تبين بشره ناعمه ؟ بشره صافيه ؟ جسم موحد اللون؟ هنا خطه الهجوم !

السلام عليكم وَ رحمه الله وَ بركاته ♥♥، شرايكم بالعنوان بس ههههههههه ! كثير يشتكي من مشاكل ببشرته ، ويبدا يدهر بالخلطات واللطخ ووصخي نفسك ووصخي بيتك ولا في فايده هههههه ، السالفه ابسيط من كذا بكثييييييير ، ماتحتاج زيت قلي بزبده طبخ بطحين وَ عشرين الف صابونه! الخلطات يمكن تجيب نتيجه بس اذا تركتيها بيرجع كل شي مثل ماكان وأسئلوني ، بتتعبين وتضيعين وقتك وغير الجهد بتصنيع الخلطات احس بعض الخلطات تحطين نص المطبخ فيها :|
في بنوته سألتني بالايميل انها تبي نظاره وتبي بشره حلوه مثل اي بنت ثانيه فهذا الموضوع اهداء لها ♥♥ ، انا عندي روتين ماشيه عليه بس ابي نتايج افضل وَ افضل فسويت لي جدول ، بسيط بس فعال ، فحبيت اهديه للبنوته هذي ولكل بنت تسعى للجمال وَ البشره الحلوه ، ماعندي مشاكل كثيره ببشرتي ، بس اطمح تكون على اجمل صوره ..


اول شي لازم تحددين اي مشاكل بشرتك ؟ اكتبي بورقه مشاكلك مثل ( لون يد اغمق من الذراع \ اظافر تتكسر بسهوله \ شعر باهت ) ... وغيره من هالاشياء ، في ناس ربي رزقها بجينات تشوفين شعرهم وَ بشراتهم تلق وَ ناس اقل مستوى منهم ، وَ مرات تجيك بنت متغيره ١٨٠ درجه مسويه شي بنفسها ولا تعلم ! وَ كثيير من الاشياء الي نشوفها بحياتنا .. اول شي لاتجلسين تقارنين بينك وَ بين غيرك يمكن في ناس تهتم بس ماتقول وَ يمكن ناس ربي خلقها كذا بس اذا كبرت راح تذبل ، كل شي غير معتنى فيه راح يذبل وَ يتحول للاسوء .. ركزي عَ نفسك وَ على بشرتك ، الخلطات مثل ماقلت نتائجها وقتيه بس الي مجرب خلطه وَ حاب يكمل عليها ماعنده مشاكل .. الحين بعد ماحددنا مشاكلنا ، الحلول سهله بس بتاخذ وقت ، المعادله بسيطه ( عنايه يوميه بسيطه + مويه + رياضه + ترطيب ) الوقت الي نضيعه بالتحلطم خلونا نستفيد منه برياضه لو نص ساعه يوميا ! والمويه مثل ماقلت مهمه مهمه جدا والي يشرب بكميات يعرف انها كيف تفيد البشره ، الترطيب لجميع الجسم مرتين باليوم ، لو ابسط شي عندك لو حتى زيت زيتون اهم شي لاتهملين الترطيب ، اما العنايه اليوميه بفصل فيها شوي.

العنايه تنقسم لثلاث اشياء :
عنايه يوميه (تسوينه بشكل يومي)
عنايه اسبوعيه (تسوينه مره بالاسبوع او اكثر)
عنايه شهريه (تسوينه مره او مرتين بالشهر)
عنايه دوريه (تسوينه كل فصل يعني لاخلصنا من الشتا ودخلنا الصيف تسوينه بس ماراح افصل فيه لان مالي خبره كبيره فيه)

العنايه اليوميه :
١) غسل الوجه بغسول خاص.
٢) تونر
٣) مرطب
هالثلاث نقاط يكون ترتيبهم كذا ورا بعض ، ماراح انصح ببراند او اي شي انتي ياتروحين الدكتور يكتبلك خط عنايه او تشوفين بنت نفس نوعيه بشرتك وَ تستفيدين منها ، اذا مو عارفه كيف تحددين نوع بشرتك طلي ع هالموضوع :

كل شي عن العنايه بالبشره + ريفيو عن مجموعتي من كلينك ♥

٤) ترطيب اليد (بعد ماتغسلين يدك دايم رطبيها ، اذا بتنامين رطبيها بكريم ثقيل والبسي شرابات يدين *قلوفز*)

٥) ترطيب الرجول (رطبيها دايما وَ اهم شي قبل الترطيب احرصي مايكون فيها جلد ميت لازم تسنفرينها وَ تستخدمين ادوات تنظيف الرجل لان الترطيب مع جلد ميت مامنه فايده ، ولما تنامين حطي كريم ثقيل والبسي شرابات بعد)

٦) ترطيب الشفايف (تقدرون تستخدمون سنفره الشفايف الي تكلمت عنها قبل بشكل شبه يومي وَ رطبوها دايما لو اكثر من مره باليوم)

٧) فرك اليد + الاندر ارمز *الابط* + الركب وَ الاكواع بليمون بشكل يومي وَ تخلينه لحد ماينشف تغسلينه وَ تدهنين المنطقه يفتح المنطقه ويوحد لونها بس اهم شي مايكون عندك حساسيه من الليمون.

٨) الاهتمام بالاندر ارمز ، ماحب اقول ابط :| فبقول اندر ارمز ، المهم .. احرصي انو المنطقه تكون خاليه من الشعر دايما! وَ قبل لاتنامين جيبي قطنه وَ حطي عليها مويه ورد وَ امسحيها كويس وَ بعدين رطبيها لو تستخدمين نفس مرطب الجسم مو مشكله.

٩) ترطيب الجسم بشكل يومي مرتين باليوم (احب ارطب جسمي بلوشن والمناطق الخشنه مثل الركب والاكواع بكريم اثقل)

١٠) تفريش الاسنان شي بديهي ههههههه.

١١) هذي النقطه ضفتها لان اعاني منها :@ وهي ترطيب الكيوتيكل او الجلد الي حول الاظفر بزيت خاص او اي نوع زيت عندك.

١٢) الفيتامينات وادويه ( اذا ماخذين فيتامينات لاتنسون تضيفونها لجدولكم اليومي وحطوها جنب الكريمات عشان ماتنسون ، الافضل استشاره دكتور واخذ فحص كامل قبل شراء اي فيتامين).

الملاحظات :

- هذي الاشياء المفروض الي تسوينها بشكل يومي ، ممكن تشيلين اشياء منها او تزيدين اشياء بس احس ضروري تسوين هالاشياء يوميا ، وَ ممكن تضيفين عَ روتينك اليومي الشور السريع الصباح او الليل بس بدون غسل الشعر بشكل دائم!

لما تحطين كريماتك وَ خاصه قبل النوم تأكدي انو البشره تشربتها مضبوط وَ مو اقل من نص ساعه قبل النوم ، عندك الفازلين وَ الكريمات المعطره لو تحبين تستخدمينها احرصصصي لاتطلعين للشمس.

- لو عندك مشاكل ببشرتك مثل الحبوب وَ غيرها استشيري دكتور بالاول.

- البعض يحب يضيف كريمات لليل وَ سيروم وَ غيره بس انتي شوفي الي يناسبك وحطيه وبالبدايه ابدي بمجموعه بسيطه وَ بعدين طوري من مجموعتك.

العنايه الاسبوعيه :

١) سكرب او تقشير الجسم ، على حسب نوع السكرب لو ناعم ممكن بكل شور تستخدمينه لو قاسي شوي خليه مرتين بالاسبوع.

٢) تقشير الوجه ، مرتين كافي وَ لما تقشرون بشكل خفيييف لاتفركون وتعذبون بشراتكم :(

٣) تقشير اليد (الي يدها اغمق من جسمها الافضل تقشر يوم اي ويوم لا ، انا استخدم مجموعه تقشير خاصه وَ بكتب عنها بس اخلص منها ان شاء الله ، وَ بعد التقشير الترطيب اكييد ، لو ماعندك مشاكل بيدك مرتين كافي)

٤) تقشير الرجل (نفس حاله اليد ، واستخدمي الاداه المخصصه للتنظيف الرجل نسيت اسمها هههه :( )

٥) العنايه باليد وَ الرجل (بوديكير ومونيكر بس بشكل مبسط يكون خطواته اكثر من ترطيب وتقشير لهم ، قلت من قبل بنزل الطريقه بس للامانه مارسيت ع شي فادني مره وفي كم منتج تحت التجربه ماحب اتكلم عن شي الا لما ياخذ حقه بالتجربه بس انتو ابحثو باليوتيوب او بالنت الطرق كثيره لاتنتظرون اعلمكم كل شي p: ومره بالاسبوع كافي جدا)

٦) خلطه للشعر (اما يكون ماسك للشعر او تزيتينه مع اني ضد التزييت وخاصه الي صابغه شعرها راح يقلب لها اللون بس في زيوت عضويه ماتضر ، الخلطه مره بالاسبوع كافي + حمام زيت للشعر يكون جاهز مره بالاسبوع بعد)

٧) خلطه للوجه (ماسك للوجه اما جاهز او تسوينه بالبيت ، على حسب كل نوع بشره تختارين الماسك ، واحرصي قبل لاتسوينه تنظفين وجهك تمام بغسول وبعدين تعرضينه للبخار وَ بعدين تحطين الماسك لان الاستفاده ع بشره نظيفه ومساماتها مفتوحه افضل ! وبعد ماتخلصين من الماسك مشي ثلجه ع بشرتك وحطي تونر وكملي بمرطبك الخاص)

٨) خلطه للجسم (تقدرين تسوين لك خلطه للجسم اما طبيعيه او تخلطين زيوت او كريمات مثل الدلكه ، ماقدر افصل اكثر لان هالايام اجرب اشياء جديده مثل ماذكرت ، والافضل لو كانت خلطه ترطيبيه تحطينها بعد ماتسوين سكرب لجسمك )

ملاحظات :

هذي الاشياء الاسبوعيه الي تسوينها البعض يمكن يعتبرها طويله بس ترا ماتاخذ وقت وتقدرون تخلونها بيوم واحد بالويك اند وخلوه دلع لنفسكم وبسسس ، لما تسوون خلطات وخاصه لو كانت من مواد طبيعيه الافضل تسونها بوقتها لاتسون كميه وتخلونها بالثلاجه ممكن تفسد وخاصه لو ليمون يتأكسد :( ، جهزو اشياءكم كلها ببوكسات مخصصه عشان يسهل عليكم العمليه ، اكتبو كل شي بورقه او نوته وَ توفير المنتجات الجاهزه يسهل لكم وماراح ياخذ وقت خاصه لو انتو كسلانين p: ماحبيت اكتب لكم الوصفات بالضبط ، لان مثل ماقلت غيرت بكثير اشياء بس وعد مني اول ماحصل نتيجه بنزلها لكم باذن الله.

العنايه الشهريه:

- الحمام المغربي ( الي عنده مسامات او لون مو موحد الحمام المغربي الصححح من مركز موثوق راح يحل المشكله مليووون بالميه ، مرتين او مره بالشهر يكفي ، بس اهم شي مثل ماقلت مكان موثوق ، مسامات والنقط السودا بالرجل هذا شعر تحت الرجل بالحمام المغربي بيختفي باذن الله ، بس اهم شي الاستمراريه)،

- نزع الشعر الغير مرغوب فيه (ماقدر اقول ضمن العنايه الشهريه بس انتو شوفو جسمكم كل ماشفتو شعره طالعه او بدا يطلع شيلوه ، انا تقريبا كل اسبوعين اشيل شعر جسمي بمكينه براون ، بس الرجل مسويه لها ليزر ، بليز لحد يطلب مني اي تفاصيل عن الليزر لان مو مسويتها بالسعوديه :( بس انصح فيه وخاصه الي شعرها كثييف بيريحها ، نزع الشعر بشكل دوري بيخفف من مشاكل البشره وبيخليك مستعده دايما لاي مناسبه ، مو اذا قالو فلان بيجي فجأه تبدين تدهرين ، خليك دايما مستعده :* )

هذي خططه الهجوم بشكل مفصل ♥♥، عطيتكم بدايه الخيط وخاصه الي مبتدئه بعالم الاهتمام والبشره ، الي عليكم الحين تبدون تعبون الفراغات ، امسكو نقطه نقطه ، دورو منتجات تساعدكم او بتفيدكم ، النت مليااان والبلوقرز مايقصرون واخذو فره ع المدونه بتحصلون اشياء تستفيدون منها باذن الله ، اضمن لكم بشهر بتشوفون نتيجه وبشهرين بتختفي كل المشاكل ، بس مثل ماقلت الاستمراااار ، لو مشكله بشرتك عميقه بتاخذ وقت اكبر ، بس مع الاهتمام بتحصلين نتيجه باذن الله ، واذا استشرتو دكاتره مختصين يعطونكم منتجات تنفع لبشرتكم فهذا افيد لكم باذن الله ، وبالاخير اهتمام مستمر افضل من مليون خلطه النتيجه بتطلع بعد فتره بس بتظل معك واهم اهم شي خلو عنكم الكسل رساله لكم ولنفسي هههههه ، ان شاء الله قدرت افيد احد منكم ، لو استفدتو مو محتاجه الا دعواتكم ، والمنتجات وكل الخلطات والاشياء الي جددتها تحت التجربه برجع لكم بنتايجها ولو انصح فيها ولا لا.

للتواصل معي ع التويتر والاسك -غيرت اللنك- والانستقرام الايكونز ع يمين الشاشه

  

لاتنسين الاشتراك بالمدونه ليصلك كل جديد ..

كونو دائما جميلين ♥ ..