعتر\المراميه\النعناع وغيرهم"

حطيت فازتين ورد ع الكومدينه مسويتهم بنفسي ، مع ستاند مكتوب عليه عبارات ، وماحصلت صوره واضحه ههههه :(

من الانستقرام ببيت أهلي هالصوره ..

ختاميه مع صوره اميرتي الله يحفظها ويخليها يارب عمرها يوم هنا ..



وبس هذا تقريبا كل شي ، انبسطت إنو كله شغل يدي والنتيجه اثنى عليها الكثييير الحمدالله ، وبما انها اول مره أجهز ثيم متكامل بروحي فحسيت إنجاز أشكر نفسي عليه :$♥♥♥

نجي للجزئيه الي مدري وين اكتبها صراحه! كثااااااار كثااااار طلبو الثيم مني ، فأي وحده حابه تشتري الثيم وجاده بالموضوع تتواصل معاي ع الايميل ونفس الشي ينطبق ع المفرش ولبس الاستقبال لأن كذا بنت قالت تبي تشوفه وضيعت محادثتهم بالانستقرام :\
gorgeousta@gamil.com

ان شاء الله يكون عجبكم الموضوع ، والله يخلي ديم ويصلحها ويهديها وتخلي الصياح والدلع يارب اللهم امين :$♥♥♥