،
السلام عليكم ورحمه الله وبركاته ♥♥، رجعت لكم ببوست كثييير حبوه وطلبوني اسويه بعد استفتاء سريع بالانستقرام ..
بالبدايه ترددت بالبوست لان البعض يشوفه مايفيد ، بس الهدف الاساسي للبوست انو دايما اشوف ريفيو عن كريمات ومكياج وغيره بس ماعمري شفت ريفيو لماركه ممكن يفيدني بالرغم المبلغ الي بدفعه بالاشياء هذي اغلى بكثيير من كريمات او مكياج ..
عشان كذا بسوي سلسله "اخذيها او خليها" واذا افادتكم بكمل فيها باذن الله ، قبل ماأبدا بسولف عليكم شوي "من زمان ماقرقت تحلموني p:"
الناس صارت تصنف بعض ع حسب اي ماركه لابسه ، كل مازدتي ماركات كل ماكان مستواك الاجتماعي افضل!
مو شرط!!! اعرف ناس كثييير ربي منعم عليهم ومايلبسون ماركات لان ماتستهويهم وفي ناس عاديه ويحبون الماركات ويقتنونها لان تعجبهم وتعبر عن ذوقهم ،، الماركات ماتحدد انتي شنو ، الذوق ذوق بماركه او بدون ماركه!
لما نلبس ونكشخ او مانكشخ او نعتمد ع ستايل معين ، احنا بالشكل هذا نوري الناس منو احنا شنو تفكيرنا ، ترا الشكل هو دايما الي يعطي انطباع الاولي للناس عنا وعن شخصياتنا ، فانتي لك حريه الاختيار تورين الناس انتي منو!
،
دايما وابدا اقول الانستقرام غييير كثيير يمكن اكثر برنامج احسه غير الناس للافضل وللاسوء .. وانا منهم !
الناس صايره استفزازيه اذا شافت احد حاط صوره ماركه كأنه حاط صوره "غير قابله للنشر"
ويبدا موال السب ويامهايطيه يافشخره وغيره ، الفرق انو قبل الانستقرام مانشوف وبعد الانستقرام صرنا نشوف ، في ناس تشوف الماركه قطعه فنيه او تعبير عن هويه وستايل معين او او او ..
فلاتقارنين نفسك وذوقك واهتماماتك بغيرك ، في ناس عادي تدفع مبلغ وقدره ع شي يعجبها ويعبر عن ستايلها وفي ناس تشوف انه خساره فلوس واسراف ..في ناس تحب تركب اغلى وافخم سياره وتشتري اخر موديل من الاجهزه الكهربائيه بس اذا جا الامر لشنطه او اكسسوار صار اسراف! انا ماحاول اقنع احد انو لازم تشترون ماركه انا بس ابين وجهه نظري بالشي هذا وارجع واقول الاعتدال دايما الحل ، محد يضغط ع نفسه وميزانيته عشان يطلع بشكل معين يرهقه نفسيا وماليا ،، ولا تصير الماركات شغلك الشاغل ، وفي شي امس قريته صدمني جدا .. بنت معلقه بحساب بنت مشهوره بالانستقرام تقول لاتحطين صور ماركات ترا النعمه زواله مثل مازالت عن الانبياء قبلك! وترانا ننقهر ناس تشتري من ماركات وناس تاخذ من محل بوتفله "هذا كلامها هههه!!"
الله قسم الارزاق والقناعه هي سر انك تحب الحياه وتعيش سعيد ومرتاح بال ، طيب انت عجزت تقتنع وتحس تبي نفس فلانه وعلانه والسعاده بامتلاكك للشي هذا خلاص اشتغلي ع نفسك انجحي بحياتك وجيبي الي خاطرك فيه لاتوفرين شي دامه من فلوسك وحلالك ولا اذل نفسي لاحد ولا اقلل من قيمه نفسي ولا احسس نفسي بضعف اني ماقدر اشتري شي عاجبني الدنيا ماتجيك ع طبق من ذهب!!
-خاصه بالانستقرام لاتهينون نفسكم لاتهينون نفسكم خليكم شامخين وفخورين بنفسكم حتى لو ماتمتلكون شي ، غنى الناس اغلى شي ومستحيل احد يقدر يشتريه اذا ذليتي نفسك بتعيشين طول عمرك ذليله حتى لو ربي اغناك-
بعد هذه القرقه الطويله الي خارج النص نجي للبوست الصدقي p:
ماركه سي اتش او كارولينا هيريرا ، هي ماركه امريكيه لمصممه ازياء فنزوليه ، اسست دار كارولينا هيريرا الي سمته باسمها عام ١٩٨٠ ، كارولينا انشهرت بأزيائها واناقتها وكانت تهتم بستايل جاكلين كنيدي لمده ١٢ سنه.
رأيي بالماركه ، كارولينا هيريرا تعتبر من الماركات المتوسطه بنفس مستوى مايكل كورس ودكني وكوتش وغيرهم
جربت كذا قطعه من الماركه ، ومنهم الاكسسوارات ، اسعارهم تعتبر متوسطه ومناسبه جدا.
اول قطعه الخاتم :
خاتم سي اتش ، فيه قلب وهذا الي حببني فيه ع طوول حسيت كيوت ويمثلني ..
في نفسه بس كله كريستال بس اخترت هذا لان ابيه لاستعمال يومي وطلعات خفيفه ..
الخاتم يعتبر اكسسوار يعني مو ذهب او غيره .. سعره ب٣٥ دينار كويتي اذا مو غلطانه ومايتعدا ال٤٠ دينار
يعني بحدود ال٤٦٠ ريال ، كثير قالولي انو لونه يتغير واحس طبيعي لانه مو ذهب مجرد معدن مطلي فأكيد بتخف لمعته
عن نفسي احاول ماخلي عطر او ماي يجون عليه ، دايما بس اخلص احطه بالكيس الخام المرفق معاه وبعلبته ، يعني احاول احافظ عليه قد ماقدر ،، حسيت اللمعه خفت شي بسيط ..بس متوقعه هالشي
ممكن تاخذين الخاتم وتطلينه بماي الذهب يحافظ عليه وعلى اللمعه بس احس السالفه ماتسوى :$
وممكن تحطين مناكير شفاف عليه بس خفت يخربه ، اعطيكم بدائل p:
الحلو فيه انو اصابعي ضعيفه وطويله فمو اي خاتم يلبق علي بس هذا حجمه مرره مناسب لي وشكله بعد
ماحس تحسفت اني اخذته ومقارنه بسعره مانتظر منه شي واو ، اذا الالماس وهو الماس برقته تخف فكيف باكسسوار
وتعرفون لما تلبسون خاتم وبعد فتره يترك صبغ اخضر ع الاصبع!! هالخاتم الحمدالله ماصبغ ع يدي
ايجابيات:
موديله ناعم ومميز ، حجمه مناسب ، ستايله يمشي مع اغلب اللبس الغير رسمي ، مايترك اثر ، سعره مناسب
سلبياته:
لونه يخف ويبهت ، ممكن يتقشر اذا ماحافظتي عليه
اخذيه او خليه؟
بالنسبه لي اخذيه لان ماندمت عليه.
اسواره كارولينا هيريرا:
اسواره كارولينا هيريرا المشهوره!
استغربت شي انو لما جيت ببحث عن الوان الاسواره ماحصلت ولا معلومه بالمواقع مع ان هالاسواره مشهوره جدا ودخلت كذا بوتيك لهم ودايما احصلها وتعتبر كلاسيك يعني دايما متواجده بالبوتيك هي ونوع ثاني .. مادري ليه :|
المهم الاسواره عباره عن اسواره جلد وعليها احرف الماركه "٥ احرف بلون ذهبي"
الجلد الي عندي لونه بينك ع موف ، جدا جدا جميل بالطبيعه ظالمته الصور ، سعره مو متأكده بس بحدود ال٥٠٠ ريال
ناسيه الاسعار :"""(
احب هالاسواره لانها جلد اولا وتحسين بين الاسبورت والانيق ، البسها مع جينز او مع فستان ناعم او غيره ينفع عادي
نجي لمساوئها :
اول شي من كذا لبسه احس الجلد طاح وذبل ، اطراف الاسواره شووي سود لونها وبهتت لمعه الذهبي
طرف الاسواره مافي شي يمسك الاحرف بما انها متحركه فاذا خليت الاسواره مفتوحه دايما الاحرف تطيح مني وتبهذلني فكرهتني الاسواره :|
ايجابيات:
اللون جمميل وغريب ماشفت نفسه كثير ، شكله ملفت وخاصه مع ساعه ذهبيه ، عمليه وسعرها مناسب
سلبيات:
الجلد ذبل ع طول يعني ماحسه واقف وفيه جوده ، اللون بهت ع طول ، الاحرف متحركه ودايما تطيح!
اخذيه او خليه؟
خليها! لو جاني هديه ماعندي مشكله p: بس ماتوقع برجع اخذ من هالاسواره ومانصح فيها بس الي يشوف سعرها مناسب وشكلها حلو ليش لا
.
.
ان شاء الله البوست يكون مفيد واكتبو تجاربكم بالكومنتات لو حابين يمكن تشوفون بنظره ثانيه غيري اكيد
اشتقت للمدونه ويارب ماطول عنها :" )
اشوفكم ع خير :*
بوست يجنننن و فكرة السلسه جميله كملي فيها وابدعي اكثر ❤
ردحذفحبيت فكرة البوست خصوصا ع قولك ندفع في بعض الاشياء اكثر من لميك اب فضروري نكون خلفية عنها
ردحذفبالنسبة لقرقرتك انا اسميها كلام من ذهب ماشاءالله قلتي كل الي كان نفسي اقولوا بصراحه
القناعة جميلة والاجمل لما الواحد يستمتع بحياته والي بين ايدينه الان و الي يحلم فيه ان يمتلكة
يعطيك العافية ياجميلة ^^
الخاتم جدا ناعم و جميل
ردحذفو حبيت فكرة البوست واصليها ;)
البوست مفيد و فكرة البوست عججيبة كملي و احنا ننطرج و موفقه يارب
ردحذفبوست رائع ومفيد واستمتعت بالقراءة مع فنجان قهوتي مفضل وانا اقرء في مدونتك .كملي واحنا متابعين .ياعسل 😘
ردحذفالبوست جميل جدا .. واتمنى انك تستمري في في السسلسة ♥
ردحذفبالنسبة للاكسسوارات برأيي ان الاكسسوارات المطلية بالذهب افضل لانها تدوم لفترة طويلة وما يتغير شكلها واسعارها قريبة من الاسعار اللي ذكرتيها . .♥
سلسلة جميلة استمري :) حبيت شكل الخاتم مره تقريبا نفس ذوقي احب الاشياء الناعمة والبسيطة وهذا الحجم يناسب اصابيعي دايما احتار ف الخواتم بس مره حبيت هذا الله يهنيكي فيهم. "اشتغلي ع نفسك انجحي بحياتك وجيبي الي خاطرك فيه لاتوفرين شي دامه من فلوسك وحلالك ولا اذل نفسي لاحد ولا اقلل من قيمه نفسي ولا احسس نفسي بضعف اني ماقدر اشتري شي عاجبني الدنيا ماتجيك ع طبق من ذهب" هذا الشي تعبت وانا احاول اقنع غيري السلبيين النكديين فيه، ناس لها بالظاهر بس مو شرط الماركات ولا الفلوس تسعد الواحد يمكن الادمية اللي تنزل صورها تكون في يوم زعلانة من مشكلة كبيرة سارتلها او ممكن تكون مريضة مرض مزمن! يعني مو شرط فلانة عندها كل فلوس الدنيا وكل ماركات الدنيا خلاص هيا اللي عايشة الحياة كلها واللي اقل منها ماهم عايشين! احنا مالنا غير بالظاهر بدال الشتم والسب او الحسد والغيرة اتمنولها الخير واتمنو توصولو لمستواها او احسن، شفت حسابات كثير لبنات مشهورات مالاقي فيه غير سب وشتم ولا تجي اللي تقلل من قدر نفسها لانو ماعندها نفس الغرض او امكانيتها ماتسمح تشتري زيو طيب اول حاجة ماعجبتكم الصورة ببساطة لاتحطي لايك زعلانة ماتقدري تشتري زيها اشتغلي او جمعي وجيبي الغرض اللي نفسك فيه. اشوف اشياء شنيعه كانو ف مجتمع جاهل مو بنات شابات متعلمات او مو شرط هذا كلو بس كونها مسلمة عيب يطلع منها كلام كذا. الارزاق موزعة ع الناس مافي احد عايش حياة مرتاح فيها يوم عليك ويوم لك القناعه كنز لاينفى. يعطيكي العافية على كلامك الله يزيدك يارب ويرفع من قدرك :)
ردحذفبوست جمييييل ومفيد ايضااا استمري
ردحذفبوست جميل استمري ، وكلام اجمل عن القناعه
ردحذفيعطيك العافية حبيت البوست وقرقرتك داً واقعية ولامست قلبي ()
ردحذفلاني طالبة ومابي اضغط ع اهلي بس عشان اتفشخر قدام بنات الجامعة عشان سوارة ولا خاتم لكن اذا توظفت ليه لا ؟؟ في ناس تضغط ع اهلها ونفسها حتى لو موظفة ع شي مو مقتنعة فيه اصلا بس عشان تتفشخر وتجاري البنات !
عقليات والله
بوست جميل نفس صاحبتها
ردحذفجميل مره ،، انا ودي اجيب لي شي من هالماركه بس مافيه بمدينتنا زين اخذت كم معلومه عنه 💞
ردحذفحبيت البوست من اول مانزلتيه ..وتوني بكتب كومنت😁
ردحذفكلامك صح وعين العقل بخصوص السوشيال ميديا وشللون تأثرت فيها انا شخصيا .. عاد بصراحة انا احبك واحب ذوقك يروقني ويمثلني .. وفي اشيا من اللي عندج تكون عندي شي يشبهها مثل الخاتم بس اللي عندي بفصوص ( زركون) والاسوارة كان عندي الاحمر اللي تنلف مرتين كوني اعشق هالماركة وطايحة فيها .. ولمن شفت الواليت حبيته وجاني هدية مثله.. السلسلة حلوة استمري فيها خص نص من هالماركة 😆💞.
شيوووم يا حبيبتي انتي عسل
ردحذفماشاء الله عليك
كثري من الرفيوووز عن الماركات و الاكسسوارات حقهم ^__^
جميلات ♥♥
ردحذف