جرعه الهام لنجاحات متتاليه ، ابحثي عن الهامك هنا | #غيمه_تسعه

السلام عليكم وَ رحمه الله وَ بركاته ♥

البوست اهداء لصديقات السناب شات الي بين لي حبكم وَ شغفكم بمدونتي ، اعتز بحبكم واشكركم على دعمكم المتواصل ولايهونون باقي البنات اكييد بس هناك صرنا صديقات مو بيدي يعني ههههههه.

بالبدايه عندي طبع موحلو ماخلص اي كتاب اشتريه واخزنه عندي ، حاولت احب القراءه بس يصيبني الملل بس هالسنه قررت اغصب نفسي لو ع كتب بسيطه ، القراءه توسع المدارك وتزيد الثقافه وتريح المخ والعيون من اشعه الاجهزه الي محاطين فيها واخذت كل وقتنا للاسف ، كتاب ميشيل فان من الكتب الي شفتها بفيرجن ميقا ستور وهالبنت لها معزه خاصه بقلبي ، غير عن كل اليوتيبورز لانها ببساطه اول يوتيوبر تابعتها بحياتي! 

متخيلين اني قبل ماكنت ادري ان في شي اسمه بيوتي قوروز = بنات يتكلمون عن الميك اب وغيره بالبيوتيوب ، اول مره شفتها كانت ب٢٠٠٧ اتوقع كانت اول سنه لها اذا موغلطانه ، كنت انا وصديقتي بالجامعه بكل البريكات نقعد نتنح ونطالع الفن الي كانت تسويه ، كانت بنت مثلنا كلامها بسيط مثلنا والمنتجات الي تستخدمها مو معقده!

حببتني بالميك اب وبينت لي اني اقدر اطلع اجمل ماعندي ، غيرت بنظرتي بالميك اب وكانت لطيفه ببساطه حبيتها .. اذكر كانت تعطيني شعور حلو اول ماشوفها احسها صديقتي ، ماقدر اقول انها الهمتني اني اصير بلوقر بس ساعدتني بطريقه ما ، لما شفت كتابها جاني احساس غريب قلت لااازم اخذه بشوف صديقتي لوين وصلت هههههه ، مره مره انبسطت بنجاحاتها ماتوقعت توصل لهنا ماشاءالله ، الهمتني وقلت الهمكم بالمقابل!

ميشيل فان بنت اصلها من فيتنام امها وابوها انحاشو من الحرب لامريكا وتعرفو ع بعض هناك وحبو بعض وتزوجو ، جابت امها اخوها الكبير وبعدين هي ، تقول انها تنقلو كثييير لانهم فقراء ودايم اهلها يدورون وظايف احسن ، تقول ماكان عندها اصدقاء لانها تتنقل دايما مايمديها تكون اي صداقه ..

بيوم من الايام ابوها شاف انه مايقدر على مسؤوليتهم وقرر يسافر وقال برجع ، كانت تقول ادري انه ماراح يرجع كان عندي احساس وفعلا مارجع ترك عائلته وسافر ، صارو وحيدين بس بعد فتره امها رجعت تزوجت وجابت بنت بس الزوج ماكان شخص جيد ، اتوقع كان يضربهم او شي كذا لان ماعمرها تكلمت عنه بس تجيب طاريه ..

تطلقت امها واخذت عيالها وقررت تعيش بروحها وتتحمل مسؤوليتهم ، كانت تقول بالثانويه ماعندها اصدقاء لانها حاولت تتشبه ببنات كثار عشان ينعجبون فيها ويصيرون صديقاتها ، بس كل محاولاتها باءت بالفشل ، تقول كنت اشغل نفسي بالرسم والعزف واسوي قصص وارسمهم ، لحد ماصارت باخر سنه ثانوي قررت تكون نفسها وعلى طبيعتها ولاتشبه احد الا نفسها وفعلا صار عندها اصدقاء اخيرا!

حبيت هالجزئيه احس بتهم ناس كثار ، كونو نفسكم لاتشبهون احد الا انتم ولاترضون احد ع حساب نفسكم ، ترتاحون والناس بتحبكم لانكم على حقيقتكم ..

كانت تكتب بمنتديات هههههه ، وترسم وتنزل رسوماتها ونجحت وقتها بشكل كبير ، مثل ماذكرت كانت فقيره وحلمها تدخل كليه الفنون بس ماعندها فلوس .. فصارت امها تشتغل طول اليوم واخوها بوظيفتين وهي اشتغلت كنادله بمطعم كل هذا عشان يجمعون فلوس للجامعه ، جمعت فلوس بس ماكانت كافيه ، كانو ينامون بشقه فاضيه مافيها اثاث ولبسهم بكراتين ، اهلها شافو وضعهم وانصدمو وتبرعو لهم ب١٠ الاف دولار عشان يشترون اثاث ، بس قررت ام ميشيل تعطي الفلوس بنتها عشان تدخلها الجامعه

لما دخلت الجامعه حياتها تغيرت .. اول لابتوب امتلكته كان هديه من جامعتها ، بالاب توب هذا بالذات حققت احلامها! صورت اول فيديو لها :

اذكر هالفيديو كاني شفته امس هههههه ، تقول طول حياتها عايشه مع نفسها وبس انتشر الخبر انها تسوي فيديو ع اليوتيوب بدو الطلاب يضحكون عليها ، كانو الطلاب يطلعون بالبريكات وهي تجلس تشوف قناتها وترد ع الناس وتتفاعل معاهم ، شي محد كان فاهمه من المجتمع حقها ، بعد فتره اضطرت تشتغل عشان تغطي تكاليف الميك اب الي راح تستخدمه بيومياتها ، واشتغلت بمطعم والمفاجآه اليوتيوب بدو يعطونها فلوس!



كل مشاهده باليوتيوب كانت تدخل فلوس ، بالبدايه كانت ٢٠ سينت باليوم يعني مبلغ لايذكر بس لما كثرت المشاهدات كثرت فلوسها انصدمت وقالت بستقيل من شغلي ، الي بالشغل بعد بدو يضحكون عليها يقولون تتركين وظيفه بالوضع الحالي الكل يدورها لان الاقتصاد وقتها مش ولابد عشان فيديوهات يوتيوب!!

كانت بقراره نفسها عارفه الي تسويه صح فثبتت ع قرارها وخلتهم ، تبي تتفرغ لشغفها الجديد "اليوتيوب" ، مرت اشهر وتركيزها كان ع قناتها وشغلها وشلون تطوره ، بيوم من الايام فتحت الرسايل الخاصه ولقت رساله قلبت حياتها! رساله من شركه لانكوم الغنيه عن التعريف ، قالو المدير للشركه يبي يقابلك ، انصدمت وتوقعته مقلب او شي كذا بس اكدو لها انهم الشركه وان المدير معجب بفيديوهاتها وخاصه الفيديو الي سوته وهي بالطياره قاعده بين شخصين وتسجل ههههههه

راحت نيويورك وقابلت مدير الشركه ، طلب منها تكون الميك اب ارتيسيت الرسميه لهم باليوتيوب وتسوي فيديوهات خاصه بلانكوم ، مقابل مبلغ مادي اكيد! من بين كلللل الشركات وكل الماركات لانكوم هي الي اختارتها ، العجيب بالسالفه انها زمان قدمت ع وظيفه تشتغل بكاونتر للانكوم باحد المولات بس رفضوها!! مرت السنين وصارت الميك اب ارتيست الرسميه لهم ، واو!!!!

بعدها الفرص تهافتت عليها والمجلات مثل فوج والسي ان ان وغيرهم سولها مقابلات وقابلت ناس ماتحلم فيهم! سافرت كثييير حول العالم لانها تمثل لانكوم ، اضطرت توقف دراستها وكان قرار صعب! وصارت فيديوهاتها احسن واحسن ، حياتها تغيرت وصارت تسافر وانشغلت كثييير واشتغلت بفاشن شوو مع مايكل كورس بس ماحبت التجربه كان مو مكانها وعرفت انه مايناسبها هالشغل ولو انها كانت فرصه عظيمه ، بعد فتره كلمتها قوقل عشان تسوي شركه انتاج باسمها! سمتها FAWN الهدف من الشركه انها تنتج مقاطع يوتيوب مميزه وتتعاون مع يوتيوبرز من كل مكان وماتكون متخصصه بالميك اب بس ، كانها مجله بس ع شكل فيديو اذا حابين ابسطها ، ونجحت ميشيل ونجحت شركتها ومستمره للان.

مرت الايام وميشيل عندها شركه انتاج وقناه يوتيوب وتشتغل مع لانكوم ، قابلت بيوم شخص لمناقشه تعاون بينهم ، قالت له ابي اسوي خدمه الاشتراك بالبريد للميك اب ، ضحك عليها وقال فكره مجنونه منو يبي يشترك بالبريد عشان يستقبل ميك اب ؟ قالت له لما كنت صغيره المجلات كانو يحطون عينات للعطر او كريم مع المجلات ، هالشي كان يعنيلي الكثيرررر ، قال لها ومنو يبي يدفع لعينات ؟ قالت لما كنت بتايلند كانو بالمحلات يبيعون بوكس فيه منتجات بس صغييره للتجربه لان بتايلند مايصير ترجع المنتج بعد استخدامه بعكس امريكا ، قال لها ومنو يبي عينات وهو يقدر يجرب منتجات ويرجعها ؟ اقنعته ان نسوي هالخدمه بس ماتكون عينات تكون منتجات بس باحجام صغيره مو عينه بكيس بلاستيك او ورقه!

اقتنع بفكرتها المجنونه وانطلقت شركه IPSY والي اصلا قبل اسمها MY GLAM ، فكرتها كل شهر الناس توصل لهم منتجات باحجام صغيره بشكل عشوائي ، حلوه الفكره عشان لو بجرب شي ماخذ الحجم الكبير وابتلش فيه وخاصه عندنا مافي ترجيع للاسف ..

واجهتهم بعض الصعوبات بس ابتكرو افكار وبدت تنجح ميشيل وصارت الخدمه الي تقدمها من انجح الخدمات والشركات ، اذا هذا كله مايكفي بكمل لكم هههههه ، بيوم من الايام لانكوم كلمت ميشيل المدير يبي يقابلها ، ميشيل خافت حست انها بتنطرد من وظيفتها ، بجلسه عشا تكلم معها المدير ومهد لها ان كان من الرائع العمل معها وميشيل كانت تقول لنفسها اذا انطردتي لاتبكين اشكريه وامشي ، قال لها المدير من كثر مو حابينك نبي نسويلك ماركه ميك اب!

واو حلم ماكانت تتجرآ تتحلم فيه لصغر سنها ولصعوبتها بس فعلا كان واقعي ، قال لها مانبيك مع لانكوم لا الماركه بتكون مستقله تحت مظله لوريال اضخم شركه مكياج بالعاااالم ,

شوفو الشركات الي تشتغل تحت لوريال :

http://www.loreal.com/brands/brands-homepage.aspx

مستغربه مو حاطين ماركه ميشيل EM من ضمنهم .. المهم انتجت اول خط مكياج لها سنه ٢٠١٣ وتحقق الحلم ..

ميشيل استلمت شهاده الدكتوراه الفخريه من كليه الفنون وعندها عده شركات ومافي احد فوقها من المدراء يعني هي مديره نفسها ، كانت تقول لصديقه لها ودي اتوظف واخلص من وظيفتي وارجع لبيتي والعب فيديو قيمز واتفرج تي في ، هذا كان اقصى طموح لها زمان ، بس كان عندها امل انها بتنجح بشي ما ، ماكانت تدري شنو لا متى ولا ليش بس كانت تحلم والحلم هو الي وصلها للطريق هذا ،،

ميشيل تشبهني باشياء كثييييره وقصتها الهمتني اني اكمل احقق طموحي ، انا مثلها بمرحله ما ، ماعرف شنو ابي بالضبط بس اعرف اني ابي شي وان عندي طموح اكون احسن ، ابي اشوف نفسي بعد سنه هل انا نفس شيماء الحين ؟ هل انا تغيرت كشخص ؟ وضعي الاجتماعي او المادي تغير ؟ كل هذا مهم ،، اذا مرت سنه وانت مكانك اعرف انك زائد على هذي الحياه ، احزززن احزززن والله اذا شفت بنات حياتهم بس رقص ونوم ومسلسلات وخرابيط ، ميشيل ماعندها ٢٤ ساعه اكثر منكم ! عندها طموح وشغف ، عادي استانسو بحياتكم لاتصيرون معقدين بس خلو بداخلكم دافع انكم تبون التغيير .. احلمو وعيشو ، مافي شي سهل ولا اقول الاحلام تتحقق بسهوله ، الفشل داايمااا وارد بس ع الاقل حاولتي وعلى الاقل فشلتي وطحتي وقمتي وحاربتي!

ليش تحاربين ؟ حاربي عشان اذا صار عمرك ٦٠ سنه تتذكرين انك عشتي حياتك ، جربتي وتجرآتي واتخذتي قرارات وماندمتي ع تضيع وقتك ابداا ، كثير يسالوني شلون نبدا بالتغيير ، شوفو مدونتي تكلمت كثير عن هالموضوع ، وكثيييييير يسالوني ماندري شنو نسوي بحياتنا ولا شنو حلمنا ، لاتسآلوني لان انا اصلا مادري وين رايحه بس ادري اني رايحه لمكان جميل!