ديكور رمضاني لبيتي اللطيف لاستقبال شهر الخير مع افكار متنوعه ♥

السلام عليكم وَ رحمه الله وَ بركاته ♥♥

كل عام وانتو بألف خير صديقاتي ، كلها ايام معدوده ويحل علينا شهر الخير ان شاء الله ♥

ففكرت اغير ديكور البيت بلمسات بسيطه وبعيده جدااااا عن الديكور التقليدي الي تعودنا عليه

مثل الشالكي والتراث المصري ، مافي أجمل انك تعيش وتخلي عائلتك تعيش اجواء رمضان ويفرحون بقدومه ♥

الفكره من التدوينه نخلي العائله تشارك بتزيين البيت لاستقبال ضيف عزيز علينا ، خاصه الاطفال بينبسطون ويحسون بأهميه هذا الشهر ، بعيد عن التكلف والاشياء الزايده ، بالاضافه بحط لكم بعض الافكار للاستفاده من هذا الشهر

تمنيت يكون عندي وقت اطول عشان اطبق كل الافكار الي كنت مخططه لها بس فعلا اخذ مني تجهيز هذا البوست يوم كامل من دون الكتابه فبكتب لكم اخر التدوينه الافكار الي ماسعفني الوقت لتطبيقها :)

زينه رمضان ، سويت ثيم بالميسن جار وتعمدت يكون ملون يعطي حياه وايضا حطيت ببالي كثير منكم

متوجهه للون الابيض بالاثاث فراح يمشي معاه هذا الثيم ، كنت بكتب العبارات بالعربي بس كشكل ماضبطت معاي!

كتبت الاحرف بميسن جار وقصصتهم وحطيت نجوم وهلال وثبتهم بخيط ابيض ، ممكن تخرمون الاوراق وتدخلون الخيط

بس انا ثبتهم بمشابك صغيره جدا ، فكره سهله التطبيق مع اطفالكم اكيد :)♥♥♥

بحط لكم رابط لتحميل الصور اخر شي ان شاء الله♥

زينت الصاله بخداديات رمضانيه من فلوريست وممكن تحطون اي شكل حابينه بنقشه رمضانيه

الخداديه اسعارها : الصغيره ب٣٠ والكبيره ٥٠

انستقرام المحل @florist_sa

بعدها غيرت كورنر القهوه وحطيت كورنر للقهوه العربي بما ان الاتيه وغيره ينقرض برمضان بالنسبه لي :)

وحطيت خداديات بأحرف عائلتي الجميله وناقصنا حرف ال"ع" لعبدلله بس للاسف مخلص كان p:

زوم لكورنر القهوه ، حطيت دله يتوق لاعداد القهوه مع قهوتها حفظتها بعلبه بس انتبهو ماتكون معرضه للشمس

وحطيت فناجيل قهوه مع معمول لأن عائلتي تحبه ، القهوه قريبه للجلسه لان حتى لو يبي زوجي يسويها مايدخل المطبخ ويحوس يدور الاغراض والحلو بدله يتوق ان فيها زر التسخين ماتضطرين تحطين القهوه بمطاره ♥♥

مع هذا انا افضل دله العرب بدالها صراحه ..

بدال الاكواب الي كنت معلقتها لو تذكرون حطيت الميسن جارات الملونه وداخلها شموع 

مره جممميله لما تشغلينها :)) من فلوريست ايضا p:

لكن بامكانكم تستبدلونها بفوانيس صغيره او علب زجاجيه ، الحامل الحديد سويناه بالبيت عباره عن معاليق 

قصيناها وحطينا حولها خيط وصارت احلى فانوس :)

البراويز الي بكورنر القهوه حطيت عبارات رمضانيه وصور وحطيت ادعيه وتذكير لختم القرآن في رمضان ♥

الي هو تقرين بعد كل صلاه ٤ صفحات لختمه وحده وممكن تدبلين العدد عشان تختمينه مرتين وهكذا

طبعا العبره مو بعدد الختمات بالعكس بالتدبر والتفسير ♥

من الاشياء الي ضفتها للصاله بعد ، نبته الافندر المجفف تعطي ريحه جممميله للمكان

مع ميسن جار رمضاني ، ماأستغني عن الورد بالبيت يعطي حياه ♥♥

كلهم من فلوريست @florist_sa

هذي صينيه رمضان المعتمده عندي مع الدله ان شاء الله ، الدله هي السيف وصبغتها لون بنفسجي بس انصحكم

ماتصبغون الفوهه افضل لكم ..

الصينيه من ابيات ومره كبيره ترا

صوره اوضح للدله الكيوت :) تأكدو الصبغ الي تشترونه غير قابل للاشتعال!

اخر شي سويت فاصل للكتب بشكل كيوت ، ينفع اذا قريتو كتب مفيده او قرآن عشان ماتضيعون الصفحات ♥

الستاند اللطيف من متجر ارت ديزاين art_design_h

مره شكرا على الهديه!

ارسلت لي بعد تغريسات للحلا او الفطاير ♥♥♥

وتوزيعات رمضانيه لديومي ماقصرتي حبيبتي :))

لاتنسون الاطفال من التوزيعات حتى لو اول يوم من رمضان ، ينبسطون عليها وممكن تسولفون عليهم

ليش نصوم هذا الشهر وليش هذا الشهر مميز لنا كمسلمين بيأثر فيهم ان شاء الله ♥

ومره ثانيه شكرا لارت ديزاين ، شوفو انستقرامها عندها توزيعات جداا جميله بتعجبكم art_design_h@

الفناجيل الرمضانيه من متجر كريتفتي هاندز @creativity_hands

عادي اني تنحت على التغليف والاهتمام بالتفاصيل اكثر من الفناجيل ههههههه

مرره كيوت ماشاء الله والي بيهديها لاحد يحبه التغليف بيعجبكم ♥

شكرا مره حبيبتي تعبتك معاي! هذا انستقرامها وعندها مطارات رمضانيه بعد @creativity_hands

،

،

بالنسبه للافكار ، كنت بسوي كورنر للصلاه وازينه بشكل بسيط مع جلسه لقراءه القرآن 

وايضا ممكن تسوون كورنر تحطون فيه البخور والعطورات وتخصصون عطر لرمضان انا كل رمضان اسوي كذا

عطر واحد استخدمه طول رمضان مع بخور ♥♥

وممكن تسوون ٣٠ عمل خيري ل٣٠ يوم ، هذا اكثر شي تحمست اسويه بس مامداني ابد الوقت

الفكره تكتبين ٣٠ مهمه ممكن تسوينها "زياره قريب ، اطعام مسكين ، حفظ حديث ، حفظ ايه صغيره ، اطعام حيوان ، التواصل مع شخص من زمان ماتواصلت معاه ، تسوين طبخه جديده لاهلك ، تحفظين طفل ايه او دعاء ، تسعدين شخص يستحق" وغيره من الافكار ، تحطينهم باوراق وتكون متنوعه مو شرط شي كبير او عظيم! وتقصصين الاوراق وتحطينها ببوكس وكل يوم تفاجئين نفسك بمهمه جديده .. 

حلوه بعد لو تخلين احد صغير او حتى اختك يشارك ويكون تحدي بينكم منو يقدر ينجز اكبر عدد من المهام

وتقدرون بعد تحطون تحدي "اكتساب عاده جيده + التخلي عن عاده سيئه" لان هذا الشهر من اجمل الشهور لتهذيب النفس وفرصه حيل كبيره لاتفوتونها!

بالنسبه للاكل وغيره ماتطرقت له ابد لان برمضان اسوي شوربه وسمبوسه وطبق رئيسي للعشا وحلا وبس

حاولو مايكون تركيزكم على الطبخ ، رمضان اشمل من "اكل" واعمق بكثييررررر لاتخلون اطفالكم يربطون هذا الشهر بالاكل وبس!

،

ان شاء الله البوست يكون حمسكم لاستقبال هذا الشهر بطريقه جديده ان شاء الله

وبحط لكم الصور بروابط تحميل لو حبيتو تطبعونها وتزينون بيوتكم وتشاركوني الصور بكون اكثررر من سعيده :))

وبالاخير شكرا للمتاجر والله يوفقهم يارب ، اذا يستاهلون الدعم لاتقصرون مع بناتنا

وكل عام وانتو بألف خير جميلاتي ♥

روابط تحميل الصور والزينه (هنا - هنا)