ريفيو عن منتجات ميك ابيه رخيصه بس ممتازه ؟ الجزء الاول

السلام عليكم وَ رحمه الله وَ بركاته ♥♥

بتكلم اليوم عن كذا منتج رخيص او منتج درق ستور بس ممتاز!

دايما ابحث عن بدائل تناسب كل الميزانيات ، مثل ماتكلمت عن مكياج غالي اليوم بتكلم عن كذا شي رخيص بس مو معناته مايسوى بالعكس ينافس ماركات كبيره ، الماركات الي بتكلم عنها تصنف درق ستور يعني تنباع بالصيدليات والسوبر ماركتات وغيرهم بالدول الاجنبيه وتعتبر رخيييييصه بس عندنا مطيرين الاسعار الله يهديهم فاذا عجبكم شي من الي ذكرته انصحكم تطلبونه اون لاين افضل.

المنتجات الي بتكلم عنها اليوم هي الاساسيه وبسوي جزء ثاني لباقي المنتجات ان شاءالله

اول شي الفاونديشن:

اذا كنتي تتابعيني بالانستقرام بتعرفين اني مغرمه بالفاونديشن هذا

-الصوره من الانستقرام للتوثيق بس-

فاونديشن لوريال ترو ماتش في منه نوعين تروماتش لومي وتروماتش ذا فاونديشن

بالبدايه الي بالنص اسمه ترو ماتش لومي طلبته من امريكا قبل سنه وكان حلو بس مو الصباح لان يبيله برايمر قبله ودمج مضبوط ومرات يقطع معاي او اذا بشرتي مو اوك يبين عيوبها بس مع هذا اعتبره حلو واستخدمه .. من مميزاته فيه واقي من الشمس بنسبه ٢٠ ودرجته رائعه لبشرتي خاصه بالصيف يعطي تان شوي ، درجتي فيه نيود بيج ، الفينيش حقه فيه لمعه صحيه مو مطفيه ، تغطيته تتحكمين فيها ياتزيدين الطبقات او لا .. بالنسبه لي احط كونسيلر ماكثر طبقات ، بس مثل ماقلت يبيله شغل عشان يطلع حلو عشان كذا مو دايما استخدمه. ،

الثاني جمممميل!! اخذته من سنتر بوينت الكويت توقعت هو نفسه الي بنص الصوره بس عشان طالبته من برا العلبه تختلف ، طلع هذا غير ، هو ترو ماتش اسمه بعد بس يعطي طله طبيعيه جداا .. يناسب شكل ولون البشره ويندمج مضبووط معاه ، تغطيته اثقل من الثاني كانها بشرتك بس افضل ، درجتي فيه بيج كريم بس مايل للوردي شوي يبيلي ادور لون ثاني بس مع هذا حلو وخاصه اذا سويتي كونتور او استخدمتي برونز يوازن اللون ، فيه واقي بنسبه ١٧ ، الي ع اليسار نفسه بس لون عنبر روز ، غامق مايل للاورنج احطه ككوريكتر ع الاماكن الغامقه بالبشره مثل الهالات يوحد اللون بشكل حلو بس لاتكثرون منه ، هالنصيحه اخذتها من حنان النجاده وحابتها 💕 ،

بشكل عام ترو ماتش ذا فاونديشن بالنسبه لبشرتي "مختلطه ومرات جافه وحساسه" افضل بكثييير من اللومي الي بالنص ، كشكل واندماج بالبشره وانصح فيه اكثر ❤️ تحصلونه بسنتر بوينت والمحلات الي تجيب الماركات المتوسطه وسعره ٩٣ريال تقريبا , متخيلين سعرها ببوتس لندن حول ال٤٠ ريال :(؟؟؟؟؟؟؟ 

 

كونسيلر ريفلون كولور ستاي ، عذرا ع الشكل السيئ بس مشكله الماركات الرخيصه بسرعه تتوسخ :|

المهم هذا الكونسيلر مرره ممتاز ولايخطط وفوق هذا تغطيته ممتازه يذكرني بكونسيلر استي لودر دبل وير بالتغطيه

بس هذا ارخص :)) عيبه درجاته محدوده الي عندي ميديوم وحلو مناسبني

سعره ناسيه بس تقريبا ٤٠ ريال

اخذته من بوتس وتحصلونه بسنتربويت بعد

ماسكرا بيق بولد من ماركه ايسادورا ، من الماسكرات الي جربتها وجدااا حبيتها ، كانت توصيه من صديقتي الجوهره بالانستقرام قالت شيوم راح تحبينهاا! وفعلا حبيتها يدي لاشعوري تروح لها اذا جيت بحط ميك اب ، احبها للاستخدام اليومي سوادها حلو وتكثف الرموش بس ماتعكفها مرره او تطولها واذا نظفت عيوني ع طول تنزل بدون لاتقطع رموشي او تبهذلني ، ماركه ايسدورا فتحو عندنا اتوقع بسنتر بوينت انا هذي اخذتها من سنتر بوينت الكويت ، جدا جددا حلوه هالماركه وخاصه المناكير جممميله بس عيبها شووي غاليه ، هالماسكرا بحدود ال٧٠ ريال

ماركه فلورمار التركيه اشتهرت عندنا بكل مكان اشوفها ، ماجذبتني بالبدايه بس شفت روج عند امي منهم وجربته وحبيييته

الروج الي بالصوره لونه اورنج ع احمر شوي ، اول مره اجرب هاللون بالعاده ماتجرآ بس دامه رخيص ماراح اتحسف لو ماعجبني ههههه ، التغطيه عاااليه وثباته متوسط بس الي حبيته كريمي مرره يعني الي شفايفهم ناشفه بيعجبهم هالنوع بالذات ، الوانهم متنوعه انصحكم تمرون عليهم

سعره بحدود ال٤٠ ريال او اقل

تحصلونه بالنخيل مول والرياض قاليري "الي يعرف افرعهم الثانيه يذكرهم"

محدد شفايف من فلورمار بعد ، جددا حلو كريمي وثاااابت لونه لحمي ع بني استخدمته كثير الشتا هذا وفوقه ارواج غامقه مرره حبيته واحلى شي سعره بحدود ال٢٠ ريال!

اخر شي هالبلشر ، لونه جمميل جمميل برونز فيه لمعه بس خفييفه مو اوفر ، الي حلو لونه مو ع برتقالي ، مره حلو للصيف والتان وثباته حلو بعد ، سعره ناسيه بالضبط "كل البوست ماعرف الاسعار مو صحبه مع الارقام ههههه"

ان شاء الله البوست يكون افادكم ♥♥ اشوفكم ببوستات ثانيه ♥♥