سنه من الحب مع ديم ♥ سواليف السنه الي فاتت!

السلام عليكم وَ رحمه الله وَ بركاته ♥♥
مرت سنه على وجود حبيبتي وقطعه من قلبي ديم في حياتي ، سبحان الله شلون الايام تمشي بسرعه ، وشلون شي صغيير ولذييذذذ ممكن يغير حياتك ، بالبوست هذا بيكون سواليف عن شنو صار بالسنه وشنو اهم الاشياء الي مرت علي والمواقف الي علمتني ، بحاول طبعا اختصر البوست لان مثل مو شايفين سويت قسم اسمه ديميات وان شاء الله يكون دايما متجدد.

بتاريخ ١٨ فبراير ٢٠١٤ جبت احلى بنوته للدنيا ، سويت لها استقبال وكان كله شغلي ولليوم تجيني استفسارات عنه ، شعور الانجاز شي جممميل ♥♥

رابط الموضوع للي ماشافه (هنا)

خلصت الاستقبال والدلع لمده ٤٠ يوم عند اهلي ورجعت لبيتي مع كائن لطيف صياح جدا جدا جدددا ،

 ديم معاها غازات بالبطن وهي صغيره وصياحها مايوقف لا ليل ولانهار ، ماكنت اتضايق من صياحها اتضايق لانها تتآلم ، بالبدايه ماتقدرون تحددون مشاعركم لشخص جديد بحياتكم ، كانو يجوني بنات يقولون قورجس متى نحب اطفالنا ؟ مانحس لهم باي مشاعر ، شي طبيعي انك تكونين بحاله انبهار وتوتر وخوف بالبدايه وخاصه البيبي يقوم يشرب ينام ويبكي ، مشاعري اتجاه ديم خوف عليها قبل اي شي ♥

اذكر اول مره تطعمت بعمر الشهرين ياصحت صياح مو حب قد مو خوف ترحمينهم اصلا لانهم نقط ههههههه .. ديم اذا بكت او سوت حركه ع طووول ابحث بقوقل ، ادور واسآل ياكثثثررر مارحت الدكتور وياكثر ماحفظني وحفظو بنتي السسترات ، اي شي جديد ماعرف شنو اروح اوديها للدكتور ، طبيعي جدا وحتى الدكتور اذا عرف انها اول بيبي عذرنا ..

الحياه مع بيبي جديد مسؤوليه وتاخذ وقت وجهد ومافي نوم ولا راحه بس اخر اليوم لما تنام وبيتي يكون نظيف وانجزت شغلي ابتسم ابتسامه من كللل قلبي ، احس اني سوبر ومن ههههه! خاصه لو امك مو قريبه منك تفزع لك كل شوي ، مهما كان عندك اهل واصدقاء محد تمونين عليه مثل الام الله يخليهم لنا.

اصعب شي مثل ماقلت الصيااح والبكى بس لما كبرت بعمر ال٤ شهور تقريبا خف كثيييير الحمدالله وبدت بنتي تفهم تضحك تتفاعل معاي وصرت وقتها عندي اضافه بحياتي ومتعه جديده ، اذكر اكثر شي كان يفيدني موقع (بيبي سينتر) اذا اشتركتي فيه وحطيتي عمر البيبي يحسب لك وكل اسبوع يرسل ايميل عن تطورات البيبي وتبدين تلاحظين طفلك وشلون يكبر وتفاعله معك يصير اكبر واحلى ..

بعمر ال٤ شهور خلصنا من صياح البطن وجينا لصياح الخوف ،، يا ان ديم بهذلتني بهذله هههههه ماتحب الناااس ماتحب احد يشيلها وتصيح صياح لحد مايروح صوتها حرفيااا ، اذكر قعدت شهرين محرومه من الجمعات مازور احد لان الاميره ديم ماتحب ،، بس كان عسل على قلبي♥♥ اهم شي تكون بصحه وكنت عارفه فتره وتعدي وعدت الحمدالله والحين هي اسعد بنوته بالدنيااااا وتحب الناااس وتضحك للكل بدون استثناء واجتماعيه جداا الحمدالله.

اول اكله اكلتها لديمي الجزر المهروس بعمر ٦ شهور ، معاناااه عشان تتقبله بس بديت حبه حبه وللان مرات تعاندني بالاكل بس الحمدالله صارت تتقبل كل شي وتاكله ..

اكثر سؤال مر علي السنه هذي "بنتك صغيره" "ماتوكلينها ماتهتمين فيها" "حرام عليك ليش مهملتها"
الي اعرفه اول شي الناس "اللطيفه" تلاحظه ان بنوتي تحب الضحك وتحب الناس واجتماعيه وصحتها طيبه الحمدالله ، اما الي ينتقدون مقدر اصنفهم لاي شي ، قله ذوق تقولين لام انتي ماتهتمين ببنتك ولاتطالعين فيها احس يطلع من راسي نار وشرار ههههههه !!

اول ماولدتها قالي الدكتور فيها ثقب بالقلب "بسم الله عليها" كنت مو مصدقه ولاحاولت اعطي الموضوع اكبر من حجمه قالي طبيعي مع الاطفال اهم شي تابعي معاها اذا ماسكر بنضطر للعمليه والف حمدالله وشكر سكر من نفسه بعد شهرين اتوقع ، فانا عارفه ان المرض شي صعب ، فكل مره احمد ربي ان بنتي يمكن مو دبدوبه ولها خدود بس بالف صحه وعاااافيييه ، فمدري متى تسكت هالناس والطامه الكبررررى يقولون انتي ماتهتمين فيها ، عايشين معاي ؟ عارفين كم دكتور رحت له ؟ عارفين كم مره غيرت الحليب ؟ عارفين كم وصفه سويت لها ؟ الناس تبي تسولف لاجل تسولف مو اهتمام فيك ولا بنتك ، متأكده بس يطلعون منك نسوك ونسو بنتك ههههه ، الغريب بالامر ان وحده بس تشوفني بنتتتك وبنتتتك وحرام عليك وكليها شربيها خل يصير لها خدود حرااام صغيييره ، وفي مره من المرات تسولف لي تقول واحد من عيالي ضعيييييف كان وماخليت دكتور مارحت له يقول هذا طبيعه جسمه والله كنت اشيل همه وهذا هو الحين كبير مافيه الا العافيه ، يالله يالتناقض .. انتي عشتي نفس تجربتي !!

ماكذب كنت اكره ازور الناس مع ديم عشان ماسمع هالتعليق منهم كل مره .. محد مايبي طفله يكون مرربرب وبصحه وله خدود هذا احلى عمر لهم ، طيب والي بنيتهم كذا خلقه يكرهون عيالهم ؟ عن نفسي كنت البسها كل شي ومبسوطه فيها واعششقها عشق وخاصه لما اشوف المربربين من اطفال عايلتنا نفسيات وديم العصله تحب الضحك والناس والكل يحبها ♥♥♥ هههههه الله ياخذ ويعطي p:

فلكل وحده طفلها نقطه وانتي تهتمين فيها بس مايبين وسويتي كل شي ولافاد والدكتور "اهم شي الدكتور" قال وزنهم طبيعييي .. ماعليك من كلام الناس والله يعقدونك ويسببون لك هاجس وانتي تاكلينها وهم عايشين حياتهم ولافكرو فيهم ، قبل اطنش بس الحين ارد واقول عاجبني جسمها وعاجبني انها تحب الناس وانها جممميله بسم الله عليها وبصحه وعافيه الحمدالله،

 ديمي ماتحب الالعاب ، بس تحب احد يلاعبها ، اخذو من وقتكم شوي والعبو مع اطفالكم استمتعوو بالحياه ، كل مره تكبر بسم الله عليها اقول ياليت سويت وياليت حطيت بس الحين لا كل مرحله معاها لها ذكرى وكل مره تتعلم حركه جديده اوثقها وماخلي مجال للندم ابببد.

كل مره تكبر تبدا تميزني وتفهمني وافهمها كل مره تصيح اعرف ليش ، اميز صيحه الجوعانه من صيحه الطفشانه هههههه ، احاول قد ماقدر اعلمها اشياء جديده وافتح عيونها على العد مثلا او وين عينك ووين خشمك ، صح مو دايما تتفاعل معاي بس احس تعليمها برقبتي واحس التربيه صعبه صعبه بس انا قدها ، الاحظ اذا زرت اهلي يخربون كل شي اسويه لها والنظام الي ممشيتها عليه بالدلع هههههه فالبعد عن الاهل مرات له فايده p: ياحلوهم ♥♥♥

ببيتي ديمي لها جدول ماشيه عليه او اقدر اقول روتين ، افقده كثييير اذا سافرت وتحتاس ونومها يحتاس ، الاستقرار اماان وراحه فعلا ، على حبي للتغيير والتجديد بس مع الاطفال الروتين هو الي يخلي حياتك متوازنه وتعرفين متى تاخذين وقت لك انتي بس تنام ♥

الشور اكثر شي كانت تكرهه والحين تحبه ، لازم يوميا الصباح تاخذ شور عشان تتنشط لليوم وتصحصح وبالبرد فاقده هالنقطه لان صارت كل يومين خوفا من الامراض ، قالولي بتكرهين الشتا بس ماصدقتهم ههههه وللان له معزه بقلبي هالفصل :"(

الالعاب والاجهزه ماحس شريت لها كثير صراحه ، يمكن انا ماشوفه كثير وغيري يشوفه لا مادري! بس اول بيبي ودك تشترين له كل شي وودك تجربين له كل شي! بس في اشياء فادتني واشياء زايده صارت .. يبيلي اكتب لكم بوست عنه.

جدا سعيده بالاضافه الحلوه لحياتي وسعيده اني قدرت اكون قد المسؤوليه رغم تخوفي الكثيير ، طبيعي اول بيبي تخافين من الحياه ، صح حياتي تغيرت والمسؤوليه زادت حتى لو عندي خادمه لازم متابعه وماعتمد عليها بكل شي دايما! بس تصدقون ناسيه حياتي قبل ديم احس اني ام من زمان ههههه ، هل عندكم نفس الشعور ؟

الامومه شي فطري لاتخافون ، الازعاج وقله النوم وقله الطلعات وتقلص الحريه كله يهون اذا شفتوهم يضحكون وبصحه وعافيه .. الله يخليهم لنا ويرزق كل محروم يارب ♥♥♥

ان شاء الله هالبوست بدايه لبوستات مفيده للامهات مستقبلا ، اشوفكم قريب ♥