كيف تخططين لمهامك وتنجزينها ! فن كتابه قائمه المهام #غيمه_٩

السلام عليكم وَ رحمه الله وبركاته  ♥♥

تدوينه اليوم عن قائمه المهام وكيف ننجزها ، تكلمت عنها بالسناب والانستقرام وابدا ماتوقعت التفاعل الكبير

الي صار معاي وكيف هالتدوينات تعجبكم وتحبونها ، عشان كذا قررت اكتبها بمدونتي حتى ترجعون لها بأي وقت

،

قائمه المهام | TO DO list

ببدايه كل سنه نكتب قائمه امنياتنا ونحلم بسنه مليااااانه بالانجاز والطموحات

تخلص السنه ونرجع نكتب نفس الامنيات ونفس الطموحات ونحط ببالنا خلاص لازم ننجز

ننام ونقوم ثاني يوم لروتين حياتنا المعتادين عليه نوم وتلفزيون وانترنت!

هل هالقصه القصيره الحزينه مرت ع اي احد منكم ؟

لانها مرت علي كثيييير p:

،

بحياتي ال٢٥ سنه مريت بتجارب كثيره ، اعتبر نفسي محظوظه وبنفس الوقت اشياء كثيره انجزتها مالها علاقه بالحظ

التخطيط و"التنفيذ" جزء من نجاحي باي مجال كان ، أقدر اقولكم سوو كذا وكذا بس مستحيل شي بيفيدكم اذا ماكان في تنفيذ وعزم ، من الاشياء الي تستفزني او بالاحرى استغرب منها ، كثير لما اتكلم عن مواضيع تجيني اسئله ان عارفه هالشي والحل هذا بس مالي مزاج او مالي خلق او ماعندي عزم شنو نسوي؟؟؟ ، وصلنا لمرحله الاتكاليه والاعتماد التااااااام ع الناس بكل شي!

انا اعطيكم بدايه الطريق بس مستحيل امسك يد كل وحده واوجها بحياتها!

اذا انتي ماعندك مسؤوليه عن حياتك او تجاه طموحاتك او احلامك مستحيل تنجزين

انا موجوده اليوم او الشخص الي تعتمدين عليه بيكون موجود اليوم وبكره ؟ والي بعده؟

ياليت يكون عندنا وعي ونعرف ان هذي حياتنا ، لانكون ناس متلقيه تسمع وتنفذ

قريتي اليوم مدونتي ابحثي بقوقل تثقفي شوفي تجارب ناس ثانيه ، دوري طرق تبدعين فيها

خلي عندك رايي ، يمكن تشوفين طريقتي بس ماتناسب طريقه حياتك اخذي الي تحتاجينه والي مايعجبك خليه

،

الهدف من الموضوع اكبر من قائمه مهام نكتبها ، الهدف يكون عندنا وعي ويكون عندنا قرارات شخصيه

مانكون مقلدين وبس! مانخلي الموضوع ان كشخه كتبت قائمه مهام ،، لا نكتب وننجز!

بخاطري كلام كثيير بس نخليه ببوست ثاني عشان ماطلع برا الموضوع p:

،

قائمه المهام هي فن برايي ، لان كل ماكان عندك تمرس فيه كل ماكان الانجاز اكبر

بس لانضيع وقتنا بالبحث عنه والطرق والتجارب اكثر من الوقت الي فعلا ننجز المهام!

طرق كتابه هالقوائم كثييييره يرجع لاختيارك الشخصي ، الي افضله انا مثل هالصوره

ورقه عاديه وتنشال .. 

تقدرون تستخدمون الستيكي نوت 

عمليه وتقدرون تحطونها بأي مكان تبونه عشان ماتنسون

وكثير يستخدمون التقويم او الجورنال نقدر نقول

يكون مقسم بالشهور والايام والاسابيع

مره بيفيد الي عندهم دوامات او ملتزمين بتواريخ معينه ، انا احبه بس مشكلتي مالقيت الي يعجبني

شريت كثييير بس ماحصلت شي عملي ففضلت اكتب بورقه وقلم ♥♥

والنوت الي كذا بعد مفيده مره احبها لان استخدمها للماوس وقريبه مني

فدايم اذا ببالي شي اكتب عليه ع طووول ، اخذتها من فيرجن ميقا ستور بدبي مقسمه ل٥ ايام

مو منحده بتاريخ معين تقدرين تكتبينه انتي

اخر شي نوت عادي ، وهذا الي افضله عشان اكتب كل الافكار الي ببالي فيه
احس اذا فرغت الافكار باوراق مخي يصير فااااضي حتى لو مانجزت ماصير احاتي واشيل هم ههههه

،

أنواع قوائم المهام | To-do list sections

القائمه شهريه:
القائمه الشهريه تكون شامله أكثر وتكون شي رئيسي مو مفصل ، وممكن تكون مهمه وحده بس طويله الامد يعني تحتاج وقت بالتنفيذ مثال ع ذلك (زواج صديقتي)
تكتبين بالتاريخ وقت الزواج تذكير واذا وصلتي للاسبوع الي فيه يوم الزواج تقدرين تفصلين وقتها
وهالشي ينقلنا للقائمه الاسبوعيه

القائمه الاسبوعيه:
اعمالك ومهامك طول الاسبوع وتكون تفاصيلها اكثر من الشهريه ، لان مستحيل طوول الشهر عندك مهام
ومثل ماقلت بالمثال عن (زواج صديقتي)
مثلا تحتاجين تشترين هديه وتحتاجين تشترين فستان وتسوين ماسك للوجه وبيوم الزواج بتروحين الصالون
هذي مهام متعدده كلها تندرج تحت (زواج صديقتي) عشان كذا تقدرين تكتبين بالاسبوع وتوزعينها ايش يناسبك والاوقات
بالطريقه هذي تخلصين كل شي بدون ضغط او تنسين شي لان اعرف المناسبات المهمه كيف تضغط الواحد

القائمه الشهريه لازم تكون من ضمن الاسبوعيه واليوميه .. بس نقدر نسوي مهام يوميه ومانكتبها بالاسبوعيه والشهريه

القائمه اليوميه:
كل المهام الي بالقوائم الاسبوعيه والشهريه تنتقل لليوميه بس عادي لو شي تكتبينه باليومي مايكون بالباقي
مثال ع ذلك رياضتي اليوميه او شرب الماي او اكل الفيتامينات او الادويه
مو منطقي تكتبينها بالقوائم الاسبوعيه والشهريه لان شي بديهي بتسوينها يوميا

،

شلون نكتب قائمه المهام | How to write To-do list

١. خليك بسيطه
حاولي وانتي تكتبين مهامك تكون بعبارات بسيطه بدون تعقيد ، وتقدرين تبسطين المهمه نفسها
مو شرط الشي الواحد تنجزينه بيوم واحد مثلا انا بكتب تدوينه فاليوم اصور الصور واضبطها وبكره اكتب البوست
فسهلت المهمه علي وانجزتها بدون تأجيل لان كتابه البوستات مو شي سهل ابدااا مو مثل متخيلين الناس ، تاخذ اقل شي ٣ ساعات من ترتيب للافكار وتصوير المنتجات ونشر التدوينه ومتابعتها ، فبالطريقه هذي سهلت ع نفسي :)

٢. رتبي المهام بأهميتها
هالشي جدا مهم! لما تكتبين كل المهام عشان تنجزينها رتبي مهامك بالاكثر اهميه \ اهم \ مهم
ليش ؟ مو احنا المفروض ننجز كل شي نكتبه ؟ صح بس ماتدرين شنو ظروفك يومها
يمكن تتعبين او تطلعين فجأه او يزورك احد ، فاذا انجزتي اول شي على قائمه المهام الي هي(اكثر اهميه)
ماراح تشيلين هم للباقي ، الاكثر اهميه معناته ضروري ينجز اليوم ومايتحمل التأجيل ، مثلا عندك تسليم واجب بكره
فضروري تخلصينه اليوم ، فهذا بيكون اول شي تبدين فيه ، وعندك تنظيف الغرفه مصنفتها (مهم) فاذا مانظفتي اليوم
بسبب ظرف ما مو "كسل" فعادي لو انتقلت هالمهمه لثاني يوم ، الدنيا ماراح تخرب ♥♥

٣. اكتبي الاشياء البسيطه "غشي p: "
أحلى شعور لما يخلص اليوم وانتي مشطبه ع اغلب المهام
فعادي نغش شوي بس شووي عشان ننبسط ، مثلا اكتبي "اكل الفيتامينات" او "اسوي روتين البشره اليومي الي هو كريمات او غسيل بالغسول وغيره" اذا سويتي هالاشياء البسيطه وشطبتي عليها بتحسين ان انجزتي شي اليوم
بس هذا مو معناته تكتبين "اروح المدرسه او اشوف مسلسلي او اتابع سناب شات" غشو بالمعقول p:

٤.كوني محدده
عشان تنجزين حاولي تحددين المهام وخاصه بالقائمه اليوميه لاتخلين كل شي فايض ع بعض
مثلا عندك تسليم واجب ، اذا هالواجب يستلزم بحث مطول او مراجع ، اكتبي ابحثي عن مرجع ، سوي بحث
اكتبي المقدمه ، اكتبي الخاتمه ، اذا الواجب ياخذ وقت طويل قسميه ع كذا يوم افضل عشان ماتضغطين ع نفسك
 وتنجزين بشكل افضل

واذا في كذا مهمه مرتبطه ببعض مثلا تطلعين تسوين رياضه وتجيبين اغراض للبيت
هالشيئين تسوينهم بطلعه وحده فترتبينهم تحت بعض

٥. التزمي بالوقت
لما تخلصين اللسته الي تبين ، تقدرين تحطين وقت لكل مهمه
عشان تعرفين متى بتخلصين ومتى بتكونين فاضيه
هالشي كنت اسويه ايام الثانويه العامه ، ماحس عملي لكل يوم تسوينه
بس كنت احطه باوقات الدراسه للامتحانات النهائيه ، مثلا من الساعه ٤ الى ٦ اخلص الفصل الاول
من الساعه ٩ الى ١٠ اراجع الفصل الاخير والامتحانات ، كنت جد جد استفيد من وقتي وماضيعه
ولا يروح يومي ع فصل واحد وشي بسيط وكنت احط وقت راحه بين كل مهمه ولازم هالوقت يصادف
اشوف برنامجي المفضل حق تايرا بانكس ههههههه والساعه ٩ كنت اريح اشوف اوبرا وينفري واتعشا
اياااااام ♥♥

٦. لاتزعلين اذا مانجزتي!
صح الهدف ان ننجز بس مرات المزاج يخرب ومرات يصير شي يخرب يومنا
بس هذا معناته مانزعل اذا مانجزنا بالعكس اعتبريها دافع ليوم ثاني تنجزين فيه بشكل اكبر
وبنفس الوقت اعرفي ليه مانجزتي! دوري السبب عشان تطلعين بحلول ماتعيقك بالمستقبل
اذا مشينا ورا مزاجيتنا عمرنا ماراح ننجز ، انا جزء كبييير من عدم الانجاز يرتبط بنومي الملخبط
اذا قمت الظهر اتضايق وازعل! احس يومي راح وانا ماسويت شي ، عشان كذا عارفه سبب عدم انجازي
وقاعده احل الموضوع في اني اصحى بدري او ارتب مهامي بالوقت الي قمت فيه واتكيف مع الوضع ♥♥

٧. الاستمراريه
كل كلامي الي كتبته ماراح يفيد اذا مابديتي واستمريتي ، اقدر اكتب قائمه وارتب وقتي وشغلي بس هل اقدر استمر؟
الاستمراريه هي النجاح ، اكتبي قائمتك قبل لاتنامين او اول ماتصحين ، تبدين يومك وانتي عارفه شنو بتسوين وشنو انجازاتك لليوم ، يمكن البعض بيشوف ان حياته بتصير عباره عن روتين ودوامه ومتوقعه يعني كل لحظه بحياتك بتكون مخطط لها ، عن نفسي حاولت اعيش بدون تخطيط وحياتي كثير منها بدون تخطيط بس اشوف نفسي يومي يخلص بدون اي اي انجاز يذكر ، بس بعكس لو بكتب كل شي ابيه بورقه وارتب افكاري احس بالانجاز ، احس يومي خلصته وانا سعيده
مو يوم عابر مثل اي يوم كان ، بالتخطيط حياتي مو عباره عن روتين بالعكسسس يومي مو مثل امس ومو مثل بكره

كل يوم عندي شي انجزه واخلصه وكل يوم فخري بنفسي يصير اكبر!
حتى لو انتي ربه بيت ترا عندك مهام ، حتى لو انتي أم عندك مهاام كبيييره وكثيره بعد!
مو شرط اكون موظفه او طالبه عشان ارتب وقتي ، بالعكس مافي احلى من الانجاز واستغلال الفراغ

حياتنا تمشي بسرعه ، ماتبين تشوفين الماضي وتقولين لنفسك "آحسنتي" ؟

أشوفكم ببوستات ثانيه ♥♥♥♥