سنتين من السعاده + شلون تكونين مدونه ناجحه ؟

السلام عليكم وَ رحمه الله وَ بركاته ♥♥

اخيرررا قررت أكتب البوست وماخفيكم علما ان صارلي اسبوع اكتب وامسح ، اتوقع قريحتي الكتابيه اكل عليها الدهر وشرب *صح كذا :$ *

قبل كم يوم جالسه اشوف بوستاتي القديمه ، السنه الي فاتت كانت البوستات تقريبا ٢٨ بوست بس!

حزنت مره مره حسيت بتقصير تجاه المدونه :(

لان السنه الي قبلها كانو حول ال٨٠ بوست فكان فرق كبير!

بس الي اختلف ان السنه الي فاتت كانت فتره حمل وولاده لي وبيبي واول كم شهر صعب جدا اكيييد فعذرت نفسي ، وان شاءالله الجاي احسن بكثييير .. ♥♥♥♥

جد اشتاق لجو المدونات الي كان بالسنه الي قبل الي فاتت!

كيف كنا كثااار ومتفاعلين مع بعض ودايم في تنافس بالتدوين "اقصد التنافس لما اشوف صديقتي نزلت تدوينه اركض انزل انا بعد" كان شي جمميل جدا ،، وقليل استمرو بالحماس هذا والبعض توجه للانستقرام واحس سحب الجو من المدونات شوي .. كثير اقول لنفسي خليني اكتب بالانستا واخلي البلوق ، بس احس ماينفع! الانستا صعب صعب تبحثين فيه وصعب تحفظين تعبك يعني ممكن فجأه الناس تترك الانستا وكل شي سويتيه يطير بمجرد يحذفون البرنامج من عندهم ، غير هذا الكلام محدود بالانستا وانا من النوع الي احب اقرق ، اكيد عارفين هالشي :$

اتمنى اتمنى التدوين ماتكون هبه وخلاص ..

كثير اتابع مدونات اجانب وعايشه معاهم الجو من بدو التدوين كثار منهم صارلهم ٧ سنين والي ٥ سنين متواصله! وانا اتابعهم طوول هالمده ♥♥♥♥

التدوين صار مهنه للكثير ومصدر دخل ، مافي احلى من انك تشتغل بشي تحبه ، هالنقطه كثيررر من المتابعين مو راضين يفهمونها ..

صح ماوصلنا للي وصلو له الاجانب من احتراف بس هي خطوات صغيره واحس الشركات كل مالها تعتبر المدونات كنز ، استغرب من البنات الي اذا مدونه كتبت ان هالشي وصلي من الشركه الفلانيه تعصب! المفروض تنبسط ان هالبنت تكتب بمصداقيه مو نفس كثااار الي صارت الدعايه والاعلان عندهم تدليس للحقائق ويسوون نفسهم كأنهم مايدرون انه اعلان :|

ليش يعطونكم شي مجاني واحنا لا!

التدوين هي تجارب لناس انتي واثقه فيهم ، فالمفترض انك تنبسطين ان في بنات مستعدات يجربون ويقولون لك هذا ناسبني وهذا فيه كذا وهذا بيناسب البشره الفلانيه .. بالعكس بيوفر عليك كثييير من الفلوس والتجارب الفاشله ، شي طبيعي المدونه ماتقدر تجرب كل كل الي بالسوق فحلو ان الشركات تتواصل معاها بشكل شخصي عشان تجرب منتجاتهم ، انا عن نفسي اذا بشتري شي ببحث عن احد مجربه ومليون بالميه الاغلب نفسي ، المحتوى الاجنبي عاامر بالتجارب والمنتجات عكسنا! احنا صح عندنا تجارب بس للاسف الاغلب كانت بمنتديات واحس المعلومات صارت صعب نوصلها ..

طيب شنو معنى التدوين ؟

التدوين ببساطه شخص يفتح موقع الكتروني خاص فيه ، يشارك الناس تجاربه وانطباعاته وحتى يومياته ، ترا احنا حصرنا فكره التدوين بالتجميل والميك اب ، بالعكس في اجانب كثااار مشهورين لانهم بس يصورون ويسولفون عن يومياتهم او عن الترتيب او التنظيف او الاهتمام بالاطفال وغييييره ، يعني تكتب تجربتك عن اي مجال يهمك انت صرت مدون.

التدوين مايختلف عن المنتديات هي تجارب ناس حبو يشاركون فيها ، بس قبل المنتدى اذا اشتهر يشتهر بالاسم واذا راح المنتدى ينظلم العضو وخلاص ينتهي ، المدونه هو موقع خاص فيك مو مرتبط باي احد ثاني ، فكره التدوين من زمااان عندنا ..

تذكرون السبيسات ؟ طيب الورد بريس ؟ التمبلر ! الفلكر كنت اعتبره مدونه لان البعض يكتب يومياته!

احس الحين صارت بروفشنال اكثر مع البلوقر ..

شلون اكون مدون ناجح ؟

كثرو المدونات بالفتره الاخيره بس قليييل الي استمر ، وقلييل الي نجح ، ماقدر اقول انا مدونه ناجحه صراحه بس الي احب اتابعهم واشوف جديدهم ينعدون ع الاصابع ، هل معناته هم الصح والباقي لا!

بالعكس بس كل شخص ينجذب لاسلوب معين ، ماقدر اقول هذا صح وهذا غلط بس بعطيكم نصائح عامه.

١. الكاريزما

الكاريزما هي قدرتك ع لفت الانتباه وجذب الشخص لكلامك واسلوبك وتأثيرك عليهم ، احس الكاريزما شي بشخصيتك مو مكتسب :|

في بنت باليوتيوب اسمها ذاتس هارت ، مع انها مو جميله مره او كشخه والميك اب حقها يعتبر عادي بس احب احب اتابعها تصرفاتها وطريقه كلامها وهي كيووت مو ممله بالعكس اتونس معاها .. صح كثير احلى واكشخ وخبره بالميك اب والعنايه منها بس هي طلعت فوق ومن القليل الي تعاملت معاها الشركات واصدرت باليت مكياج خاص فيها!

المغزى مو شرط تكونين بيرفكت اهم شي تحبين الي تسوينه ، اذا ماتحسين عندك اسلوب بلفت الانتباه ممكن تعوضين هالشي بطريقه التصوير مثلا! تدورين ع طريقه اي احد يشوف الصوره يدري انها لك ، ممكن تكتبين عن مواضيع جديده محد تطرق لها ، لازم تحصلين شي تبدعين فيه اكثر من غيرك ، هالشي يجي مع الوقت بس لاتيأسين!

٢. التجديد

كثير بلوقرز لما اشوف مدوناتهم احس كل الكلام مكرر ، المشكله عندنا اذا انشهر شي لازم الكلللل يشتريه وانا اولهم هههه! فصار الكل يكتب عن نفس الغرض ونفس الاسلوب وكل شي ، اذا ماعندك شي جديد تكتبين عنه ، ابحثي بين المدونات عن نفس المنتج وحاولي تكتبين شي جديد عنه لاتكررين الكلام بيصر شي ممل!

بدايه انطلاقك بعالم التدوين هو الي بيخليك تنجحين او لا ، فلاتبدين تتكلمين عن اشياء مستهلكه ومليون مره قرينا عنها ، دوري شي جديد لازم تحصلين ..

٣. جوده الصور

احس هالشي جدا جدا مهم ، في كثار بلوقرز يكتبون تجاربهم بس الصور من النت ، اول ماشوف الصوره ع طول اقفل ، شلون اثق بكلام بنت ماعندها المنتج ؟ حتى لو ماتعرفين تصورين ، اهم شي الصوره واضحه وبشكل ممتاز.

اعترف اكثر شي اشيل همه التصوير واخذت وقت طووووويل لحد ماصرت اخذ صور لابأس فيها ، بس الاستمرار والتغيير بالاعدادات والتدريب بيخلي صورك اجمل ، لاتحطين صور من النت ولاتحطين صور مظلمه او تصورين منتج وسخ :(

نظفي المنتج قبل التصوير وحاولي المكان الي تصورين فيه مو حوسه ، حلو تسوين كورنر خاص بالتصوير "هالشي داااايم بسويه بس مافضى له :( " ماقصد بكورنر استديو كامل لا! ممكن اي جزء من تسريحتك او طاولتك وتكون مرتبه واهم اهم شي فيها شمس ، كثاااار لاحظو ان تصويري متحسن هذا لان غيرت مكان مكتبي لمكان فيه شمس ، اصور العصر او الصباح ، افضل شي تصورين الصبح الشمس ماتكون قويه وتعكس ع الاشياء وتخربها ، دايما دوري ع مكان مشمس ، صوري قريب من الدريشه واهتمي بالباك راوند حقك ، انا بسوي لي واحد قريب ان شاء الله وبشاركم الصور.

٤. اسلوبك بالتدوين 

في مرات الاحظ اذا بنت اعجبت بمدونه تقلد كلامها :( شعور حلو تعتبرين احد قدوه بس غلط غلط تقلدين ، اول شي راح يظلمك يعني اي احد بيقرا مدونتك بيقول شوفو نفس اسلوب فلانه ، صعب تنجحين اذا صرت كوبي من شخص اخر ، يمكن البعض يقول طيب انا اتأثر بدون قصد او هذي شخصيتي! صحيح بس انتبهي لنفسك لما تبدين تدوين شوفي كلامك الواقعي كييف وصيري نفسك ، مثال ع ذلك:

اذا كنتي جداويه مثلا بس فجأه وانتي تدونين صرتي تكتبين كلام نجدي فاعرفي انك متأثره بأحد المدونات ، حلو تكونين ع طبيعتك وتتكلمين بالاسلوب الاقرب لقلبك "مادري لو كلامي منطقي بس احس كذا افضل" حتى محد يشبهك بأحد

اعترف "مره اخرى صار هالبوست اعترافات p:" اول مابديت ادون ، مرات صرت اقتبس بالردود من مدونات ثانيه احببببهم ، لاشعوري !! فجأه تداركت الوضع وقلت يابنت ستوب خليك ع طبيعتك ، لما تكونين ع طبيعتك راح تنجحين والحمدالله تداركت الوضع يعني هالمشكله ممكن تمر ع اي احد فلاتخافين.

في بنات كثار يعتقدون اذا كثرتي كلام بيكون افضل فتحصلينها تكتب وتكتب ولما تقرين البوست تشوفين الفايده بسطرين والباقي كلام "مثلي حاليا p: امزح اكيد كلامي كله حكم هههه p: امزح مره ثانيه :( "

فشوفي نفسك اذا انتي من الناس الي تحب تسولف لاتسترسلين بالكلام وخليك بالنقطه نفسها "اعترف اعاني من هالمشكله هههههه بس كثار يحبون هذرتي مع اني دايما اذا خلصت امسح كلام كثيييير :| "

اذا كان البوست ريفيو لمنتج حاولي تشملينه ، في بنات يكتبون قصه حياتهم قبل اي بوست مثلا رحت وجيت وامي عزمت فلانه ومدري شنو "بالنسبه لي" احس حلو نكتب سالفه تخص المنتج وممكن نخلي بوست ثاني للسوالف ، اما تكتبين شي ماله علاقه بالمنتج فأحس مو حلو ، وفي بنات العكس تماما تكتب عن المنتج سطرين وبس!

انا اذا جيت بقرا تجربه احد ، احب اسمع ليه ماعجبه ؟ البعض تكتب المنتج مو حلو ماناسبني مانصحكم فيه ، طيب ليه ؟ شنو سوا لك او شنو اثر عليك شنو ايجابيات وسلبياته ، بكذا راح تكون التجربه مفيده لي كمتابع اما اذا كتبتي ماعجبني المنتج وبس ماعتبر هالبوست مفيد ابدا وممكن افقد ثقتي فيك كمتابعه.

٥. ستايل مدونتك

شكل المدونه مهم صراحه ، اذا ماعندك احد يصمم لك خلي التصميم ابيض واكتبي اسمك فوق ، مو شرط يكون كشخه اهم شي نظيف ومرتب ، اقسام المدونه حلو ترتبينها عشان الي يدخل مدونتك ويبي يبحث يكون كل شي واضح قدامه ، حاولي تبسطين شكل المدونه قدر المستطاع لان بكذا الناس بتلقى نفسها واصله لاخر بوست بدون ماتحس مو تشوفه صعب وتقفل وتظلمين نفسك ، طريقه ترتيب مدونتي كثاااااار يسألوني عنها ، المشكله ناسيه الطريقه ههه !! انا تخصصي برمجه حاسوب فاستخدمت دراستي ببرمجه المدونه الي مسويتها بس لو تقولون شلون اقول مدري :| لان شغل كودات كله ، واعترف "ياليل الاعترافات :| " طفشت شوي من شكل المدونه وودي اغيرها ، غيرت شووي بس مو ببالي شي ثاني فنشوف بالمستقبل شنو يطلع معاي.

٦. الفائده من التدوين

دايما وابدا اقول التدوين هو نقل تجربتك ، عن نفسي لو ابي اشتري منتج معين بدور تجربه بنت نفس مستواي يعني ماروح ادور ميك اب ارتيست واخذ راييه لان مهما كان لهم طريقه باستخدام المنتج ويخلونه يمشي معاهم بس لو بنت نفس عمري مثلا ونفس خبرتي احس تجربتها بتكون اصدق ، مثلا في بنت تحب تستخدم كل منتج للعنايه غالي هذي ماراح تناسب بعض البنات وتناسب ميزانياتهم فراح تدور ريفيو عن منتجات ارخص ، يعني حلو التنوع الي تقدمه لنا المدونات ، المحتوى العربي للأن فقير بالخبرات وغيره ، فأحس هذي وظيفه المدونات يكتبون تجاربهم ، اذكر لما كنت بفتره المراهقه ١١ سنه عمري ، كنت اتمنى احد يقولي سوي كذا واهتمي بنفسك كذا ، مافي احد بعمري ابدااا بعائلتنا ، حتى لو امي ماقصرت معاي بتعلمي بس غير لما تاخذين تجربه احد قريب من عمرك ومجرب هالطريقه بنفسه!

لاتستهينون بقوه المدونات وحبهم لاثراء المحتوى ، حلو نشجع بعض لان بالاول والاخير راح نفيد جيلنا والناس الي بتجي من بعدنا ، وكلمه موجهه للمدونات خلي عندك مبادئ وقيم لاتغرك الشهره ولاتغرك تهافت الشركات عليك ، دايما وابدا تذكري ليش بدأتي تدوين ، اذا بدأتي عشان شهره فاعرفي انها مؤقته لان بس تنشرهين بتفقدين شغفك للتدوين ، اذا ماخذته عشان تجيك اشياء مجانيه "وابدا امزح ان في بنات الله يهديهم يفتحون مدونات ومايكتبون ولا ولا شي بالعكس اول شي يسألوني عنه شلون اخلي الشركات تتعامل معاي؟" طيب اكتبي ودوني واتعبي ع نفسك عشان احد يلاحظك اولا! ولاتخلين هذا هدفك بتفقدين متعه التدوين.

٧. تعاونك مع الشركات

جينا للنقطه الي رافعه ضغط كثير من الناس ههههههه

انا ذكرت بالبدايه المفروض تنبسطين ان احد مرسل منتج لبلوقرز ، لان اذا هم فرغو جزء من وقتهم عشان يساعدونك فانبسطي ان الشركات لاحظتهم وتعتبرهم عنصر مهم بالدعايه والاعلان ، ماخفيكم مرات اشوف احد يعلن عن منتج ويرفع فيه اكثر من قيمته او انه ماااايسسووى بس عشان وصلهم مجاني ، احس ودي اقول للبنت شوهتي مبدأ التدوين :(

بس مرات اقول ممكن صدق هذا رأيها بالمنتج ، وهذي حلاوه المدونات ان لكل بنت تجربه غير عن الثانيه فاذا قريتي تجربه وحده بس ترا مايكفي اقري وابحثي عن تجارب غير لحد ماتتشبعين وتكونين رايك الخاص كبنت رايحه تشتري المنتج.

نصيحه لاي بلوقر ، اهم اهم شي ثقه متابعينك فيك ، لاتخلين الشركات تستخدمك كوسيله اعلانيه وبس!

هم ترا الي يستفيدون اكثر وانتي تخسرين ثقه البنات فيك ، مو عشان المنتج مجاني لازم امدحه ، تكلمي عن رأيك بدون خووووف ، اذكر اول مابديت ادون تواصلت معاي شركه وارسلولي منتجات ماخفيكم اني فرحت جدا جدا مع ان الاشياء تافهه واقدر اشتريها بنفسي بس فكره ان شركه تشوف كلامك ممكن يسوي فرق بين البنات ترا مو شي هين ، فكره ان احد لاحظ تعبك وحب الناس لك شي جممميل ، لما تواصلو معاي وارسلولي المكياج "كانت اول مره اعلن لاحد بحياااتي" جربتها بغيت انجلط كلها تقليد :( وابدا ابد ماحبيتهم وتواصلت معاهم "كان من اصعب القرارات الي اواجهها بالمدونه اني اقول هونت مابي اعلن لكم احس فشله :| " بس بنفس الوقت ماعلن لشي الا اذا مجربته وجد عاجبني وثقه الناس فيني شي مستحيل اتخلى عنه ، ع فكره قلت لهم ارجعو اخذو اغراضكم لانكم قلتو بنرسل منتجات معروفه وطلعت كلها تقليد!

من الشركات الي جدا جدا احترمها ، شركه بينفت ، مو عشان صديقتي الجميله الجوهره ساجر تشتغل فيها "هااي جوجو p:" لا لان جد تعاملهم راقي مع البلوقرز ودايم يتواصلون معانا لاي شي جديد باحترام ، وهم من الشركات القليله الي اذا قلت ترا بكتب تجربتي الصادقه "مايعارضوني" يقولون اكتبي تجربتك سيئه او جيده ، فاحترم فيهم ثقتهم بنفسهم وافتخر انهم يرسلون لي منتجات حتى لو عينات لان احترموني كبلوقر اولا قبل اكون وسيله اعلانيه  ;) 

٨. شلون تشهرين مدونتك!

من الاشياء الي اشهرتني بالبدايه مساعده المدونات لي ، شلون كانو يدعموني ويسوون لي ريتويت هالشي مستحيل انساه لهم ، الحين الدعم قل ، حتى البنات الي يرسلون لي كثااار بس انا نشاطي قل يعني ماطنش احد بس احس حاليا عايشه بقوقعه ويارب ماتدوم لان كرهت هالحاله p:

فمن الممكن تخلين احد يسويلك ريتويت ، بس البعض يكتب لي منشن وخاصه لو بنت مامون عليها يعني سوويلي ريتويت ، اذا انتي ماتمونين ع البنت ممكن تكتبين لها منشن خاص وتقولين عن شنو موضوعك ولو عجبك تسويلك ريتويت بس فجأه اسم البنت مع مليون غيرها بالغالب راح تطنشه لان الموضوع مايخصها بس هي ..

اكتبي عنوان مميز يعبر عن البوست وبنفس الوقت يخلي البنات يتحمسون يفتحون الرابط ، العناوين المبهمه ماتساعد ابد.

انشري البوست بوقت مناسب ، يعني دوري وقت الناس تتفاعل فيه ، مو الفجر لان الاغلب حتى لو صاحي ماله خلق ..

لاتستهنين بقوه الانستا والتويتر واستخدمي هاشتاقات لان تساعد بالنشر "دايما اقول بستخدم وانسى"

اخر نقطه هي الاستمراريه!!

هذي النقطه اوجهها لنفسي اولا لوول!

اذا ابتعدتي لفترات طويله الناس تنساك وماعاد تشتاق للتدوينات ، خليك متواجده اقل شي بالانستا لو ظروفك ماساعدتك تكتبين تدوينه ، دايما حلمي اني احدد يوم معين بالاسبوع اكتب فيه تدوينه واستمر فيه واتمنى احقق هالحلم يارب : (

مبسوطه باليوتبرز العرب مثل دلال الدوب وهدى بيوتي وحصه العميري مو سهل تعرضين نفسك لعالم متنوع فيه الصاحي والمجنون وانواع الاننتقادات بس صراحه استفيد من الفيديوهات اكثر من البلوقز لان ببساطه اشوف طريقه تطبيقه قدامي واقدر احكم هل هالشخص ممكن يناسب ستايلي ويخدمني او لا ، بس احنا كمتجمع وعاداتنا وتقالدينا ماتسمح لنا نعرض نفسنا فنكتفي بالتدوين وان شاء الله نتطور ويصير في برامج تنقل لكم الريحه اقل شي او برنامج تضمنين محد يشوفه الا بنت نفسك ، ترا دايما احلم بالحلم هذا يارب يتحقق هههههههه

،

تقريبا هذا الي ببالي حاليا ، ان شاء الله البوست يفيدكم ويحمسني اولا ويحمسكم ان نكمل تدوين ونكون مرجع لغيرنا والناس تبدأ تتقبل فكره التدوين اكثر ، اهدي هالبوست لمتابعه جميله دايما تكتب لي وتدعمني بكومنتاتها وحابه تبدأ تدوين ماودي اذكر يوزرها بس اكيد عارفه نفسها فشكرا لك ، وشكر ثاني لمتابعتي سميه الي دايما تكتب لي كلام جميل ووعدتها اليوم اخلص التدوينه فشكرا لصبرك علي :$

اشوفكم ع خير.