ريفيو عن شنطتي من برادا | اخذيها او خليها ♥

السلام عليكم وَ رحمه الله وبركاته ♥♥

متابعاتي القديمات اتوقع يذكرون سلسله "اخذيها او خليها" وهي عباره عن بوستات اتكلم عن ماركات متنوعه وقطع منها وهل تستحق الشراء او لا ، الهدف من السلسه هذي ذكر تجربتي مع استخدامي لاحد القطع وسلبياتها وايجابياتها وهل تستحق المبلغ المدفوع؟

هذي البوستات القديمه "هنا" و "هنا"
وهالتدوينه اهداء لاحد متابعاتي تمنيت اكون حافظه اسمها! كانت تنتظر تجربتي مع شنطه برادا فان شاء الله يفيدك البوست :)♥♥♥♥

بالبدايه ، برادا ماركه ايطاليه تعتبر luxury يعني فخمه اسست سنه ١٩١٣ من قبل شخص يدعى ماريو برادا ، هالفتره احس خف وميض هالماركه وبدت تتراجع يعني من زمان ماشفت لهم شنطه ناجح صيتها او حتى شوز غير السليبر الشهير ، مقارنه بقوتشي الي صاير يتفنن بتصاميمه وبدا يسحب الضوء من فندي الي كان سوقه ناجح الفتره الي فاتت ، برادا احسها برا المنافسه وماصارت تجذب ناس كثير ومن ضمنهم انا .. شنطه برادا الي عندي تعتبر من الكلاسيك شبيهه بشنطه قاليريا الفرق ان السحاب بس بالنص واشوف هالشي خلاها مميزه اكثر عن الباقي ♥♥

كانت هالشنطه بالويش ليست ومره حابتها ، شريتها قبل ٣ سنين تقريبا ..

بالبدايه لونها يعتبر مغامره "بالواقع شوي افتح" خفت تاخذ من لون العبايه بس الحمدلله اللون ماتغيير كثير

يمكن الي بيدقق بيشوف لون بسيط من الخلف ..

من مميزاتها غير اللون ..

جلدها جدااا متين اتوقع افضل جلد شنطه مر علي ، ماتخدشت او صار فيها اي صوره من صور الكرف ♥♥

الهاردوير يعني الحديد الي فيها لونها ذهبي وحافظ على لونه وماتضرر الحمدلله 

السير حقها جدا ثابت مع اني كنت املاها اشياء اذا طلعت ولاخرب :))

السحاب متين ومانقطع مع استخدامي المتواصل له بس شوي ثقيل بالسحب

شكلها من داخل ،، سحاب بالنص وجيبين صغار من داخل واحد بسحاب وواحد بدون

فيها تعليقه مفاتيح من برا بس ماحسيت له داعي

والسير ينشال لو حابه تشيلينها باليد بس

من سلبياتها ثقيله نوعا ما!

يعني ماتنفع لبنات الجامعه ابدا ولا تنفع بالسفر او طلعه طويله

احس لازم املاها اشياء عشان تاخذ شكل حلو من برا مثل الصور

خليتها فتره بسيطه بدون ورق من داخل وصار فيها بعج هههههههه

سعرها مرتفع لكن تستاهل بنظري مقارنه بالجوده الي اشوفها

الموديل الي معاي ممكن ماتحصلونه عندهم فشوفو قاليريا لانها مشابهه لها جدااا

،

للامانه ناسيه اي حجم عندي بس ممكن يكون الميديوم واعتبره مناسب ينفع لطلعات وعزايم غير رسميه

بس الاغلب وانا منهم صار توجهنا للشنط الصغيره فماصرت استخدم برادا كثير

احس بتنفع الموظفات واشوفها كلاسيك ممتازه للدوامات وانيقه ♥♥

الامهات الي مثلي ياخذون شنطه منفصله عن شنطه البيبي ماتنفع لهم لان ثقيله بالشيل

،

شريتها من سنتريا ووقتها كانت بحدود ال٨ الاف اذا مو غلطانه ..

اخذيها او خليها؟

بالنسبه لي اخذيها ، شنطه كلاسيك بتدوم معك لان جلدها يتحمل ، موديلها مايقدم وكثير ماركات توفر شبيهه للموديل

ال tote ♥♥

 ان شاء الله يكون البوست مفيد وشنو الماركه الي حابين اتكلم عنها بالمرات الجايه؟
اشوفكم ببوستات اجمل ان شاء الله ♥♥