تجربتي مع صالون جويل ، صبغه وويفي وتريتمنت الامازون للشعر ♥♥♥

السلام عليكم وَ رحمه الله وَ بركاته ♥♥

أخييراا بكتب لكم البوست الي طال انتظاره وكثيير طلبتوني اتكلم عنه ، انا تعمدت اطول فيه

لأن أبي أجرب التريتمنت لوقت أطول حتى أكون فكره متكامله عنه ♥

جتني دعوه من جويل أجرب خدمه من عندهم وأخترت صبغه لمره وحده وتريتمنت للشعر "امازون"

في خدمات أنا دفعت فلوسها فمن الأخير بقول تجربتي بكل صدق سواء الي دفعتهم أو الي قدموها لي

صبغه الشعر

أول مره رحت لهم كنت أبي أصبغ شعري لأن بعد ولادتي بديم صبغته اومبريه وكان حلو بس صار يتساقط بشكل فضييع

وهذي كانت رده فعل طبيعيه بعد الولاده ولان ماكنت اخذ فيتاميناتي ، بعدها صبغت لون واحد وماطول معاي يادوب اسبوع ونص وخف مرره! مع انه مكان معروف وحتى الي تصبغ صارو يسون لها دعايه الناس بس استغربت اللون ماثبت مع انه غامق :| وانا بعادتي ماصبغ الا بالكويت نادرا اسوي شي بالرياض بس مدري وش ملقفني فلوس طارت ع الفاضي 

المهم ،، جلست اعتني بشعري وريحته من الصبغ فلما رحت لصالون جويل قالت لي شعرك جيد جدا يعتبر والشعره خفيفه بس كثافه شعري متوسطه ، المهم صبغت لي لون أحمر غجري مايل للبنفسجي ، بدون سحب لون وانا اطراف شعري فيه هايلايت وقالت اذا تبين سويت سحب لون بس انا ماحبذت بخليه وكل فتره اقص اطراف الشعر لحد مايختفي ان شاء الله،

اللون كان بيرفكت بيرفكت حبيته مرره وجد نور وجهي وحتى بدون ميك اب احس وجهي فيه حياه ، لان قبل اصبغ اشقر وبني وماتحلى الصبغه الا مع ميك اب بعكس هاللون ، وكثييير بالصالون سألوني عنه ♥♥

المشكله ان هاللون مركب يعني مو من الالوان الاساسيه فيروح بحدود الشهر الى شهر ونص وينزل اللون كثيير فانتبهو للفوطه والملابس البيضا عشان مايوسخها ، انا جلس معاي بحدود الشهرين بس طبعا مو مثل جماله اول ماصبغته وبانت معاي الجذور ، هنا رجعت صبغت مره ثانيه لان عندي مناسبه وكان اللون احمر اكثر من قبل لان عدت على الصبغه بس كانت حلوه بس فضلت الاولى لان كانت تميل للبنفسجي اكثر.

وبعد ماسويت التريتمنت سويت رينساج وصبغه للجذور بس اللون كاول مره كان احلى مع ان الكل يقول حلو للحين بس مصره انا هههههه ، للامانه شعري يتساقط صارله فتره قبل لااسوي تريتمنت بس ماعرف لو من الصبغه او التوتر او نقص فيتامينات ، ماكان عندي وقت افحص عشان اتأكد بس رجعت اخذ فيتامنيات بعد ماوقفتهم فتره طويله

انا صبغت لون واحد وعجبني بس ماشفت احد صابغ اومبريه وغيره فماعرف لويضبطونه او لا ♥

الي صبغت لي اسمها "ليما" اردنيه بس فاهمه شنو تسوي ، حبيت شغلها

ويفي الشعر

سويت عندهم ويفي مرتين واحد بالفرشاه وواحد بالفير ، مره مرره حبيت شغلهم بالشعر الي سوت لي "نجلا"

الويفي الي بالفرشاه ماطول معاي لان شعري اساسه ناعم وينام ع طول بس قولولها تكثر سبراي اذا انتو نفس شعري

وبالفير مره حلو ومرتب ، اذا ابي ويفي مافكر الا اروح عندها صراحه لان يكون مع فوليوم ، واسعارهم منطقيه شعري لنص ظهري تقريبا

سويته ب٢٥٠ اذا ماخاب ظني ♥♥

البديكير والمنيكير

وبعد سويت عندهم بوديكير ومنيكير مرتين ، اخترت البيسك الي مامعاه شي ، حسيت عادي مقارنه بالسعر المرتفع تقريبا ٢٠٠ ريال وشي

فماتوقع بسويه مره ثانيه عندهم

تريتمنت الشعر

كان عندي زواج بالعيد وطلعت الجذور لان صبغت اخر شهر ٥ ميلادي فرحت لهم نص رمضان تقريبا وسويت ٢٩ يونيو تقريبا التريتمنت "علاج الشعر" ، كنت بصبغ بس قالت لي الافضل تسوين تريتمنت وتصبغين بعدها باسبوعين  او العكس مايفرق

انا بحثت عن الموضوع ومالقيت جواب شافي صراحه ، بس التريتمنت يغير لون الصبغه يفتحها شوي فحطو هالشي ببالكم واختارو الطريقه الي تناسبكم

عندهم انواع كثيره بس بتكلم عن الي جربته ، الي هو الامازون ، من الي قريت عنه الكل يندرج تحت الكيراتين بس النسب مختلفه واختلاف الاسماء باختلاف الشركات ، يعني مدام ليما قالت لي انه بروتين والمكتوب ع العلبه امازون

ماراح اشرح كثيير بالنقطه هذي لان يبيلي بوست ثاني من كثره المعلومات بس الي طلبته بالضبط تريتمنت او علاج للشعر بدون نسبه فرد ، انا شعري ناعم بس بسرعه يتعقد وفيه نفشه يعني مستحيل اطلع بدون ماستشوره لو على السريع

فاختارت لي مدام ليما هالمنتج من امازون

"من حقكم تشوفون المنتج قبل لايحطونه ع شعركم واخذو صوره منه اضمن لكم"

مكتوب عليه علاج الكيراتين البرازيلي اورقانيك وفيه زيت البندق

بحثت عن هالمنتج كثيير بس مالقيت له معلومات ، لاحظت ان اغلب الصوالين الكبيره تستخدمه فتطمنت

طريقه العلاج :

١. غسلت شعري بالشامبو ونشفته

٢. قسمت شعري وحطت المنتج عليه وبعدت عن فروه الشعر مقدار سانتي 

٣. مشطت الشعر عشان يتغلغل المنتج 

٤. نشفت الشعر باستخدام استشوار

٥. استخدمت سيراميك او ستريتنر لفرد الخصل 

"خلت المنتج علي فتره بسيطه بس ماذكر بأي خطوه كانت"

قالت لي اذا تبين الشعر مفرود اكثر عيدي عليه بالستريتنر وغسليه ثاني يوم

انا ماحب الفرد والشعر اللازق بالوجه فماعدت عليه ابدا وغسلت ثاني يوم

ملاحظات:

* التريتمنت ماله اي ريحه

* اذا تبحثين عن شعر مفرود مانصح بالطريقه هذي عندهم اشياء غير

* بعد ماغسلت شعري حسيت الشعر صار اطرى كلملس وفيه لمعه

* اذا نشفت الشعر ماينفش وقل وقت استشواري له

* اقدر انشفه وامشطه واطلع مايكون بيرفكت بس يكون مرتب

* لاحظت شعري من فوق ارتب من نهايه شعري الي فيه "هايلايت" والتريتمنت بين فيه اكثر

* فتح لون شعري وماعجبني ابد فرجعت سويت رينساج بعد فتره 

،

حبيت العلاج مرره واختصر علي وقت كثير ومدته ل٣ شهور تقريبا بس ضروري تستخدمين منتجات مخصصه للكيراتين

لان اذا استخدمتي منتجات عاديه بتشيل العلاج من الشعر وخاصه الي فيه سولفات ، التريتمنت مايطيح الشعر اذا سويتوه عند مكان مختص ومنتج جيد! لان لما سوته لي بعدته عن جذور الشعر فماله علاقه ابد ، للامانه لاحظت شعري فيه شوي تقصف من تحت بعد الصبغ والتريتمنت .. بشكل عام التقصف ماله علاج الا القص برايي وانا بعادتي بعد كل صبغه اقص الاطراف بس اخر مره ماقصيت ولاحظت التقصف.

انا شريت من عندهم منتجات جويل 

شامبو كيراتين (احس عادي ماقدر احكم عليه)

 وماسك استخدمه مره كل اسبوعين (حبيت يعطي ترطيب قوي للشعر)

وسبراي احطه قبل الاستشوار بالعنبر (مره حلوه ريحته ويعطي لمعه للشعر)

عطوني هالمنتجين هديه من ماركه ايت فاكتور عندي منهم من زمان بس احسهم ثقال ع الشعر ويعطون ملمس كانه طبقه ع الشعر

يبيلي ارجع استخدمهم واحكم اكثر

الفيشال للوجه

سويت عندهم فيشال او تنظيف بشره ، انا من زمان اسوي تنظيف بالبيت بس ابداااا مايشبه الي بالعيادات ههههه

لان تنظيف الروؤس السودا يبيلها ضغط قوي وانا بس احس بنقطه الم اوقف بعكس الي تنظف وجهك بتضغط سواء المك او لا ..

انا كنت احس بحبوب تحت بشرتي وابدا مالها راس بس اذا لمست بشرتي احس في شي تحت

قالي دكتوري هذي روؤس بيضا تنشال بالتنظيف ، اخترت تنظيف بشره عادي بعياده جويل سعره 350 بالحدود هذي

بس نصحتني بتنظيف مع تقشير بحدود ال700 فسويته وانبسطت بالنتيجه مررره

اول شي غسلت بشرتي بغسول وبعدين مقشر من قلام قلو "حبيته شكلي بشتريه !!!"

بعدها نظفت بشرتي بالضغط بالاصابع ماقولكم الشعور شلون يعورر هههههه بس الحمدالله ماكان في شي حول الانف او الذقن الا شوي بس ، محد يحس ببشراتكم مثلكم انتم .. انا كنت كل شوي المس بشرتي واقولها احس في شي هنا وهنا وهنا

وهي ساعدتني فيعني لاتسلمون الخيط والمخيط عادي تابعو مع الي تسويلكم عشان تطلعون باحسن نتيجه واذا خلصتو تكونون راضين

بعد التنظيف سوت لي تقشير وحطت ماده ع بشرتي فتره "مدري ليه انسى الخطوات فسوري اذا نسيت شي :("

المهم بعد ماخلصت رطبت بشرتي وسوت لي مساج وبعدين بجهاز ضوئي مشته ع وجهي كاامل اتوقع تسكر المسام

بعد التنظيف حسيت بنظااافه مو طبيعيه ، بس طلعت لي كم حبه بالجبهه اتوقع مع التقشير طلعها 

بس مافرق معاي لان ابي بشرتي تنظف عشان بسوي تقشير باذن الله ففرصه حلوه P:

النعومه الي حسيت فيها شي جممميل وخاصه حول انفي دايم يكون جاف 

النعومه ظلت اسبوعين ونص تقريبا ،، حبيت النتيجه وحبيت الشغل ونفسيتها الحلوه الي تسوي لي التنظيف ♥

جويل اهدولي هالمجموعه خاصه بالبشره واستخدمتها الاسبوع الي طاف بس

ماقدر احكم عليها بس للان عاديه اشوفها ، هي مجموعه عنايه ماتوقع بتحل اي مشكله بمشاكل البشره

بالنهايه ، حبيت التجربه وصرت اروح لهم اذا بغيت خدمه معينه

بس الصالون ماينفع تروحين له اذا تبين تغيرين جو او ريلاكس مع انه هادي ونفسياتهم جدا حلوه

بالنسبه للاسعار اشوفها عاديه جداا جداا مثل اي صالون ثاني 

لازم حجز قبل لاتروحون وهذا رقمهم 

0566881700

مكانهم بالعليا مقابل مكتبه جرير بالسيركون

،

واخيرا حابه اشكر مدام نوف ومدام ليما ومدام نجلا على حسن تعاملهم واستقبالهم اللطيف لي ♥♥

ان شاء الله يكون البوست افادكم وجاوب على تساؤلاتكم

واذا في اي سؤال تفضلو بالكومنتات